Marzo

Je xi “barré” tsole ya Mateo 25:31-36 jé tínchja̱ni je chjota xi i̱ Sonʼnde koyale koatio kʼoa xi kʼia tjíobatio nga toje tífikjetʼa nichxin kʼoa tijéni xi kjaʼaí barré ʼmile. Kixi tjíofitʼale je chjotale Cristo xi ya ngʼajmi koai kʼoa tjíobinyakao nga tjíotsoyason je Énle Niná (Mat. 24:14; 28:19, 20). Nga xki̱ nó, jao jan xomana tongini nga kjesa faʼaitsjenyajin Kjoabiyale Cristo, je xi kjaʼaí barré ʼmile binyakao je chjotale Cristo xi ya ngʼajmi koai nga bájinkon chjota nga kʼoati katasíkjaʼaitsjenya nga kui nichxin. Jngo tjíjtsa Sonʼnde bationdale nga xki̱ nó nga síkjaʼaitsjenya Kjoabiyale Cristo. Je xi kjaʼaí barré ʼmile nʼio tsjoa satío kon nga kʼoasʼin tsjoánganʼiole je chjotale Cristo xi ya ngʼajmi koai. Majinle nga joxi jeni Jesús xi tjíobinyakao nga kʼoasʼín (Mat. 25:37-40). w22.01 22 párr. 11, 12

Jé Jeobá chjenngilee kʼianga chjenngiá jokoankjoan je Jesús kʼoa josʼin tsabekon xi kjaʼaí. Tobʼelañá, koanmake jngo chjota xi tífiʼndojon yaole, kisindaya jngo chjoón xi nʼio táo chʼin tjínle nga̱ kisijinle yaole jotjín kon, kʼoa koanmake je xi xínkjín kisicha (Mar. 1:40, 41; 5:25-34; Juan 11:33-35). Kʼianga sa nda sa nda chjenngilee jokjoan je Jeobá ngisaa machriantʼalee. Tsa kjuintjenngiaa je choa̱le Jesús alikui kui kʼoechjoaná jme xi chon sonʼnde nga je Jeobá si̱xálee. Nitje̱n nga tokʼoatjínsa tsakʼejna i̱ Sonʼnde, je Jesús i kitso: “An jekisikinjele sonʼnde” (Juan 16:33). Kui xi kitsonile nga tsín kʼoasʼin kisikjaʼaitsjen kʼoa tsín kʼoakisʼin josʼín je chjota xi tsín je Jeobá síxále. Je Jesús alikui kisichajin nga kui xá jaʼaini i̱ Sonʼnde nga kʼoasjetsje je jaʼaínle Jeobá. Jméni xi sʼiaan ñá. Nkjín koya xi kʼoechjoaná nga tsín tikui nʼio kʼoainilee kjoandosin josʼin tinixálee je Jeobá. Tojo kisʼin je Jesús, tsakui ngisa kʼoailee kjoandosin nga si̱tjosoán jmeni xi mele je Jeobá kʼoati si̱kinjelee je sonʼnde (1 Juan 5:5). w21.04 3, 4 párr. 7, 8

Je Pablo be nga kʼoakitso je Jesús nga sʼe̱le kjoabijnachon ngantsjai ngatsʼi xi koa̱nkjainle xi tʼatsʼe (Juan 3:16; Rom. 6:23). Koankjainle Pablo nga jetsakʼéchjíntjainá je Jesús, kʼoa ñaki kʼoatsakʼé kon nga síchatʼaná je Jeobá tsa kʼoamaniná ninga ai jée kabijnyaa (Sal. 86:5). Je Pablo ñaki kʼoatsakʼé kon nga nʼio tsjoake Niná, nga̱ koankjainle nga je Niná kisikasén ʼNdíle nga kʼienntjai. Nʼio tsjoánganʼioná jmeni xi tso jña tofetʼani Gálatas 2:20 (TNM). Je Pablo i kitso: “ʼNdíle Niná, xi tsjoake koanna kʼoa xi kitsjoa kjoabijnachonle xi totʼatsʼan”. Je Pablo alikui kʼoasʼin kisikjaʼaitsjen nga tsínkʼia tsjoake koa̱n je Niná. Alikui i̱ kitso: “ʼBeña nga tsjoake Jeobá je ndsʼe, tonga alikuila kʼia tsjoake koa̱nna an”. Tosaa i̱ kitsole je chjotale Cristo xi Roma tsʼe: “Cristo kʼen xi tʼatsaan, kʼia nga tojo chjotajée nía” (Rom. 5:8). Je Niná tsjoakená ngantsjai. Je Pablo ñaki kʼoatsakʼé kon nga tsjoakená je Niná. Koanjinle nga nʼio tsejta koan je Jeobá xi kao chjota israelita. w21.04 22 párr. 8-10

Kuinyakoaa je xi Biblia tiʼmiyalee nga tsjoake katama Jeobá. Koaan chʼa̱sjeʼaa nichxin nga chja̱kaonajmíñá jokjoan je Jeobá. Kʼoakʼuínlee nga je Jeobá jngoo Niná xi tsjoa tjínle kʼoa tíjnanda ngantsjai nga basenkao je xi tsjoake (1 Tim. 1:11; Heb. 11:6). Kʼoakʼuínlee nga kjoanda tsʼeni tsa sitjoson jmeni xi kjimajinle nga tíkotʼaya je Biblia, kʼoa kʼuínyalee nga kʼoasʼin tíbakóni Jeobá nga tsjoake (Is. 48:17, 18). Kʼianga sa tsjoake sa tsjoake koa̱n Jeobá je chjota xi tiʼmiyalee ngisaa koa̱nmele sikʼantjaiya yaole. Kʼianga koa̱n koaisʼenngindá nkjín koya jmeni xi sikatío. Tobʼelañá, tsín koa̱n nga tosi tonda je simiyo chjota xi tsín be xi tʼatsʼe Jeobá. Kʼoa tsakui nichxin sikjin je xi xínkjín mani. Je Jesús kʼoakitso nga je Jeobá sichikontʼain je xi chjotatjenngile Cristo koa̱n, kʼoa nga nʼio nkjín koa̱nni xi jo familiale sʼin skoe̱kon (Mar. 10:29, 30). w21.06 4 párr. 8, 9

