Agosto

Tsakui nichxin je xokitsole Jesús je sondado romano xi yá tsakátʼa. Je Jesús alikui tsakʼéngijti kon ninga kʼoakinikao (1 Ped. 2:23). Joni je Jesús, kʼoati tjínnele si̱chatʼalee xíngiaa (Col. 3:13). Tsakui nichxin kuinga batiochjoaniná je chjota nga Énle Niná tichotʼayá, jolani je xíngiaa nga tsín majinle ánni nga kʼoanʼiañá. Tsakui nichxin énndiso koanená, tsa totaon skoe̱ná ngixko̱n xi kjaʼaí chjota, tsa kʼoejnda je xo̱n xi chotʼayá kʼoa tsa saʼnda kʼoakuitsoná nga tjín xi sikaoná. Tonga ʼndele nga kʼoéngijtiaa tokoán, tosa kʼoakʼuínlee je Jeobá nga katamachoyale jokjoantjínni je xi kixi (Mat. 5:44, 45). Sakʼoa ñʼai maná kʼianga nichatʼalee xíngiaa, ngisaa kʼianga totaon bená tsa ʼyani. Tonga tsa kʼoaiʼndelee yaoná nga tosi tonda kʼoéngijtiaa tokoán, tiñá si̱kiʼaonñá yaoná (Sal. 37:8). Kʼianga nichatʼalee xíngiaa, alikui tikui bʼejinkonñá jmeni xi síkaoná (Efes. 4:31, 32). w21.04 8, 9 párr. 3, 4

Kʼianga jngo chjota bichonsjejin ya jinjtín, nʼio ba satío kon je xi xínkjín mani. Si̱kjaʼaitsjenla jokji aon koanle Jeobá nga nʼio nkjín ánkje xi yátsʼi̱n tsakinyále, nga̱ yaa familiale tjíojin tsakai (Jud. 6). Je Jeobá nʼio tsjoake koan je chjota israelita, a fiya jkoaa jokji ba koanle kʼianga xíjin koan chjota jebi kʼoa nga nʼio nkjín kʼa nga tsín tikisitjosonnile (Sal. 78:41). Kʼoati ba sʼe kon je Jeobá kʼianga jngo xíngi bichonsjejin naxinandále. Majinle josʼe tokuin kʼoa kʼoasʼin koakonili kjoamatokon nga sinʼiojinli kʼoa tsjoánganʼioli. Kʼianga jngo ti kʼoa tsa jngo tsoti xi tsín tije Jeobá síxánile, je xi xijchá ma kui síkjaʼaitsjen jósʼin koan tsakinyakao tsakai. Kʼianga jetsakichonsjejin naxinandále Niná je tile ndsʼee, i kitso: “Kʼoasʼin kisikjaʼaitsjen nga an kisʼena jée, kʼoa saʼnda chʼao kitsona nijñá”. Jngo tichjaa xi kʼoati kui kjoa tsakʼejnajin, ñaki tokui kisikjaʼaitsjen ʼndeʼnde nga tsín koanle nda tsakándiaale je tile. Itso: “Alikuijin nda kixinyale Énle Niná nga sʼa kisijchínga je ʼndítina”. w21.09 26 párr. 1, 2, 4

Tjínkʼa xi kʼoasʼin síkjaʼaitsjen nga tsín koa̱nná koakoyaa jmeni xi tso je Biblia nga̱ tsín ya tsangián skuela jñani sakóya xi tʼatsʼe Biblia. Tonga nda biyotsʼinyaa jokjoantjínni kjoa, tojo kisʼin je Lucas. Kʼianga kiski je Evangelio títjonkjoanla tsakʼejnatsʼinya jokjoantjínni kjoa. Kui xi koanmele nga sʼe̱jngo kon je chjota xi kʼoexkia nga ñaki kʼoatjín jmeni xi kinrʼoé tʼatsʼe Jesús (Luc. 1:1-4). Kʼoati nʼio nda tsakatiotsʼinya je chjota judío xi Berea tsʼe. Kʼianga kinrʼoé xi tʼatsʼe Jesús tsakásjaiyaa ya Escrituras Hebreas tsa ñaki kʼoatjín jme xi tsakʼinyale (Hech. 17:11). Kʼoati machjén nga kʼoati sʼiaan tsanda ñá. Si̱ngósonkoaa jmeni xi tso je Biblia kʼoa jmeni xi bakóya naxinandále Niná. Kʼoati koa̱n chótʼayajiaan jmeni xi tísʼín je naxinandále Niná. Tsa nda kuijnatsʼinyaa alikui tokui kjuinñá jmeni xi tso je chjota. w21.05 3 párr. 7, 8

A tjío tsa ʼyani ya jinjtín xi koa̱n kuisenkoaa. Tsen tjín nichxin nga ngisa machjénle nganʼioná je ndsʼee. Tobʼelañá, kʼianga sʼuí batío je xínkjín xi tsín kotʼaya Énle Niná, nʼiojin ñʼai male je ndsʼee nga kui nichxin. Kʼoa tjínkʼa ndsʼee xi ba satío kon kʼianga bichó nichxin nga xki̱ nó josʼin nga kʼien xínkjín. Kʼianga nikʼayalee nichxin ndsʼee jebi, kʼoasʼin bakonilee nga mandosin kjoaixiná (Filip. 2:20). Nkjín koya anni nga kʼoasatío sakʼoani tokoán nga toñá tiyoaa maná. Tonga alikui si̱chajiaan nga je Jeobá be josatío tokoán, kʼoa sakʼoa je ndsʼee síchjén nga basenkaoná (Mat. 12:48-50). Kʼoasʼin koakonilee Jeobá nga bʼailee kjoanda kʼianga kuinyakoaa je ndsʼee kao tichjaa. Ningalani tsín nda satío sakʼoa tokoán, alikui toñá tiyoaa nga̱ yaa tjen tíjnakaoná ngantsjai je Jeobá. w21.06 12, 13 párr. 18-20

