Septiembre

Ningalani nʼio ndasʼin kitsoya je Jesús, tjínkʼa chjota xi kʼoakitso nga kʼia koa̱nkjainle nga je xi Mesías ma kʼiatsa jngo choa̱ koakole. Nga tsín jme kjoaxkón tsakʼéjna Jesús ya ngixko̱n alikui koankjainle (Mat. 16:4). Jméni xi tso je Biblia. Je Isaías i kitso xi tʼatsʼe Mesías: “Alikui skíʼndáxá ni kuinchja̱tijinla, tsín kuinóʼyale jta̱le ya yandiaa” (Is. 42:1, 2). Alikui yaole tsakʼasjengʼa je Jesús kʼianga kitsoyason. Alikui yo̱ngo̱ tsakʼénda, alikui kʼoakjoan najño tsakʼakjá jokjoan xi tsakʼakjá je chjota xi nyatítjonle religión, kʼoa alikui kui jaʼaín tsakʼaile je jaʼaín xi bʼaile chjota xi nyatítjonle religión. Ningalani xkón jetíjna kʼianga kisʼendajinle kjoa, alijme kjoaxkón tsakʼéjna ngixko̱n Herodes (Luc. 23:8-11). Ningalani tsakatío kʼa kjoaxkón nga kitsoyason, je xi ngisa chjí tsabekon kuinga kitsoyason je Énle Niná. Kʼoa kʼoakitsole je chjotatjenngile nga kui xá jaʼaini (Mar. 1:38). w21.05 4 párr. 9, 10

Jé fasjee chjota xi mele nga sʼe̱le kjoabijnachon xi tsínkʼia fetʼa (Hech. 13:48). Kʼianga chjotatjenngile Cristo koa̱n je chjota tjínnele kuinyakoaa nga katamajinle jotso je Énle Niná, nga katamakjainle kʼoa nga katasítjoson jmeni xi tíkotʼaya (Col. 2:6, 7; 1 Tes. 2:13). Ngatsʼi ndsʼee xi tjío ya jinjtín koaan kuinyakao je chjota xi Biblia tjíokotʼaya nga koakole kjoatsjoacha kʼoa nga nda skoéya nga fichó kjoajtín (Juan 13:35). Je ndsʼee xi tíbakóyale kʼoajin titse nichxin sikʼayale nga koasenkao nga sikʼéjna jmeni xi makjainle tsakai (2 Cor. 10:4, 5). Tsee nichxin kuichomani nga sikʼantjaiya yaole je chjota xi Biblia ʼmiyalee kʼoa nga koa̱n koaisʼenngindá, tonga nʼio ndasʼin kuichomani tsa kʼoasʼin kuisenkoaa. w21.07 3 párr. 6

Ñá xi testigole Jeobá maa, a ñaki tjínjngoo tokoán nga kui xi kixi bakoyaa kʼoa nga kʼoasʼin ʼyaxkoán Niná josʼin mele. Je pastro Pablo ñaki tsakʼéjngo kon nga Énle Niná xi koankjainle (1 Tes. 1:5). Kʼoa ali tsa tokuijin nga kisʼejngoni kon nga tsjoa tsakáya kon jmeni xi tso je Énle Niná. Kuinga kʼoakitsoni nga nʼio nda kiskotʼayajin. Koankjainle nga “ngayije xo̱n Escritura [tʼatsʼe] Niná jinroani” (2 Tim. 3:16). Nga kiskotʼayajin Énle Niná je Pablo, koanjinle je choa̱ xi bakó nga je Jesús je Mesías xi tíchoyale. Tonga je chjotatítjonle religión alikui kʼoakisʼin. Chjota jebi jaonkjaín koan nga̱ kʼoakitso nga je Niná tjíosíxále, tonga alikuini kʼoakisʼin josʼin mele Niná (Tito 1:16). Je Pablo alikui totsakjaʼájin jñanile xi koanmele kisitjoson kʼoa jñanile xi mai. Koanmele kitsoya je Énle Niná kʼoa kʼoasʼin kikao yaole jotso Niná (Hech. 20:27). w21.10 18 párr. 1, 2

Ningalani ñá binyakoaa chjota nga be xi tʼatsʼe Niná, xi kuenta sʼiaan kuinga je Niná basenkao nga makjainle (1 Cor. 3:6, 7). Je Jeobá nʼio chjí bekon ngatsʼi chjota. Kui kjoanda títsjoáná nga tibisenkoaa je ʼNdíle nga naxinandále Niná katabatiojin chjota xi xinxin naxinandále nga kjesa faʼaijin kjoafetʼa (Ageo 2:7). Kʼianga ʼmiyasoán yaa mangósoán josʼín je xi chjota fikásjai kʼianga kixó fine, ninga tsín tongatsʼi nga koa̱nsjaile chjota, nʼio chjíle je xá xi sʼín ngatsʼi. Kʼoatisʼinni nga ʼmiyasoán, alikui ʼyaa jotjínsa chjota koa̱nkjainle je Énle Niná kʼoa kuitjontjaile yaole. Tsakui nichxin ñá sichjénná je Jeobá nga kuisenkoaa chjota jebi. Je Andreas, xi ya Bolivia tíjna, itso: “Kʼianga jngo chjota makjainle Énle Niná kʼoa fisʼenngindá, ali tojngojin mani xi basenkao, binyakaoñá ngatsʼiaa”. Kuinga tosi tonda kʼuínyasonñá. Tsa tsín si̱kʼajenlee tokoán, jé Jeobá koasenkaoná kʼoa nʼio tsjoa sa̱tío tokoán nga kʼuínyasoán. w21.05 18, 19 párr. 19, 20

