Septiembre

Kʼiatsa nda tso én kuinókjoaa, je chjota skoee ʼyani xi “síxále Niná kʼoa kao xi tsín síxále” (Mal. 3:18). Kui xi tsonile nga skoe̱ chjota nga je Jeobá tinixálee. Kataʼyala jokoan jngo tichjaa xi Kimberly ʼmi. Kʼianga ñatjen tsakʼénda xo̱nle kao jngo tsoti xi ñatjen fi skuela, je tsoti jebi tsabe nga tsín kʼoasʼín je Kimberly josʼín je xti xi ngikʼa. Alikui xínkjín síkʼaxki̱, nda chjota kʼoa alikui chʼao tso én nchja̱. Tsoti jebi koanmele tsabe ánni nga kʼoasʼínni je Kimberly, kʼoa nga jeki nichxin tsakʼinyale Biblia. Je Jeobá nʼio tsjoa sʼe kon kʼianga kui kotʼayani Énle Niná je chjota nga be nga nda tso je én xi nokjoaa. Kui xi mená nga je Jeobá kʼoasjengʼa én xi nokjoaa. w22.04 5, 6 párr. 5-7

Je María Magdalena ñato sénnichxin xi chʼao kjoan tsakatiojinle. Tonga je Jesús kisindayaa. Nʼiojin tsjoa kisʼe kon je María Magdalena nga koanndaya kʼoa kuinga chjotatjenngile Jesús koanni kʼoa tsakasenkao je Jesús kʼianga kitsoyason (Luc. 8:​1-3). Ningalani chjí tsabe María jmeni xi kisʼin Jesús xi tʼatsʼe, tonga alikui koanjinle jokji kjoanda koakole Jesús nga koa̱nskanni. Je Jesús kitsjoa kjoabijnachonle “jméni nga ngatsʼisíni xi makjainle tʼatsʼe, likui cha̱” kʼoa nga sʼe̱le kjoabijnachon xi tsínkʼia fetʼa (Juan 3:16). Ningalani tsín koanjinyejele María tsakakó nga kixi koan kʼoa nga chjí tsabekon jme xi kisʼin Jesús. Kʼianga tjenbʼatʼa yá kjoañʼai je Jesús yaa tsakʼejna nga kitsjoanganʼiole kao xi ya tjío (Juan 19:25). Kʼoa kʼianga jekijnaya tsjó je Jesús, je María kʼoa kao ngijao yánchjín kui kisikajon yaole Jesús je xki xi nda nje̱ (Mar. 16:​1, 2). Je María tsabee nga jaʼáyanile je Jesús kʼoa koan tsakjákaonajmí. Alikui tongatsʼi je chjotatjenngile Jesús nga kui kjoanda kisʼele (Juan 20:​11-18). w23.01 27 párr. 4

Alikui koa̱n nga tokui kjuinñá nga nda kinixálee Niná ngasʼa kʼoa tsín tikʼoasʼianñá ndʼai. Ningalani tsín tikʼoakji bichóni nganʼioná joni ngasʼa, machjén nga tosi tonda si̱xálee je Jeobá, kʼoa nga tjenyatokon kuiyoaa saʼnda nga kuichokjetʼa jme xi chon sonʼnde (1 Cor. 15:58; Mat. 24:13; Mar. 13:33). Tjínnele nga nda si̱xálee je Jeobá kʼoa nga ñaki kao ni̱ma̱ná si̱xálee. Je Jesús kʼoakitso jme kjoa xi kisʼele je jtín xi kisʼejna ya Laodicea. Jtín jebi to choa kisixále Niná. Je Jesús i kitsole: “Likui ʼyao nga ñʼai tiyo, kʼoa nga chʼoao”. Tjínnele nga kisindaya yaole (Apoc. 3:​16, 17, 19). Jméni xi bakóyaná jebi. Tsa tsín tikʼoakji tinixánilee Jeobá joni ngasʼa, tjínnele si̱kjaʼaitsjenjiaan kʼoa kʼoailee kjoanda tʼatsʼe xi títsjoáná je kʼoa kao naxinandále (Apoc. 3:18). Alikui koa̱n nga tokuila kjoásjee je tsojmi xi tjín sonʼnde, tosa kui ngisa kʼoailee kjoandosin nga je Niná si̱xálee. w22.05 3, 4 párr. 7, 8

Je Jeobá jejmi nó tjínle nga jngo libro tíbʼétʼa jaʼaínle chjota. Tsʼee títjon Abel kisʼetʼa libro jebi, je chjota xi títjon kixi kitʼale Niná (Luc. 11:​50, 51). Jokji tífaʼato nó sa nkjín sa nkjín jaʼaín tíbʼétʼa Jeobá ya libro jebi kʼoa jenkjín millón jaʼaín tjíotʼa. Ya Biblia kjaʼaí kjaʼaísʼin nchja̱jaʼaínle libro jebi, jolani “libro”, “xo̱n xi tsʼe kjoabijnachon” kʼoa “xo̱nle kjoabijnachon” (Mal. 3:16; Apoc. 3:5; 17:8). Libro jebi yaa tjíotʼa jaʼaínle ngatsʼi xi je Jeobá bexkón kʼoa xi tsjoake jaʼaínle. Kui kjoachoya tjínle nga koa̱n koatio ngantsjai nichxin tsa i̱ Sonʼnde kʼoa tsa ya ngʼajmi. Yaa sʼe̱tʼa jaʼaínná libro jebi tsa nda kuiyoaa ngixko̱n Jeobá kʼoa tsa koa̱nkjainná nga je Jesús tsakʼéchjíntjainá (Juan 3:​16, 36). Ngatsʼiñá nga mená nga ya katasʼetʼa jaʼaínná. w22.09 14 párr. 1, 2