Je pastro Pablo kui kisingósonkao je xá xi nʼia nga chjotatjenngile Cristo nikoaa je chjota kao nga tsojmintje sʼentje kʼoa nga tsín tokui xi machjén nga to sʼentje je na̱xi̱n kʼoa tsa tocho. I kitsole je chjotale Cristo xi Corinto tsʼe: “An tsakʼentje, Apolos tsakʼéjtenngile nandá, [...] kʼoa jonnío ʼndele jña nga síxá Niná” (1 Cor. 3:6-9). Kʼianga nixá ya ʼnde “jña nga síxá Niná”, ali tsa to bʼentjejián, kʼoati basenndálee kʼoa kuenta nʼia nga jebiso je na̱xi̱n. ʼYañá nga je Niná xi síkinngʼa. Nʼio tse kjoanda tjínná nga ʼmiyasoán kʼoa nga Biblia ʼmiyalee je chjota. Nʼio tsjoa báya tokoán xá jebi. Je pastro Pablo nʼio nkjín chjota xi Tesalónica tsʼe tsakasenkao nga chjotatjenngile Cristo koan. I kitso: “Jméni xi tichoyalaijin. Jmé kjoatsjoa xi sʼe̱najin. Jmé korona xi ska̱ningʼanajin. A tsí tsa kui nga jon xi kuinyao ngixko̱n Nainá Jesucristo nga kjoaʼaíni. Jon nío xi kjoajeyanajin kao kjoatsjoanajin” (1 Tes. 2:19, 20; Hech. 17:1-4). w21.07 3 párr. 5; 7 párr. 17

Jé Jeobá xi kʼoasʼin koanmele nga koanchriantʼalee (Juan 6:44). Si̱kjaʼaitsjenla, ninga millón mani chjota tjín jngo tjíjtsa Sonʼnde, je Jeobá tsabe jotjín ni̱ma̱ná kʼoa tsabe nga koa̱n tsjoacha koaan (1 Crón. 28:9). Nʼio nda bexkonná je Jeobá, majinle jotjín tokoán kʼoa tsjoakená. Nʼio nda bʼé tokoán nga kʼoasʼín je Jeobá. Je Jeobá nʼio tsjoakená nga jngó jngoá. Nga koa̱njinná xi tʼatsʼe jebi, je Jesús kui choa̱ kisichjén tʼatsʼe josʼín jngo xi barré koʼnda. Jósʼin tsa 100 mani je barréle kʼoa tsa jngo jcha. A tsí sikatío je xi 99 nga koaikásjai je xi kacha. Kʼoa nga jekoa̱nsjaile alikuijin koa̱njtile, tosajin tsjoa sʼe̱ kon. Jebi kui bakóyaná nga nʼio chjí be je Jeobá nga jngó jngó je choʼndale. I kitso je Jesús: “Likui mele Nʼaino xi tíjna ya ngʼajmi nga cha̱ jngo xi je ʼndíxtibi” (Mat. 18:12-14). w21.06 20 párr. 1, 2

Kʼianga nikjaʼaitsjenjiaan nga tsínkʼia fetʼa je kjoatsjoachale Jeobá ngisaa tsjoacha maa kʼoa ngisaa machriantʼalee (Rom. 8:38, 39). Basenkaoná nga chjenngilee Jesús (1 Ped. 2:21). Jao jan nichxin tongini nga kjesa faʼaitsjenyajin Kjoabiyale Cristo bʼexkiañá je Biblia tʼatsʼe jmeni xi kisʼin Jesús nga kjesa biyajin kʼoa nga jejaʼáyanile. Je kjoanokjoaya xi faʼa nga faʼaitsjenya Kjoabiyale Cristo kui síkjaʼaitsjenjinná jokji tsjoakená je Jesús (Efes. 5:2; 1 Juan 3:16). Nga bʼexkiaa jme xi kisʼin kʼoa nga nikjaʼaitsjenjiaan basenkaoná nga mangíntjenngiaa je choa̱le (1 Juan 2:6). Kʼoa tosi tonda tsjoake maná Niná (Jud. 20, 21). Nga bʼenelee yaoná nga nitjosonlee Niná, nga chʼasjetsjee jaʼaínle kʼoa nga fayatsjoaa ni̱ma̱le tosi tonda tsjoake maná (Prov. 27:11; Mat. 6:9; 1 Juan 5:3). Nga mangían nga faʼaitsjenya Kjoabiyale Cristo basenkaoná nga kʼoanʼia josʼin mele je Jeobá nga nyaon nyaon kʼoa kʼoasʼin bakonilee nga mená nga miyole koaan ngantsjai nichxin. w22.01 23 párr. 17; 25 párr. 18, 19

Je Jeobá tsjoáná kjoandái nga koa̱n chjoéjiaan jme xi mená sʼiaan. Nga kui kjoanda jebi tjínná koaan ñá chjoéjiaan jmeni xi mená sʼiaan. Je Niná nʼio tsjoa sʼe kon kʼianga kui chjoejiaan nga je nixálee (Sal. 84:11; Prov. 27:11). Nkjín koya jmeni xi koa̱n sʼiaan nga nda si̱chjén je kjoandái xi tjínná. Je Jesús jé xi ngikʼa títjon kuenta kisʼin, kʼoa ñá kʼoati koa̱n kʼoasʼiaan. Ñandia nga nʼio kijtale Jesús kao chjotatjenngile, tsakásjai jngo ʼnde jña koa̱n sikjáya. Tonga tsínni koan kisikjáya, nga̱ nʼio nkjín chjota xi jeya tjíokoyale nga kicho, xi koanmele kinrʼoé xi tʼatsʼe. Je Jesús alikui koanjtile, tosaa koanmake je chjota kʼoa tsakakóyale xi tʼatsʼe Niná (Mar. 6:30-34). Jé Jeobá chʼasjengʼaa nga chjenngilee je Jesús kʼianga nikʼayaa nichxinná kao nganʼioná nga binyakoaa xi kjaʼaí (Mat. 5:14-16). w21.08 3 párr. 7, 8