Je chjota xi cho̱ tsoa kui xi mele nga tjoéle kʼoa tsa sikʼien je cho̱ xi tíkoxi̱nle. Kʼianga xóntsja je cho̱, nkjín koya che̱n síchjén, jolani je xi kisikʼaxki̱ je chjota xi kichokonle Job (Job 18:8-10). Je chjota xi cho̱ tsoa títjonkjoanla kotsenle josʼín kʼoa jmeni xi kjen je cho̱, kʼoa kui che̱n síchjén jmeni xi ngotjo jtsaoyani. Kʼoakjoánti síkaoná tsanda ñá je Na̱i. Kuenta sʼín jonʼia kʼoa jmeni xi tsjoachaa, kʼoa kui batíobasenná je che̱n xi ngotjo jtsaoyañá. Tonga je Biblia kʼoatsoná jósʼiaan nga tsín ya jtsaoyaa je che̱nle Na̱i. Kʼoa tsa jeya títsaoyaa, jósʼiaan nga tsín tosi tonda kʼoakatamaa. Je che̱n xi nʼio síchjén je Na̱i kui je kjoangʼakon kao kjoaxkaiʼa. Jejmi nó tjínle nga kui tísíchjén. Kʼoasʼín josʼín jngo chjota xi nise tsoa kʼianga kui batíole jme xi tsjoake ánni jtsaoyani che̱n (Sal. 91:3). Tonga tsa si̱kuindaa yaoná alikui ya jtsaoyaa je che̱nle, nga̱ je Jeobá tsoyaná jme che̱n xi síchjén je Na̱i (2 Cor. 2:11). w21.06 14 párr. 1, 2

Je ndsʼee xi jekoanjchínga nʼio chjíle. Je Énle Niná jngo corona síngósonkao je ntsja̱chxoa (Prov. 20:29). Tonga sakʼoa tsín kuenta nʼia jokji chjíle je ndsʼee xi jekoanjchínga. Je ndsʼee xi sʼa xti nʼio binyakao kʼianga bechjí je ndsʼee xi jekoanjchínga. Je Jeobá nʼio chjí be je ndsʼee xi jekoanjchínga. Be jokjoan kʼoa josʼín. Ndsʼee jebi nʼio tse kjoafaʼaitsjen tjínle jojekji tse tjíosíxále Jeobá. Kʼoa kʼianga bʼéyanajmíle je xi sʼa xti nʼio tsjoa sʼe kon je Jeobá (Job 12:12; Prov. 1:1-4). Je Jeobá kʼoati chjí be nga tjíokale ndsʼee jebi (Mal. 3:16). Ningalani tse kjoa tjíofaʼatojin, tjíobakó nga nʼio tjío kjoamakjainle. Ngisaa titjíojngongáni kon nga sitjoson jmeni xi tso je Jeobá tikʼoajinni nga tokʼia kiskotʼaya. Kʼoa je Jeobá nʼio tsjoake ndsʼee jebi nga̱ tsín tjíobájñále nga tjíotsoya xi tʼatsʼe ninga jekoanjchínga (Sal. 92:12-15). w21.09 2 párr. 2, 3

Machjén nga kjitʼa si̱kjaʼaitsjenjiaan jebi: “A tokʼiaa nda sʼe tokoan tsa je xi ngikʼa singósonkoa yaona. Ánni nga tsjoanganʼioña ya jinjtín, a kuinga ngisa ngʼa kʼoasje yaona tikʼoajinni je ndsʼee, axo kuinga ngisa ndasʼin sixále je Jeobá”. Je Biblia kʼoatso nga tsín koa̱n nga je xi ngikʼa si̱ngósonkoaa yaoná. Kʼiatsa je xíngiaa si̱ngósonkoaa yaoná kʼoajinsʼin si̱kjaʼaitsjeen nga ngisa nda nʼia ñá, kʼoa tsa kʼoasʼin si̱kjaʼaitsjeen ngʼakonjin koaan. Xi ijngosani, tsa ngisa nangi chʼa̱sjee yaoná, kjuinroajenjin tokoán (Rom. 12:3). Je xi kuenta sʼiaan kuinga kui xá jaʼaikaoniná Jeobá jinnaxinandále nga tsjoacha koaan kʼoa nga si̱tjosonlee je ʼNdíle, ali tsakuijin tsa naskásʼin matseen, tsa nda maná nokjoaa kʼoa tsa nʼio ʼyanáje̱ (Juan 6:44; 1 Cor. 1:26-31). w21.07 14, 15 párr. 3, 4

Kʼianga koa̱nchjotseya je kjoafaʼaitsjenná, machjén nga kʼoétsʼoaa, nga chótʼayá je Énle Niná kʼoa si̱kjaʼaitsjenjiaan jmeni xi tso. Tosi tonda kʼoasʼiaan kʼoa kʼoakʼuínlee je Jeobá nga katabasenkaoná. Kʼiatsa je xi ngikʼa ningósonkoaa yaoná, kui nganʼiotsjele Jeobá koasenkaoná nga tsín tikʼoasʼianñá. Kʼoati koasenkaoná je Jeobá nga jchaa tsa ngʼakon kjimaa kʼoa tsa xinkon kjimaa. Tsa kʼoalani kjimakjoaan, tokjoan si̱ndayaa yaoná. (2 Crón. 6:29, 30). Je Jeobá be jotjín je ni̱ma̱ná. Be jokji tibʼenelee yaoná nga tsínkui kʼoanʼia jmeni xi chon sonʼnde, kʼoa be nga sakʼoa tsín choa ñʼai maná nga kui kʼoanʼia xi ndatjín nga̱ chjotajée maa. Kʼianga be je Jeobá jokji bʼenelee yaoná, sa tsjoake sa tsjoake maná. Kʼianga koa̱njinná jokji tsjoakená je Jeobá kui choa̱ síchjén jokji tsjoake jngo na̱ je ʼndíleele (Is. 49:15). Kʼoati kji tsjoake maná je Jeobá kʼianga bʼenelee yaoná nga kui kʼoanʼia xi ndatjín kʼoa nga kʼoakji nixálee jokji tjen kʼoamaná. Nʼio tsjoánganʼioná nga ʼyaa jebi. w21.07 24, 25 párr. 17-19

