Abril

Nga kʼienntjainá Jesús tsakakó nga tsjoakená (Juan 15:13). Ningalani tsín koa̱n josʼin kʼoaingajaoñá jokji kjoatsjoacha tsakakóná, kʼoasʼin kʼoainilee kjoanda josʼin koanngínkoaa yaoná (Col. 3:15). Xi totʼatsʼe nga tsakʼéchjíntjainá je Jesús koaan koai ya ngʼajmi je chjotale Cristo xi ya tjínle kjoachoya, kuinga nʼio chjí beni kjoanda jebi (Mat. 20:28). Nga makjainle nga kʼienntjainá je Jesús, je Jeobá chjotakixi sʼin bekon kʼoa xtile tsole (Rom. 5:1; 8:15-17, 23). Je xi kjaʼaí barré ʼmile kʼoati bechjí nga kʼienntjainá Jesús, kʼoa nga makjainle xi tʼatsʼe kjoabʼechjíntjai koaan nda koatio ngixko̱n Niná, kʼoa koaan kjoaʼatojin tjínkon nga kjoaʼaí kjoañʼai xi nʼio tse (Apoc. 7:13-15). Je chjotale Cristo xi ya ngʼajmi koai kao xi i̱ Sonʼnde koyale koatio, fi nga xki̱ nó nga faʼaitsjenya Kjoabiyale Cristo nga̱ kʼoasʼin bakóni nga tsjoá kjoanda nga tsakʼéchjíntjainá Jesús. w22.01 23 párr. 14, 15

Ningalani tse kjoañʼai tsakjaʼá je Jesús nga kinikʼien ali tsakuijin xi ngisa aon koanle, je xi ngisa aon koanle kuinga kui jée kisʼene nga tsín tsakakóle kjoaxkóntokon je Niná (Mat. 26:64-66). Je Jesús nʼio aon koanle nga kʼoatsakʼinle kʼoa kui xi koanmele nga tsín katatsjoáʼnde je Nʼaile nga tosi tonda kui jée sʼe̱ne (Mat. 26:38, 39, 42). Kʼianga yá kʼientʼa je Jesús jé chjota judío kisikatíondái tʼatsʼe jée xi kisʼene (Gál. 3:10). Kuinga jée kisʼeneni nga kʼoakitso nga sitjoson je kjoatéxomale Niná, tonga tsínni kʼoakisʼin. Kʼoa kʼoati ya koanjngokao je jée xi tsakajngi Adán (Rom. 5:12). Je kjoatéxomale Niná kʼoatso nga tjínnele kinikʼien jngo chjota xi tse jée tsakajngi. Kʼoa kʼianga jenikʼien, tjínkʼa xi yá kisʼetʼa (Deut. 21:22, 23; 27:26). Kʼianga yá kisʼetʼa je Jesús nga kinikʼien, tse kjoanda kisokole je chjota judío. w21.04 16 párr. 5, 6

Cha̱niyala jkoaa jokoan nga tokʼoatjínsa tsakʼejna je Jesús i̱ Sonʼnde. Je sondado romano totaon tsabe (Mat. 26:52-54; Juan 18:3; 19:1). Je nʼó xi tsakichon ñaki tsakʼasjekaya yaole. Kʼoa xijekoan, jngo yá xi nʼio ai kinikásonxja. Je Jesús yaa kichokao yá jebi saʼnda jñani kinikʼien. Kʼoa je sondado romano kjoanʼio kisʼinle jngo chjota nga tsakʼakao je yá xi kjisonxja je Jesús (Mat. 27:32, TNM). Kʼianga jekichokao yá je Jesús jñani ni̱kʼien, je chjota xó tsakinyá ntsja kao ndso̱ko̱ kʼianga tsakátʼa je yá, kʼoa ngisaa tikitsiʼaonngáni je Jesús nga yá kisʼetʼa. Je chjota judío totsabesin kʼianga kjitʼa je yá, tonga je miyole kʼoa kao na̱le tjíokjiʼndá (Luc. 23:32-38, TNM; Juan 19:25, TNM). Nkjín hora nga kʼoasʼin kisʼetʼa yá je Jesús. Je ni̱ma̱le tsín tikichokjoanile kʼoa chaan tsín tinanda koan kiskenjtani. Nga be kʼianga kixi kitʼale je Jeobá tsakʼétsʼoale, kʼoa xijekoan kʼien (Mar. 15:37; Luc. 23:46; Juan 10:18, TNM; 19:30). Nʼio tse kjoañʼai kinikjaʼá je Jesús nga kinikʼien. w21.04 16 párr. 4

Je Jesús jao koya tjínni xi tsakʼéndajin kao chjotatjenngile, je kjoa xi kisʼendajin chjotse kao kjoa xi kisʼendajin xi tʼatsʼe Chjotaxále Niná (Luc. 22:20, 28-30). Nga kʼoakisʼin Jesús, kʼiaa saʼnda kitjoʼndenile je pastrole kao xi ngikʼa chjotale Cristo xi ya tjínle kjoachoya ya ngʼajmi nga rey kʼoa naʼmi koa̱n (Apoc. 5:10; 14:1). Je chjotale Cristo xi ya ngʼajmi koai, yaa tjíojin je kjoasʼendajin xi kitso Jesús kʼoa tojé xi ma ʼbi je vino kʼoa kjen je nioxtila. Je xi ya ngʼajmi koai kui kjoanda tsjoále Jeobá nga tsín tikʼia kuiyáni. Yaa koatexomakao Jesús je xi 144,000 mani kʼoa yaa kuinya ngixko̱n Jeobá (1 Cor. 15:51-53; 1 Juan 3:2). Je chjotale Cristo xi ya ngʼajmi koai be nga tjínnele kixi koaitʼale Niná josaʼnda nga kuiyá (2 Tim. 4:7, 8). w22.01 20, 21 párr. 4, 5