Ya libro xi tsʼe Apocalipsis jngo “cho̱toán xi nʼio je, xi ní kji” síkʼaxki̱ (Apoc. 12:3). Cho̱toán jebi kján kao Jesús kʼoa kao ánkje (Apoc. 12:​7-9). Xi ijngosani, bʼetʼale je naxinandále Niná kʼoa tsjoále nganʼio je chjota político (Apoc. 12:17; 13:4). ʼYáni cho̱toán jebi. Jé “ye̱ jchínga xi kʼoatsakʼin je na̱i kao Satanás” (Apoc. 12:9; 20:2). Jé kjinentsja ngatsʼi xi ngikʼa xi kʼoati kontra tjíole Jeobá. Jméni xi koa̱ntʼain cho̱toán jebi. Ya Apocalipsis 20:​1-3 kʼoatso nga jngo ánkje sikʼatje̱nya je Na̱i ya jngo ni̱tja̱n xi tixʼa̱jinsén kʼoa yaa kʼoéjnaʼyanʼio. Je Na̱i jngo jmi nó nga kʼoasʼin kʼoéjnaʼyanʼio kʼoa tsín tiʼya xi kʼoanachanile saʼnda nga kjoetʼa xi jngo jmi nó. Xijekoa̱n, je Na̱i kao sénnichxin xi chʼao kjoan yaa si̱kʼatsaojin je “jnrólʼí kao azufre”. Jebi kui xi tsonile nga tondiaa si̱kjeson. Nʼiojin ndasʼin kuiyoaa kʼianga jetsín je Na̱i kao sénnichxin xi chʼao kjoan. w22.05 14 párr. 19, 20

Je Jesús nʼio kisixá. Nga sʼa xti chjineyá koan (Mar. 6:3). Ndajin kisatio kon je xijchále nga tsakasenkao nga kitsjoa jmeni xi koanchjén ya yaniʼya, nga̱ nkjínya koanni. Nga chjotatsje koan nʼio nda xá koanle kʼoa nʼiojin nkjín chjota xi koanmele tsakatse je yá xi kisinda Jesús. Nʼiojin tsjoa kisʼe kon Jesús nga kisixá. Tonga alikui kui xále tsakʼéchjoale nga kisixále je Jeobá (Juan 7:15). Kʼoa kʼianga ñaki to xále Niná jekisʼin i kitso: “Tixáo ali totʼatsʼe je xi bichaa xi fitson, tonga tʼatsʼe je xi bichaa xi tíjnantsjai xi tsjoá kjoabijnachon ngantsjai” (Juan 6:27). Kʼoa kʼianga kinchja̱ya ya jngo sonnindo i kitso: “Chjoéxkó kjoanyiná ya ngʼajmi” (Mat. 6:20). Je kjoachjine xi tsjoáná Jeobá basenkaoná nga tsínkui je xá nʼio bʼailee kjoandosin. Ñá xi chjotale Cristo maa kʼoaʼminá nga nʼio si̱xá kʼoa nga nda xá xi sʼiaan. w22.05 22, 23 párr. 9, 10

Je Eunice nʼio nda choa̱ tsakʼéjnale je Timoteo. Kʼoa je Timoteo koanjinle nga kui kʼoakisʼinni male nga nʼio tsjoake koan je Jeobá kʼoa nga kui xi tsjoa tsakáya kon nga je Jeobá kisixále. Kʼoakjoán tikjima nichxin xi tiyoaa ndʼaibi, nʼio nkjín tichjaa xi tjíobinyakao je familiale nga je Jeobá tjíosíxále (1 Ped. 3:​1, 2). Kʼoati koa̱n sʼiain tsanda ji. Kui ngisa tʼailai kjoandosin nga nda kuijnai ngixko̱n Jeobá (Deut. 6:​5, 6). Tojo sʼín ngatsʼi je xi na̱ ma, kʼoajinti nʼiai tsanda ji, nkjínjin koya xi tsín kʼoanʼiai tojoni nga nisinlai jmeni xi chale je ʼndíxtili. Tobʼelañá, nikʼayajin nichxinli, nikjeyajin tao̱nli kʼoa sakʼoajin tsín nda sojnafai. Tonga alikui koa̱n nga toxá si̱kʼienjin yaoli kʼoa si̱chajin xi tʼatsʼe Jeobá. Chʼa̱sjeʼai nichxin nga tʼetsʼoalai Jeobá nga toji, nga chótʼayai Biblia nga toji kʼoa nga kʼuín kjoajtín. Tsa kʼoasʼiain kui xi koasenkaoli nga ngisa koa̱nmiyui je Jeobá, kʼoa nda choa̱ kʼoéjnalai je familiali kao xi kjaʼaí chjota. w22.04 16 párr. 1; 19 párr. 12, 13