Tsjoa sa̱tío tokoán tsa kʼoénelee yaoná jokji tjen kʼoakoa̱nná nga si̱tjosoán tojme xá xi sʼe̱nená ya jinnaxinandále Jeobá. Kʼoénelee yaoná nga ngisasa tse kʼuínyasoán kʼoa kʼoainganʼioá ya jinjtín (Hech. 18:5; Heb. 10:24, 25). Tongini nda chótʼayá jmeni xi kjoaʼa ya kjoajtínná ánni nga kʼoainganʼionilee xi ngikʼa nga kʼoee comentarioná. Si̱tjosoán kʼianga jme xi sʼenená nga kuitjá nga satíoná kjoajtín nga jinle xomana. Kʼiatsa jme xá sʼe̱nená ya jinjtín tokjoan si̱tjosoán kʼoa ndakjoan si̱tjosoán. Likui kʼoasʼin si̱kjaʼaitsjeen nga tsín nʼio tjínle kjoandosin je xá xi sʼenená kʼoa nga tsín machjén nga nichxinná si̱kʼayalee. Tosa kʼoénelee yaoná nga sa nda sa nda si̱tjosoán je xá xi sʼe̱nená (Prov. 22:29). Kʼianga sa nda sa nda si̱tjosoán je xá xi sʼenená ya jinnaxinandále Jeobá, ngisaa koa̱nmiyoaa je Niná kʼoa ngisaa tsjoa sa̱tío tokoán (Gál. 6:4). Tsa kʼoasʼiaan, tsjoa sa̱tío tokoán kʼianga kjaʼaí xi kʼoaile je xá xi ñá mená tsakai (Gál. 5:26). w21.08 22 párr. 11

Alikui ngʼakon katamaa kʼoa kʼoaiʼndee nga je Jeobá katabakóyaná. Tojo ma je ni̱ma̱ná nga chʼin katʼale, nga kui xosíkao nga tsín tinanda síxáni, kʼoati ma nga ngʼakon maa, ñʼai maná nga nitjosonlee je Jeobá. Nga ngʼakon koan je chjota fariseo, alikui koankjainle nga ʼNdíle Niná je Jesús kʼoa tsín koankjainle nga kui nganʼiotsjele Niná tsakándiaale (Juan 12:37-40). Nga kʼoakisʼin, alikui kisʼele kjoanda nga koa̱n koatio ngantsjai nichxin (Mat. 23:13, 33). Kuinga nʼio chjínile nga tosi tonda kui Énle Niná kao nganʼiotsjele katabándiaaná nga si̱ndayaa yaoná, josʼin nikjaʼaitsjeen kao jmeni xi nʼia. Nga nangitokon koan je Santiago kitsjoaʼnde nga kitsoyale Jeobá. Kʼoa xijekoanni, nʼio nda koanle kitsoya nga̱ nangitokon koan. w22.01 9 párr. 7

Tsa kʼoasʼiaan jokitso je Jesús kʼoa tsa kjitʼa kʼoétsʼoaa, ñaki sʼe̱jngo tokoán nga nrʼoéná je Niná nga bʼetsʼoalee kʼoa koasenkaoná (Col. 4:2). Tsakui nichxin kʼoasʼin nikjaʼaitsjen sakʼoa nga tsín ndi̱to̱n basenkaoná je Jeobá nga bʼetsʼoalee, tonga je Jeobá kʼoatsoná nga kʼiakjoan koasenkaoná kʼianga machjénná (Heb. 4:16). Kuinga tsín koa̱n kʼoasʼin si̱kjaʼaitsjenñá nga tsín nda tísʼín je Jeobá tsa tsín kʼia basenkaoná kʼiani nga mená ñá. Tobʼelañá, nʼio nkjín mani xi jekjoatse nga kui tjíosíjéle Jeobá nga skoe̱ jósʼin je Chjotaxále nga kjoaʼaxin ngayeje xi chʼaotjín i̱ Sonʼnde. Je Jesús kʼoakitso nga kui si̱jé nga katabatéxoma je Chjotaxále Niná i̱ Sonʼnde (Mat. 6:10). Tsínjin nda sʼiaan tsa tsín tikoa̱nkjainniná xi tʼatsʼe Niná tokuini nga tsín kʼia tífetʼa jmeni xi chon sonʼnde kʼianga mená ñá (Hab. 2:3; Mat. 24:44). Xi ngisa ndatjín nga sʼiaan kuinga tosi tonda chóyalee je Jeobá saʼnda nga kjoaʼaxin jmeni xi chon sonʼnde. Kʼoa tsín jao kʼoé tokoán nga koasenkaoná kʼianga kʼoétsʼoalee. Je kjoafetʼa kʼiakjoán kjoaʼaí kʼianga choa̱le, nga̱ je Jeobá jetíjnachoa̱le je nichxin kao hora kʼiani kʼoakoa̱n. Kʼoa koa̱njinná ngatsʼiaa nga ñaki kʼiakjoán choa̱le nga kʼoakoa̱n (Mat. 24:36; 2 Ped. 3:15). w21.08 10 párr. 10, 11