Kʼianga kitsjentjenbʼatʼa yá je Jesús, jao chjotaché xi kʼoati kitsjentjenbʼatʼa yá (Luc. 23:40, 41). Jngo xi i̱ kitsole: “Jesús, tikjaʼaitsjennái kʼianga jekoatexomai” (Luc. 23:42, TNM). Je Jesús be nga nʼio tjínle kjoamatokon je Nʼaile, kuinga kitsjoanile kjoachoya chjota jebi kʼianga kjesa biyajin (Sal. 103:8; Heb. 1:3). Je Jeobá síchatʼaná kʼoa bakóná kjoamatokon kʼiatsa kʼoama kjoaixininá jñani chʼao kanʼia kʼoa tsa makjainná nga tsakʼéchjíntjainá je Jesús (1 Juan 1:7). Tonga jméni xi sʼiaan tsa ñʼai maná nga makjainná kʼianga síchatʼa je Jeobá. Si̱kjaʼaitsjenjinla jebi: kʼianga tojeme kuiyá, je Jesús tsakakóle kjoamatokon jngo chjotaché xi tokʼiakjoan koankjainle. Jebi kui bakóyaná nga ngisa bakóle Jeobá kjoamatokon je choʼndale xi kixi fitʼale (Sal. 51:1; 1 Juan 2:1, 2). w21.04 9 párr. 5, 6

Nga kixi koan je Jesús saʼnda nga kinikʼien nkjín koya xi kitjosonle. Xi títjon, kuinga tsakʼéjnatsen nga ndiso je Na̱i, kʼoa nga koa̱n kixi koaitʼale Niná jngo chjota xi ñaki tsje kʼoa xi ñaki kixi ningalani tojme xi sikao je Na̱i. Xi majaoni, nga tsakʼéchjíntjainá je Jesús, koaan ndasʼin kuiyoaa ngixko̱n Niná kʼoa koaan kuiyoaa ngantsjai nichxin. Kʼoa xi majanni, je Jesús kisitoánntjai nga toje Jeobá xi tiʼndele koatexoma kʼoa nga ndasʼin kʼoaxki̱ je jaʼaínle Nʼaile. Kʼoasʼin kjuinkoaa yaoná nga nyaon nyaon joni tsa tokʼiasa tiʼndená nga kixi kjuintʼalee je Niná. Ningalani nʼio xkón jetiyoaa, koaan i̱ kʼuínlee je Jeobá: “Tibʼenele yaona jokji tjen kʼoakjimana nga kixi tifitʼale kʼoa nga tibakoa nga ndiso je Na̱i kʼoa nga toji xi bakinli koatexomai”. w21.04 12 párr. 13, 14

Je Jesús énndiso kisʼene kʼoa kui jée kisʼene jmeni xi tsín kʼoakisʼin. Kʼoa je chjotakontrale totaon tsabe, totsabesin kʼoa yá tsakátʼa. Kʼianga kjinʼio ntsja kao ndso̱ko̱ je Jesús, kʼoa ninga jetsín tinanda ma kjenjtani, nʼio tjínle kjoandosin jmeni xi kitso. Nʼio tse xi bakóyaná jmeni xi kitso je Jesús kʼianga tojeme kuiyá. Kui síkjaʼaitsjenjinná nga tjínnele si̱chatʼalee xíngiaa, kʼoa nga ñaki kʼoakʼoé tokoán nga sichatʼaná je Jeobá. Nʼio nkjín ndsʼee xi kuinyakaoná kʼianga nganʼio koa̱nchjénná. Tonga machjén nga ñá si̱jélee nganʼio je ndsʼee kʼianga nganʼio koa̱nchjénná. ʼYañá kʼianga je Jeobá koasenkaoná nga chókjoajinná tojme kjoa xi kuitjátojiaan. Nʼio tjínle kjoandosin nga kʼoasʼin kjuinkoaa yaoná nga nyaon nyaon joni tsa tokʼiasa tiʼndená nga koakoá nga kixi kjuintʼalee je Niná. Kʼoa ñaki kʼoatjío tokoán nga sikjaʼáyaniná je Jeobá kʼiatsa kuiyálañá. w21.04 8 párr. 1; 13 párr. 17

Tsa kjuintjenngiaa je choa̱le Jesús sʼeená kjoabijnachon xi tsínkʼia fetʼa. Kʼianga kui kiskonangile Jesús jngo ti xi nyiná jméni xi sʼin nga so̱kole kjoabijnachon xi tsínkʼia fetʼa, kʼoakitsole nga chjotatjenngile katama (Mat. 19:16-21). Je Jesús i kitsole je chjota judío xi tsín koankjainle nga je xi Cristo ma: “Je barréna [...] fitjenngina. An tsjoale kjoabijnachon ngantsjai” (Juan 10:24-29). Makjainná xi tʼatsʼe Jesús kʼianga nitjosoán jmeni xi kitso kʼoa nga chjenngiá jmeni xi kisʼin. Tsa kʼoasʼiaan, tosi tonda ya kuitsomayaa je ndiaa xi kuichokaoná nga sʼe̱ná kjoabijnachon xi tsínkʼia fetʼa (Mat. 7:14). Nga koa̱n kjuintjenngiaa je choa̱le Jesús machjén nga títjonkjoanla kataʼyaxkoaan. Kʼiatsa mená nga jchaxkoaan je Jesús machjén nga sa nda sa nda jchaa jokjoan, josʼin síkjaʼaitsjen kʼoa jotso kjoatéxomale. Ni jekjoatse kʼoa ni chriansʼa tichotʼayá je Énle Niná, machjén nga tosi tonda jchaxkoaan je Jeobá kao ʼNdíle. w21.04 4 párr. 9, 10