Kjaʼaí kjaʼaí kjoan jmeni xi kisinda je Jeobá, jolani ñá xi chjota. Kjaʼaí kjaʼaí nʼia nga jngó jngoá, kuinga tsín ʼya xi síngósonkaoniná je Jeobá. Je xi kuenta sʼín Niná kui jotjín je ni̱ma̱ná (1 Sam. 16:7). Be jmeni xi nʼio nda maná kʼoanʼia kʼoa kʼoati be jmeni xi ñʼai maná, kʼoa be josʼin koanjchíngaa. Je Jeobá alikui tsʼato kʼoakji síjéná jmeni xi koa̱nná kʼoasʼiaan. Machjén nga chjénngilee josʼín je Jeobá kʼoa kʼoasʼin jchatokoán yaoná josʼin bená je. Tsa kʼoasʼiaan, nʼio ndasʼin si̱kjaʼaitsjeen, likui ngisa ngʼa kʼoa likui ngisa nangi chʼa̱sjee yaoná (Rom. 12:3). Tjínkʼa xi nʼio nda choa̱ batíoná. Tobʼelañá, koaan chjénngilee je ndsʼee xi nʼio nda male tsoyason (Heb. 13:7). Kui xi koasenkaoná nga kʼoati koa̱nná nda kʼuínyasoán (Filip. 3:17). Ndatjín kʼianga chjenngilee jñani nda sʼín xi ngikʼa. Tonga xi tsín ndatjín kuinga yaoná si̱ngósonkoaa, tsa kʼoasʼin si̱kjaʼaitsjeen nga ngisa nda nʼia kʼoa tsa kʼoasʼin si̱kjaʼaitsjeenje̱ nga ngisa chʼao nʼia. w21.07 20 párr. 1, 2

Tsa si̱kjaʼaitsjenjiaan tʼatsʼe cho̱, tʼatsʼe xka̱ kao tʼatsʼe niño, ngisaa sʼe̱jngo tokoán nga tíjna je xi kisinda ngayeje jebi (Sal. 19:1). Nga sa tse sa tse chótʼayasoán xi tʼatsʼe jebi, ngisaa sʼe̱jngo tokoán nga je Jeobá kisinda. Kʼianga chótʼayajiaan tʼatsʼe jmeni xi koannda, kuenta sʼiaan jmeni xi bakóyaná tʼatsʼe xi kisindaná (Rom. 1:20). Tobʼelañá, je Tsʼuí ali tsa to síʼisenjin kʼoa ali tsa to sísjejin i̱ Sonʼnde nga koa̱n sʼe̱ kjoabijnachon, kʼoati bʼasje je lʼí xi síkiʼaonná. Jngo ntjao̱ kijnajtsa Sonʼnde xi ozono ʼmi xi basenkaoná nga tsín josíkaoná je lʼí jebi, kʼoa nga nʼio sje ma lʼí jebi, kʼoati matse je ntjao̱ xi kijnajtsa Sonʼnde nga ma bʼéchjoale. A tsíkui jebi xi bakóná nga tíjna je Niná xi tsakʼénda Sonʼnde kʼoa nga nʼio tsjoakená. w21.08 17 párr. 9, 10

Kʼianga jngo chjota fisʼenngindá tjínnele nga tosi tonda tsjoacha koaan kʼoa koakolee kjoaxkóntokon (1 Juan 4:20). Tobʼelañá, tsa tsín sa̱sénná jmeni xi sʼin, alikui koa̱n kʼoasʼin si̱kjaʼaitsjeen nga toxá kasʼínni kʼoa tsakuije̱ nga to yaole fini, tosa koakolee kjoaxkóntokon kʼoa kʼoasʼin si̱kjaʼaitsjeen nga ngisa ngʼa tíjna tikʼoajinni ñá (Rom. 12:10; Filip. 2:3). Koakolee kjoamatokon ngatsʼi chjota kʼoa ndʼé si̱koaa. Kʼiatsa mená nga ya kuiyojinlee je familiale Niná ngantsjai, tjínnele kʼoasʼin kjuinkoaa yaoná jotso je Biblia. Tobʼelañá, je Jesús kʼoakitso nga tjínnele koakolee kjoamatokon ngatsʼi chjota kʼoa nga ndʼé si̱koaa, saʼnda je xi jtikená (Luc. 6:32-36). Kʼiatsa ñʼai maná nga nitjosoán jebi, machjén nga kʼoasʼin si̱kjaʼaitsjeen kʼoa kʼoasʼiaan jokisʼin je Jesús. Kʼianga nitjosonlee Jeobá jokji tjen kʼoamaná kʼoa nga mangíntjenngiaa je choa̱le Jesús, kʼoasʼin bakoñá nga mená ya kuiyojinlee je familiale Niná ngantsjai. w21.08 6 párr. 14, 15