Je ndsʼee xi jekoanjchínga xi nangitokon, majinle nga tsín tikʼoakji chókjoanile nga sixále Jeobá jokisʼin ngasʼa. Tobʼelañá, je xi superintendente xi tsʼe circuito sʼin tjío, jetsín tikʼoasʼin síxáni kʼianga jebichóle 70 nó. Tsakui nichxin ñʼai koa̱nle nga sikatío xá jebi, nga̱ nʼio tsjoake nga binyakao je ndsʼee kʼoa nʼio tsjoake nga kʼoasʼin síxále Jeobá. Tonga majinle nga ngisa nda kuitjosonle xá jebi je ndsʼee xi sʼa xti. Kʼoati sʼín ndsʼee jebi jokisʼin je chjota levita nichxin kjoatse, kʼianga jekichole 50 nó alikui tiya ndʼianajño kisixáni. Ali tsakuijin je xá xi kisʼenele chjota levita xi tsjoa tsakatío kon, tosaa kui xi tsjoa tsakatío kon nga tsakʼénele yaole jokji tjen kʼoakoanle nga kisixále je Jeobá kʼoa nga tsakinyakao je xi sʼa xti (Núm. 8:25, 26). Nichxin xi tiyoaa ndʼaibi, je ndsʼee xi tsínti superintendente xi tsʼe circuito sʼin tjíosíxáni, ninga tsín tinkjín jtín kjinentsjani, nʼio binyakao je ndsʼee ya jtín jñani tjío. w21.09 8, 9 párr. 3, 4

Je Jesús jngo choa̱ tsakʼéyanajmí tʼatsʼe jngo ti xi ki, josʼin faʼaitʼa ya Lucas 15:11-32. Jngo ti xi tsʼantjaikjoa koan kao nʼaile, kitjo ndʼiale kʼoa nʼio kjin ki. Jñani kicho alikui ndasʼin kikao yaole. Tonga kʼianga jekjoa tíjnajin, kʼiaani kisikjaʼaitsjenjin jmeni xi kisʼin kʼoa koanjinle nga nʼio ndasʼin tsakʼejna ya ndʼiale nʼaile. Tojo kitso je Jesús, kisikjaʼaitsjenjin ti jebi, kinroaa ijngokʼa ndʼiale kʼoa kisijéle kjoanichatʼa nʼaile. Nʼio tjínle kjoandosin nga koanjinle nga chʼao kisʼin, kui xi tsakasenkao nga kisikʼantjaiya yaole. Tsakakó nga kʼoakoan kjoaixinile jme xi kisʼin. Choa̱ jebi nʼio tse jmeni xi bakóyaná. Kʼoati tsjoále kjoafaʼaitsjen xi chjotajchínga sʼin tjío nga skoe̱ tsa kʼoakjima kjoaixinile jngo chjota je jée xi tsakajngi. w21.10 5 párr. 14, 15

Je pastro Pablo kʼoakitso jmeni xi tsín koa̱ntinyale kʼoa xi tsín tjóxin. I kitso: “Nga chjoé je kjoatéxoma xi tsín tsa matinya, katasʼená kjoanda. Kʼoasʼin [...] nga xkón jchaa” (Heb. 12:28). Kʼianga jekjoaʼato ngayeje nga koa̱ntinyale naxinandá, tojé Chjotaxále Niná koatexoma (Sal. 110:5, 6; Dan. 2:44). Nʼio maxátíyale nga skoéjin je chjota jmeni xi sʼin. A tosi tonda kui koaitjenngi jme xi chon sonʼnde jñani to kjoeson, axo sikʼantjaiya yaole nga kʼoasʼin josʼin mele Niná kʼoa nga sʼe̱le kjoabijnachon xi tsínkʼia fetʼa (Heb. 12:25). Kʼianga ʼmiyasoán binyakaoñá je chjota nga katakjoéjin jmeni xi sʼin. Si̱kjaʼaitsjeen ngantsjai jmeni xi kitso je Jesús, nga i̱ kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mat. 24:14). w21.09 19 párr. 19, 20

Xi chjotajchínga sʼin tiyo jon xi ngisa kjineno kuinyakao je ndsʼee xi tsín tije Jeobá síxánile xínkjín (1 Tes. 5:14). Koaan kʼia chja̱kaonajmío kʼianga kjesa fitsʼiajin je kjoajtín kʼoa kʼianga jekafetʼa. Tangínchonlao ya ndʼiale kʼoa tʼetsʼoantjao. Kʼoati koa̱n ñatjen kʼuínyason kʼoa tsa kuinókjoalaoje̱ nga chotʼayajtíon ya yaniʼyano. Je xi chjotajchínga sʼin tjío tjínnele koakole kjoamatokon kao kjoatsjoacha kʼoa nga sikuinda je choʼndale Jeobá xi kjoaba faʼatojin (1 Tes. 2:7, 8). Je Jeobá “kaile nga jngo xi cha̱. Tomele nga kjuicho síkʼantjaiya kjoafaʼaitsjenle ngatsʼi” (2 Ped. 3:9). Ningalani ai jée kabajngi jngo chjota, je Niná tojo chjí bekon kjoabijnachonle. Kuenta sʼiaan nga je Jeobá kao kjoabijnachonle ʼNdíle tsakʼéchjíntjaininá nga jngó jngoá. Nga nʼio tsjoakená je Niná, basenkao je chjota xi jekisikjinle nga katasíchriantʼa ijngokʼanile. Kʼoa kui xi mele je Jeobá nga kʼoakatasʼín xi jekisikjinle, tojosʼin bakóyaná je choa̱ xi kisikʼéjna je Jesús tʼatsʼe ti xi ki (Luc. 15:11-32). w21.09 30, 31 párr. 17-19

