Marzo

Je Pedro kʼoakitsole je ndsʼe̱ nga katasíchjén jmeni xi male sʼín nga sinʼiojin xínkjín. Itso xi kiski: “Josʼin kjoanda tsakʼaile, nga jngójngó katasíchjén tʼatsʼe xi kjaʼaí. Katasíchjén josʼin xi nda síchjén xi kjaʼaíngá kjoandale Niná” (1 Ped. 4:10). Alikui koa̱n nga tokui tsín kʼoasʼianñá jmeni xi maná nʼia tsa kʼoasʼin si̱kjaʼaitsjeen nga koa̱nxinkonkená xi kjaʼaí kʼoa tsa kjoaʼajen kon. Ndatjín nga kʼoasʼiaan jmeni xi maná nʼia, tonga alikui koa̱n nga tokui ngʼa chʼa̱sjeñá yaoná (1 Cor. 4:6). Kuenta sʼiaan nga tʼatsʼe Niná tínroani tsa jmeni xi maná nʼia. Kʼoasʼin si̱chjén kjoanda jebi nga kʼoainganʼiolee je ndsʼee ʼndele nga to yaoná chʼa̱sjengʼaa (Filip. 2:3). Tsjoa báya tokoán kʼianga kʼoasʼin nichjén nganʼioná kao jmeni xi maná nʼia nga nixálee Niná. Nga̱ jé Jeobá chʼasjengʼaa, ali tsakuijin nga ñá ngisa ngʼa chʼasjee yaoná tikʼoajinni xi ngikʼa, kʼoa tsín mená nga kʼoasʼin sikjaʼaitsjen xíngiaa nga ngisa ngʼa tiyolee. w22.04 11, 12 párr. 7-9

Nʼio tsjoake koan Jesús je Énle Niná. Kʼoa ya Salmo 40:8 tongini kisʼetʼaxo̱n jokji chjí skoe̱kon je Énle Niná, itso: “Kʼianga kʼoasʼian josʼin nga meli, ji Ninána, kui xi simetokoan kʼoa je kjoatéxomali yaa tíjnajin ni̱ma̱na”. Tsjoa kisʼe kon Jesús nga chjí tsabekon Énle Niná kʼoa kui xi tsakasenkao nga tosi tonda kisixále Jeobá. Kʼoati sa̱tío tokoán tsanda ñá tsa kʼoénelee yaoná nga kʼoéxkiaa Énle Niná kʼoa tsa tsjoacha koaan (Sal. 1:​1-3). Jmeni xi kitso kʼoa jmeni xi kisʼin Jesús kʼoati basenkaoná tsanda ñá nga nindayaa yaoná josʼin bʼexkiaa kʼoa josʼin chotʼayá Biblia. Nga ngisa nda koa̱njinná jme xi kʼoéxkiaa, kʼoétsʼoalee je Jeobá, alikui xitso xiská kʼoéxkiaa, si̱kjaʼaitsjenjiaan jméni xi bakóyaná xi tibʼexkiaa kʼoa kʼoétʼaxoaan. Nga si̱jinlee yaoná jmeni xi tso Biblia machjén nga ngasin nganda chótʼayajiaan kʼoa kjoásjaiyaa jotso je xo̱n xi Énle Niná yʼangini. Nga koasenkaoná Énle Niná kʼianga kʼoéxkiaa, machjén nga nangitokon koaan. Tsa kʼoasʼiaan, ngisaa nda chótʼayá Biblia kʼoa ngisaa koa̱nchriantʼalee Jeobá (Sal. 119:17; Sant. 4:8). w23.02 13 párr. 15, 16

Si̱kjaʼaitsjeen jméni xi mená nga ngisa nda koa̱nná. Xijekoa̱n, kʼoasʼiaan jokʼuínná. Tonga jmésani xi koasenkaoná. Kʼoénelee yaoná nga kuichotjenngiaa jmeni xi mená nga koa̱nná. Tsa kuilani xi mená nga ngisa nda kʼuínyaa, koaan ndakjoan chótʼayajiaan je folleto Tosi tonda nda tʼexkiai kʼoa nda takoyai. Kʼianga kjesa bitjajián jmeni xi bʼakaoná nga sʼejna kjoajtín nga jinle xomana, koaan kʼoakʼuínlee jngo ndsʼee xi jetjínle kjoafaʼaitsjen nga katanrʼoéná kʼoa nga kʼoakatatsoná jmésani xi machjén nga sʼiaan nga ngisa nda kuinóʼyale. Tsa tongini kuijnandaa jmeni xi kʼoakaoná ngisaa nda koakoyaa kʼoa skoee xi ngikʼa nga tongini bijnandaa kʼoa nga nitjosoán je xá xi sʼenená (2 Cor. 8:22). Jméni xi koasenkaoná nga si̱ndayaa yaoná jñani ñʼai maná. Kuinga tsín si̱xa̱nlee. A nda koanle kitsjoa kjoanokjoaya je Timoteo kʼoa a nda kitsoya. Ya Biblia alikui kʼoatso, tonga ʼyañá nga kisitjoson je kjoafaʼaitsjen xi kitsjoale Pablo. Sa nda sa nda koanle kisixá kʼoa nda kisitjoson je xá xi tsakʼaile (2 Tim. 3:10). w22.04 24, 25 párr. 8-11