Tsa je Jeobá si̱nʼiotʼaa kʼoa tsa kʼoénelee yaoná nga kʼoasʼin si̱xálee jokji tjen kʼoakoa̱nná, je Jeobá kʼoatso nga nʼio tse kjoanichikontʼain tsjoáná. Ya Biblia nkjín choa̱ faʼaitʼa tʼatsʼe chjota xi tsakʼénele yaole nga kʼoakji kisixále Niná jokji tjen kʼoakoanle. Nʼio nkjín chjota jebi xi títjonkjoanla tsakakó nga je Jeobá kisinʼiotʼa, kʼoa je Jeobá nʼio tse kjoanichikontʼain kitsjoale nga kʼoakisʼin. Tobʼelañá, je Jeobá kʼiaa kisichikontʼain je Abrahán kʼianga jekitjo naxinandále ningalani tsín be jñani koai (Heb. 11:8). Kʼoa je Jacob kʼiaa koanchikontʼain kʼianga jekisitajakao jngo ánkje (Gén. 32:24-30). Kʼoa nga jekjoaʼasʼen ya ʼNde jña tsakʼinle nga kʼoaile je chjota israelita, je naxinandá kʼiaa saʼnda koan jaʼatojin je xo̱ngá Jordán kʼianga títjonkjoanla je naʼmi tsakinyajin je nandá (Jos. 3:14-16). Kʼoati koa̱n chjénngilee je choʼndale Niná xi tjío nichxin xi tiyoaa ndʼaibi xi je Jeobá tjíosínʼiotʼa kʼoa xi tjíobásjaile josʼin nga ngisa nda tjíosíxále. w21.08 28-30 párr. 12-14

Je ndsʼee xi jekoanjchínga be josʼin koanxá nichxin kjoatse, tonga kʼoati be nga toxá tíbʼantjaiyajinni josʼin kjimaxá ndʼaibi, kʼoa nga nʼio chjíle nga kʼoasʼin kjuintjenngiaa jotso je naxinandále Niná. Je ndsʼee xi jejchínga xi chriansʼa kisʼenngindá kʼoati nʼio tsjoánganʼio. Je ndsʼee xi sʼa xti nʼio kuinyakao nga kjuinrʼoéle jmeni xi kʼoeyanajmíle je ndsʼee xi jekoanjchínga. Kʼiatsa kʼuínyalai je ndsʼee xi sʼa xti jokji kjoafaʼaitsjen tjínli, nʼio tse kjoanichikontʼain tsjoáli je Jeobá (Luc. 6:38). Kʼiatsa je ndsʼee xi jekoanjchínga simiyo je xi sʼa xti tsjoánganʼiongañále xínkjín (Rom. 1:12). Je ndsʼee xi jekoanjchínga nʼio tse kjoachjine tjínle kʼoa nʼio tse kjoafaʼaitsjen tjínle. Kʼoa je ndsʼee xi sʼa xti tsee nganʼio tjínle. Kʼianga binyakaongañá xínkjín je ndsʼee xi sʼa xti kao je ndsʼee xi jekoanjchínga, jé Jeobá bʼasjengʼa kʼoa nʼio ndasʼin biyoaa ngatsʼiaa ya jinjtín. w21.09 8 párr. 3; 13 párr. 17, 18

Kuinga kisatengini kjoafaʼaitsjenle chjota judío nga̱ kʼoasʼin kisikjaʼaitsjen nga tsín bakinle nga kʼoasi̱kao je Mesías, nga̱ jé chjota xi tse jée bajngi kʼoa xi nʼio chʼao sʼín xi bakinle nga yá sʼetʼa (Deut. 21:22, 23). Je chjota judío xi tsakʼasjengi je Jesús alikui koankjainle xi tʼatsʼe, ningalani tsabe nga tsín jme jée tsakajngi je Jesús, nga to énndiso kisʼene kʼoa nga totaon tsaʼya. Xi ijngosani, alikui ndasʼin kisʼendajinle kjoa je Jesús. Je chjota xi tsakʼéndajinle kjoa tokjoaxátíya xi kisʼin kʼoa alikui kjoatéxoma kitjenngi (Luc. 22:54; Juan 18:24). ʼNdele nga koasjaiya jokjoantjínni kjoa, je chjota jebi tosaa “tsakásjai én xi koainenile Jesús, jméni nga sikʼensíni” (Mat. 26:59; Mar. 14:55-64). Kʼoa kʼianga jejaʼáyanile Jesús, je chjota xi tsakʼéndajinle kjoa tsakʼéchjíle je sondado romano xi kisikuinda tsjó jñani kisʼeñe je Jesús ánni nga tsín kuitsoyakixisíni anni nga tokjitiani je tsjó (Mat. 28:11-15). w21.05 11 párr. 12, 13

Je Jeobá ngotjo koa̱nnile kjoaʼaxin xi chʼaotjín i̱ Sonʼnde. Tonga tsejta kjima. Nga ya Adán kitjenñá chjotajée maa ngatsʼiaa. Ninga kʼoalani, je Jeobá nʼio tsjoakená kʼoa síkuindaná, kʼoa kʼoatso nga kjoaʼaxin ngayeje xi chʼaotjín (1 Juan 4:19). Jetíjnachoa̱le nichxin nga kjoaʼaxin jmeni xi kjoañʼai síkjaʼá je xtile. Nga tsjoakená je Jeobá chókjoajinná je kjoa xi bitjatojiaan tojotjín tse kjoaʼato. Jé Jeobá xi ngisa tíkale. Kʼoa je Jesús kʼoati kiskale nga̱ yaa kiskenngile je Jeobá. Kʼianga tsakʼejna i̱ Sonʼnde kiskale kʼianga totsakʼin tomanile, nga totaon tsaʼya kʼoa nga yá kisʼetʼa (Heb. 12:2, 3). Nga kale je Nʼaile kʼoati kui xi tsakasenkao je Jesús nga kiskale jme xi koantʼain. Kʼoa je choa̱le kʼoati kui xi koasenkaoná tsanda ñá nga ska̱ná. w21.07 12, 13 párr. 15-17