Koaan tsjoa kʼoái tokuin nga kʼuínyasuin ninga tsín tichókjoanili nga tse ʼmiyasuin xi totʼatsʼe nga jetínroajen nganʼioli kʼoa tsa chʼin tíbʼetʼali. Kataʼyala jokoan je rey David kao chjotale kʼianga kisikjeson je chjota amalequita xi kichosíchéle. Kitjoénile je familiale kao je tsojmi xi koanchéle. Jao siento koanni chjotale David xi tsín ki nga kikján nga̱ jenʼio kijtale, kʼoa jé kisikuinda je tsojmi xi tjíosale. Kʼianga jejaʼaini David nga kikján, kʼoakitso nga ngóson ngóson tjín kʼoakaole je tsojmi xi kisokole (1 Sam. 30:21-25). Kʼoati ma nichxin xi tiyoaa ndʼaibi nga tíʼmiyason je Énle Niná jngo tjíjtsa Sonʼnde. Ninga tsín kʼoakoa̱nná kʼoakji kʼuínyasoán josʼin mená tsakai, tsa kʼoénelee yaoná nga kʼoasʼiaan jokji tjen kʼoakoa̱nná nga si̱xálee Jeobá, tsjoa sa̱tío tokoán ngatsʼiaa kʼianga jngo chjota skoe̱ xi tʼatsʼe Jeobá kʼoa nga koaisʼenngindá. Je Jeobá kui kuenta sʼín jokji bʼenelee yaoná nga nixálee kʼoa tsee kjoanichikontʼain tsjoáná. Kʼoa bakóyaná jósʼiaan nga tsjoa sa̱tío tokoán nga ʼmiyasoán je Énle (Juan 14:12). Alikui jao tjín tokoán nga tsjoa sʼe kon je Jeobá kʼiatsa tsín si̱xa̱nlee. w21.10 27, 28 párr. 15-17

Kʼiatsa jekjimajchíngaa tsakui nichxin kui nʼio si̱kjáojiaan nga tsín tikʼoakoa̱nniná kʼoakji si̱xálee je Jeobá jokinʼia ngasʼa. Tsínjin tikʼoakji nganʼio tjínniná joni nga sʼa xtiaa. Tonga jokji tífaʼato nó, sa tse sa tsee kjoafaʼaitsjen tísʼená nga koa̱n kuinyakoaa je xi sʼa xti nga ngisa nda katasíxále je Jeobá kʼoa nga ngisa tse xá sʼe̱nele. Tsa je ndsʼee xi jekoanjchínga mele kuinyakao je ndsʼee xi sʼa xti, machjén nga nangitokon koa̱n. Je chjota xi nangitokon be nga ngisa ngʼa tjío xi ngikʼa tikʼoani je (Filip. 2:3, 4). Je ndsʼee xi jekoanjchínga xi nangitokon be nga nʼio nkjín koya josʼin ma sʼendajin nga bitjoson jngo xá, kʼoa tsín kʼoasʼin síkjaʼaitsjen nga kʼoakjoán tisʼin xi ngikʼa jokisʼin je ngasʼa (Ecl. 7:10). Ninga nʼio tse kjoafaʼaitsjen tjínle ndsʼee jebi, be nga tíbʼantjaiya jokjimachon sonʼnde, kuinga majinnile nga tjínnele kʼoantjaiya josʼin sʼendajin tsa jmeni (1 Cor. 7:31). w21.09 8 párr. 1, 3

Je Jeobá tsínkʼia kui kʼoatsoná nga kui kʼoasʼiaan xi jndí tíjna. Ñaki tsje je Jeobá. Jebi yaa tsakakó jotso én xi kisʼetʼa je ki̱cha̱ xi tíjnatʼa je najño xi tsakʼékjá jko̱ je naʼmitítjon. Itso én xi jaʼaitʼa: “Tsʼee Jeobá je xi tsje” (Éx. 28:36-38). Nga tsabe je chjota nga kʼoatso én xi tjítʼa ki̱cha̱ xi tíjnatʼa je najño xi tsakʼékjá jko̱ je naʼmitítjon, koanjinle nga nʼio tsje je Jeobá. kʼoa ningalani tsín tsabe kʼa je chjota israelita nga kʼoatso én xi tjítʼa ki̱cha̱ jebi, tojo tsabe nga nʼio tsje je Jeobá. Ngatsʼi chjota israelita kinrʼoé nga kisʼexkia je kjoatéxoma ngixko̱n xi xʼin, xi yánchjín kao xtiʼndí (Deut. 31:9-12). Tsa yalani tsakiyoaa nga kui nichxin, i̱jin tso én xi kinoʼyá: “Anña Jeobá Nináno, [...] kʼoa jon tjínnele tsje koa̱on nga̱ tsjeña an”, “jon tjínnele tsje koa̱on, nga an Jeobá tsjeña” (Lev. 11:44, 45; 20:7, 26). w21.12 3 párr. 6, 7

Tjínkʼa ndsʼee xi nʼio síkjáojin josʼin so̱kole je tsojmi xi machjénle. Tsakui nichxin nʼio ñʼai chon tao̱n ya naxinandále, kʼoa ñʼai male nga sokóle tao̱n xi bajngiʼani je familiale. Kʼoa tsakui nichxin kuinga ñʼai kjimanile nga jekʼien je xi bajngi tao̱n ya yaniʼya. ʼNdele nga kui nʼio si̱kjáojiaan je kjoa xi tjínná, tosa je Jeobá si̱nʼiotʼaa. Kuenta sʼiaan nga kʼoatsoná je Jeobá nga tsjoáná jme xi koa̱nchjénná kʼiatsa je títjon si̱kʼéjnaa (Mat. 6:32, 33). Kʼoa nga kʼoatso je Jeobá sítjoson ngantsjai (Deut. 8:4, 15, 16; Sal. 37:25). Tsa síkuinda Jeobá je nise kao naxó alikui koa̱n nga kui nʼio si̱kjáojiaan jme xi chi̱nee kʼoa jme xi chʼa̱kjá (Mat. 6:26-30; Filip. 4:6, 7). Tojo sʼín jngo nʼai, nga tsjoake je xtile tsjoále jmeni xi machjénle, kʼoatisʼinni je Jeobá, nga tsjoake je choʼndale tsjoále jme xi machjénle. w21.12 16, 17 párr. 4, 5; 18 párr. 8