Je Jesús alikui kisikʼajenle kon ninga tsín kinrʼoé kʼale je chjota, tosi tonda kitsoyason. Kui kʼoakisʼinni nga̱ be nga nʼio machjénle chjota nga kjuinrʼoé je Énle Niná kʼoa koanmele tsakasenkao. Kʼoati koanjinle nga tjínkʼa chjota xi tsín kjuinrʼoé nga títjon, kʼoa nga skanni koa̱nndosinle je Énle Niná. Kʼoakisʼin je xínkjín. Je xi jan nó basen kitsoyason Jesús, nijngojin ndsʼe̱ xi chjotatjenngile koan (Juan 7:5). Tonga kʼianga jejaʼáyanile Jesús chjotatjenngile koanni je ndsʼe̱ (Hech. 1:14). Alikui ʼyaa jotjín chjota xi koa̱nkjainle je Énle Niná kʼianga ʼmiyasoán. Tjínkʼa chjota xi tsín ndi̱to̱n makjainle. Ningalani tsín nrʼoéná je chjota, tonga kuenta sʼín josʼin mangínkoaa yaoná kʼoa jonʼia, kʼoa tsakui nichxin skanni koa̱nndosinle je Énle Niná. w21.05 18 párr. 17, 18

Kʼianga tsakʼejna Jesús i̱ Sonʼnde jao koya tjínni xi kitsole chjotatjenngile nga sʼin. Kʼoakitsole nga katatsoyason je Énle Niná kʼoa tsakakóyale josʼin kuitsoyason (Luc. 8:1). Je Jesús kʼoati kitsoyale je chjotatjenngile jósʼin kʼiatsa kjuinrʼoé Énle Niná je chjota kʼoa jósʼin kʼiatsa tsín ʼya xi kuinyaño (Luc. 9:2-5). Kʼoati kitso nga sa̱kóyason jngo tjíjtsa Sonʼnde (Mat. 24:14; Hech. 1:8). Je Jesús kʼoakitsole chjotatjenngile nga katatsoyale chjota nga katasítjoson jmeni xi tsakakóyale. Je Jesús kʼoakitso nga tosi tonda sa̱kóyason josaʼnda “nga kuichokjetʼa xi chon sonʼnde” (Mat. 28:18-20, TNM). Kʼoa je sén xi kisakole pastro Juan kui bakó nga kui xi mele Jesús nga chjotatjenngile si̱koaa je chjota kʼoa nga katabe xi tʼatsʼe Jeobá (Apoc. 22:17). w21.07 2, 3 párr. 3, 4

Je chjota básjaile josʼín tojoni nga ngisa ngʼa kʼoasje yaole. Tobʼelañá, je chjota xi tsojmi baténa básjaile josʼín tojoni nga ngisa nda koa̱nchjíle tikʼoajinni xi ngikʼa. Tsakui nichxin je chjota xi síská toxá sikiʼaonni je xi ñatjen síská tojo mani nga je kuinjele. Kʼoa tsa sʼin copiar je examenle jngo ti xi skuela tsoʼba tojoni nga tjóʼndele kjoaʼasʼen skuelangʼa. Ñá xi chjotale Cristo maa ʼyañá nga chʼaotjín jebi nga̱ kui “kjoa xi sʼín yaoná” (Gál. 5:19-21). Tsa tjínkʼa ndsʼee xi ngisa ngʼa kʼoasje yaole, alikuijin nda kuiyoaa ya jinjtín. Koaan chótʼayajin kʼa je choa̱le choʼndale Niná xi tsakatio nichxin kjoatse xi tsín ngʼakon koan. w21.07 14 párr. 1, 2

Nga tjínná xi ñaki kjoatsjoacha binyakaoñá je xi tjíonroajen kon. Tjín ndsʼee xi binyakaoná kʼianga nroajen tokoán kʼoa nga ba satío tokoán. Binyakaoná jokji tjen kʼoamale nga̱ tsjoakená (Prov. 12:25, nota; 24:10). Nga kʼoasʼín, fitjenngi kjoafaʼaitsjen xi kitsjoa je pastro Pablo, nga kitso: “Tinʼiokon xi choa tjíokon, tinyakao xi tsínle nganʼiojin, tikjaínlao ngatsʼi” (1 Tes. 5:14). Kʼiatsa jngo ndsʼee tísíkʼajenle kon, je xi ngisa koasenkao kuinga kuinóʼyalee kʼoa kʼoakʼuínlee nga tsjoachaa. Je Jeobá kuenta sʼín josʼin binyakoaa je choʼndale. Ya Proverbios 19:17 itso: “Je xi bakóle kjoanda je xi ma̱ tíjna jé Jeobá síkinyale, kʼoa jé tsjoángajaonile jmeni xi sʼín”. w21.11 10 párr. 11, 12