Sakʼoajin tsín nda kisʼe kon je Pablo jmeni xi kisʼin ngasʼa. Kʼoakitso nga je xi ngisasa tse jée tsakajngi (1 Tim. 1:15). Nga kjesa chjotale Cristo majin, nʼio kitjenngike je chjotale Cristo, totaon tsabe, tjínkʼa xi ndoyá kisikatíoʼya kʼoa saʼnda kitsjoanganʼio nga kinikʼien kʼa (Hech. 26:10, 11). Si̱kjaʼaitsjenla jókisʼe kon je Pablo kʼiatsa tsabexkon nga koanskanni je tile chjotale Cristo xi kʼoakinikao. Tonga kʼoati koanjinle nga tsín tikoa̱n sikʼantjaiyani jmeni xi kisʼin ngasʼa. Ñaki kʼoatsakʼé kon nga je kʼienntjai Cristo, kʼoa i kitso: “Kao kjoandale Niná kʼoakjoan jo kjoan” (1 Cor. 15:3, 10). Jebi kui bakóyaná nga tjínnele kʼoéjngoaa tokoán nga ñá kʼienntjainá je Jesús, kʼoa nga kʼoakisʼin koaan miyole Jeobá koaan (Hech. 3:19). Je xi kuenta sʼín Niná kui jmeni xi tinʼia ndʼaibi kʼoa jmeni xi sʼiaan nichxin xi sʼa nroa, ali tsakuijin bʼéjinkon jñani tsín nda kinʼia ngasʼa (Is. 1:18). w21.04 23 párr. 11

Ningalani nʼio nkjín chjota judío xi tsakatio nga nichxinle Jesús xi tsínkui kiskoyale nga kuiyá je Mesías, kataʼyala jotso je én xi tongini kinokjoa xi tʼatsʼe. Itso: “Kitsjoaa kjoabijnachonle nga kinikʼien, yaa koanxki̱kao chjotajée; jé tsakʼa je jéele chjota kʼoa kinchja̱ntjai chjotajée” (Is. 53:12). Kuinga tsín tjínnenile kisatengi tsakai je kjoafaʼaitsjenle chjota judío nga kʼoasʼin kʼien je Jesús joni tsa jngo chjota xi nʼio tse jée tsakajngi. Je xi koasenkaoná nga tsín kʼoakoaan tsanda ñá, kuinga kjoásjaiyaa jokjoantjínni kjoa. Kʼianga kitsoya je Jesús ya jngo sonnindo, kʼoakitso nga tjínkʼa chjota xi énndiso kuinchja̱ kʼoa xi jée koane je chjotatjenngile (Mat. 5:11). Tonga ngayeje énndiso jebi tʼatsʼe Na̱i nroani. Jé Na̱i xosʼín nga énndiso kaníbason je chjota xi jtike je choʼndale Niná (Apoc. 12:9, 10). Alikui énndiso si̱siaan kʼoa alikui kʼoaiʼndee nga kui katasíkʼajen kjoamakjainná. w21.05 11 párr. 14; 12 párr. 16

Kuisenkoaa je xi tiʼmiyalee Biblia nga je Jeobá katasínʼiotʼa. Je Jesús kʼoakitsole je chjotatjenngile nga tsjoake je Jeobá kʼoa nga koasenkao (Mat. 10:19, 20, 29, 30). Kʼoakʼuínlee je xi ʼmiyalee Biblia nga kʼoati je Jeobá koasenkao. Kʼianga ñatjen kʼoétsʼoaa, si̱jélee je Jeobá nga katabasenkao nga katabichótjenngi jme xi tíbʼéndajin. Je Franciszek, xi Polonia tsʼe, itso: “Kʼianga tsakʼétsʼoa je xi kitsoyana Biblia, nkjín kʼa kisikʼaxki̱ jmeni xi mena sʼian. Nga tsaʼbe nga kinrʼoéle Jeobá, kʼoati tsakʼetsʼoa tsanda an. Tsaʼbeña josʼin tsakasenkaona Jeobá nga kisijékjoa jñani sixá kʼianga koan kia kjoajtín kao kjoajtíntse”. Kʼiatsa tsín ʼya xi Biblia tiʼmiyalee, koaan kuisenkoaa je xi tjíokotʼaya nga koa̱n koaisʼenngindá. Koaan kjuinkoaa je ndsʼee kʼianga fitsoyale Biblia je chjota. Je Jeobá nʼio mandosinle xi tʼatsʼe chjota xi Biblia tjíokotʼaya, kʼoa nʼio tsjoakená kʼoa chjí be jmeni xi nʼia nga ʼmiyalee Biblia je chjota (Is. 52:7). w21.06 7 párr. 17, 18