A sa jenʼio kisikiʼaonná tsa ʼyani, tsakui nichxin saʼnda ya jinjtín tíjna je xi kʼoakisikaoná. Tobʼelañá, je José, tsín kixi tíjna jme xi kisikao xtindsʼe̱. Tonga kui kuenta kisʼin nga je Jeobá kisixále, kʼoa je Jeobá kisichikontʼain je José nga tsejta koan kʼoa nga kiskale. Nga jeki nichxin, je José kisichatʼale je ndsʼe̱, kʼoa tsabe josʼin kisichikontʼain Jeobá (Gén. 45:5). Tojo kisʼin José, kʼoati nda satío tokoán kʼianga nichriantʼalee je Jeobá kʼoa nga choya nga je kʼoendajin kjoa (Sal. 7:17; 73:28). Tsa tsín kixi tíjna jme xi kjimatʼeen kʼoa tsa jmesa kjoa tibitjatojiaan xi aon bʼé tokoán, si̱kjaʼaitsjenjiaan nga je Jeobá chrian tíjnale “je xi nʼio aon tjío ni̱ma̱le” (Sal. 34:18). Je Jeobá tsjoakená nga̱ tsejta kjimaa kʼoa jé nikʼamiaa chʼáná (Sal. 55:22). Jé Jeobá xi Juez sʼin tíjna jngo tjíjtsa Sonʼnde kʼoa be ngayeje jmeni xi kjima (1 Ped. 3:12). Tsa ñʼai tjín kjoa tibitjatojiaan xi tsín ñá kʼoakoa̱nná kʼoéndajiaan, si̱kjaʼaitsjenjiaan nga machjén nga tsejta koaan nga chóyaa nga je Jeobá kʼoendajin kjoa. w21.08 11 párr. 14; 12 párr. 16

Xi ngisa ndatjín kuinga kʼoasʼin si̱chjén nichxinná nga kjoáyatsjoaa ni̱ma̱le Jeobá. Si̱kjaʼaitsjenjiaan jmeni xi ngisa chjíle. Nga nkjín koya jmeni xi nʼia, machjén nga si̱kjaʼaitsjenjiaan jméni xi ngisa chjíle nga kʼoasʼiaan ánni nga nda si̱chjénñá je nichxinná. Kʼoakoan kʼianga kichosíxatʼa Jesús je María kao Marta. Nga nda chjota koan kʼoa nga tsjoa kisʼe kon nga ya kichosíxatʼa Jesús, nʼio nkjín koya tsojmi tsakʼénda je Marta. Tonga je María yaa tsakʼejnangi ndso̱ko̱ Jesús nga kinrʼoéle jmeni xi kitsoya. Alikui chʼaotjín jmeni xi kisʼin je Marta, tonga je Jesús kʼoakitso nga kui xi ngisa ndatjín kiskoejin je María (Luc. 10:38-42). Tsakui nichxin kichajinle María jmeni xi tsakjenni nga kui nichxin, tonga tsínjinkʼia kichajinle jmeni xi kitsoya Jesús. Je María nʼio chjí tsabe jokji nichxin kisikʼaya nga kinrʼoéle je Jesús, kʼoa ñá kʼoati chjí ʼyatokoán jokji nichxin nikʼayalee je Jeobá. w22.01 27 párr. 5, 6

Ninga nangitokon koan je Acab nga kʼia, skanni tsakakó nga tsínni kʼoakoan kjoaixile je jéele. Tosi tonda kitsjoaʼnde nga je Baal tsakʼétsʼoale chjota israelita kʼoa tsín kʼoakitsole nga je Jeobá katabexkón. Kʼianga jekʼien Acab, je Jeobá kʼoakitso josʼin kisikjaʼaitsjen xi tʼatsʼe. Je profeta Jehú kʼoakitso nga chjotatsʼen koan (2 Crón. 19:1, 2). Kʼiatsa kʼoalani koan kjoaixile je jée xi tsakajngi Acab, alikuijin kʼoakitso je Jehú nga tsʼen koan kʼoa nga jtike koan Jeobá. Ningalani kʼoakitso nga kʼoakoannile jme xi kisʼin, alikui tsakakó tsa kʼoakoan kjoaixinile. Jmé xi bakóyaná je choa̱le Acab. Kʼianga kʼoakitsole Elías je kjoañʼai xi kjoaʼa je familiale, je Acab kʼoakitso nga kʼoakoannile je jée xi tsakajngi. Ndatjín nga kʼoakitso, tonga jme xi kisʼin nga koanskanni yaa tsakakóni nga tsínni ñaki kʼoatjín ni̱ma̱le. Kʼianga kʼoama kjoaixininá je jéená ali tsa tokuijin xi machjén nga kʼoakuixoán nga kʼoamaniná, machjén nga koakoá nga ñaki kʼoama kjoaixininá. w21.10 3 párr. 4, 5, 7, 8