ʼYá xi tsoyanile je cho̱ xi ñato mani jko̱. Je Biblia kʼoatso nga jo xaʼindo kji cho̱ jebi, je ndso̱ko̱ jo tsʼe oso kjoan, kʼoa je tsʼoa jo tsʼoa xa kji, kʼoa te mani nra̱le. Ya Apocalipsis tojngoo cho̱ síkʼaxki̱ xi kʼoakji jokjoan nga ño cho̱ xi síkʼaxki ya capítulo 7 xi tsʼe Daniel. Je cho̱ jebi ali tsa tojngojin gobierno tínchja̱ni. Xi ijngosani, ya Apocalipsis kʼoatso nga je kjinentsja “ngayije ntje̱, kao ngayije naxinandá, kao ngayije én, kao ngayije ʼnde”. Kui xi tsonile nga ngisa tse nganʼio tjínle tikʼoajinni je gobierno xi jngo naxinandá batéxomale (Apoc. 13:7). Kuinga je cho̱ jebi jé tsoyanile ngatsʼi gobierno xi tjíobánentsja chjota jokji tífaʼato nó (Ecl. 8:9). Kʼianga número 10 bʼaxki̱ ya Biblia me tongantsjai nga kui tsoyanile ngakjijngo tsa jmeni. w22.05 9 párr. 6

ʼYáni xi sʼe̱le kjoanda jebi. Kui kjoanda sʼe̱le je chjotankjín xi kuinje̱ngile yaole nga kjoaʼaí Armagedón kao xtiʼndí xi kʼia jtsín ya sonʼnde chjotse. Kʼoa ya Apocalipsis capítulo 20 kʼoatso nga kjoaʼáyanile xi jekʼien (Apoc. 20:​11-13). ʼYáni xi kjoaʼáyanile. Je “chjota xi tjínle kjoakixi”, xi tsonile, je chjota xi kʼien nichxin kjoatse xi kixi kitʼale Jeobá, kao xi “chjotatsʼen” ʼmile, xi tsonile, je chjota xi tsín tsabe xi tʼatsʼe Jeobá (Hech. 24:15; Juan 5:​28, 29). A kui xi tsonile jebi nga kjoaʼáyanile ngatsʼi chjota kʼianga jetíbatéxoma Chjotaxále Niná xi jngo jmi nó. Mai. Je chjota xi jetsabe tʼatsʼe Jeobá tonga xi toxá tsín koanmenile nga je kisixále nga kjesa biyajin alikui tikjoaʼáyanile. Jetsakʼaile kjoanda jebi, tonga tsakakó nga tsín mele nga ya koatio ya ʼndenaxó (Mat. 25:46; 2 Tes. 1:9; Apoc. 17:8; 20:15). w22.05 18 párr. 16, 17

Jé “choʼnda xi nʼiotʼakon, xi nda be xá” tísíchjén Jesús nga tísíkatíoxkó je choʼndale i̱ Sonʼnde nga kʼoasʼin skoe̱xkón Niná josʼin mele (Mat. 24:45). Nga ʼyai josʼin tísíxá naxinandále Niná i̱ Sonʼnde, tsakui nichxin kʼoatisi jokitso Pedro, tojo tso texto xi kamaxkia ndʼaibi. Likuijin kʼoasikji kjoanda tjínná tsa tsínlani tsaʼyaxkoaan je naxinandále Niná. Jé naxinandá jebi tísíchjén Jesús kʼianga títsoyaná xi tʼatsʼe Niná kʼoa bakóyaná nga koa̱nná kʼuínyalee xi kjaʼaí. Kʼoati basenkaoná nga nindayaa yaoná nga kʼoati makjoaan josʼin mele Jeobá ánni nga tsjoa sʼe̱ni kon (Efes. 4:24). Kʼianga ñʼai machon, je Jesús nʼio nda bándiaaná. Tobʼelañá, nga tsʼatsen je chʼin COVID-19, alikui titsabeni jokisʼin je chjota. Tonga je Jesús tsakándiaale naxinandále nga kitsjoaná kjoafaʼaitsjen josʼin si̱kuindaa yaoná. w22.07 12 párr. 13, 14

Je Jeobá kʼoakitsole je xi xijchá koan ya naxinandá Israel nga nyaon nyaon katafákaonajmíni ʼndíxtile xi tʼatsʼe Niná (Deut. 6:​6, 7). Nga bʼajnda nichxin koan nkjín koya jme xi tsakjákaonajmíni je ʼndíxtile nga tsjoake katama Jeobá. Tobʼelañá, je xi xtixʼin nkjín hora nga ya kisixákao nʼaile nga tsakántje kʼoa tsa kʼiaje̱ nga tsakʼéxkó tsojmintje. Kʼoa je xi xtiyánchjín kʼoati nkjín hora tsakinyakao je na̱le jme xá xi tjín ya yaniʼya, jolani tsa najño kiskonya. Kʼianga ñatjen kisixá kao ʼndíxtile kʼoati koan tsakjákaonajmíni xi nʼio tjínle kjoandosin. Tobʼelañá, koanjin kisikjaʼaitsjenjin jokji kjoanda bakóle Jeobá kʼoa josʼin kisikuinda. Nkjín naxinandá jñani tsín nanda maʼale xi xijchá ma nga fákaonajmí je ʼndíxtile, tsakui nga síxá xi xijchá ma kʼoa tsakuije̱ nga skuela fi je ʼndíxtile. Kuinga machjénsíni nga kʼoasjeʼa nichxin je xi xijchá ma nga ya koatiokao je ʼndíxtile kʼoa nga kjoakaonajmí (Efes. 5:​15, 16). w22.05 28 párr. 10, 11

Je jée xi nʼio ai tjío faʼatoné kjoatéxomale Niná. Tsakui jée jebi koa̱njngí jngo chjotale Cristo machjén nga kʼoetsʼoale Jeobá nga sijéle kjoanichatʼa kʼoa kʼoeyanajmíle xi chjotajchínga sʼin tjío (Sal. 32:5; Sant. 5:14). Jmé xá xi kjinele xi chjotajchínga sʼin tjío. Jé Jeobá xi tiʼndele tondiaa sichatʼaná xi totʼatsʼe nga tsakʼéchjíntjainá Jesús. Tonga je Jeobá kui xá bánele xi chjotajchínga sʼin tjío nga ya Biblia kʼoangini tsa koa̱n nga tosi tonda kʼoéjnajin naxinandále Niná jngo xi tsakajngijée kʼoa tsa mai (1 Cor. 5:12). Jngo koya jmeni xi sʼín xi chjotajchínga sʼin tjío kuinga básjaiya xi tʼatsʼe jebi: A toxá tsakʼéndajinni chjota jebi nga tsakajngijée. A tsakʼéʼma jmeni xi kisʼin. A tsee nga kʼoasʼin tsakajngijée. Kʼoa xi ngisa chjíle, a tíbakó nga kʼoama kjoaixinile je jée xi tsakajngi. Jméni xi bakóná nga jekisichatʼale Jeobá (Hech. 3:19). w22.06 9 párr. 4