Kʼianga ntsjaintsjai kʼoéxkiaa je Énle Niná kʼoasʼin koakoñá nga chjí ʼyatokoán. Machjén nga ndakjoán kʼoéndajiaan nga kʼoéxkiaa kʼoa nga chótʼayá je Biblia, alikui koa̱n nga tokʼia kʼoéxkiaa nga koa̱nʼaná. Tsa kjitʼa kʼoéxkiaa je Biblia nʼio sʼe̱jna je kjoamakjainná. Je chjotachjine xi tjín alikui jña bʼangini jmeni xi makjainle, tonga je xi makjainná ñá yaa chʼangiñá jotso je Énle Niná (Mat. 11:25, 26). Nga Biblia chotʼayá, ʼyañá ánni nga sa chʼao sa chʼao kjimachonni sonʼnde, kʼoa ʼyañá josʼin kʼoendajin Jeobá kjoa jebi. Kuinga ñaki kʼoakʼoéñá tokoán nga sa nʼio sa nʼio katasʼejna kjoamakjainná, kʼoa jokji tjen kʼoakoa̱nná kuinyakoaa je chjota nga katamakjainle xi tʼatsʼe Niná (1 Tim. 2:3, 4). Kao kjoatsjoa chóyalee nga kjoaʼaí je nichxin nga toje Jeobá kʼoasjengʼa ngatsʼi xi koatio i̱ Sonʼnde kʼoa nga kʼoakuitso jotso ya Apocalipsis 4:11, nga tso: “Bakinli [Jeobá] nga ji katjitjojeyai, [...] nga ji kinindai ngayije tsojmi”. w21.08 19 párr. 18-20

Nga je síkuindaná xi chjotajchínga sʼin tjío, jé kjinele nga tsjoále kjoafaʼaitsjen ʼyani xi machjénle. Tjínnele nga kui kjoafaʼaitsjen tsjoá xi kuinyakao xíngiaa kʼoa xi tsjoa koaya ni̱ma̱le (Prov. 27:9). Je xi chjotajchínga sʼin tjío tsjoake je ndsʼe̱. Kʼoa nga tsjoake, tsjoále kjoafaʼaitsjen tsa ʼyani xi jexin ndiaa tífi (Gál. 6:1). Kʼianga kjoafaʼaitsjen tsjoá je xi chjotajchínga sʼin tjío kui kuenta sʼín jmeni xi kitso pastro Pablo, nga kui kinchja̱ni tʼatsʼe kjoatsjoacha, i kitso: “Je kjoatjaocha tsejtaní, kʼoa tjínle kjoanda. [...] Síkjaínle ngayije, makjainle ngayije, koyale ngayije, ngayije jchókjoakaole” (1 Cor. 13:4, 7). Nga sikjaʼaitsjenjin jotso texto jebi xi chjotajchínga sʼin tjío, kʼoasʼin skoe̱ni tsakui nga tsjoake je ndsʼe̱ nga kjoafaʼaitsjen tsjoánile. Kʼoaʼénjin jmeni xi kʼuínle jngo chjota kʼiatsa skoe̱ nga kjimandosin kjoaixile je xi kjoafaʼaitsjen títsjoále. w22.02 14 párr. 3; 15 párr. 5

Je Jeobá ñaki ndasʼin kisinda je ánkje kao chjota. Tonga jngo ánkje xi xíjin koan, xi Satanás sʼin tsakʼaijaʼaínle (“xi bʼejnachjoa” sʼin tsoyanile) kʼoati tsakʼanachale je Adán kao Eva nga kʼoati xíjin katama tsanda je, nga tsín tije Jeobá katasítjosonnile. Kʼoati nkjínsa ánkje kao chjota xi yátsʼi̱n tsakinyále Niná (Jud. 6). Nga kʼoakisʼin alikui nda kisʼe kon je Jeobá. Tonga tojo tíkale saʼnda ndʼaibi kʼoa tosi tonda ska̱le saʼnda nga kuicho nichxin nga sikjeson je xi xíjin. Kʼianga kʼoakoa̱n, nʼiojin nda sa̱tío kon je choʼndale xi kixi tjíofitʼale, xi kʼoati tjíokale nga chʼao chon sonʼnde. Jmeni xi kitsole Na̱i je Job, joxi kuini xi kitso nga totjín xi sʼínnile ngatsʼi xi Niná síxále (Job 1:8-11; 2:3-5). Je Na̱i tojo kui énndiso tísíchjén saʼnda ndʼaibi (Apoc. 12:10). Tsakui nga tsjoachaa je Jeobá nga kixi mangíntʼanilee kʼoa tsa chókjoajinná je kjoa xi kuitjátojiaan, kʼoasʼin koakoñá nga to énndiso jmeni xi tso je Na̱i. w21.07 9 párr. 7, 8

Je pastro Pablo jngo choa̱ kisichjén xi basenkaoná nga majinná kʼianga nʼio chjíle nga nikʼantjaiyaa yaoná. Kʼoakitso nga katasʼetʼa yá kjoañʼai jokoankjoaan ngasʼa (Rom. 6:6, TNM). Kʼoatisʼinni tsanda ñá, tjínnele nga tsín tikui kʼoasʼianñá jmeni xi chʼaotjín kinʼia ngasʼa xi tsín sasénle Jeobá. Tsa kʼoasʼiaan, nda sʼe̱ kjoafaʼaitsjenná kʼoa kui kjoanda sʼe̱ná nga koa̱n kuiyoaa ngantsjai nichxin (Juan 17:3; 1 Ped. 3:21, TNM). Je Jeobá alikʼia síkʼantjaiya je kjoatéxomale, ñá xi machjén nga si̱kʼantjaiyaa yaoná ánni nga kuitjosonniná jotso je kjoatéxomale (Is. 1:17, 18; 55:9). Kʼianga jekʼuínsʼenngindái, tojo machjén nga tosi tonda kʼoénelai yaoli nga si̱kʼéjnai xi chʼaotjín. Ali tojijin chʼai yaoli, tosa je Jeobá tijélai nganʼio kʼoa kui nganʼiotsjele koasenkaoli (Gál. 5:22; Filip. 4:6). Machjén nga kʼoénelee yaoná ánni nga tsín tikʼoakoa̱nkjoansíñá jokjoaan ngasʼa. w22.03 6 párr. 15-17