Jméni xi sʼiaan nga kuiyondalee ndʼaibi jokoa̱n nichxin xi sʼa nroa. Tjínnele nga tokʼoéjngoaa tokoán jokji tjínná kʼoa tsjoa kʼoé tokoán nga miyoná mani je Jeobá. Nga ngisasa nda jchaxkoaan Niná ngisaa sʼe̱jngo tokoán nga je sikuindaná kʼianga kʼoetʼaná je Gog xi tsʼe Magog. Jmeni xi tso je texto xi kamaxkia ndʼaibi kui bakóná ánni nga ñaki kʼoatsakʼéni kon David nga je Jeobá koasenkao. Ngantsjai nga je Jeobá kisijéle nganʼio, kʼoa je Jeobá alikuikʼia kitsjionkon. Kʼianga sʼa xti je David, kao jngo sondado xi nʼio ngʼa kji kiskan xi Goliat tsakʼin. I kitsole: “Nichxin jebi, jé Jeobá xosʼin nga ska̱yai ndsa̱” (1 Sam. 17:46). Kʼianga choʼndale koan je rey Saúl, nkjín kʼa me kisikʼien. Tonga jé Jeobá tsakasenkao je David (1 Sam. 18:12). Nga tsabe David josʼin tsakasenkao Jeobá nga sʼa xti, be nga tosi tonda je koasenkao. w22.01 6 párr. 14, 15

Kʼianga jmeni xi sʼín je Jeobá, alikui tsa xitso xiská kʼoasʼín. Kuinga kʼoasʼínni nga nda katabʼaxki̱ je jaʼaínle kʼoa nga koasenkao xi kjaʼaí. Kuila kataʼyaa jokisʼin nga tsakʼénda je Sonʼnde. Je Biblia kʼoatso nga “tsakʼécho̱ya”, tsakʼéndaa “xjáoja̱ma̱le” kʼoa kisikʼéjnaa “la̱jao̱xingile” (Job 38:5, 6). Kʼoati tso je Biblia nga kisikʼaya nichxin je Jeobá nga kisikjaʼaitsjenjin je xále (Gén. 1:10, 12). A majinná jokisatio kon je ánkje nga tsabe jmeni xi kisinda je Jeobá. Nʼiojin tsjoa kisatio kon, nga̱ je Biblia kʼoatso nga saʼnda kiskiʼndáxá nga tsakʼasjengʼa Niná. Jebi kui bakóyaná nga nʼio nkjín jmi nó kisʼengile je Jeobá nga tsakʼénda je Sonʼnde, nga kisinda je niño kao ngatsʼi je xi tjíokon. Kʼoa kʼianga kiskotsenle Niná ngayeje jmeni xi tsakʼénda kʼoakitso “nga nʼio nda ngayeje” (Gén. 1:31). w21.08 9 párr. 6, 7

Kʼianga kisikʼéjna choa̱ jebi je Jesús, kui kinchja̱ni tʼatsʼe jngo chjota xi kjin ki. Nga kjesa fijin kinchjale je choʼndale kʼoa kitsjoale tao̱n xi talento ʼmi nga jngó jngó ánni nga sixákaoni. Jngo choʼndale xi aon talento kitsjoale, jngo xi jao talento kitsjoale kʼoa xi ijngo jngo talento kitsjoale, be jokji kʼoakoa̱nle sixákao nga jngó jngó. Je choʼnda xi aon talento kʼoa xi jao talento tsakʼaile nda kisixákao kʼoa kisikinjeson tao̱n xi kitsjoale naile. Tonga je xi jngo talento tsakʼaile alikui kisixákao, kuinga tsín tikitsjoaxánile je naile. Tojo kisʼin je choʼnda xi títjon kao xi majaoni, nda kisitjoson je xá xi kisʼenele kʼoa nda kisixákao je tao̱nle naile. Jngó jngóya kʼoakji kisikinjeson jotjín tsakʼaile. Nda kisʼe kon naile choʼnda jebi kʼoa ngisasa tse xá tsakánele. w21.08 21 párr. 7; 22 párr. 9, 10

Je Jeobá nʼio tsejta kjima nichxin xi tiyoaa ndʼaibi nga toje tífikjetʼa nichxin. Alikui mele nga ʼya xi kjoeson (2 Ped. 3:9). Títsjoásale nichxin je chjota nga kʼoakatamanile je jéele. Tonga alikui tongantsjai nga tsejta koa̱n je Jeobá. Je xi tsín tsjoánganʼiole je Chjotaxále Niná kʼoati koa̱n jokoan je faraón kʼianga nichxinle Moisés. Je Jeobá i kitsole: “Koanjin nga jetsakakole tsakai nganʼiona nga kitsjoale kjoañʼai ji kao naxinandáli nga chʼintáo kisikasénnele, kʼoa jejin tsín titijnani i̱ sonʼnde. Tonga kui xá tisikʼéjnakonnile nga koakole nganʼiona kʼoa nga kʼoaxki̱ je jaʼaínna jngo tjíjtsa sonʼnde” (Éx. 9:15, 16). Nga kuichoka nichxin, je chjota skoee nga je Jeobá xi ñaki Niná (Ezeq. 38:23). Je én xi sitinya tso ya texto xi kamaxkia ndʼaibi kui nchja̱ni nga tondiaa ni̱kjeson je chjota xi kʼoasʼin jokisʼin je faraón, xi tsín makjainle nga toje Jeobá xi tiʼndele batéxoma. w21.09 18 párr. 17, 18