Nga je Jeobá xi Juez sʼin tíjna ya ngʼajmi kao i̱ Sonʼnde, alikui ñá xi kuixónñá josʼin sʼe̱ndajinle kjoa xi ngikʼa. Nda sʼe tokoán nga je Jeobá xi bʼéndajin kjoa (Rom. 14:​10-12). Alikui jao tjínná nga nʼio nda be Jeobá jmeni xi ndatjín kʼoa jmeni xi chʼaotjín kʼoa kui kjoatéxomale síchjén nga bʼéndajin kjoa (Gén. 18:25). Alikuikʼia kui kʼoasʼin Jeobá jmeni xi tsín kixi tjín. Je Jeobá kjoaʼaxin ngayeje kjoañʼai xi tísíkjaʼáná je jée. Jemená nga kʼoakatama. Jé Jeobá sindayaná jñani kitsiʼoaan kʼoa koasenkaoná nga nda sʼe̱ tokoán tokʼia saʼndani (Sal. 72:​12-14; Apoc. 21:​3, 4). Alikui tikui kjoaʼaítsjenniná. Nga kjesa kʼoamajin, chjénngilee je Jeobá nga si̱chatʼalee xíngiaa. w22.06 13 párr. 18, 19

Jngo juez xi nʼio nda male bʼéndajin kjoa tjínnele nʼio nda skoe̱ jotjínni je kjoatéxoma. Tjínnele nda koa̱njinle jméni xi ndatjín kʼoa jméni xi chʼaotjín. Jmésani xi tjínnele sʼin jngo juez xi nʼio nda male bʼendajin kjoa. Nga kjesa kʼoatsojin jokoa̱ntʼain jngo chjota xi kabajngijée kuenta sʼín ngayeje jokjoantjínni kjoa. Tojé Jeobá xi ngisasa nʼio nda male bʼéndajin jngo kjoa. Je Jeobá alikui mangóson kao josʼín je chjota xi juez sʼin tjío. Nʼio nda be Jeobá ngantsjai jokjoantjínni kjoa kʼianga jngo chjota bajngijée (Gén. 18:​20, 21; Sal. 90:8). Ali tokuijin kuenta sʼín jmeni xi be kʼoa jmeni xi nrʼoé xi tʼatsʼe chjota. Nʼio nda majinle nga ya nroani jomakjoan jngo chjota josʼín xijchále, josʼin majchínga, jochon ya ʼndele, jotjín kon, tsa nda tíjna kʼoa tsa chʼin bʼetʼale. Je Jeobá be jotjío je ni̱ma̱ná, xi tsonile, be ánni nga kʼoanʼiañá tsa jmeni kʼoa be jmeni xi nimetokoán. Alijme xi tjíʼma ngixko̱n (Heb. 4:13). Nga nʼio nda be Jeobá jokjoantjínni kjoa yaa nroani nga síchatʼaná. w22.06 4 párr. 8, 9

Machjén nga kuenta sʼiaan jokisʼin je Na̱i nga tsakʼetʼale je Job, nga̱ kʼoati sʼín ndʼaibi nga bʼetʼaná. Je Na̱i kʼoakitso nga tsín ñaki kʼoatjín tokoán nga tsjoachaa je Jeobá, kʼoa nga yándsʼiaan koasenlee tsa jexkón tiyoaa. Kʼoati tso nga tsín tsjoakená je Jeobá kʼoa nga tsínkʼia chjí be tojmeni xi nʼia nga nixálee. Tonga nga je Jeobá ninʼiotʼaa alikui je Na̱i kʼoanachaná nga̱ jeʼyaa kjoamañale. Kʼianga kjoa bitjatojiaan yaa ʼyañá jñasani machjén nga si̱ndayaa yaoná. Kʼianga kjoa jaʼatojin je Job kʼiaa tsabe jñasani machjén nga sindaya yaole. Tobʼelañá, nga ngisa nangitokon koa̱n (Job 42:3). Kʼianga kjoa bitjatojiaan kʼoati ʼyaa yaoná jokjoaan. Kʼianga ʼyaa jebi jenikjaʼaitsjenjiaan jósʼiaan nga si̱ndayaa yaoná. w22.06 23 párr. 13, 14

Je Jeobá kʼoatsoná nga je koasenkaoná. Tobʼelañá, tongini nga kjesa i̱ tsojin: “Jonño testigona”. Itso: “Kʼianga kuitjátojin nandá, yaa tjenkaole, kʼoa kʼianga kuitjátojin xo̱ngá alikui koaixjakaoli. Kʼianga kuitjátojin je lʼí, alikui koakali ni jejinla ni̱je̱nlʼí koakali” (Is. 43:2). Kʼianga ʼmiyasoán sakʼoa kui kjoa bitjatojiaan xi ya mangóson jngo xo̱ngá kʼoa xi ya mangóson je lʼí. Tonga jé Jeobá basenkaoná nga tosi tonda ʼmiyasoán (Is. 41:13). Me tongatsʼi chjota nga tsín nrʼoéná nga ʼmiyasonlee. Kʼianga tsín nrʼoéná je chjota alikui kui xi tsonile nga tsín nda tinitjosoán je xá xi kjinená. Nda sʼe tokoán nga ʼyaa nga tsjoa tjín kon Jeobá kʼianga tosi tonda ʼmiyasoán. Je pastro Pablo i kitso: “Kʼoaile jngójngó je chjíle josʼin koan xále” (1 Cor. 3:8; 4:​1, 2). w22.11 4 párr. 5, 6