Kʼiatsa kui títjon si̱kʼéjnaa je Chjotaxále Niná kʼoa si̱tjosoán je kjoatéxomale, je Jeobá tsjoáná tsojmi xi chi̱nee, najño xi chʼa̱kjá kʼoa kao ndʼia (Mat. 6:33). Kuinga tsín koa̱n kʼoasʼin si̱kjaʼaitsjenñá nga kui tsojmi xi tjín sonʼnde xi nda sikatíoná kʼoa xi tsjoa kʼoee tokoán. ʼYañá nga kui xi nda kʼoee tokoán kʼiatsa kʼoasʼiaan josʼin mele Niná (Filip. 4:6, 7). Kʼoa ningalani bichó nganʼioná nga koa̱n nkjín tsojmi kuindá, kuenta sʼiaan tsa koa̱nsonniná nichxin nga si̱chjén kʼoa nga si̱kuindaa. Si̱kjaʼaitsjenjiaan jebi: “A kui ngisa nʼio tjentʼale je tsojmi xi tjínna”. Kuenta sʼiaan nga kui xi mele Jeobá nga ngisa ndasʼin si̱xálee. Kuinga tsín koa̱nni nga tokjaʼaíla kjoa kʼoailee kjoandosin. Alikui kʼoasʼiaan jokisʼin je ti xi tsakʼejna nga nichxinle Jesús, nga tosa kui nʼio kitsjentʼale je tsojmi xi tjínle ʼndele nga je Jeobá sixále. Nga kʼoakisʼin ti jebi, alikui ya kʼoéjnajinle je xi xtile Niná koa̱n nichxin xi sʼa nroa (Mar. 10:17-22). w21.08 6 párr. 17

Kʼianga chótʼayá Biblia jchañá jokjoan je Jeobá, kʼoa kʼoati koa̱njinná jokjoan nga si̱kjaʼaitsjenjiaan jmeni xi kisinda. Nga jchaa jokjoan je Jeobá ñaki sʼe̱jngo tokoán nga tíjna kjoaixi (Éx. 34:6, 7; Sal. 145:8, 9). Nga sa nda sa nda jchaxkoaan je Jeobá, ngisaa koa̱nkjainná xi tʼatsʼe, ngisaa tsjoacha koaan kʼoa ngisaa koa̱nmiyoaa. Chja̱kaonajmíñá chjota nga makjainná tʼatsʼe Niná. Tonga jméni xi sʼiaan tsakui skónanginá tʼatsʼe Niná kʼoa tsa tsín ʼyaa jmeni xi kʼuínlee. Ya kjoásjaiyaa je xo̱n xi bʼasje naxinandále Niná kʼoa kui si̱chjén nga kʼuínyalee je chjota. Kʼoati koa̱n si̱jélee nganʼio jngo ndsʼee nga katabasenkaoná. Ni koa̱nkjainle kʼoa ni mai je chjota jmeni xi tso Biblia, koasenkaoná ñá nga kʼoasʼin kuijnatsʼinyaa, nga̱ ngisaa nʼio sʼe̱jna kjoamakjainná. w21.08 18 párr. 14, 15

Likuikjoan machjén nga si̱katioá ngayeje jmeni xi tjínná nga je Jeobá si̱xálee (Ecl. 5:19, 20). Tsa ʼyaa nga kʼoakoa̱nná nga ngisasa tse si̱xálee je Niná, tonga tsa tsín kʼoasʼiaan, yajin koa̱nngósoán je chjota xi kisikʼaxki̱ je Jesús kʼianga kui kinchja̱ni nga nʼio ndasʼin tsakʼejna chjota jebi tonga kichajinle xi tʼatsʼe Niná (Luc. 12:16-21). Kʼianga kjoa bitjatojiaan jé Jeobá bʼetsʼoalee kʼoa nda nikjaʼaitsjeen josʼin koa̱n kʼoéndajiaan kjoa (Prov. 3:21). Nʼio nkjín koya josʼin síchikontʼainná je Jeobá. Koaan kʼoasʼin koakoñá nga bʼailee kjoanda nga si̱xálee jokji tjen kʼoakoa̱nná (Heb. 13:15). Kʼoa koaan kjoásjailee josʼin nga ngisa nda si̱xálee. Tsa kʼoasʼiaan, je Jeobá tosi tonda sichikontʼainná. Je Jeobá títjon si̱kʼéjnaa nga nyaon nyaon ánni nga jchasíñá nga nda chjota (Sal. 34:8). Tsa kʼoasʼiaan, kʼoati kuixoán jokitso je Jesús: “Jé xi bakjennia, nga kʼoasʼian josʼin mele je xi kisikasénna kʼoa nga sijngoa xále” (Juan 4:34). w21.08 30, 31 párr. 16-19