Je Jesús kʼoakitso nga kjoásjee je kjoatéxomakixi (Mat. 5:6). Jebi kui xi tsonile nga kui kʼoasʼiaan xi tsje tjín, xi kixi tíjna kʼoa xi sasénle Niná. Tsjoachajin je kjoatéxomakixi kao xi kixi tíjna, kuijin nga tsín sasénnili je énndiso kao xi chʼaotjín (Sal. 119:​128, 163). Jé Na̱i kjinentsja jme xi chon sonʼnde kʼoa jé kjenngile xi énndiso nchja̱ (Juan 8:44; 12:31). Je Na̱i kui xi mele nga chʼaosʼin sikʼéjna je jaʼaínle Niná. Jenʼio kjoatse nga énndiso tíbáne Niná, kʼoakitso ya ʼndenaxóle Edén nga ndiso Niná, nga to yaole fini kʼoa nga tsínkui xi ndatjín tsjoále chjota (Gén. 3:​1, 4, 5). Nga kʼoatísʼín je Na̱i, nʼio nkjín chjota xi tsín nda síkʼaxki̱ Jeobá. Nga tsínkui matsjoake chjota xi kixi tíjna, kui xi mele je Na̱i nga kui kʼoakatasʼín xi tsín ndatjín kʼoa xi kjoatsʼen tjenkao (Rom. 1:​25-31). w23.03 2 párr. 3

Tsa ñʼai mali nikʼéjnai xi chʼaotjín kʼoa tsa sakʼoa kui kʼoanʼia ijngokʼai. Kʼoa tsakuije̱ nga kʼoasʼin nikjaʼaitsjain nga tsín kuichotjenngi nga kʼuínsʼenngindái kʼoa kui xi ba bʼé tokuin. Jmé xi koasenkaoli nga tsín si̱kʼajenlai tokuin. Je xi koasenkaoli kuinga tsjoacha koai̱n Jeobá (Prov. 3:​3-6). Kʼianga tsjoachaa je Jeobá kui xi basenkaoná nga chókjoajinná nga kjoa bitjatojiaan. Je Biblia kʼoatso nga je Jeobá bakóle xi ñaki kjoatsjoacha je choʼndale xi kixi fitʼale. Jebi kui xi tsonile nga tsín tsjionkon je choʼndale kʼoa tsjoake ngantsjai nichxin. Kʼoa ji koaan chjénngilai Niná nga̱ kʼoasʼin kisindaná nga koa̱n chjénngilee jokjoan (Gén. 1:26). Jósʼin koakoni nga tsjoachai Niná. Je xi machjén nga sʼiain kuinga kʼoailai kjoanda Niná (1 Tes. 5:18). Nyaon nyaon tikjaʼaitsjenjin jebi: “Jósʼin kabakóna Jeobá ndʼaibi nga tsjoakena”. Xijekoa̱n, tʼetsʼoalai Jeobá nga tʼailai kjoanda jme xi kasʼín xi tʼatsi nga kui nichxin. Kuenta tʼiain nga kui kʼoasʼínni Jeobá nga tsjoakeli. w23.03 12 párr. 17-19

Je Jesús tsjoake koan kʼoa tongóson sʼin tsabekon nga tejao chjotatjenngile. Jmé xi bakóyaná jebi. Kʼianga ʼyani xi tsín nda sʼín jósʼin nikjaʼaitsjeen ñá. Kʼiatsa tsín sa̱sénná josʼin je ndsʼee koaan i̱ tso xi si̱kjaʼaitsjeen: “Ánni nga kasíjtinina jmeni xi kasʼín. A anña xi machjén nga sindaya yaona. A kjoa tífaʼatojin ndsʼee jebi. Ningalani tjín xi kasíkaona a tsí ngisa nda nga tosichajian ʼndele nga yaona sijtile”. Tsa koakoá ngantsjai nga tsjoachaa xíngiaa kʼoasʼin koakoñá nga chjotatjenngile Cristo ma kjoaixiaa. Josʼin tsabekon Jesús je chjotatjenngile kui bakóyaná nga tjínnele si̱jinlee yaoná josatío kon je ndsʼee (Prov. 20:5). Je Jesús tsabe jotjío ni̱ma̱le chjota. Tonga ñá alikui ʼyaa jotjío ni̱ma̱le xi ngikʼa. Tonga koaan koakolee kjoatsejta je ndsʼee nga sakʼoa tsín nda sʼín (Efes. 4:​1, 2; 1 Ped. 3:8). Je xi koasenkaoná kuinga nda jchaxkoaan xíngiaa. w23.03 30 párr. 14-16