Nyaon nyaon bakóná kjoamatokon je Jeobá (Sal. 103:10-14). Kʼoati kisʼin je Jesús, kisichatʼale je chjotatjenngile kʼoa tsakakóle kjoamatokon ningalani chjotajée koan. Saʼnda kʼienntjainá nga koa̱n jchatʼa je jéená (1 Juan 2:1, 2). Ngisaa tsjoacha maa je ndsʼee kʼianga nichatʼalee (Efes. 4:32). Sakʼoa ñʼai maná nga nichatʼalee xíngiaa, tonga tjínnele nga kʼoasʼiaan. Jngo tichjaa xi nʼio tsakasenkao nga tsakʼéxkia je revista La Atalaya jñani i̱ tso xi jaʼaitʼa: “Perdónense liberalmente unos a otros”. Je tichjaa itso: “Revista jebi kui tsoya nga tsín tsakuijin xi tsonile nga sasénná josʼín jngo chjota kʼianga nichatʼalee kʼoa tsa tsín kuenta nʼiaje̱ nga ʼya xi síkiʼaonná. Kʼianga nichatʼalee xíngiaa alikui bʼengijtiaa tokoán, kʼoa nga kʼoanʼia nda sʼe tokoán”. Kʼianga nichatʼalee je ndsʼee kʼoasʼin bakoñá nga tsjoachaa, kʼoa jé Jeobá chjenngilee nga kʼoanʼia. w21.09 23 párr. 15, 16

Je Jesús nʼio tsjoake koan je Énle Niná kao jme xi tjínndajinle. Kʼoasʼin kikao yaole jotso je Énle Niná kʼoa kitsoyale xi kjaʼaí (Juan 18:37). Je xi ñaki chjotatjenngile Cristo koan kʼoati nʼio tsjoake koan je Énle Niná (Juan 4:23). Je pastro Pedro kʼoakitso nga je chjotale Cristo kui ndiaa xi kixi tjíomaya (2 Ped. 2:2). Je chjotale Cristo xi títjon tsakatio nʼio tsjoake koan je Énle Niná kʼoa tsínkui kitjenngi jotso je religión, josʼín kʼoa jme costumbre xi tjínle, kʼoa tsínkui kitjenngi je kjoafaʼaitsjen xi kontra tjíole je Énle Niná (Col. 2:8). Tikʼoasʼinni ndʼaibi, je xi ñaki chjotatjenngile Cristo ma bʼénele yaole nga sítjoson jotso je Énle Niná (3 Juan 3, 4). Yaa Énle Niná bʼangini jmeni xi makjainle kʼoa kʼoasʼin fikao yaole jotso je Énle Jeobá. Je testigole Jeobá alikui kʼoatso nga majin tsjetsjele jmeni xi tso je Biblia. Tjín jmeni xi skanni síkixiyanda josʼin majinle tsakai jmeni xi tso Biblia kʼoa tsakuije̱ josʼin tjínnele sʼendajin ya jinjtín. w21.10 21 párr. 11, 12

Nichxin kjoatse, je xjáo xi kisʼendai naxinandá kui tsakinyakao je chjota nga tsín ya kichokʼetʼale je kontrale. Tikʼoasʼinni, nga bakóná xi ñaki kjoatsjoacha je Jeobá basenkaoná nga tsínkui kʼoasʼiaan jmeni xi chʼaosʼin sikʼéjnaná ngixko̱n. Xi ijngosani, kʼianga bakóná xi ñaki kjoatsjoacha je Jeobá kui xi mele nga koa̱nchriantʼalee (Jer. 31:3). Ijngosa choa̱ kisichjén David tʼatsʼe josʼin síkuinda Jeobá je naxinandále. I kitso: “Je Niná yaa mangóson jngo ʼnde jñani ma batejnangʼiánngia, je Niná xi bakóna xi ñaki kjoatsjoacha”. “Jéní xi bakóna xi ñaki kjoatsjoacha kʼoa xi tsjoánganʼiona, jñani ma batejnangʼiánngia kʼoa xi bʼasjentjaina, jéní xi basenchjoana kʼoa jé xi síkuindana” (Sal. 59:17; 144:2). Ánni nga kui kisingósonkaoni je David jngo xjáo taja kao jñani ma bijnangʼiánngiaa kʼianga bakóná xi ñaki kjoatsjoacha je Jeobá. Kuinga tojñani tiyoaa, jé Jeobá koasenkaoná nga tsín jme xi koa̱nná kʼoa nga tosi tonda nda kuiyoaa ngixko̱n nga choʼndale maa. w21.11 6 párr. 14, 15

Ñandia nga tjíoya chitso je Jesús kao chjotale jngo ntjao̱xkón jaʼajin ndáchikon. Kʼiaa kʼoakitsole Jesús je chjotale nga machjén nga ngisasa sʼe̱le kjoamakjain (Mat. 8:23-26). Nga nʼio jaʼa ntjao̱xkón, jaʼasʼen nandá je chitso kʼoa je Jesús tíkijnafe. Nga nʼio kitsokjon je chjotale kisikjaʼále kʼoa kʼoakitsole nga katabasenkao. Kʼoa je Jesús ngasin nganda i̱ kitsole: “Ánni nga bijkonsínio, chjotaxʼin xi choa makjainno”. Tsakui nichxin ñʼai tjín kjoa tibitjatojin xi totʼatsʼe nga kjoaxkón kichoneli kʼoa tsakuije̱ nga táo chʼin tíbʼetʼali kʼoa tsín tiʼyani jme xi sʼiain. Tsakui nichxin nikjáojin, tonga ali bʼaiʼndejin nga kui sikinjeli nga tsín tije Jeobá si̱nʼiotʼani. Tʼeyanajmílai Jeobá jotjín tokuin. Xi koasenkaoli nga nʼio sʼe̱jna kjoamakjainli, kuinga si̱kjaʼaitsjenjin josʼin tsakasenkaoli Jeobá nichxin xi tífaʼato (Sal. 77:11). Ñaki kʼoatʼai tokuin nga tsínkʼia tsjiónkonli je Jeobá. w21.11 22 párr. 7, 10