A nʼio aon tjín tokuin nga xíngi tsakichonsjejin naxinandále Niná. Jósʼiain kʼiatsa kui kʼoakuitsoli jngo ndsʼee jmeni xi tsín nda kʼoe tokuin. Alikui koa̱n kʼoasʼin si̱kjaʼaitsjeen nga kui kʼoakuitsoná ngatsʼi jmeni xi sa̱sénná (Sant. 3:2). Nga chjotajée maa ngatsʼiaa, sakʼoajin tsín be xíngiaa jmeni xi kuitsoná kʼoa tsakui kʼoakuitsonáje̱ jmeni xi sikiʼaonná. Kuenta sʼiaan jmeni xi kitso je pastro Pablo, nga kitso: “Tikjaínlao xíngio, tichatʼa ngaʼi̱ngajánlao xíngio, tsa jngo xi fajéetʼain xínkjín” (Col. 3:13). Tosi tonda kʼoainganʼiolee je ndsʼee xi xínkjín tsakichonsjejin naxinandále Niná. Nga kui kjoa tjíojin ngisaa timachjénngáni nga koakolee kjoatsjoacha kʼoa nga si̱nʼiojiaan (Heb. 10:24, 25). Tjínkʼa ndsʼee xi xínkjín tsakichonsjejin naxinandále Niná xi kʼoatso nga tjín ndsʼee xi tsín tinchja̱nile. Kʼoasíkao joni tsa je xi tsakichonsjejin naxinandále Niná. Alikui mená nga kʼoakatasatío kon je ndsʼee. Je xi nʼaile kʼoa tsa na̱le tsakichonsjejin naxinandále Niná machjén nga kʼoainganʼiolee, kʼoa kʼoakʼuínlee nga nda tjíosʼín nga tosi tonda je Jeobá tjíosíxále. w21.09 29 párr. 13, 14; 30 párr. 16

Binyakaongañá xínkjín kʼianga fákaonajmí jngo ndsʼee xi jekoanjchínga kao jngo xi sʼa xti (Rom. 1:12). Je xi sʼa xti ñaki sʼejngo kon nga síkuinda Jeobá je choʼndale xi kixi fitʼale. Kʼoa je ndsʼee xi jekoanjchínga nda sʼe̱ kon nga kʼoeyanajmí josʼin tísíchikontʼain Jeobá jokjitse tísíxále, kʼoa skoee nga chjí ʼyatokon. Kʼianga jemajchíngaa jebʼantjaiya josʼin matseen. Kʼianga jngó jngó nó faʼato, sa naská sa naskásʼin matsen ngixko̱n Jeobá je choʼndale xi kixi fitʼale (1 Tes. 1:2, 3). Ánni. Kuinga jokji faʼato nó tsjoáʼnde nga je nganʼiotsjele Jeobá síndaya. Ngisaa chjí jchatokoán je ndsʼee xi jekoanjchínga kʼianga ngisa nda jchaxkoaan kʼoa nga kjuintjenngiaa je choa̱le. Nga nda kuiyoaa ngatsʼiaa ya jinjtín machjén nga chjí skoe̱ xi sʼa xti je xi jekoanjchínga, tonga kʼoati machjén nga kʼoati chjí skoe̱ xi jekoanjchínga je xi sʼa xti. w21.09 7 párr. 15-18

Si̱kuindaa yaoná nga tsín toxkia kuinókjoaa kʼoa tosa kʼoasʼiaan josʼín je Jeobá nga bakó kjoamatokon (Efes. 2:4). Kʼianga bakoá kjoamatokon ali tsa tokʼoajin bixoán nga mamachaa je chjota. Koaan si̱kjaʼaitsjenjiaan jósʼin kuinyakoaa je xíngiaa, je ndsʼee kao chjota xi ya tsʼe jñani ʼmiyasoán. Nkjín koya josʼin koa̱n koakolee kjoamatokon. A ʼyaxkonñá tsa ʼyani xi machjénle nga si̱nʼioá kon. A koaan kjuinkaolee tsa ʼyani je tsojmi xi ma chine kʼoa tsa josasʼin kuisenkoaa. A tíjna jngo ndsʼee ya jinjtín xi jaʼaikʼejnajin ijngokʼani naxinandále Niná xi machjén nga si̱nʼiojiaan kʼoa kʼoainganʼiolee. A koaan kʼuínyalee Énle Niná je chjota (Job 29:12, 13; Rom. 10:14, 15; Sant. 1:27). Nkjín koya josʼin koa̱n koakolee kjoamatokon je chjota kʼiatsa kuenta sʼiaan ʼyani xi nganʼio machjénle. Kʼiatsa koakoá kjoamatokon nʼio tsjoa sʼe̱ kon je Niná xi bakóná kjoamatokon. w21.10 13 párr. 20-22

Ya Salmo 23, je David kui nchja̱ni jmeni xi ngisa tjínle kjoandosin. Jolani je kjoanichikontʼain xi kitsjoale Jeobá nga je kisinʼiotʼa yaole. Jé Jeobá tsakándiaale josʼin tsakʼamje, kʼoa tsakasenkao nga nda tsakʼejna kʼoa nga kjoa jaʼatojin. Je David koanjinle nga tsín tsakui xi tsonile nga tsín jme kjoa kjoaʼatojin nga choʼndale Jeobá ma. Sakʼoajin kisikinroajen kon, kʼoa kʼoakitso nga chjota kitjenngike. Tonga nga je Jeobá kisinʼiotʼa, je David kʼoakitso nga tsín jme xi tso̱kjonle. Je David ndasʼin tsakʼejna ngixko̱n Jeobá, kuinga kʼoakitsoni nga tsín jme xi kichale. Ali tsakuijin xi tsjoa tsakáya kon je tsojmi xi kisʼele, tokoanjngoni kon jmeni xi kitsjoale Jeobá. Kui xi ngisa chjí tsabe nga je Jeobá sikuinda kʼoa koasenkao. Je choa̱le David kui bakóyaná nga tsínkui si̱metokoán nga nʼio nkjín tsojmi sʼe̱ná. w22.01 3, 4 párr. 5-7