Tsakui nichxin kʼianga chʼin tjínná kui sichjén je Na̱i nga kuinyaxkónná. Je Na̱i kui xi mele nga kui kʼoasʼiaan jmeni xi tsín sasénle Jeobá. Tsakui nichxin je chjinexki kʼoa tsa je xíngiaa xi tsín kotʼaya Énle Niná kʼoakuitsoná nga njín kataxinyáná. Tonga ʼyañá nga tsín tsjoáʼnde kjoatéxomale Niná nga njín xi̱nyáná. Kʼoa tsa ʼya xi kʼoakuitsonáje̱ nga koa̱n josasʼin si̱xkiaa. Alikui ʼya xi mele nga kuiyá, kʼoa ningalani kʼoakoaan ʼyañá nga tojo tsjoake koa̱nná je Jeobá (Rom. 8:​37-39). Je Jeobá tjínjinkon jokjoan miyole xi jekʼien, nga̱ ngixko̱n joxi tjíokonni (Luc. 20:37). Kʼoa mele sikjaʼáyanile je miyole (Job 14:15). Je Jeobá jé ʼNdíle kitsjoa nga tsakʼéchjíntjainá nga koa̱n sʼe̱ná kjoabijnachon xi tsínkʼia fetʼa (Juan 3:16). ʼYañá nga tsjoakená kʼoa nga síkuindaná je Jeobá. Kuinga tsín yándsʼiaan basennilee kʼianga tjochʼinná kʼoa tsa ʼya xi kʼoatsoná nga sikʼienná. Tosaa je Jeobá ninʼiotʼaa nga koasenkaoná, nga tsjoáná kjoachjine josʼiaan kʼoa nga tsjoánganʼioná (Sal. 41:3). w22.06 18 párr. 16, 17

Je Biblia itso: “Nga nokjonchá Jeobá yaa nroani nga sʼená kjoachjine, kʼoa je kjoankjíntokonle xi nʼio ngʼa tíjna kui je kjoamajintokon” (Prov. 9:10). Kuinga kui kuenta sʼianñá je kjoankjíntokon xi tsjoáná je xi Nʼio tsje, kʼianga jmeni xi sʼiaan, xi tsonile, kui kuenta sʼiaan josʼin síkjaʼaitsjen Jeobá. Je kjoankjíntokon jebi yaa faʼaitʼa Biblia kao xo̱n xi Énle Niná yʼangini. Tsa ya kjoásjaiyaa kʼoasʼin koakoñá nga tjín kjoaixiná kjoachjine (Prov. 2:​5-7). Tʼatsʼe Jeobá nroani je xi ñaki kjoachjine (Rom. 16:27). Ánni kʼoabixónsíñá. Xi títjon, kuinga je kisindaná kʼoa nʼio nda be tʼatsʼe ngayeje xi kisinda (Sal. 104:24). Xi majaoni, jmeni xi sʼín je Jeobá bakó nga nʼio chjine (Rom. 11:33). Kʼoa xi majanni, binyakao ngantsjai je xi fitjenngi kjoafaʼaitsjen xi tsjoá (Prov. 2:​10-12). Tsa mená nga chjine koa̱n kjoaixiaa, machjén nga ñaki kʼoakʼoé tokoán nga kʼoatjín je xi jan koya kanikʼaxkiaa, kʼoa kui kuenta sʼiaan kʼianga jme xi chjoéjiaan kʼoa jme xi sʼiaan. w22.10 19 párr. 3, 4

Je Na̱i kisichaa kjoajchán jebi kʼoa i Sonʼnde kinikʼatsaojenngi kao sénnichxin xi chʼao kjoan. Nga nʼio jtile jé chjota tsakʼetʼale. Kuinga i̱ tsoni je Biblia: “Ma̱xóni xi tjío sonʼnde kao ya ndáchikon” (Apoc. 12:​9-12). Jósʼin basenkaoná je én xi tongini kinokjoa. Jmeni xi kjima jngo tjíjtsa Sonʼnde kao jokjimakjoan chjota kui bakóná nga Rey sʼin jetíjna Jesús. Kuinga tsín tokʼoamaniná nga nʼio tsʼen kjima je chjota kʼoa nga to yaole fini. Kʼoasʼin ʼyañá nga tíbitjoson je én xi tongini kinokjoa, nga jetíbatéxoma je Chjotaxále Niná (Sal. 37:1). Kʼoa ʼyañá nga sa chʼao sa chʼao koa̱nchon nga jekjimachrianle nga kjoaʼaí Armagedón (Mar. 13:8; 2 Tim. 3:13). Je Jeobá nʼio tsjoakená kʼoa basenkaoná nga majinná ánni nga nʼio chʼao kjimachonni nichxin xi tiyoaa ndʼaibi. Bʼailee kjoanda je Jeobá nga kʼoasʼin bakóyaná. w22.07 3, 4 párr. 7, 8

Koaan kʼoakʼuínlee Jeobá nga katabinyakao je ndsʼee nga katachókjoajinle je kjoa xi faʼatojin, jolani chʼin, tsa kjoaxkón bichóne, tsa kjoajchán tjín jñani tsʼe kʼoa tsa chjota tjíofitjenngike. Kʼoati koa̱n kʼoétsʼoantjé je ndsʼee xi ya tsjoánganʼio jñani kjoaxkón sʼe. Tsakui nichxin ʼyaxkuin tsa ʼyani xi kui kjoa tífaʼatojin, koaan tikʼaxki̱ jaʼaínle nga kʼoétsʼoalai Jeobá nga toji. Kʼoasʼin bakoñá nga tsjoachaa je ndsʼee nga kʼoaʼmilee Jeobá nga tosi tonda katabinyakao nga katachókjoajinle je kjoa xi faʼatojin. Kʼoati tsjoá kjoanda je ndsʼee xi bándiaa ya jinjtín kʼianga bʼetsʼoantjé, nga̱ nʼio binyakao nga kʼoanʼia. Kʼoakoan je pastro Pablo. I kitso: “Kʼoatisʼin tʼetsʼoao tʼatsʼan, jméni nga kʼoaisínina én nga skoʼe ndsoʼba, kʼoa jméni nga likui tsakjonsínia nga kuinchjaya je kjoaʼma xi tsʼe énnda tʼatsʼe Cristo” (Efes. 6:19). Nichxin xi tiyoaa ndʼaibi, kʼoati tjín je ndsʼee xi nʼio síxá kʼianga bándiaaná. Kʼoasʼin bakoñá nga tsjoachaa nga kʼoaʼmilee Jeobá nga katasíchikontʼain ngayeje jmeni xi sʼín. w22.07 24 párr. 14-16