Tsakui nichxin tjínkʼa xi kʼoakuitso nga tsín koa̱n skoé jmeni xi tsín tsa tsʼe. Tonga ali tsa tokuijin xi tínchja̱ni i̱bi. Tobʼelañá, tsa jngo chjota xi tsojmi baténa tsín nda kʼoechoya jmeni xi baténa, tísíchénile je chjota xi tsojmi bichókatse. Ya Levítico 19:13 kʼoatso nga tsín koa̱n xíngiaa chʼa̱nachalee, kʼoati kui tínchja̱ni nga tsín koa̱n si̱chélee xíngiaa nga tsojmi batenaa. Tísíchéni jngo chjota kʼiatsa tsín kixi jme xi tísʼín nga baténa tsojmi. Je xi mani jin kjoatéxoma kʼoatso nga tsín koa̱n si̱ché, kʼoa jmeni xi tso ya Levítico koasenkaoná nga si̱kjaʼaitsjenjiaan josʼin be Jeobá kʼianga nichésoán kʼoa tsa tsín kixi jmeni xi nʼia. Si̱kjaʼaitsjenjiaan jebi: “Nga kʼoatso ya Levítico 19:11-13, a machjén nga sindaya yaona josʼian nga tsojmi batena kʼoa tsa kʼianga sixá”. w21.12 9, 10 párr. 6-8

Kʼianga kʼoétsʼoalee je Jeobá kʼoakʼuínlee jñani tsín nda kanʼia kʼoa kʼoakʼuínlee nga katasíchatʼaná. Kʼoa tsa ai jée kabijnyaa, kʼoéyanajmílee je xi chjotajchínga sʼin tjío. Je xi chjotajchínga sʼin tjío kjuinrʼoéná kʼoa ngasin nganda tsjoáná kjoafaʼaitsjen xi ya Biblia yʼangini. Xi ijngosani, kʼoétsʼoaa kʼoa si̱jélee je Jeobá nga katasíchatʼaná xi totʼatsʼe nga tsakʼéchjíntjainá je Jesús ánni nga nda kuiyo ijngokʼañá ngixko̱n Niná (Sant. 5:14-16). Tsa si̱kjaʼaitsjenjiaan nga tsakʼéchjíntjainá je Jesús, tsakui nichxin kʼoati aon koa̱nná jokji kjoañʼai tsakjaʼá. Kʼianga chotʼayá, koaan kui chótʼayajiaan nga tsakʼéchjíntjainá je Jesús. Tsa kʼoasʼiaan, ngisasa tsjoacha koaan je Jeobá kao Jesús. Kʼoa kʼianga mangián nga xki̱ nó nga faʼaitsjenya je kjoabiyale kʼoa nga kʼoaʼmilee xi kjaʼaí nga kʼoati katafi, sa chjí sa chjí jchatokoán nga tsakʼéchjíntjainá je Jesús. Kui kjoanda títsjoáná je Jeobá nga ʼmiyalee xi kjaʼaí chjota tʼatsʼe ʼNdíle. w21.04 18, 19 párr. 13-16

Si̱kjaʼaitsjenla jokisʼin je Jesús kʼianga jngo jtín chjota kichokonle jñani tíjna jngo nindo. Nga tsʼajndale nitje̱n nga tíbʼétsʼoa je Jesús jejin kijtale nga kʼia. Tonga nga tsabe chjota jebi koanmake je xi ma̱ kʼoa xi chʼin tjínle. Ali tsa tokisindayajin chjota jebi, kʼoati kitsjoanganʼiole jmeni xi kitsoya je Jesús nga kui nichxin, kʼoa saʼnda ndʼai nʼio ʼyale jmeni xi kitso je Jesús nga kʼia (Luc. 6:12-20). Je Jesús kisikʼayale nichxin je xi kjaʼaí. Si̱kjaʼaitsjenjinla jebi: nʼiojin ba kisʼe kon je Jesús nga tokʼia kisʼejinle nga kinikʼien je Juan Bautista, xi miyole mani. Je Biblia itso: “Kʼia nga kinrʼoé Jesús, kitʼaxinni yabe. Kiya jngo chitso, ki ya ʼndetʼaxintʼa” (Mat. 14:10-13). Tonga nʼio nkjín chjota jetjíokoyale kʼianga kicho (Mar. 6:31-33). Je Jesús koanjinle nga machjénle chjota jebi nga kjuinrʼoé xi tʼatsʼe Niná kʼoa kuinga tsakasenkaoni (Luc. 9:10, 11). w22.02 21 párr. 4, 6

Jméni xi sʼiaan tsa bele tokoán nga jngo xíngiaa kinikiʼoaan kjoafaʼaitsjenle. Je Jeobá kʼoétsʼoalee kʼoa si̱jélee nganʼio nga katabasenkaoná nga cho̱banda ijngokʼañá kao xíngiaa. Kʼoati tjínnele si̱kjaʼaitsjenjiaan tsa jñani machjén nga si̱ndayaa yaoná. Tobʼelañá, koaan si̱kjaʼaitsjenjiaan jebi: “A tijnandaña nga an kjuísijéle kjoanichatʼa, a koakoña kjoanangitokon kʼoa a kui xi mena nga cho̱banda ijngokʼanijin. Jósʼe̱ kon je Jeobá kao Jesús tsa an títjon kjuísijéle kjoanichatʼa je ndsʼe kao tichja nga nda cho̱banijin”. Tsa kʼoasʼiaan, koakoñá nga tinoʼyalee je Jesús kʼoa koa̱nmená si̱jélee kjoanichatʼa je ndsʼee. Kʼiatsa mená kʼoéndajiaan je kjoa xi tjínná kao jngo ndsʼee, machjén nga nangitokon koaan (Efes. 4:2, 3). Koaan kjuinchja̱kaonajmiá nga̱ kui xi mená nga nda katasʼe kon kʼoa nga nda cho̱ba ngindiañá. Kuenta sʼiaan nga kui xi ngisa chjíle nga ndasʼin cho̱ba ngindiañá kao je ndsʼee ʼndele nga tokui cho̱bayañá ʼyáni xi kisʼele jée kʼoa ʼyáni xi mai (1 Cor. 6:7). w21.12 25, 26 párr. 13-16