Je Isaías profeta koan kʼoa tsakui nichxin kʼoati kui koan chjoónle, nga̱ je Biblia “profetisa” tsole (Is. 8:1-4). Je Isaías kao chjoónle kui ngisa kitsjoale kjoandosin nga je Jeobá tsabexkón. Jósʼin koaitjenngi xi jechixan je choa̱le Isaías kao chjoónle. Kʼiaa nga kʼoasʼin sixále Jeobá jokji tjen kʼoakoa̱nle. Kʼianga nʼio sa̱tío kjoamakjainle koaan ñatjen skótʼaya je én xi tongini kinokjoa xi faʼaitʼa Biblia ánni nga skoe̱ni josʼin bitjoson ngantsjai jmeni xi tso Jeobá (Tito 1:2). Koaan sikjaʼaitsjenjin josʼin sixále Niná nga kʼoati sitjoson je én xi tongini kinokjoa, jolani nga kʼoakitso je Jesús nga tjínnele sa̱kóyason je Énle Niná jngo tjíjtsa Sonʼnde nga kjesa faʼaijin kjoafetʼa. Kʼianga sʼe̱jngo kon xi jechixan josʼin tíbitjoson je én xi tongini kinokjoa xi faʼaitʼa Biblia, ngisaa koa̱nmele nga ndasa sixále je Jeobá. w21.11 16 párr. 9, 10

Kui xi koanmele je Jesús nga nda katamakuinda je na̱le. Kuinga je Juan tsakánenile nga sikuinda. Nga nʼio tsjoake koan je na̱le Jesús kui xi koanmele nga ndasʼin tsakʼejna kʼoa nga tosi tonda je Jeobá katasíxále. Saʼnda nga kui nichxin, je María jo tile sʼin tsabekon je Juan, kʼoa je Juan jo na̱le sʼin kisikuinda je María. Je Jesús nʼio tsjoake koan je na̱le, nga̱ jé kisikuinda saʼnda nga kitsin kʼoa tojo yaa tíjna saʼnda nga kinikʼien. Jmeni xi bakóyaná. Sakʼoa ngisa machriantʼalee je ndsʼee tikʼoajinni je xíngiaa. Tsakui nichxin koa̱njtikená je xi xíngiaa mani kʼoa tsa saʼnda tsjiónkonná. Tonga je Jesús kʼoakitso nga 100 ya kʼoakji kʼoaingajaoniná kʼiatsa je Jeobá si̱xálee kʼoa tsa ya naxinandále kuiyojiaan. Nʼio nkjín xi jo xtiná sʼin jchatokoán, xi jo na̱ná sʼin jchatokoán kʼoa xi jo xijcháná sʼin jchatokoán (Mar. 10:29, 30). Jósatío tokoán nga ya tiyojinlee xi jo xíngiaa sʼin bekonná, xi tongóson sʼin makjainná kʼoa xi tsjoake je Jeobá kao ndsʼee (Col. 3:14; 1 Ped. 2:17). w21.04 9-11 párr. 7, 8

Nga bakoá xi ñaki kjoatsjoacha fasjailee josʼin binyakoaa xíngiaa. Tojo koan nichxin kjoatse, nʼio nkjín testigole Jeobá xi bakóle xi ñaki kjoatsjoacha je ndsʼe̱, kʼoasíkao ninga je xi tsín bexkon. Tobʼelañá, kʼianga jngo kjoaxkón sʼe, kjonangi jósʼin koa̱n tsjoánganʼio. Kʼoa nga sʼejinle nga jngo ndsʼee xi ñʼai kjimale tao̱n, básjaiya josʼin koa̱n kuinyakao. Fitjenngi je choa̱le chjotale Cristo xi tsakatio nga siglo 1 xi Macedonia tsʼe nga kitsjoasonsa jokji tjen kicho nganʼiole (2 Cor. 8:3). Nichxin xi tiyoaa ndʼaibi, je xi chjotajchínga sʼin tjío kʼoatsole je ndsʼee xi tjío ya jinjtín nga nʼio nda sʼín nga binyakao xi kjaʼaí. Nʼio binyakao je ndsʼee nga kʼoaʼmilee nga nʼio nda tjíosʼín (Is. 32:1, 2). w21.11 11 párr. 14; 12 párr. 21

Ngatsʼiñá nga machjén sakʼoaná kjoafaʼaitsjen. Sakʼoa je nijélee kjoafaʼaitsjen je xi ʼyaa nga nda kjoafaʼaitsjen tsjoáná. Kʼoa tsakui nichxin je tsjoáná kjoafaʼaitsjen jngo ndsʼee xi skoe̱ nga tsín nda ndiaa timangínyaa, tsakui kjoa ska̱jiaan xi skanni kʼoakoa̱nná (Gál. 6:1). Kʼoa tsakui nichxin kʼia kʼoaináje̱ kjoafaʼaitsjen nga jekabijnyijée. Tojosʼinni, machjén nga kuinóʼyá je kjoafaʼaitsjen xi kʼoainá, nga̱ kjoanda tsaanñá kʼoa kui xi kʼoasjentjainá (Prov. 6:23). Je texto xi kamaxkia ndʼaibi kʼoatso nga kuinóʼyalee je chjota xi chjine. Aliʼya xi toje beyeje, tjín je xi ngisa be kʼoa xi ngisa tjínle kjoachjine tikʼoajinni ñá (Prov. 12:15). Kʼianga noʼyá kjoafaʼaitsjen xi bʼainá kʼoasʼin bakoñá nga nangitokon maa, majinná nga tsín toñá ʼyayejee, kʼoa majinná nga nganʼio machjénná nga kuichotjenngiaa jmeni xi mená. Jé Jeobá xi kʼoasʼin koanmele nga i̱ tso én xi kiski je Salomón: “Ndasʼin bichótsjoá nga nkjín ma xi tsjoá kjoafaʼaitsjen” (Prov. 15:22). w22.02 8 párr. 1, 2