Je sondado kui xombeki̱cha̱ basenkao jko̱ nga tsín kontrale sikiʼaon. Kʼoa ñá, nga kao Na̱i tibixkan machjén nga si̱kuindaa je kjoafaʼaitsjenná. Je Na̱i cheen batíoná kʼoa kui kjoafaʼaitsjenle kaníbason nga mele sikiʼaon kjoafaʼaitsjenná. Tojosʼin basenkao jko̱ sondado je xombeki̱cha̱, je kjoachoya xi tjínná kʼoati basenkao je kjoafaʼaitsjenná nga tosi tonda kixi kjuintʼalee Jeobá. Tsa tokui si̱kjaʼaitsjeen jmeni xi nimetokoán ñá, tsakui nichxin tsín tisʼe̱niná kjoachoya. Si̱kjaʼaitsjenjinla jmeni xi koanle chjotale Cristo xi ya naxinandá Corinto tsakatio nichxin kjoatse. Alikui tikoankjainnile jmeni xi nʼio tjínle kjoandosin xi kitso Niná, nga sʼe̱ kjoafaʼáya (1 Cor. 15:12). Je Pablo kʼoakitso nga je chjota xi tsín makjainle tʼatsʼe kjoafaʼáya tokui fini jmeni xi símekon (1 Cor. 15:32). Nichxin xi tiyoaa ndʼaibi, nʼio nkjín chjota xi tsín makjainle jmeni xi tongini tso Niná, kʼoa kuinga tokui kʼoasʼínni jmeni xi símekon kʼoa tobʼétsaojin. Tonga ñá, makjainná jmeni xi tso Niná tʼatsʼe nichxin xi sʼa nroa. w22.10 25, 26 párr. 8, 9

Je Jeobá kui xi mele nga kʼoéyanajmílee jotjín tokoán kʼianga kʼoétsʼoalee. Be josatío tokoán kʼoa kʼoatsoná nga koa̱n kʼoétsʼoalee tokʼiani, nga̱ ʼyañá nga kjuinrʼoéná. Nʼio sasénle Jeobá kʼianga bʼetsʼoalee (Prov. 15:8). Jméni xi koa̱n kʼuínlee je Jeobá kʼianga kʼoasʼin nikjaʼaitsjeen nga toñá tiyoaa. Koaan kʼoéyanajmílee jotjín tokoán (Sal. 62:8). Kʼoéyanajmílee jmeni xi makjáojinná. Kʼoakʼuínlee nga katabasenkaoná jmeni xi sʼiaan. Koaan kʼoatʼinlai Jeobá nga katabasenkaoli nga nʼiojin katamai, kʼoa kʼoatʼinlai nga katatsjoáli kjoachjine ánni nga koa̱nnili josʼin kʼuínyai jmeni xi makjainli (Luc. 21:​14, 15). Kʼoa jméni xi koa̱n sʼiain tsa nikʼajenlai tokuin. Kʼoatʼinlai Jeobá nga katabasenkaoli nga kuitso tokuin nga kʼoéyanajmílai jotjín tokuin jngo ndsʼee xi jetjínle kjoafaʼaitsjen kʼoa kʼoatʼinlai Jeobá nga katabasenkao ndsʼee jebi nga koa̱njinle jotjín tokuin. Kuenta sʼiaan josʼin basenkaoná kʼianga bʼetsʼoalee kʼoa kʼoaiʼndelee xi kjaʼaí nga katabinyakaoná. w22.08 10 párr. 6

Kʼianga to chriankʼia kisʼejna jtín ya Tesalónica chjota kitjenngike je chjotale Cristo. Jngojtín chjota xi ñaki tsakáʼndojbe kʼa chjotale Cristo nga kikao ngixko̱n chjotaxá (Hech. 17:6). Nʼiojin kitsokjon je chjotale Cristo jebi nga tijeni chjota xi ya tsʼe kitjenngike. Nga kʼoakoantʼain tsakui nichxin tsín titsjoa kisationi kon nga je Jeobá sixále. Tonga Pablo tsín mele nga kʼoakatama, kuinga kisikasénni xi tsakinyakao je chjotale Cristo jebi. Nga koanskanni, i kitsole Pablo je chjotale Cristo xi Tesalónica tsʼe: “Kichanijin Timoteo [ . . . ], nga kʼoasʼin sinʼiotakonno kʼoeneno josʼin koa̱nkjainno, jméni nga tsín tsa ʼya xi sikʼantjaiya yaole nga faʼá je kjoañʼaibi” (1 Tes. 3:​2, 3). Je Timoteo tsabejin josʼin tsakasenkao Pablo je chjotale Cristo xi ya tsʼe Listra kʼoa josʼin tsakasenkao Jeobá. Kuinga koan kisinʼiojinni Timoteo je chjotale Cristo xi Tesalónica tsʼe (Hech. 14:​8, 19-22; Heb. 12:2). w22.08 21 párr. 4

Kʼianga nó 1870, jngojtín chjota xi tsakásjaiya jotso je Biblia kʼoa jé tsakándiaale Charles Russell. Koanmele tsabe josʼin tíjna je kjoabʼechjíntjaile Jesús kʼoa jósʼin tjínnele kjoaʼaítsjenya kjoabiyale. Jósʼin basenkaoná ndʼaibi jmeni xi koanjinle. Nga kʼoakisʼin kuinga majinniná ndʼaibi josʼin tsoyanile je kjoabʼechjíntjaile Jesús kʼoa jme kjoanda xi tjenkao (1 Juan 2:​1, 2). Kʼoati majinná ndʼaibi nga kʼoatso je Biblia jme kjoachoya xi sʼe̱le je chjota xi sitjosonle je Niná. Tjínkʼa xi kui kjoachoya tjínle nga ya ngʼajmi koai kʼoa je chjota xi kui kjoachoya tjínle nga i̱ Sonʼnde koatio ngantsjai nichxin. Nga kui nikjaʼaitsjenjiaan je kjoabʼechjíntjaile Jesús kʼoa kao jokji tsjoakená je Jeobá ngisaa machriantʼalee (1 Ped. 3:18). Tojo kisʼin je choʼndale Niná xi tsakatio nichxin kjoatse, kʼoati fajinkoaan chjota nga katasíkjaʼaitsjenya Kjoabiyale Cristo tojo kitso je Jesús. w23.01 21 párr. 6, 7