Jokji tífaʼato nichxin, tjínkʼa chjota xi tsín nrʼoé kʼianga tsoyason je choʼndale Niná. Tobʼelañá, je Noé nʼio nkjín nó nga kitsoyason je Énle Niná (2 Ped. 2:5). Je Noé kuijin xi koanmele nga kjuinrʼoé je chjota, tonga je Jeobá alikui kʼoakitsole tsa kʼoasʼin je chjota. Kʼianga kʼoakitsole nga sinda je arca, i kitsole: “Tjínneli kuitjásʼain ya arca ji kʼoa kao xtili kao chjoónli kʼoa kao yánchjínle xtili” (Gén. 6:18). Kʼianga kʼoakitsole Jeobá josiká je arca, je Noé koanjinjinle nga tochoa chjota kjuinrʼoé nga kuitsoyason (Gén. 6:15). Kʼoa kʼoakoan kjoaixi, nijngojinla chjota koankjainle nga kitsoyason (Gén. 7:7). Je Jeobá alikui kʼoakitso tsa toxitsjoa nga kitsoyason je Noé, tosaa kʼoakitso nga nʼio nda kisixá, nga̱ ñaki kʼoakjoansʼin kisitjoson jokitsole (Gén. 6:22). w21.10 26 párr. 10, 11

A fiyaa jkoaa jokisʼe kon je Rut nga kʼoakitso je na̱chále. Nga̱ je Rut alikui kitsjionkon je Noemí, kiskiʼndákao, kisinʼio kon kʼoa nʼio nkjín nichxin nga ñatjen tsakʼetsoma. Ninga kʼoalani, je Noemí kʼoakitso nga tokjitia ntsja nga kichoni ya Belén. Ningalani tsín kitsjionkon Rut, nga kʼoakitso je Noemí joxi tsínjinni tsabechjí jmeni xi kisʼin. Nga kʼoakitso je Noemí aonjin koanle je Rut, tonga alikui kitsjionkon (Rut 1:3-18). Tsakui nichxin aon kʼoe tokoán jmeni xi kuitsoná jngo tichjaa xi ba tjín kon ninga tibisenkoaa. Tonga alikui yaoná si̱jtilee. Alikui kuinjíotokoán kʼoa si̱jélee Jeobá nga katabasenkaoná josʼin koa̱n si̱nʼioá kon (Prov. 17:17). Tsa jngo tichjaa xi nganʼio machjénle, tsakui nichxin koa̱nkaile nga kʼoakʼuínlee nga kuisenkoaa. Ninga kʼoalani, tsa tjínná xi ñaki kjoatsjoacha alikuijin kuinjíotokoán (Gál. 6:2). w21.11 11 párr. 17-19

Kʼianga kui én xi tsje tso síkʼaxki̱ Biblia, kui nchja̱ni nga tsje sʼin mangínkoaa yaoná kʼoa nga tsje sʼin ʼyaxkoán Niná. Kʼoati kui nchja̱ni nga Niná nixálee. Tsje koaan kʼiatsa tsje sʼin koanngínkoaa yaoná, tsa kʼoasʼin jchaxkoán Jeobá josʼin mele kʼoa tsa miyoná koa̱nni. Ningalani nʼio tsje je Jeobá, koaan miyole koaan ninga chjotajée maa. Je Jeobá nʼio tsje. I kitso kʼa ánkje xi serafín ʼmi, xi ya tjíochrian jñani séjna je yáxilele Jeobá: “Tsje, tsje, tsje je Jeobá xi tsʼe chjotakjoajchán. Kijnakitse sonʼnde je kjoajeyale” (Is. 6:3). Kʼianga ndasʼin koatio ngixko̱n Niná tjínnele nga tsje koa̱n je ánkje, kʼoa tsjení xi je. w21.12 3 párr. 4, 5

Ñʼai male nga kjoéjin je xi sʼa xti jmeni xi sʼin, nga̱ je maestro kao je xínkjín xi tsín kotʼaya Énle Niná kʼoatsole nga skuelangʼa katakotʼaya ánni nga nda koationi. Tonga tsa kʼoalani sʼin xti jebi ñaki tokuijin sikʼayale nichxinle. Tonga tsakui nichxin je xijchále kao je ndsʼee xi tjío ya jinjtín kʼoakuitsole nga ñaki to xále Niná katasʼín. Jméni xi kuinyakao je xi sʼa xti nga nda skoéjin jmeni xi sʼin. Koaan kʼoexkia Efesios 5:15-17. Kʼianga jekʼoexkia texto jebi, koaan i̱ tso xi sikjaʼaitsjenjin: “Jméni xi mele Jeobá nga sʼian. Jméni xi tsjoa koaya kon. Jméni xi sʼian nga ndasʼin sichjén nichxinna”. Kuenta sʼiaan nga jeme tjóxin jmeni xi chonle je Na̱i i̱ Sonʼnde. w22.01 27 párr. 5