Ñaki xkoaan tiʼyañá josʼin tíbitjoson je én xi tongini kinokjoa xi faʼaitʼa Biblia. Je chjota xi kjaʼaí kjaʼaí én male kui kjimale “jngo én xi tsje”, xi tsonile, tjíobe jokjoantjínni jmeni xi bakóya je Biblia (Zac. 8:23; Sof. 3:9). Je chjota xi Niná tjíosíxále tsʼato jin millón mani kʼoa 240 naxinandá kao ʼnde tjío. Kʼoa nga xki̱ nó jmi mani xi fisʼenngindá. Xi ngisa chjíle ali tsakuijin jotjín mani, kui xi ngisa chjíle nga tjíosíkʼantjaiya yaole kʼoa nga kʼoakjimakjoan josʼin mele Niná, nga tjíosʼele je “ni̱ma̱ xi chjotse” tsole Biblia (Col. 3:​8-10). Tjíosíkatío jmeni xi kisʼin ngasʼa, jolani kjoachajngi, kjoatsʼen, nga xínkjín bʼasjengi kʼoa nga naxinandále nʼio fitʼale tsakai. Tíbitjoson je én xi tongini kinokjoa, tojo tso ya Isaías 2:4 nga tsín tikjoajchán skótʼayani. Nga bʼenelee yaoná nga kʼoamakjoaan josʼin mele Niná, je chjota faʼaikatiojin naxinandále Niná kʼoa kʼoasʼin bakoñá nga timangíntjenngilee je Jesús, xi tíbándiaaná (Juan 13:35). Kuinga kʼoakjimani nga je Jesús tíbasenkaoná. w22.07 9 párr. 7, 8

Machjén nga kao kjoaxkóntokon kʼoétsʼoanilee Jeobá. Si̱kjaʼaitsjenjinla je sén xi tsabe Isaías, Ezequiel, Daniel kao Juan. Kui tsabe jokji jeya tíjna Jeobá nga Rey sʼin tíjna. Je Isaías kui sén kisakole nga tsabe Jeobá nga jngo yáxile xi ngʼa kji tíjnason kʼoa nga ngʼa tíjna (Is. 6:​1-3). Je Ezequiel kui sén tsabe nga carro tíjnason je Jeobá kʼoa nga fate sʼin matsen “jngotjondaile josʼin mafate je ʼya̱” (Ezeq. 1:​26-28). Je Daniel kui tsabe je “Chjotajchínga xi jekjoatse tíjna” xi najñochxoa yʼakjá kʼoa xi ya tíjnason jngo yáxile xi lʼí tíbitjole (Dan. 7:​9, 10). Kʼoa je Juan kui sén tsabe nga je Jeobá yaa tíjnason jngo yáxile kʼoa “jngo ʼya̱ xi ya séjnandaile je yáxile, xi kʼoakji joni tsa sénle la̱jao̱ xi esmeralda ʼmi” (Apoc. 4:​2-4). Nga nikjaʼaitsjenjiaan jokji jeya tíjna Jeobá kui síkjaʼaitsjenjinná nga nʼio tse kjoanda tjínná nga ma bʼetsʼoalee kʼoa nga tjínnele koakolee kjoaxkóntokon. w22.07 20 párr. 3

Ji xi sʼa xti, je Na̱i kui xi mele nga kjuinroajen kjoamakjainli, kʼoa yaa bʼangini nga to jao sʼe tokoán. Kui xi mele nga tsín tikatamakjainnili jmeni xi bakóya je Biblia. Tobʼelañá, tjínjinkʼa xi kui kuitsoyali xi tʼatsʼe evolución, xi kʼoasʼin makjainle nga tsín je Niná kisindaná. Tsakui nichxin tsín kuenta nʼiai tsakai xi tʼatsʼe jebi, tonga nga jekjimajchíngai kuijin kuitsoyali maestroli ya ndʼiaskuela. Tsakui nichxin ñaki kʼoatjín koa̱nli jmeni xi kuitsoli. Tonga kʼoati kuenta tʼiain tsa tsínni nʼio nda básjaiya je maestro tsa tíjna jngo Niná xi kisindaná. Kuenta tʼiain nga i̱ tso Proverbios 18:17: “Je xi títjon nchja̱ ñaki kʼoatjín xi títso maná, tonga nga faʼai xi ijngo bʼéjnatseen jokjoantjínni kjoa”. Jebi kui bakóya nga tsín koa̱n tokoa̱nkjainyejeli jmeni xi ʼmiyali ya ndʼiaskuela, tosa nda tjasjaiyai jmeni xi bakóya je Énle Niná kao je xo̱n xi bʼasje naxinandále Niná. w22.08 2 párr. 2; 4 párr. 8

Machjén nga koa̱njinná jotso je Biblia, nga̱ tsa mai likuijin josʼin koasenkaoná. Si̱kjaʼaitsjenjinla josʼin tsakjáonajmí je Jesús kao jngo chjota xi nʼio nda be jotso kjoatéxoma (Luc. 10:​25-29). Je chjota jebi koanmele tsabe jme xi tjínnele sʼin nga koa̱n kʼoéjna ngantsjai nichxin. Je Jesús kui Énle Niná kisikʼaxki̱le nga katasíkjaʼaitsjenjin chjota jebi, i kitsole: “Jmé xi tjítʼa jajin kjoatéxoma. Jósʼin bʼexkiai”. Kʼoatjín jokitso chjota jebi, yaa Énle Niná tsakʼangini nga kʼoakitso nga machjén nga tsjoacha koaan Niná kao xíngiaa (Lev. 19:18; Deut. 6:5). Tonga xijekoanni i kitso: “ʼYáni xi xíngia”. Kʼoasʼin tsakakóni nga tsínni majinle jmeni xi bʼéxkia kʼoa tsín tsabe josʼin kisitjoson jmeni xi tso Énle Niná. Tsín koa̱njinná jotso Biblia tsa tsín je Jeobá koasenkaoná. Kuinga kui nganʼiotsjele ni̱jénilee nga katamajinná jmeni xi bʼexkiaa. Xijekoa̱n, kʼoakʼuínlee nga katabasenkaoná nga si̱tjosoán jmeni xi kamajinná. w23.02 9 párr. 4, 5