Je Jesús kui kitsoyale chjota je kjoanda xi kjoaʼaíkao je Chjotaxále Niná. Kʼoati nʼio chjí ʼyatokoán jmeni xi sʼin Chjotaxá jebi kʼoa kʼoati chjí ʼyatokoán je kjoabʼechjíntjai nga̱ kui xi basenkaoná nga miyole Jeobá kao Jesús maa. Ñá xi makjainná tʼatsʼe Jesús kui choyalee nga koa̱n kuiyoaa ngantsjai nichxin kʼoa nga jcha ijngokʼá xíngiaa xi jekʼien (Juan 5:​28, 29; Rom. 6:23). Nʼio tse kjoanichikontʼain títsjoáná je Jeobá kao Jesús ningalani tsín jme xi tinʼia kʼoa alikui koa̱n josʼin kʼoéchjínilee ngayeje jmeni xi tjíosʼín xi tʼatsaan (Rom. 5:​8, 20, 21). Jósʼin koakonilee nga chjí ʼyaa jmeni xi tjíosʼín. Koaan kʼoasʼin si̱chjén jmeni xi tjínná nga si̱xálee je Jeobá. Tobʼelañá, koaan kʼoainganʼioá nga sʼenda kʼoa nga matsje ndʼia jña ʼyaxkón je Jeobá. w23.01 26 párr. 3; 27 párr. 5

Je Jesús kao xi 144,000 mani jé koatexomale chjota xi millón mani xi tjío jngo tjíjtsa Sonʼnde. Je Jesús kao xi 144,000 mani rey kʼoa naʼmi koa̱n (Apoc. 5:10). Je kjoatéxoma xi tsakʼaile chjota israelita kʼoatso nga je naʼmi kjinele sikuinda chjota nga tsín chʼin jtsaotʼale kʼoa nga nʼio sa̱tío kjoamakjainle. Nga totsoyanile jokoan ngasʼa, je xi 144,000 mani kui kjoanda sʼe̱le nga je sikuinda chjota nga tsín jme chʼin jtsaotʼale kʼoa nga nʼio sa̱tío kjoamakjainle (Heb. 10:1). Ninga kjesa ʼyajián jósʼin kjoakao je xi rey kao xi naʼmi koa̱n ya ngʼajmi je xi i̱ Sonʼnde koatio, alikui jao tjín tokoán nga nda sʼe̱ndiaale je xi koatio nga jeʼndenaxó koa̱n (Apoc. 21:​3, 4). w22.12 11 párr. 11-13

Jngo koya anni fajinkonñá je chjota kʼianga faʼaitsjenya Kjoabiyale Cristo, kuinga mená nga katabe jmeni xi kisʼin je Jeobá kao Jesús xi tʼatsaan (Juan 3:16). Kui xi mená nga kuinyakao jmeni xi kjuinrʼoé nga kui nichxin nga ngisa koa̱nmele skoe̱xkon je Jeobá kʼoa nga choʼndale katama. Nga fajinkoaan je chjota kʼianga faʼaitsjenya Kjoabiyale Cristo kʼoati binyakao xi jekisikatío xále Niná. Kʼoaʼmilee nga tojo tsjoake Niná. Tsjoa sʼe tokoán nga nkjín mani xi bichó nga faʼaitsjenya Kjoabiyale Cristo. Kʼianga bichó kui faʼaitsjenle jokji tsjoa kisatio kon nga kisixále je Jeobá (Sal. 103:​1-4). Ni koai kʼoa ni tsín koai je chjota nga kʼoaʼmilee, tonga fajinkonñá toʼyani nga̱ ʼyañá nga je Jeobá mandosinle je chjota (Luc. 15:7; 1 Tim. 2:​3, 4). w23.01 20 párr. 1; 22, 23 párr. 9-11

Jngo nitje̱n tongini nga tojeme ni̱kʼien je Jesús kʼoakitsole je Nʼaile nga katasíkuinda je chjotatjenngile (Juan 17:​15, 20). Je Jeobá síkuindaa ngantsjai je choʼndale. Tonga je Jesús be nga ngisa nʼio kʼoetʼale Na̱i je chjotatjenngile, kuinga machjénnile nga je Jeobá koasenkao. Jmeni xi chon sonʼnde nʼio bʼetʼale chjotatjenngile Cristo. Je kjoa xi bitjatojiaan síkinroajen tokoán kʼoa kotʼayakaoná tsa tosi tonda kixi kjuintʼalee Niná. Tonga alikui koa̱n kuinókjoaan. Je Jeobá kuenta sʼínná, be jme kjoa xi bitjatojiaan kʼoa tíjnandaa nga koasenkaoná. Je Jeobá kuenta sʼín je xi tsokjónke kʼoa bʼasjentjai (Sal. 33:​18-20). w22.08 8 párr. 1, 2