Nʼio ba kisʼe kon je Jesús nga̱ be nga nkjín chjota xi ya tsʼe Jerusalén xi tsín koa̱nkjainle xi tʼatsʼe Chjotaxále Niná. Kʼoa be nga kuinga ni̱kjesonni naxinandá, kʼoa je chjota xi kuinje̱ngile yaole si̱katíonʼio (Luc. 21:20-24). Kʼoakoan jokitso Jesús, nʼio nkjín chjota xi tsín koankjainle xi tʼatsʼe. Kʼiatsa tochoa chjota nrʼoéli nga ʼmiyasuin je Énle Niná, jméni xi bakóyali nga kʼoasʼin kiskiʼndá je Jesús. Kuinga tsjoake Jeobá je chjota kʼoa nʼio mandosinle xi tʼatsʼe. “Kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Ped. 3:9). Kʼianga ʼmiyasonlee je chjota, kʼoasʼin bakoñá nga tsjoachaa nga̱ kui xi mená nga katamakjainle jotso je Énle Niná (Mat. 22:39). w22.01 16 párr. 10-12

Nga si̱kjaʼaitsjenjiaan josʼin basenkao Jeobá je naxinandále kʼoa josʼin basenkaoná nga jngó jngoá ngisaa nʼio sʼe̱jna kjoamakjainná, tonga xi ngisa chjíle kuinga ngisa tsjoacha maa je Jeobá. Nga tsjoachaa je Jeobá nitjosonlee, bʼenelee yaoná nga kʼoanʼia josʼin mele kʼoa chókjoajinná je kjoa xi bitjatojiaan (Mat. 22:37-39; 1 Cor. 13:4, 7; 1 Juan 5:3). Kui xi ngisasa chjíle nga miyoná mani je Jeobá (Sal. 63:1-7). Kʼoasʼin ʼyaxkónñá je Jeobá nga bʼetsʼoalee, nga chotʼayá kʼoa nga nikjaʼaitsjenjiaan jmeni xi tso Énle. Chjénngilee jokisʼin je Jesús, kʼoa kjoásjeʼndee nga chja̱kaonajmiá je Jeobá. Alikui kʼoaiʼndee nga jme xi katasísiná. Kʼoa nga kui xále Niná kʼoatinʼia kʼoakʼuínlee je Jeobá nga katabasenkaoná nga tsínla jme xi katasísiná. Tsa ndasʼin si̱chjén je nichxinná ndʼaibi, sichikontʼainná je Jeobá kʼoa kuiyoñá ngantsjai nichxin kʼianga jeʼndenaxó koa̱n Sonʼnde (Mar. 4:24). w22.01 30, 31 párr. 18-20

Jmeni xi nʼia yaa nroani josʼin nikjaʼaitsjeen. Je Jesús kʼoakitso nga tsín koa̱n kui si̱kjaʼaitsjeen jmeni xi jée ska̱nijinná (Mat. 5:21, 22, 28, 29). Tokjoan chja̱ʼaxinlee yaoná kʼianga kui faʼaitsjenná xi chʼaotjín, nga̱ kui xi mená nga ndasʼin kuiyoaa ngixko̱n Jeobá. Je Jesús kʼoakitso nga je xi bitjoni ndsoʼbaa yaa ni̱ma̱ná nroajinni (Mat. 15:18). Jotso én xi nokjoaa kui bakó jotjín kjoafaʼaitsjenná. Si̱kjaʼaitsjenjinla jebi: “A ñaki énkixi nchja ngantsjai ninga kʼia nga tsín skénndiaana. Kʼoa tsa jechixan, a sikuindaña yaona nga tsín kjaʼaí chjota si sikoa. A tsínkʼia nga énchi̱nga̱ nchja. A ngasin nganda fakoa ʼyani xi síjtina”. Machjén nga nda si̱kjaʼaitsjenjiaan jebi. Tsa chja̱ʼaxinlee yaoná je éntsʼen, énndiso kao énchi̱nga̱, kui xi koasenkaoná nga tsín tikʼoakoa̱nkjoanñá jokjoaan ngasʼa. w22.03 5 párr. 12-14

Jngo chjota xi toxá síjéni kjoafaʼaitsjen ʼndele nga to skóya nga kui kʼoaile, ngisaa mankjín kon kʼoa ngisaa nda kjoéjin jmeni xi sʼín. Kuinga machjénsíni nga tosa ñá si̱jé kjoafaʼaitsjen. Kʼiáni nga koa̱n si̱jélee kjoafaʼaitsjen tsa ʼyani ya jinjtín. Kataʼyala kʼa: Xi títjon, tsa jngo tichjaa kʼoakuitsole jngo xi nda tsoyason nga katafikao nga tsjoále estudio jngo chjota, kʼoa xijema skónangile nga kʼoakatatsole jñani machjén nga sindaya yaole. Xi majaoni, tsa jngo tichjaa xi sʼa xti kʼoakuitsole jngo tichjaa xi jetjínle kjoafaʼaitsjen tsa ndakjoan pantalón xi mele koatse. Xi majanni, tsa jngo ndsʼee xi tosʼa kʼoakao títjonle nga tsjoá kjoanokjoaya ya jinjtín, kʼoakuitsole je ndsʼee xi jetjínle kjoafaʼaitsjen nga katanrʼoéle ánni nga kʼoakuitsonile josʼin nga ngisa nda tsjoá je kjoanokjoaya. Kʼoati ndatjín nga sijé kjoafaʼaitsjen xi jekjoatse tsjoá kjoanokjoaya kʼoa sitjoson jmeni xi kʼuínle (Prov. 19:20). w22.02 13 párr. 15-17