Je Na̱i kui xi mele nga ngʼakon katamaa. Tsa ngʼakon koaan kʼoati koa̱nkjoaan jokjoan je Na̱i kʼoa tsínjinni tjoéná je kjoabijnachon xi tsínkʼia fetʼa. Je Pablo kʼoakitso nga kʼoati kui kjoañʼai kʼoaile jokoa̱ntʼain je Na̱i kʼiatsa ʼyani xi ngʼakon koa̱n (1 Tim. 3:6, 7). Kuinga nʼio si̱kuindanilee yaoná ninga jekjoatse nga je Jeobá tinixálee kʼoa ninga tosʼa choatse. Je chjota xi ngʼakon to yaole fini. Kʼianga kjoa bitjatojiaan, je Na̱i kui xi mele nga to yaoná kjuinñá kʼoa nga tsín je Jeobá kuenta sʼiaan. Tobʼelañá, tsa tokjoatjao nga jée kisʼené. Tsa tsín kixi tíjna jmeni xi koantʼeen. Je Na̱i kui xi mele nga je Jeobá kʼoa tsa je ndsʼee kjoánelee jmeni xi matʼeen. Kʼoa kui xi mele nga tokui kʼoasʼiaan josʼin nikjaʼaitsjeen, ʼndele nga kui kʼoasʼiaan jotsoná je Jeobá (Ecl. 7:16, 20). w21.06 15 párr. 4, 5

Nʼio chjíle je xá xi tsakánele Jeobá je profeta Ageo. Tsakui nichxin ya tjenjinle Ageo je chjota xi kinikatíonʼio ya Babilonia kʼoa xi kʼia kichoni ya Jerusalén nga nó 537 tongini nga nó 1. Kʼianga kicho, je choʼndale Niná xi kixi kitʼale tiʼa tsakʼéndani je xjáoja̱ma̱le yo̱ngo̱le Jeobá (Esd. 3:8, 10). Tonga xijekoanni chjota tsakatiochjoale, kisikinroajen kon kʼoa tsín tikisixáni (Esd. 4:4; Ageo 1:1, 2). Kuinga je Ageo kisikasénni Jeobá nga nó 520 tongini nga nó 1 ánni nga kuinyakaoni je chjota nga tsjoa katasatío kon kʼoa nga sijngo je yo̱ngo̱ (Esd. 6:14, 15). Je Ageo kui xá kichokaonile én je chjota judío nga ngisa nʼio sa̱tío kjoamakjainle xi tʼatsʼe Jeobá. Nʼiojin kitsjoanganʼiole nga “Jeobá xi tsʼe chjotakjoajchán” kitso je Ageo. Je Jeobá nʼio nkjín ánkje kjinentsja, kʼoa tjínnele je kisinʼiotʼa chjota judío kʼiatsa mele koa̱njngole je xá xi tjíosʼín. w21.09 14, 15 párr. 4, 5

Nichxin xi tiyoaa ndʼaibi, je testigole Jeobá tsjoake xínkjín kʼoa jtín tjío jngo tjíjtsa Sonʼnde. Alikui kʼoasʼin tjío je religión xi kjaʼaí. Tonga xi testigole Jeobá maa tojngo familia maa ngatsʼiaa, ninga xinxin tsaan kʼoa ninga kjaʼaí kjaʼaísʼin nganá nga jngó jngoá. Yaa ʼyanile nga tsjoachaa xíngiaa kʼianga satíoná kjoajtín kao kjoajtíntse. Jebi ngisaa bʼéjngo tokoán nga toñá xi kʼoasʼin ʼyaxkoán Jeobá josʼin mele (Juan 13:34). Je Biblia itso: “Nʼio katamatsjoachao xíngio” (1 Ped. 4:8). Jngo koya josʼin bakoá nga tsjoachaa xíngiaa kʼiaa nga nichatʼalee kʼoa nga kaná josʼín xi totʼatsʼe nga chjotajée maa. Kʼoati bakolee kjoanda kʼoa nda chjoéyaa ngatsʼi je ndsʼee, ninga je xi jokitsoná kʼoa tsa jokisikaoná (Efes. 4:32). Kʼoasʼin bakoñá nga chjotatjenngile Cristo ma kjoaixiaa. w21.10 22 párr. 13, 14

Kʼianga bichonsjejin naxinandále Niná jngo chjota, sakʼoa kui basenkao nga kʼoamanile jme xi kisʼin. Nʼio nkjín xi tsakichonsjejin naxinandále Niná xi kʼoatso nga kui tsakinyakao je kjoafaʼaitsjen xi kitsjoale xi chjotajchínga sʼin tjío nga kisikjaʼaitsjenjin ijngokʼa, nga kisindaya yaole kʼoa nga kisichriantʼa ijngokʼanile Jeobá (Heb. 12:5, 6). Si̱kjaʼaitsjenjinla choa̱ jebi. Kʼianga be nga tímʼe jngo barréle je chjota xi cho̱ koʼnda, tjínnele nga tʼaxin sikʼéjna je barréle nga sixkile. Tonga je barré alikui ngale nga tʼaxin batio, kui xi mele nga ya koatiojinle xínkjín kʼoa tsín sasénle nga tʼaxin nikatío. Kʼiatsa je xi koʼnda barré tʼaxin sikʼéjna je barré xi tímʼe, a kui xi tsonile nga totaon tíbe. Mai. Je xi cho̱ koʼnda majinle nga kʼoati tjóchʼinle je barré xi ngikʼa kʼiatsa tosi tonda ya kʼoéjnajinle je barré xi tímʼe. Nga tʼaxin síkʼéjna síkuinda ngatsʼi barré xi ngikʼa. w21.10 10 párr. 9, 10