Jejin nkjín kʼa bʼeyanajmiá josʼin tsaʼyaxkoaan Énle Niná kʼianga kui kjonanginá je ndsʼee. Tsjoa sʼe tokoán nga bʼéyanajmíná je ndsʼee josʼin tsabexkon Jeobá kʼoa josʼin tsjoake koan. Kʼoati tsjoa sʼená nga bʼeyanajmílee jotjío tokoán nga Énle Niná tichotʼayá (Rom. 1:11). Nga kʼoasʼin chobanajmiá kui faʼaitsjenná nga tse kjoanda tjínná nga testigole Jeobá maa. Kʼoati basenkaoná nga tosi tonda kʼoasʼin mangínkoaa yaoná jotso je Énle Niná, ánni nga tsjoa sʼe̱ni kon Jeobá kʼoa nga nda kuiyoñá ngixko̱n. Nkjín koya tjínni anni nga tsjoachañá je Énle Niná. Xi ngisa chjíle kuinga tsjoachaa je Jeobá nga̱ jé tsoyaná jokjoantjínni xi kixi. Yaa Biblia tsoyaná nga nʼio tse nganʼio tjínle, nga je kisinda ngʼajmi kao Sonʼnde. Kʼoa nga Nʼainá mani tsjoakená kʼoa mandosinle xi tʼatsaan (1 Ped. 5:7). w22.08 14 párr. 1, 3

Je Pablo kʼoakitsole je ndsʼe̱ nga kʼoasʼin koakonile nga tsjoake xínkjín kʼianga kui xá xi ndatjín sʼin (Heb. 10:24). Ali tokʼoajin kitsole jme xi tjínnele sʼin je ndsʼe̱, jé títjon kʼoakisʼin. Tobʼelañá, kʼianga kjinrá koan ya Judea jé Pablo kikaole tsojmi je chjotale Cristo xi ya tsʼe (Hech. 11:​27-30). Ningalani nʼio tse xá kisʼele Pablo nga kitsoya Énle Niná kʼoa nga kitsoyason tsakásjaile josʼin tsakasenkao je chjotale Cristo xi ma̱ tsakatio. Kʼoasʼin tsakasenkaoni je ndsʼe̱ nga kisatiojngo kon nga je Jeobá sikuinda. Nichxin xi tiyoaa ndʼaibi, kʼoati binyakoaa je ndsʼee nga nʼio satío kjoamakjainle, nga nikʼayaa nichxinná, nga bʼainganʼioá jñani kjoaxkón sʼe kʼoa nga nikatioá tao̱n xi kʼoasʼin machjén nga fison Énle Niná jngo tjíjtsa Sonʼnde. Nga kʼoanʼia kʼoasʼin binyakaoñá je ndsʼee nga sʼejngo kon nga tsínkʼia tsjiónkon Jeobá. w22.08 24 párr. 14

Nkjín én xi tongini kichjitʼa Biblia xi jekitjoson kʼoa tjínkʼa xi siento nó kitjosonni. Tjín choa̱ xi bakó nga kitjoson je én xi tongini kinokjoa. Alikui tokʼoamaná nga kitjoson nga̱ jé Jeobá xi tongini kʼoakitso nga kʼoakoa̱n. Si̱kjaʼaitsjenla jokoan naxinandá Babilonia. Kʼianga siglo 8 tongini nga nó 1, je Jeobá kʼoakitsole je profeta Isaías nga tongini katakji nga ni̱kjeson je naxinandá Babilonia. Saʼnda kʼoakitso Isaías nga Ciro ʼmi xi kuichosíkjeson naxinandá kʼoa kʼoakitso josʼin kjoaʼasʼen (Is. 44:​27–45:2). Kʼoati kitso nga tondiaa ni̱kjeson naxinandá Babilonia nga jekoai nichxin kʼoa nga tosʼe̱jnakjitia (Is. 13:​19, 20). Nʼio tse nganʼio kisʼele tsakai naxinandá Babilonia, tonga kʼiaa kinikjeson nga nó 539 tongini nga nó 1, kʼoa ndʼai toxkoa̱lesa tjío. w23.01 4 párr. 10

Nʼio tse kjoanda tjínná nga títsjoáʼndená Jeobá nga naxinandále tiyojiaan, nga ya tiyojinlee je choʼndale xi tjío jngo tjíjtsa Sonʼnde kʼoa nʼio tse kjoanichikontʼain tísʼená (Mar. 10:​29, 30). Joni ñá, kʼoati tjío je ndsʼee kao tichjaa jngo tjíjtsa Sonʼnde xi tsjoake Jeobá kʼoa xi sítjoson kjoatéxomale. Ninga tokʼia ʼyaxkon títjoán je ndsʼee tsjoachañá, ninga kjaʼaí kjaʼaí nʼia nga jngó jngoá, ninga kjaʼaí kjaʼaí kjoan najño xi chʼakjá kʼoa ninga kjaʼaí kjaʼaí én maná. Je xi ngisa tsjoachaa kuinga ñatjen ʼyaxkoán Jeobá kʼoa nga chʼasjengʼaa, kʼoa ngisaa nʼio machjén ndʼaibi nga jtín sʼin kuiyoaa (Sal. 133:1). Sakʼoa je ndsʼee binyakaoná nga nganʼio machjénná (Rom. 15:1; Gál. 6:2). Kʼoati binyakaoná nga tosi tonda je Jeobá nixálee kʼoa nga nʼio satío kjoamakjainná (Heb. 10:​23-25). Alikuijin nda sʼiaan tsa tsín kuinyakoaa je ndsʼee nga tibixkantʼakoaa ngatsʼiaa je Na̱i kao jmeni xi chon sonʼnde. w22.09 2, 3 párr. 3, 4