Je Jeobá kʼoakjoán tisʼin bakó nga tsjoakená jokisikao je ʼNdíle kʼianga tsakʼejna i̱ Sonʼnde (Juan 5:20). Tsakasenkao nga ndasʼin katabʼejna ngixko̱n, nga nda katasʼe kon kʼoa kitsjoale jme xi koanchjénle. Kʼoa kʼoakitsole nga tsjoake kʼoa nga ndasʼin tíjna ngixko̱n (Mat. 3:16, 17). Alikuikʼia nga toje tíjna koanle je Jesús, nga̱ be nga je Nʼaile tísíkuinda kʼoa nga nʼio tsjoake. Joni je Jesús, ʼyañá ngatsʼiaa nga tsjoakená je Jeobá. Si̱kjaʼaitsjenla jebi: jé Jeobá xi koanmele nga i̱ tiyojiaan naxinandále. Tojngo familia maa kao je ndsʼee, tsjoachañá xíngiaa, jtín sʼin tiyoaa kʼoa tsjoa tjío tokoán, kʼoa binyakaoná je ndsʼee kʼianga nganʼio machjénná (Juan 6:44). Je Jeobá kʼoati kjitʼa kjitʼa basenkaoná nga nʼio sa̱tío je kjoamakjainná kʼoa tsjoáná jmeni xi machjénná nga nyaon nyaon (Mat. 6:31, 32). Kʼianga nikjaʼaitsjenjiaan nga nʼio tsjoakená je Jeobá kʼoati ngisa tsjoacha maa tsanda ñá. w21.09 22 párr. 8, 9

Jókjoaan ngasʼa nga kjesa chotʼayajián je Énle Niná. Tjínjinkʼa xi tsín timeniná nga kui si̱kjaʼaitsjeen. Tsakui nichxin kui kʼoakinʼia kʼoa kʼoasʼin kinikjaʼaitsjeen josʼin síkjaʼaitsjen chjota. Nga kʼoakinʼia alikui jme kjoachoya kisʼená kʼoa tʼaxin tsakiyolee Niná (Efes. 2:12). Tonga kʼianga jekichotʼayá koanjinná nga nʼio tsjoakená Niná. Koanjinná nga tjínnele si̱kʼantjaiyaa yaoná kʼoa josʼin nikjaʼaitsjeen tsa mená nga ndasʼin kuiyoaa ngixko̱n kʼoa tsa mená nga ya kuiyojinlee je naxinandále. Tsaʼyañá nga tjínnele kʼoasʼin kjuinkoaa yaoná jotso je kjoatéxomale Niná (Efes. 5:3-5). Nga Nʼainá mani Jeobá kʼoa nga je kisindaná tjínle ʼnde nga je kʼoakuitsoná josʼiaan. Kʼoa je xi mele koaisʼenngindá kʼoatsole nga katafaʼáxinle yaole je “ni̱ma̱ xi jchínga kao kjoa xi kisʼin”. w22.03 2 párr. 1-3

Je xi kjaʼaí barré ʼmile, tsjoa satío kon nga bichó nga faʼaitsjenya Kjoabiyale Cristo kʼoa nga síkjaʼaitsjenjin je kjoachoya xi tjínle. Nrʼoé je kjoanokjoaya xi faʼa nga̱ kui ngisa nchja̱ni josʼin koatio chjota xi kixi koaitʼale Niná je xi jngo jmi nó koatexoma Jesús kao xi 144,000 mani. Je Jesús kao xi ya koatexomakao ʼndenaxó sikao Sonʼnde, kʼoa chjotatsje koa̱n ijngokʼa je chjota. Je xi bichó nga faʼaitsjenya Kjoabiyale Cristo nʼiojin tsjoa satío kon nga síkjaʼaitsjenjin josʼin kuitjoson je én xi tongini kinokjoa, jolani Isaías 35:5, 6; 65:21-23 kao Apocalipsis 21:3, 4. Nga síkjaʼaitsjenjin nga skoe̱ ijngokʼani je xínkjín xi jekʼien kui xi binyakao nga tosi tonda je Niná síxále (Mat. 24:13; Gál. 6:9). w22.01 21 párr. 5-7

Kʼianga kʼienntjainá je Jesús kʼoasʼin tsakʼéchjíni jmeni xi kisicha je Adán (1 Cor. 15:22). Ánni machjénni nga kʼoasʼin koanchjíntjé. Kuinga kʼoatso je kjoatéxomale Jeobá nga tjínnele kjoabijnachon kʼoaingajaoni tsa kjoabijnachon kicha (Éx. 21:23, 24). Nga chjotatsje koan tsakai je Adán kʼoati machjén nga chjotatsje xi kʼoechjíntjainá. Kuinga koanchjénni nga je Jesús kitsjoa kjoabijnachonle nga̱ kʼoati chjotatsje tsanda je (Rom. 5:17). Nga kʼoakisʼin, Nʼaile mani ngantsjai xi makjainle nga je tsakʼéchjíntjainá (Is. 9:6; Rom. 3:23, 24). Je Jesús kitsjoaa kjoabijnachonle nga̱ nʼio tsjoake je Nʼaile kʼoa kʼoati nʼio tsjoakená tsanda ñá (Juan 14:31; 15:13). Kʼoati kui kjoatsjoacha xokisikao nga kixi kitʼanile Niná saʼnda nga kʼien kʼoa kisitjoson josʼin mele je Nʼaile. Nga kʼienntjainá je Jesús, kʼoasʼin kuitjosonni jmeni xi tjínndajinle je Jeobá saʼnda ngasʼa xi tʼatsʼe chjota kao tʼatsʼe Sonʼnde. w21.04 14 párr. 2, 3