Kʼiáni nga chjotatjenngile Jesús koan je Santiago. Kʼiaa nga jejaʼáyanile Jesús. Je Jesús “tsʼatsenle Jacobo [xi tsonile je Santiago] koanskanni ngatsʼi pastro” (1 Cor. 15:7). Saʼnda nga kʼia, chjotatjenngile Jesús koanni je Santiago. Kʼoati ya tíjna Santiago nga tjíoxkó chjotatjenngile Jesús kʼianga tjíokoyale nga kʼoaile je nganʼiotsjele Niná (Hech. 1:13, 14). Xi koanskanni, yaa tsakʼejnajinle je cuerpo gobernante nga siglo 1 (Hech. 15:6, 13-22; Gál. 2:9). Kʼoa tongini nga nó 62, jé Niná tsakándiaale nga jngo carta kiskile je chjotale Cristo xi ya ngʼajmi koai. Kʼoati nʼio basenkaoná tsanda ñá jmeni xi kiski je Santiago, ni ya ngʼajmi tjínná kjoachoya kʼoa ni i̱ Sonʼnde (Sant. 1:1). Je chjota xi Josefo tsakʼin, xi kʼia tsakʼejna nga siglo 1. Kʼoakitso nga je tsakʼéxá je naʼmitítjonle chjota judío xi Anán tsakʼin nga kinikʼien je Santiago. Kixi kitʼale Jeobá je Santiago saʼnda nga kʼien. w22.01 8 párr. 3; 9 párr. 5

Jngo koya xi bakóyaná texto xi kamaxkia ndʼaibi kuinga likui koa̱n kʼoasʼin si̱kjaʼaitsjeen nga je Jeobá sikuinda ʼndeʼndená kʼianga kjoa kuitjátojiaan. Joni Jesús, machjén nga ñaki kʼoakʼoé tokoán nga kixi kjuintʼalee Niná ningalani si̱kʼienná (Mat. 16:24, 25, TNM). Kʼoati ʼyaa nga tsín tsjoáʼnde je Niná nga kui kjoa kuitjátojiaan je xi tsín chókjoajinná (1 Cor. 10:13). Je xi kʼoati bakóyaná jokoan je Jesús kuinga sakʼoa tsín kixi tíjna jmeni xi koa̱ntʼeen (1 Ped. 2:19, 20). Ali tsakuijin majtikeniná je chjota kʼiatsa chʼaotjín jmeni xi tinʼia, kui majtikeniná nga Énle Niná ʼmiyasoán kʼoa nga tsín ya nojiaan yaoná jmeni xi chon sonʼnde (Juan 17:14; 1 Ped. 4:15, 16). Je Jesús koanjinle ánni nga kitsjoaʼndeni Jeobá nga kjoa jaʼatojin. Tonga tjínkʼa je choʼndale Niná xi kui síkjaʼaitsjen ánni nga tsjoáʼndeni je Jeobá kʼianga kjoa faʼatojin (Hab. 1:3). Nga mamakená je Jeobá kʼoa nga tsejta, ali tsa kʼoajinsʼin síkjaʼaitsjen nga tsínle kjoamakjain je choʼndale, nga̱ be nga toje xi koa̱nle sinʼio tokoán (2 Cor. 1:3, 4). w21.04 11 párr. 9, 10

Je Jeobá sasénle nga kʼoasʼin ʼyaxkoán josʼin mele, nga bakoá kjoatsjoacha kao kjoaxkóntokon. Kuinga kʼoasʼin ʼyaxkónñá nga̱ tsjoachañá kʼoa bakinle nga jchaxkón. Jngo koya josʼin yaxkónñá je Jeobá kʼiaa nga bʼetsʼoalee. Je Biblia kui síngósonkao nga bʼetsʼoalee Niná josʼin kisʼenda je xongó xi tsakʼaitʼale ya ndʼianajño kʼoa xi tsakʼaitʼale ya yo̱ngo̱ nga jekoanskanni. Nga xongó tsakʼaitʼale Niná kisasenle. Tikʼoasʼinni, je Niná sasénle kʼianga ni̱ma̱ná nroajinni nga bʼetsʼoalee ninga tokʼiakjoan kjoaʼaítsjenná jmeni xi kʼuínlee (Prov. 15:8; Deut. 33:10). Je Jeobá nda sʼe kon nga kʼoaʼmilee nga tsjoachaa kʼoa nga bʼailee kjoanda. Je Niná kui xi mele nga kʼoéyanajmílee jotjín tokoán, jmeni xi nikjáojiaan kʼoa jmeni xi choyalee. Kʼianga kjesa bʼetsʼoajinlee, machjén nga títjonkjoanla si̱kjaʼaitsjenjiaan jmeni xi kʼuínlee. Kʼiatsa kʼoasʼiaan, yaa koa̱nngóson nga bʼetsʼoalee joni tsakui tibʼaitʼalee je xongó xi ñaki nda. w22.03 20 párr. 2; 21 párr. 7

Kʼianga kjoaʼaí Armagedón, alikui ñá xi kuixónñá ʼyani xi kuitjontjai kʼoa ʼyani xi mai, jé Jeobá xi kuitsoni ʼyani xi koakole kjoamatokon (Mat. 25:34, 41, 46). A jé Jeobá si̱nʼiotʼaa nga kʼia, axo tsín tije si̱xánilee tsa tsín sa̱sénná jmeni xi sʼin. Machjén nga je Jeobá si̱nʼiotʼaa ndʼaibi ánni nga je si̱nʼiotʼasíñá nichxin xi sʼa nroa. Si̱kjaʼaitsjenjiaan josa̱tío tokoán nga jeya ʼndenaxó tiyoaa. Alikui tisʼe̱ni religión ndiso, alikui tiʼya xi negocio sʼinni kʼoa alikui tiʼya chjotaxá sʼe̱ni xi totaon skoe̱ chjota. Alikui tisʼeni chʼin, alikui tikoa̱njchíngañá kʼoa tsín tiʼya xi kuiyáni. Je Na̱i kao sénnichxin xi chʼao kjoan jngo jmi nó si̱katíoʼyanʼio. Tjóxin ngayeje kjoa xi tíbajngi je Na̱i (Apoc. 20:2, 3). Nga kʼia, nʼiojin tsjoa sa̱tío tokoán nga je Jeobá kininʼiotʼaa kʼoa nga ñaki tsakʼejngoaa tokoán nga je xi ngisa nda be jmeni xi sʼín. w22.02 6, 7 párr. 16, 17