Yaa jchañá tsa maná chjoéxkoá yaoná kʼianga redes sociales nichjén. Tsa tsín si̱kuindaa yaoná jmeni xi nikatíotʼaa kʼoa jmeni xi bʼetʼaa ya redes sociales nʼiojin nkjín chjota sʼe̱jinle jmeni xi tsín je tjínnele sʼe̱jinle tsakai. Jmeni xi jeya batiotʼaa ya redes sociales alikui tiñá ʼyañá josʼin koa̱nchjén kʼoa josʼin sikiʼaon xi kjaʼaí. Kʼianga maná chjoéxkoá yaoná kʼoati tsín jme xi bʼeyanajmílee tʼatsʼe ndsʼee je chjota xi kontra tjíoná. Jolani tsa jme xi skónanginá je policía ya ʼnde jña tíchjoale xále Niná. Kʼiatsa kui jebi kʼoa tsa kjaʼaínile xi chjónanginá, koaan kjuintjenngiaa kjoafaʼaitsjen jebi, xi tso: “Tjín xi kʼoeʼa ndsoʼba ánni nga tsín kuinchjaña” (Sal. 39:1). Tjínnele nga chjotakixi koaan kao xi tjío ya yaniʼyaná, kao miyoná, kao ndsʼee kʼoa kao xi kjaʼaí chjota. Kuinga nʼio machjénni nga koa̱nná chjoéxkoá yaoná. w22.09 12 párr. 16

Kʼianga tsjoa sa̱tío kjoaixi tokoán machjén nga kʼoéxkiaa kʼoa chótʼayá je Énle Niná kʼoa machjénná nga kʼoasʼiaan. Kuinga i̱ kitsoni je Jesús: “Ali tokao nioxtila kʼoéjnakonni chjota, tonga kao ngayije én xi nchja̱ni tsʼoa Niná” (Mat. 4:4). Kuinga machjénni nga nyaon nyaon kʼoéxkiaa je Énle Niná. Nga tsjoakená Jeobá kui Biblia síchjén nga kʼoatsoná jmeni xi sʼiaan nga tsjoa sa̱tío tokoán. Tobʼelañá, tsoyaná ánni nga tiyochonñá, jósʼiaan nga miyoná koa̱n je Niná kʼoa jósʼiaan nga jchatʼa je jéená. Kʼoati tsoná nga ndasʼin kuiyoaa nichxin xi sʼa nroa (Jer. 29:11). Nga chotʼayá Biblia majinná xi tʼatsʼe jebi kʼoa kui xi nʼio tsjoa bʼé tokoán. Tsa nʼio tinikjáojiaan nga kjoa tibitjatojiaan, ngisa si̱kʼayaa nichxin nga kʼoéxkiaa Biblia kʼoa si̱kjaʼaitsjenjiaan jmeni xi tso. w22.10 7 párr. 4-6

Je Biblia kʼoatsoná nga katasʼená kjoafaʼaitsjen. Sʼená kjoachjine kʼianga nitjosoán je kjoafaʼaitsjen xi tsjoáná Biblia. Tobijbi majinná nga je kjoafaʼaitsjen xi tsjoá Biblia kui xi basenkaoná nga nʼio nda chjoejiaan jmeni xi nʼia. Kʼoati basenkaoná nga tsín kjoa jtsaojiaan. Ndatjín nga si̱kjaʼaitsjenjiaan jókji kjoachjine jetjínná. Tobʼelañá, tsa jekjoatse nga tichotʼayá Biblia kʼoa jekjoatse nga mangián kjoajtín, tonga tsa kje bʼaitʼajinlee yaoná Jeobá kʼoa tsa kje mangínsʼenngindájián, koaan si̱kjaʼaitsjenjiaan ánni nga kje kʼoanʼiajinñá. Kʼoa tsa jetsangínsʼenngindá, a jengisa nda ʼmiyasoán kʼoa a jengisa nda bakoyalee Biblia chjota. Kʼianga jme xi nʼia, a kui kuenta nʼia jotso kjoafaʼaitsjen xi tsjoáná Biblia. A kʼoanikoaa xi ngikʼa tojo kisʼin je Jesús. Tsa ʼyaa nga machjén nga si̱ndayaa yaoná, kuenta sʼiaan jotso kjoafaʼaitsjen xi tsjoáná Jeobá. Nga̱ je Jeobá “síchjinee je xi tsínle kjoafaʼaitsjen” (Sal. 19:7). w22.10 20 párr. 8

Je Ezequiel tsabe nga nʼio tse nganʼio tjínle nganʼiotsjele Niná. Kʼianga jngo sén kisakole tsabe josʼin síxá je nganʼiotsjele Niná, nga basenkao je ánkje kʼoa josʼin síkjanle je rueda xi tjíongi carretale Jeobá (Ezeq. 1:21). Je Ezequiel i kitso: “Kʼianga tsaʼbe, tsakajnaniaña”. Nga tokʼoakoanle ñaki tsakajnania je Ezequiel (Ezeq. 1:28). Kʼianga kui kisikjaʼaitsjenjin je sén xi kisakole ñaki kisʼejngo kon nga kui nganʼiotsjele Niná koasenkao nga kuitjosonle je xá xi kisʼenele. Je Jeobá i kitsole Ezequiel: “ʼNdíle chjota, tisenndui nga̱ ji kjoakaonajmíle”. Nga kʼoatsakʼinle kʼoa nga kui nganʼiotsjele Niná tsakʼaile, kui xi tsakasenkao nga kitjonganʼiole (Ezeq. 2:​1, 2). Nga koanskanni, jokjitse kitsoyason jé ntsja Jeobá tsakándiaale, xi tsonile, je nganʼiotsjele (Ezeq. 3:22; 8:1; 33:22; 37:1; 40:1). w22.11 4 párr. 7, 8