Bʼaiñá kjoanda nga jngo familia mañá kao je ndsʼee xi tjío jngo tjíjtsa Sonʼnde, kʼoa tsjoachañá xíngiaa. Kʼoati kui xi mená nga nʼiosa nkjín chjota xi je Jeobá katabʼétsʼoale. Alikui mená nga kui xi chʼaotjín kʼoasʼiaan, nga̱ tsín mená nga chʼaosʼin katabʼaxki̱ je Jeobá kao naxinandále. Kui kʼoanʼia ngantsjai je xi ndatjín ánni nga koa̱nmenile je chjota skoe̱ xi tʼatsʼe Jeobá. Tjínjinkʼa xi tsín sa̱sénle kʼoa xi koaitjenngikená nga je Niná nitjosonlee. Jméni xi sʼiaan kʼiatsa nokjoaan nga chjakaonajmíñá je chjota tʼatsʼe jme xi makjainná. Kuenta sʼiaan nga je Jeobá kao Jesús kuinyakaoná. Je Jesús kʼoakitsole chjotatjenngile nga tsínkui katasíkjáojin jmeni xi kuitso. I kitsole: “Nga tikʼiani kʼoaino josʼin kuinókjoao, nga̱ tsín tsa jon xi kuinókjoao, tojé Espíritule Nʼaino xi nchja̱jinno nga jon” (Mat. 10:19, 20). w21.09 24 párr. 17, 18

Je Moisés kʼoati kui choa̱ kisichjén tsʼe jngo ʼnde jñani ma bijnangʼiánngiaa (Sal. 90:1, nota). Kʼianga jeme kuiyá, i kitso: “Saʼnda kjoatse yaa mangóson Niná jngo ʼnde jñani ma bijnangʼiánngiaa; yaa tijnangi je xjale xi tjío ngantsjai” (Deut. 33:27). Jmé xi bakóyaná texto jebi xi tʼatsʼe Jeobá nga “yaa tijnangi je xjale xi tjío ngantsjai” tso. Kʼianga ñaki tjínjngo tokoán nga je Jeobá sikuindaná alikui jme xi nokjonlee. Ninga kʼoalani, sakʼoajin kjuinroajen tokoán kʼoa ba sa̱tío tokoán. Jósʼin koasenkaoná Jeobá kʼianga kʼoasatío tokoán (Sal. 136:23). Kao xjale skómitjenniná kʼoa ngasin nganda koasenkaoná nga kuisenkixi ijngokʼá (Sal. 28:9; 94:18). Nga ʼyaa nga basenkaoná je Jeobá kui faʼaitsjenná je kjoanichikontʼain xi tjínná. Xi títjon, tojñani tiyoaa, ʼyañá nga je Jeobá sikuindaná. Kʼoa xi majaoni, ʼyañá nga nʼio chjí bená je Jeobá. w21.11 6 párr. 15, 16

Je Jesús be nga kui xi skótʼayakao kjoamakjainle chjotatjenngile kʼianga tsín kixi tíjna jme xi koa̱ntʼain. Kʼianga chókjoajinle, je Jesús kui tsakʼéyanajmí jmeni xi faʼaitʼa je libro xi tsʼe Lucas. Kui kinchja̱ni tʼatsʼe jngo ʼndíchjoónkʼan xi kjitʼa kjitʼa kʼoakitsole jngo juez xi tsʼen nga katabʼéndajinle je kjoa xi tífaʼatojin. Ñaki kʼoatsakʼé kon ʼndíchjoón jebi nga kʼoendajinle je juez tsa tosi tonda kʼoakuitsole. Kʼoa kʼoakisʼin kjoaixi juez jebi, tsakasenkao je ʼndíchjoónkʼan. Jmé xi bakóyaná jebi. Je Jeobá ñaki kixiní. Kʼoa je Jesús i kitso: “Niná a tsí kʼoendajinle xi tsʼe chjota xi tsakjaʼájin xi nʼio nchja̱le nichxin kao nitje̱n” (Luc. 18:1-8). Je Jesús i kitsosa: “Kʼia nga je ʼndíle chjota kjoaʼaí, a koa̱nsjaile chjota xi koa̱nkjainle i̱ sonʼnde”. Kʼianga tsín kixi tjín jme xi matʼeen kʼoasʼin koakoñá nga kʼoati nʼio tíjna kjoamakjainná joni je ʼndíchjoónkʼan kʼianga tsejta koaan kʼoa nga chókjoajinná. Kʼianga tjínná kjoamakjainná ʼyañá nga je Jeobá koasenkaoná. Kʼoati machjén nga koa̱nkjainná nga nʼio basenkaoná nga bʼetsʼoaa. w21.11 23 párr. 12; 24 párr. 14

Xi sʼa xtio, a sakʼoa kʼoasʼin nikjaʼaitsjaon nga nkjín koya xi bʼéchjoano je kjoatéxomale Jeobá. Kui xi mele je Na̱i nga kʼoasʼin si̱kjaʼaitsjaon. Kui xi mele nga kʼoasʼin si̱kjaʼaitsjaon josʼin síkjaʼaitsjen je chjota xi ndiaa “teya” tjíofiya kʼoa xi kʼoasʼin matsen nga tsjoa tjío kon. Kui xi mele nga kʼoasʼin si̱kjaʼaitsjaon nga tsín kʼoasʼin tibʼetsaojion josʼín je xti xi ñatjen mangíon skuela kʼoa josʼín je chjota xi ʼyao ya Internet, kʼoa nga kui kjoatéxomale Jeobá xi tsín tsjoáʼndeno nga tsjoa sa̱tío tokon. Tonga kuenta tʼiaon nga je Na̱i alikui mele nga skoe̱ je chjota josʼin kuichomani nga ya ndiaa xi “teya” tjíofiya (Mat. 7:13, 14). Tonga je Jeobá tsoya kixiná je kjoanda xi sʼe̱le je xi ya tjíofiya je ndiaa xi kjoabijnachon kuichokaoná (Sal. 37:29; Is. 35:5, 6; 65:21-23). w21.12 23 párr. 6, 7