Nga kʼoasʼin xki̱ nó nikjaʼaitsjenyá Kjoabiyale Cristo kʼoasʼin bakoñá nga chjí ʼyaa jmeni xi kisʼin. Tobʼelañá, nikʼayañá nichxin nga bʼetsʼoaa kʼoa nga nikjaʼaitsjenjiaan je kjoanda xi tjenkao nga kʼoasʼin tsakʼéchjíntjainá. Kʼoati fajinkoaan je chjota nga̱ kui xi mená nga nkjín chjota katabichó nga faʼaitsjenya je Kjoabiyale Cristo kʼoa ñá alikui nichaa kjoajtín jebi. Kʼianga nikjaʼaitsjenyá Kjoabiyale Cristo, sakóyaná ánni tsakʼéchjíntjaininá kʼoa jókoa̱nnile nga tojngo chjota kʼoechjíntjaini je jéená xi millón mañá, kʼoati sakóyaná ʼyáni xi ʼbi je vino kʼoa ʼyáni xi kjen je nioxtila, kʼoa jmé xi tsoyanile nioxtila kao vino (Luc. 22:​19, 20). Kʼianga faʼa je kjoanokjoaya kui nikjaʼaitsjenjiaan je kjoanda xi sʼe̱le je xi i̱ Sonʼnde koatio (Is. 35:​5, 6; 65:​17, 21-23). Nʼio chjíle nga majinná jokji kjoanda tjenkao je kjoabʼechjíntjaile Jesucristo. w23.01 20 párr. 2, 4

Nga kisikasén ʼNdíle Niná nga kʼienntjainá koaan jchatʼa je jéená kʼoa kʼoati kui kjoanda tjínná nga koa̱n kuiyoaa ngantsjai nichxin (Mat. 20:28). Je pastro Pablo i kitso: “Josʼin nga je kjoabiya jaʼai xi tʼatsʼe jngo chjota, kʼoati xi tʼatsʼe jngo chjota jaʼai kjoafaʼáyale xi kʼen. Josʼin xi tʼatsʼe Adán ngatsʼi mʼen, kʼoatisʼinni tʼatsʼe Cristo ngatsʼi si̱kʼéyokonni” (1 Cor. 15:​21, 22). Je Jesús kʼoakitsole chjotatjenngile nga kui katasíjéle Niná nga katanroa Chjotaxále kʼoa nga kʼoakatama i̱ Sonʼnde josʼin mele Niná (Mat. 6:​9, 10). Je xi mele Niná kuinga koatio ngantsjai nichxin je chjota i̱ Sonʼnde, kuinga je Jesús kiskoejinni nga Rey sʼin tíjnale Chjotaxále kʼoa 144,000 mani chjota tíkjoejin nga koasenkao Jesús nga kuitjoson josʼin mele Niná (Apoc. 5:​9, 10). w22.12 5 párr. 11, 12

Kʼianga jngo xíngiaa mʼe nʼio ba satío tokoán. Ngisaa tsa tse kjoañʼai tsakjaʼá. Tonga nga jekoai nichxin tsakui si̱kjaʼaitsjenjiaan jmeni xi tsakakóyaná, jmeni xi kisʼin, jokitsoná nga kitsjoanganʼioná kʼoa tsa kisikijno ñandianáje̱ kuijin xi koasenkaoná nga nda sʼe̱ ijngokʼa tokoán. Kʼoati nʼio ba sʼe tokoán kʼianga kui nikjaʼaitsjenjiaan je kjoañʼai xi kinikjaʼá je Jesús kʼianga kinikʼien. Kʼianga bʼexkiaa Biblia xi tʼatsʼe Jesús, nga faʼaitsjenya kjoabiyale nikʼayañá nichxin nga nikjaʼaitsjenjiaan jokji chjíle nga kitsjoa kjoabijnachonle (1 Cor. 11:​24, 25). Tonga kʼianga nikjaʼaitsjenjiaan jmeni xi kisʼin kʼoa josʼin kitsoyason nga jaʼai i̱ Sonʼnde kui xi nʼio tsjoa báya je tokoán. Kʼoati tsjoánganʼioná nga kui nikjaʼaitsjeen jmeni xi tísʼín ndʼaibi kʼoa jmeni xi sʼin nichxin xi sʼa nroa. w23.01 26 párr. 1, 2

Kʼianga kʼien je Jesús, nʼio ba kisatio kon je chjotatjenngile. Makjoanni nga nʼio miyo tsakjáo kʼoajinsʼin kisikjaʼaitsjen nga tsínkʼia tiskoe̱ni (Luc. 24:​17-21). Xijekoan, tsʼatsen ijngokʼale je Jesús kʼoa kitsoyale josʼin kitjoson je én xi tongini kinokjoa xi tʼatsʼe. Xi ijngosani, jngo xá tsakánele xi nʼio tjínle kjoandosin (Luc. 24:​26, 27, 45-48). Nga jekini ngʼajmi je Jesús, je chjotatjenngile alikui tiba kisationi kon. Tsjoa kisatio kon nga tsabe nga tíjnakon je Jesús kʼoa nga je koasenkao nga kuitjosonle je xá xi tsakánele. Nga tsjoa kisatio kon kui xi tsakinyakao nga tosi tonda je Jeobá kisixále (Luc. 24:​52, 53; Hech. 5:42). Jósʼin chjénngiaa jmeni xi kisʼin je chjotatjenngile Jesús. Kʼiaa nga kui títjon si̱kʼéjnaa je Chjotaxále Niná. Tsa tosi tonda kʼoénelee yaoná nga je Jeobá si̱xálee, kʼoatsoná nga sichikontʼainná tsa kʼoasʼiaan (Prov. 10:22). w23.01 30, 31 párr. 15, 16