Je chjota xi jée bajngi ali tsa tokuijin xi machjén nga kʼoakuitso nga tsín ndatjín kon nga tsakajngijée, tjínnele ñaki sikʼantjaiya josʼin síkjaʼaitsjen kʼoa jotjín kon. Machjén nga sindaya yaole kʼoa sitjoson ijngokʼa kjoatéxomale Jeobá (Ezeq. 33:14-16). Je xi ngisa tjínle kjoandosin xi sʼin kuinga ndasʼin kʼoéjna ijngokʼani ngixko̱n Jeobá. Jósʼiaan kʼiatsa sʼe̱jinná nga jngo miyoná xi ai jée tsakajngi. Kʼiatsa tsín kuixónyaa je jée xi tsakajngi, alikuijin tibisenkoaa. Toxitsjoajinni tsa kʼoasʼiaan, nga̱ je Jeobá be ngayeje (Prov. 5:21, 22). Koaan kʼoakʼuínlee je miyoná nga tjíonda je xi chjotajchínga sʼin tjío nga kuinyakao. Kʼiatsa tsín kuitsoya jme xi kisʼin, machjén nga ñá kuinókjoaa. Kʼoasʼin koakoñá nga mená kuisenkoaa. w21.10 7 párr. 19-21

Ngatsʼiaa, koaan chjénngilee jokisʼin je Jesús. Je Biblia kʼoatso nga “tochoʼnda tsabekon yaole” (Filip. 2:7). Jngo choʼnda xi nda síxá kui xi mele nga tsjoa sʼe̱ kon je naile. Nga choʼndale Jeobá maa kʼoa nga je nixálee ndsʼee, kui xi mená nga sa nda sa nda si̱xálee je Niná kʼoa nga kuinyakoaa je ndsʼee. Koaan si̱kjaʼaitsjenjiaan: “A tijnandaña nga tsjoanganʼiole kʼoa nga sikʼayale nichxinna xi kjaʼaí. Kʼianga kʼoaʼmina nga nganʼio machjén nga koa̱ntsje ya jñani sʼejna kjoajtíntse kʼoa tsa yaje̱ Ndʼia jña chotʼayá, a tokjoan kʼoaxian nga tsjoanganʼioa”. Tsa ʼyai nga machjén nga tjínnele si̱ndayai yaoli tonga tsa tsín tso tokuin nga kʼoanʼiai, tʼetsʼoalai je Jeobá kʼoa kʼoatʼinlai nga katabasenkaoli. Tʼeyanajmílai jotjín tokuin kʼoa kʼoatʼinlai nga katabasenkaoli nga koa̱nmeli si̱ndayai yaoli (Filip. 2:13). w22.02 23 párr. 9-11

Je Jesús ndʼé koan kʼoa kiskosonnile jmeni xi kisʼin, ninga kʼianga ñʼai tjín kjoa jaʼatojin (Mat. 11:29, 30). Tobʼelañá, tsín tokjoán kisindaya je tsotiʼndíle jngo chjoón kananita nga kʼoakitsole nga katasíndaya. Tonga nga tsabe nga makjainle chjoón jebi, je Jesús kisindaya je tsotiʼndíle (Mat. 15:22-28). Ningalani nda chjota koan, alikui tokui kini jokisʼe kon. Tosaa kʼoakitsokixile josʼin síkjaʼaitsjen ʼyani xi tsjoake koan. Tobʼelañá, kʼianga kʼoakitso Pedro nga tsín katasítjoson je Jesús josʼin mele Niná, je Jesús kʼoakitsokixile Pedro josʼin síkjaʼaitsjen ninga ya tjío pastro xi ngikʼa (Mar. 8:32, 33). Nga kʼoakitsole Jesús je Pedro ali tsa kiskankaojin, tosaa kitsoyale kʼoa kʼoasʼin tsabeni xi ngikʼa nga tjínnele tsjoánganʼiole nga kʼoasʼin josʼin mele Niná. Tsakui nichxin soa koanle je Pedro, tonga tsakasenkao jme xi tsakʼinle. Ninga nda chjotaa sakʼoajin machjén nga kʼoakʼuínkixilee xíngiaa jotjín tokoán. Kʼianga jme xi kuixoán chjénngilee je Jesús kʼoa ya Biblia chʼa̱ngiñá je kjoafaʼaitsjen xi kʼoee. w22.03 11 párr. 12, 13

ʼYaxkónñá je Jeobá kʼianga chʼasjengʼaa (Sal. 34:1). Kʼoasʼin chʼasjengʼañá kʼianga nokjoañá jokjoan kʼoa jmeni xi kisinda. Kʼoa nga bʼailee kjoanda ni̱ma̱ná nroajinni nga chʼasjengʼaa. Kʼiatsa chʼa̱sjeʼaa nichxin nga si̱kjaʼaitsjenjiaan je kjoanda xi tíbakóná je Jeobá kʼoa jmeni xi tísʼín xi tʼatsaan ntsjaintsjaijin chʼa̱sjengʼaa. Kʼianga ʼmiyasoán kʼoasʼin chʼasjengʼañá Niná nga nokjoañá xi tʼatsʼe. Tojo nʼia kʼianga bʼetsʼoalee Jeobá nga títjonkjoanla chosonnilee jmeni xi ʼmilee, kʼoati tjínnele sʼiaan kʼianga ʼmiyasoán, títjonkjoanla nda si̱kjaʼaitsjeen jmeni xi kʼuínlee je chjota, nga̱ kui xi mená nga ndasʼin kʼuínyasoán. Kʼianga ʼmiyasoán ñaki kao kjoatsjoa bakoyalee je chjota. w22.03 21 párr. 8