Je Jesús kjoanyʼán tsakásjai kʼoa kʼoakitsole xi kjaʼaí nga katabʼéndajin kʼiatsa jme kjoa tjínle. Kʼoakitso nga tjínnele si̱chatʼalee xíngiaa kʼiatsa mená nga sa̱sénle Jeobá josʼin tiʼyaxkoán (Mat. 5:23, 24). Kjitʼaa kʼoakitsole je pastrole nga tsínkui katafáotiyani ʼyani xi ngisa ngʼa tíjna (Luc. 9:46-48; 22:24-27). Tsa mená nga nda kjuinkoaa xíngiaa ali tsa tokuijin xi machjén nga tsín kjoa kuinójiaan yaoná. Machjén nga ñá títjon si̱chatʼalee xíngiaa kʼoa kʼoakʼuínlee je ndsʼee nga katabʼéndajin tsa jme kjoa tjínle (Filip. 4:2, 3; Sant. 3:17, 18). Koaan si̱kjaʼaitsjenjiaan jebi: “A tijnandaña ninga ñʼai koa̱nna nga sichatʼale xi ngikʼa. A bʼengijtiña tokoan kʼiatsa jngo ndsʼee kisikiʼaon kjoafaʼaitsjenna. A kui koyale nga je katasíjéna kjoanichatʼa. Axo an títjon sijéle kjoanichatʼa ninga tsín an tjínna jée”. w22.03 10, 11 párr. 10, 11

Jenʼio kjoatse kʼoakitso je Biblia kʼianga je choʼndale Niná kao kjoatsjoa sixále nga koaitjenngi josʼin koandiaa je ʼNdíle (Sal. 110:3). Tíbitjoson je én jebi nichxin xi tiyoaa ndʼaibi. Nga xki̱ nó siento millón hora tsoyason je choʼndale Niná, kao kjoatsjoa kʼoasʼín kʼoa tsín machjíle. Kʼoati síkʼaya nichxin nga binyakao je ndsʼe̱, nga tsjoánganʼiole kʼoa nga binyakao nga sa nʼio sa nʼio sa̱tío kjoamakjainle. Kʼoa je xi siervo ministerial sʼin tjío kao xi chjotajchínga sʼin tjío síkʼaya nichxin nga batíonda jmeni xi faʼa ya kjoajtín, nga batíonda kjoanokjoaya kʼoa nga síxatʼa je ndsʼee nga tsjoánganʼiole. Kuinga tsjoake je ndsʼe̱ kʼoa kuinga tsjoake je Jeobá nga kʼoasʼínni (Mat. 22:37-39). Je Jesús jé ngisa títjon kuenta kisʼin xi ngikʼa. Kʼoa nga chjotatjenngile maa bʼenelee yaoná nga mangíntjenngiaa choa̱le (Rom. 15:1-3). Ndasʼin kuichomani tsa kʼoasʼiaan. w22.02 20 párr. 1, 2

Me tongatsʼi je chjota ya naxinandá Israel nga tsojmi tsakántje, kʼoa je xi choʼnda ma kʼiaa machjíle nga maxon. Kʼiatsa jngo chjota xi tsín koanchjíle nga koanxon, kʼoati tsín koan tsakatse je tsojmi xi koanchjénle je familiale nga kui nichxin. Je Jeobá i kitso: “Machjénle kʼoa kui kʼoéjnakonni jokji koa̱nchjíle” (Deut. 24:14, 15; Mat. 20:8). Nichxin xi tiyoaa ndʼaibi, nkjín chjota xi tsín tsa nyaon nyaon machjíle nga síxá, tsakui nichxin ñandia kʼoa tsa jao kʼa machjíle nga jngo sá. Tonga tojo nʼio machjén je kjoafaʼaitsjen xi faʼaitʼa Levítico 19:13. Tjínkʼa chjota xi tsín kʼoakji bʼéchjíle je choʼndale jotjín tjínnele koa̱nchjíle tsakai. Tokui fini nga ñʼai chonle je ʼndíchjota kʼoa nga kjoanʼio sixá ninga tochoa koa̱nchjíle. Je chjota xi kʼoasʼín joxi jéni tjíokjoé je tao̱n xi koa̱nchjíle je chjota xi síxá. Tsa jngo chjotale Cristo xi choʼnda tjínle, nʼio tjínle kjoandosin nga kuenta sʼin jebi. w21.12 10 párr. 9, 10