Je profeta Isaías yaa síngósonkao Jeobá josʼín jngo xi bakóya, nga ya bʼamjetjenngile je xi tsoyale kʼoa nga kʼoatsole josʼin ndiaa koai. Nichxin xi tiyoaa ndʼaibi, kʼianga bʼexkiaa je Biblia kʼoasʼin noʼyañá nga fákaoná Jeobá, nga̱ jé xi kʼoasʼin koanmele nga ya Biblia katasʼetʼa je Énle. Kʼianga bʼexkiaa Biblia joxi jéni Jeobá xi tinoʼyalee nga tínchja̱ (Is. 51:4). Jméni xi sʼiaan nga koasenkaoná josʼin bándiaaná je Jeobá. Je Isaías jao koya tjínni xi síkʼaxki̱. Itso: “Kui jebi je ndiaa. Ya titómjeyai”. Ali tsa tokuijin xi machjén nga jchaa je ndiaa, machjén nga ya kuitómjeyá. Nga ʼyaa jme xi tso Biblia kʼoa jmeni xi tso je naxinandále Niná basenkaoná nga majinná jme xi mele Jeobá nga sʼiaan kʼoa josʼin si̱tjosoán jme xi bakóyaná. Machjén nga kʼoasʼiaan nga jao koya jebi ánni nga tosi tonda je Jeobá si̱xánilee. Kʼiatsa kʼoasʼiaan, je Jeobá sichikontʼainná. w22.11 10, 11 párr. 10, 11

Nga tongi jngo jaosa pastro tjío, nkjín koanni je xi chjotale Cristo kitsole yaole xi kjaʼaísʼin kitsoya ya jinjtín (Mat. 13:​24-27, 37-39). Alikui kʼoatjín jmeni xi kitsoya, chjota jebi kui xi koanmele nga “koaikao chjota xi je koaitʼale” (Hech. 20:30). Jngo koya xi tsín kʼoatjín josʼin kitsoya, kuinga kʼoakitso nga je Jesús tsín “tojngo kʼa kitsʼaitʼa nga tsakʼa je jéele xi tsʼe xi nkjín mani”. Chjota jebi kʼoakitso nga nkjín kʼa kʼoechjíntjainá je Cristo, tonga ya Biblia alikui kʼoatso (Heb. 9:​27, 28). Tjínkʼa chjota xi tojo kʼoasʼin makjainle ndʼaibi. Tobʼelañá, tjínkʼa xi jinjin nichxin kʼoa xi nyaon nyaon kʼoasʼín kʼianga sʼe̱jna mixa̱. Tjínkʼa religión xi tsín kjitʼa síkjaʼaitsjenya Kjoabiyale Cristo, kʼoa je chjota xi bichó ya yo̱ngo̱le, alikui majinle josʼin tsoyanile je kjoabʼechjíntjaile Jesús. w23.01 21 párr. 5

Je xi jngo jmi nó koatexoma Jesús sikjaʼáyanile xi jekʼien kʼoa koasenkao je chjota xi sitjoson nga chjotatsje koa̱n. Je xi kixi sʼin skoe̱kon Jeobá “tsʼee koa̱n sonʼnde kʼoa i koatio ngantsjai nichxin” (Sal. 37:​10, 11, 29). Kʼoa tondiaa tjóxin je kjoabiya (1 Cor. 15:26). Nʼio tsjoa satío tokoán nga kʼoakoa̱n. Yaa Énle Niná jñani kʼoatso nga koa̱n kuiyoaa ngantsjai nichxin. Kui kjoachoya jebi xi basenkaoná nga kixi mangíntʼalee Niná nga ñʼai kjimachon nichxin fetʼa xi tiyoaa ndʼaibi. Tsa mená nga tsjoa sʼe̱ kon je Jeobá ali tsa tokuijin nga kixi kjuintʼanilee je Jeobá kao Jesús kʼianga mená kuiyochoán, kuinga kʼoanʼiañá nga tsjoachaa (2 Cor. 5:​14, 15). Nga tsjoachaa je Jeobá kao Jesús chjenngilee jokjoan kʼoa chjakaonajmíñá xi kjaʼaí chjota tʼatsʼe kjoachoya xi tjínná (Rom. 10:​13-15). Nga tsín to yaoná kjuinñá kʼoa nga nda chjota koaan ngisa koa̱nmele Jeobá nga miyoná koa̱nni ngantsjai. w22.12 6, 7 párr. 15, 16