Likui mená nga kʼoati sʼiaan jokisʼin je Adán kao Eva. Nga tsín kʼoati sʼiaan machjén nga sa nda sa nda jchaxkoaan je Jeobá, chjí jchatokoán jokjoan kʼoa kʼoatisʼin si̱kjaʼaitsjeen josʼin síkjaʼaitsjen. Sa tsjoacha sa tsjoachajin koaan tsa kʼoasʼiaan. Jolani je Abrahán nʼio tsjoake koan je Niná. Ninga tsín ndi̱to̱n koanjinle jme xi kitso Jeobá nga sʼin alikui jaʼatone kjoatéxomale, tosaa tsakʼénele yaole nga ngisa nda tsabexkon. Tobʼelañá, kʼianga kisʼejinle nga kʼoakitso Jeobá nga sikjeson je Sodoma kao Gomorra, kʼoasʼin kisikjaʼaitsjen nga tsín kixi tíjna jmeni xi sʼin je Jeobá, nga tojngo sikjeson je xi kixi kao xi tsʼen. Alikui koankjainle tsa kʼoasʼin Niná, kuinga ngasin nganda kʼoakitsonile josʼin síkjaʼaitsjen. Je Jeobá kinrʼoé jme xi kitsole, kʼianga jetsakjáonajmí, je Abrahán koanjinle nga kui fini Jeobá jotjío ni̱ma̱le chjota kʼoa nga tsínkʼia kjoañʼai tsjoále je xi nda chjota kʼianga síkjeson je chjotatsʼen (Gén. 18:​20-32). w22.08 28 párr. 9, 10

Kʼianga nó 455 tongini nga nó 1, kʼianga jekisʼendaya je xjáo xi kjindai Jerusalén, je chjotaxá Nehemías jé tsakáne kʼale chjota xi be nga nda sitjoson je xá xi sʼe̱nele nga sikuinda naxinandá. Jolani je Hananías, xi tsakasentítjonle je xi kisikuinda xo̱ntjoale naxinandá. Je Biblia kʼoatso nga chjotakixi koan je Hananías kʼoa ngisaa tsakakó nga kitsokjonke Niná tikʼoajinni xi kjaʼaí (Neh. 7:2). Nga tsjoake koan Jeobá je Hananías kʼoa nga tsín mele nga chʼao sʼe̱ kon Niná nʼio nda kisitjoson je xá xi kisʼenele. Kʼoati kui xi koasenkaoná tsanda ñá nga koa̱n sinʼiotʼaná xi kjaʼaí. Kataʼyala xi tʼatsʼe Tíquico, jngo chjotale Cristo xi ñatjen kitsoyason Pablo. Tsakakó je Tíquico nga kixi koan. Je Pablo kʼoakitso nga kixi kitʼale Niná je Tíquico (Efes. 6:​21, 22). Kʼoakitsole nga katafikaole carta je chjotale Cristo xi Éfeso kao xi Colosas tsʼe. Kʼoati kitsole nga katasínʼiojin. Kʼianga je Tíquico nikʼaxkiaa jé faʼaitsjenná choʼndale Niná xi tjío ndʼaibi xi kixi kʼoa xi tsoyaná xi tʼatsʼe Niná nroani (Col. 4:​7-9). w22.09 9 párr. 5, 6

Tejanla nó nga tse kjoa jaʼatojin je José. Koanjin kʼoasʼin kisikjaʼaitsjen nga tsín tsjoake je Jeobá kʼoa nga tsín tsakasenkao nga tse kjoa jaʼatojin. Tonga tsín kʼoasʼin kisikjaʼaitsjen kʼoa tsín yaole kisijtile. Kʼianga jeki nichxin alikui kisijndangajaoni jmeni xi kisikao je ndsʼe̱, tosaa tsakakóle kjoatsjoacha kʼoa kisichatʼale (Gén. 45:​4, 5). Kui kʼoakisʼinni nga̱ ndasʼin kisikjaʼaitsjen je José. ʼNdele nga tokui sikjaʼaitsjen kjoa xi jaʼatojin, tosaa kui kisikjaʼaitsjen jmeni xi mele Jeobá (Gén. 50:​19-21). Jmé xi bakóyaná jebi. Kʼiatsa ʼya xi josikaoná alikui koa̱n nga yaoná si̱jtilee kʼoa tsa kʼoasʼin si̱kjaʼaitsjeen nga je Jeobá tjínle jée kʼoa tsa jetítsjionkonnáje̱. Tosa kui si̱kjaʼaitsjeen josʼin tíbasenkaoná Jeobá nga chókjoajinná je kjoa xi bitjatojiaan. Si̱chatʼalee xíngiaa kʼoa kuenta sʼiaan nga “nkjín kjoatsʼen bʼéʼmatʼain kjoatjaochabe”. w22.11 21 párr. 4

Je profeta Daniel jngo sén kisakole jñani tsabe nga je Jeobá xi ngisasa ngʼa tíjna tikʼoajinni ngatsʼi chjotaxá xi tjín. Ño cho̱ xi nʼio yʼai kjoan xi títjon tsabe xi je tsoyanile chjotaxá xi nʼio tse nganʼio tjíosʼele, xi tsakatio nichxin kjoatse kao xi tjío ndʼaibi: Babilonia, Medopersia, Grecia, Roma, kao je chjotaxá xi nʼio tse nganʼio tjínle xi tíbatéxoma ndʼaibi, je Reino Unido kao Estados Unidos (Dan. 7:​1-3, 17). Xijekoan, je Daniel kui sén tsabe nga ya tíjnason Jeobá je yáxilele ya ngʼajmi (Dan. 7:​9, 10). Je Daniel kui be nga faʼáxinle Niná ngayeje kjoatéxoma xi tjínle ngatsʼi chjotaxá sonʼnde, kʼoa je tsjoále kjoatéxoma xi ngisa bakinle kʼoa xi ngisa tse nganʼio tjínle. ʼYáni. Jé “xi jo ʼndíle chjota” kji, xi tsonile, je Jesucristo kao “chjotatsjele Niná xi nʼio ngʼa tíjna”, xi tsonile, je xi 144,000 mani xi koatexoma ngantsjai (Dan. 7:​13, 14, 18). Tojé Jeobá xi nʼio ngʼa tíjna. Jmeni xi kitso Daniel mangóson kao jmeni xi sa jekitso. Je profeta Daniel kʼoakitso nga je Niná xi tsʼe ngʼajmi jé binyánda rey kʼoa jé bʼasjexin (Dan. 2:​19-21). w22.10 14, 15 párr. 9-11