Kuijin koanfatinile je Jesús nga tse kjoañʼai kinikjaʼá kʼoa nga yá kisʼetʼa. Alikui soa koanle kʼianga kʼoakitso jokisʼe kon. Kui bakóyaná nga tsín chʼaotjín kʼianga kʼoabixoán josatío tokoán. Me tongantsjai nga tsín tso tokoán kʼianga ʼya xi bʼeyanajmílee josʼe tokoán. Tonga ngisaa ndatjín nga kʼoakʼuínlee xíngiaa kʼianga nganʼio machjénná. Tobʼelañá, kʼiatsa jekjimajchíngaa kʼoa tsa timʼee, machjénná je nganʼiole miyoná kʼianga koaikatsená tsa jmeni xi machjénná kʼoa tsa tsʼe chjinexki koaikaoná. Kʼoa tsa jetinikinroajeen tokoán, koaan kʼoakʼuínlee jngo xi chjotajchínga sʼin tíjna kʼoa tsa kjaʼaísa ndsʼee xi kʼoati tjínle kjoafaʼaitsjen xi kjuinrʼoéná kʼoa xi sinʼiojinná (Prov. 12:25). Je ndsʼee tjao bená kʼoa tjíonda nga binyakaoná kʼianga kjoa bitjatojiaan (Prov. 17:17). Tonga je ndsʼee alikui be jotjío tokoán, kuinga machjénni nga ñá si̱jélee nganʼio. w21.04 11, 12 párr. 11, 12

Ñʼai ma sakʼoaná kʼianga bʼantjaiya josʼin tinixálee je Jeobá. Nʼio nkjín ndsʼee xi jekjoatse nga ñaki to xále Niná tjíosʼín, tonga ndʼaibi tjíonikʼantjaiyaa josʼin tjíosíxá, kʼoa tjínjinkʼa xi tjíosíkatío josʼin tjíosíxále Niná nga jekjimajchínga. Toxá ba satíoni tokoán kʼianga kʼoama. Je xi koasenkaoná nga tsín ba sa̱tío tokoán nga bʼantjaiya josʼin tinixálee Niná, kuinga kuenta sʼiaan josʼin síkjaʼaitsjen Jeobá. Nʼio nkjín koya jmeni xi tísʼín Jeobá ndʼaibi kʼoa kui kjoanda tjínná nga tojngo tinixá kao je (1 Cor. 3:9). Je xi tsín bʼantjaiya kui jokji tsjoakená je Jeobá. Ningalani tíbʼantjaiyajin josʼin tinixálai je Niná, alikuijin nʼio nikjaʼaitsjain ánni nga kʼoakjimani, ʼndele nga tokui si̱kjáojin jmeni xi tinʼiai nichxin xi tífaʼato tosa tijélai Niná nga katabasenkaoli nga ngisa ndasʼin si̱xálai nichxin xi sʼa nroa (Ecl. 7:10). Tsín si̱kʼajenlee tokoán, ánni nga tosi tonda tsjoa sa̱tíoni tokoán kʼoa kixi kjuintʼanilee Niná ninga kʼoantjaiyaa josʼin tinixálee. w22.03 17 párr. 11, 12

ʼYáni xi bakóle Jeobá je xi ñaki kjoatsjoacha. Je Biblia kʼoatso nga nʼio nkjín koya jmeni xi tsjoacha maa, jolani je kjoabichakjáya, kjoankjíntokon, vino, siti̱ kao kjoachjine (2 Crón. 26:10; Prov. 12:1; 21:17; 29:3). Tonga tojé chjota xi sakóle xi ñaki kjoatsjoacha ali tsojmijin. Tonga a kui xi tsonile jebi nga bakóle Jeobá je xi ñaki kjoatsjoacha toʼya chjotani. Mai, nga̱ kjoatsjoacha jebi kjaʼaí sʼin tíjna. Tojé bakóle je xi nʼio miyole mani. Je Niná kixi fitʼale je miyole, nʼio tse kjoanda tsjoále kʼoa tsínkʼia tsjiónkon. Jebi likui mangóson kao kjoatsjoacha xi bakóle Jeobá ngatsʼi chjota. Je Jesús i kitsole jngo chjota xi Nicodemo tsakʼin: “Niná kʼoasʼin koantsjoake sonʼnde [xi tsonile je chjota] nga kitsjoa je xi tojngo ʼndíle, jméni nga ngatsʼisíni xi makjainle tʼatsʼe, likui cha̱, tonga tjínle kjoabijnachon ngantsjai” (Juan 3:1, 16; Mat. 5:44, 45). w21.11 2 párr. 3; 3 párr. 6, 7

Ñʼai kjimachon nichxin xi tiyoaa ndʼaibi kʼoa tsakui nichxin ngisa tiñʼai koa̱nchonngáni nichxin xi sʼa nroa (Mat. 24:21). Ngatsʼiñá nga mená katatjoxin ngayeje kjoa jebi. Kʼoa kuicho nichxin nga tsín tikui si̱kjaʼaitsjenñá kʼoa tsín tikʼia kʼoakoa̱nni (Is. 65:16, 17). Kuinga machjénsíni nga tosi tonda katakaná. Je Jesús kʼoakitso ánni machjénsíni nga kʼoasʼiaan. I kitso: “Xi totʼatsʼe kjoatsejtano si̱kinjao kjoabijnachonno” (Luc. 21:19). Je xi koasenkaoná kuinga si̱kjaʼaitsjenjiaan jméni xi tjíobinyakao xi kʼoati kui kjoa tjíofaʼatojin. Jé Jeobá xi ngisasa nda choa̱ bʼéjnaná nga tíkale. Kuinga kʼoabixónñá nga̱ nʼio tse kjoa tjín i̱ Sonʼnde nga je Na̱i kjinentsja kʼoa je Jeobá koaanle nga ngotjo kjoaʼaxinni xi chʼaotjín, tonga tíkoyakaola saʼnda nga kuicho nichxin xi tíjnachoa̱le (Rom. 9:22). Nga kjesa faʼaijin nichxin jebi, je Jeobá tíkale. w21.07 8 párr. 2-4