Kʼianga chjota fitjenngikená alikui tikui kʼoanʼiañá jmeni xi tsjoa bʼé tokoán. Tsakui nichxin nʼio si̱kjáojiaan kʼoa kui si̱kjaʼaitsjeen jmesani xi koa̱n. Ningalani toxá kʼoasatíoni tokoán nga chjota fitjenngikená, tsín koa̱n si̱kinroajeen kjoamakjainná, tojo kitsole Jesús je chjotatjenngile (Juan 16:​1, 2). Ningalani kʼoakitso je Jesús nga chjota koaitjenngikená, kʼoati kitso nga koa̱n kixi kjuintʼalee Niná (Juan 15:20; 16:33). Tsa tíchjoale xále Niná ya jñani tsaan, tsakui nichxin je naxinandále Niná kao xi chjotajchínga sʼin tjío tsjoáná kjoafaʼaitsjen nga si̱kuindaa yaoná, nga tosi tonda sa̱kóyaná xi tʼatsʼe Niná kʼoa nga tosi tonda kʼuínyasoán. Si̱tjosoán jokʼuínná (Sant. 3:17). Kʼoa alikui je kʼoéyanajmílee xi tʼatsʼe ndsʼee je chjota xi tsín je tjínnele sʼe̱jinle (Ecl. 3:7). w22.12 20, 21 párr. 14-16

Je Jesús kʼoakitso nga je koandiaale nga kʼuínyason jngo tjíjtsa Sonʼnde kʼoa kʼoatísʼín ndʼaibi. Kʼianga títsoyaná Jesús josʼin kʼuínyasoán, kui tísíchjén je kjoajtín xi satíoná kao je xo̱n xi Énle Niná yʼangini (Mat. 28:​18-20). Je xi tjínnená sʼiaan kuinga ngisasa nda kʼuínyasoán kʼoa ngisa nda kʼuínyalee Biblia je chjota, kʼoa tjenyatokon kuiyoaa nga tichoyalee nga kjoaʼaxin Jeobá jme xi chon sonʼnde. Nʼio sʼe̱jna kjoachoya xi tjínná tsa kʼoasʼiaan jotso Hebreos 6:​11, 12. Je Jeobá jebe kʼiáni kjoaʼaxin jme xi chonle sonʼnde je Na̱i. Nga kʼia, kuitjoson je én xi tongini kinokjoa xi faʼaitʼa Biblia. Ninga kʼoasʼin nikjaʼaitsjen sakʼoa nga tsesa chale nga kjoetʼa jme xi chon sonʼnde, je nichxinle Jeobá alikui sikʼachxin (Hab. 2:3). Ñaki kʼoakʼoé tokoán nga kʼoasʼiaan jotso Miqueas 7:​7, nga i̱ tso: “Tjenyatokon koatejnantsje xi kao Jeobá. Tsejta koa̱n nga skoyale je Niná xi kʼoasjentjaina”. w23.02 19 párr. 15, 16

Jngo chjota xi ya jko̱nindo tífi, basenkjáya kaoni kʼoa kotsen jochon. Tikʼoasʼinni, sakʼoa si̱kjaʼaitsjeen josʼin tíbasenkaoná je Jeobá kʼiatsa kjoa tibitjatojiaan. Nga nyaon nyaon koaan i̱ kuixoán: “Jósʼin kabasenkaona Jeobá ndʼai. Ningalani tojo kjoa tijnajian, jósʼin tíbasenkaona Jeobá”. Nyaon nyaon si̱kjaʼaitsjenjiaan josʼin basenkaoná Jeobá ninga tojngo koya kjoaʼaítsjenná josʼin tíbasenkaoná. Kʼoa tosi tonda kʼoakʼuínlee je Jeobá nga katafaʼáxin je kjoa xi tibitjatojiaan (Filip. 4:6). Tonga kʼoati tsín si̱chajiaan josʼin tísíchikontʼainná Jeobá, nga̱ tsjoánganʼioná nga chókjoajinná je kjoa xi tibitjatojiaan, kuinga kʼoainilee kjoanda josʼin tíbasenkaoná. Tsa kʼoasʼiaan jchañá nga tíbasenkaoná je Jeobá nga nda sʼe̱ tokoán ningalani kjoa tibitjatojiaan (Gén. 41:​51, 52). w23.01 19 párr. 17, 18

Si̱kjaʼaitsjenjiaan jebi: “Jósʼin bakoña nga ʼbe nga jemachrianle nga kjoetʼa jmeni xi chon sonʼnde. Jmeni xi sʼian, a bakoña nga kui xi ngisa chjí ʼbe nga je Jeobá sixále tikʼoajinni je xá kao kjoachjine xi tjín sonʼnde. A makjainna nga je Jeobá sikuindana kʼoa nga sikuinda je familiana”. Tsjoa sʼe kon je Jeobá nga kʼoasʼin mangínkoaa yaoná josʼin mele (Mat. 6:​25-27, 33; Filip. 4:​12, 13). Machjén nga kjitʼa si̱kjaʼaitsjenjiaan josʼin nikjaʼaitsjeen kʼoa si̱ndayaa yaoná jñani tsín nda tinʼia. Je Pablo kui kjoafaʼaitsjen jebi kitsjoale je chjotale Cristo xi Corinto tsakatio, i kitsole: “Chótʼao yaono nga tijonnio, tsa nda tiyokao xi makjainno. Nda chótʼao yaono tsa nda kjoaon” (2 Cor. 13:5). Kuinga machjénni nga tosi tonda si̱ndayaa josʼin nikjaʼaitsjeen. Xi koasenkaoná kʼiaa nga kʼoéxkiaa Biblia ánni kʼoasʼin si̱kjaʼaitsjenñá josʼin síkjaʼaitsjen Niná kʼoa xijekoa̱n, si̱ndayaa yaoná ánni nga tsjoa sʼe̱ni kon (1 Cor. 2:​14-16). w23.01 9 párr. 5, 6