ʼYañá nga tjínnele si̱chatʼalee xíngiaa. Tonga alikui choa ñʼai maná nga kʼoanʼia. Kʼoati koan sakʼoa je pastro Pedro (Mat. 18:21, 22). Jmé xi koasenkaoná. Xi títjon, si̱kjaʼaitsjenjiaan jótjín kʼa síchatʼaná je Jeobá (Mat. 18:32, 33). Alikui bakinná nga sichatʼaná, tonga kʼoasʼín (Sal. 103:8-10). Xi ijngosani, tjínnele nga tsjoacha koaan xíngiaa. Alikui ñá xi kuixónñá tsa mená si̱chatʼalee xíngiaa kʼoa tsa mai, tjínnele kʼoasʼiaan (1 Juan 4:11). Xi majaoni, si̱kjaʼaitsjenjiaan nga nda bichómani nga nichatʼalee je ndsʼee. Bisenkaoñá xi jokasíkaoná, nda biyoaa ya jinjtín, nda biyoaa kao Jeobá kʼoa nda satío tokoán (2 Cor. 2:7; Col. 3:14). Xi majanni, kʼoétsʼoalee je Jeobá, nga̱ jé xotsoná nga si̱chatʼalee xíngiaa. Alikui kʼoaiʼndee nga je Na̱i sikitsónjin nga nda tiyoaa kao ndsʼee (Efes. 4:26, 27). Machjén nga je Jeobá koasenkaoná nga tsín ya jtsaoyaa che̱nle Na̱i. w21.06 22 párr. 11; 23 párr. 14

Je rey Saúl nʼio jtike koan je David kʼoa koanmele kisikʼien, kuinga kitokachjingani je David. Kʼianga títokachjinga, yaa kicho ya naxinandá xi Nob ʼmi kʼoa nga tsínle jme xi ski̱ne aon nioxtila kisijé (1 Sam. 21:1, 3). Xijekoan, jngoo ngijao kichokationgi kao chjota xi tjenkao (1 Sam. 22:1). Ánni nga kui kjoa tsakʼejnajinni je David. Kʼianga nʼio nda tsabekon chjota je David kʼoa nga nkjín kjoajchán kinjele, je Saúl koanxinkonke, kʼoa kʼoati be nga kuinga tsín kisitjoson nga je David kiskoejinni je Jeobá nga koatexoma ya naxinandá Israel (1 Sam. 23:16, 17). Nga tojo je Saúl tíbatéxoma nga kʼia, nʼio nkjín chjotakjoajchán kisʼele kʼoa kuinga kitokachjingani David. A kʼoasʼin kisikjaʼaitsjen Saúl nga koa̱n kʼoechjoa josʼin jetjínndajinle Jeobá nga rey koa̱n je David (Is. 55:11). Je Biblia alikui kʼoatso tsa kʼoasʼin kisikjaʼaitsjen. Tonga je xi ʼyaa kuinga tsín ndasʼin batio je xi kontra batiole Jeobá. w22.01 2 párr. 1, 2

Je Jesús nʼio tsakʼénele yaole nga kitsoyason. Nga tsjoake je chjota tsakʼénele yaole jokji tjen kʼoakoanle (Luc. 19:47, 48). Kʼoa kuinga kitsoyasonni nga koanmake chjota. Nga nʼio nkjín koan chjota xi kitsoyale, sakʼoa tsín koanʼale Jesús kao chjotatjenngile nga tsakjen (Mar. 3:20). Kʼoa ninga jekoannjio kichokonle Nicodemo tsakjákaonajmí je Jesús. Nga kitsoya Jesús, nʼio nkjín chjota xi kisʼejinle je Énle Niná, tonga tsín tongatsʼi nga chjotatjenngile koanni. Nichxin xi tiyoaa ndʼaibi, kʼoati kui xi mená nga katanrʼoé ngatsʼi chjota je Énle Niná (Hech. 10:42). ʼNdele nga tokui kjuinñá jme hora nga skénndiaaná, tosa kʼoachon kʼuínyasoán jochon nga jtsaojiaan je chjota. Tsa kʼoasʼiaan, nʼio tsjoa sʼe̱ kon je Jeobá. w22.01 17 párr. 13, 14

Nichxin xi tiyoaa ndʼaibi, alikui choa ñʼai male je chjota nga je sínʼiotʼa chjota xi xá tjínle. Nga̱ tojé nda nikao chjota xi nyiná kʼoa xi nʼio ʼyale kʼoa je xi ma̱ tjío totaon ʼya. Je chjota alikui tisínʼiotʼani je xi nyatítjonle religión xi totʼatsʼe nga tsín ndasʼin fikao yaole, kʼoa yaa nroani nga tjínkʼa chjota xi tsín tisínʼiotʼani je Niná. Kuinga machjénni nga kuinyakoaa je xi ʼmiyalee Biblia nga katasínʼiotʼa je Niná kʼoa nga katasínʼiotʼa je xi tsakinyánda Niná nga bándiaaná. Ali tsa tojejin chjota xi Biblia ʼmiyalee xi tjínnele sinʼiotʼa Niná kao naxinandále. Ninga jenkjínná nó nga tichotʼayá tojo machjén nga kʼoéjngoaa tokoán nga kixi jmeni xi sʼín Jeobá ngantsjai, nga̱ kui xi koasenkaoná tsakui kjoa kuitjátojiaan xi skótʼayakao kjoamakjainná. w22.02 2 párr. 1, 2