Noviembre

Tsa xtiʼndí tjínli kʼoati koa̱n kuisenkoai nga katatsjoá comentariole. Kʼianga satíoná kjoajtín sakʼoa kui chotʼayajiaan je kjoa xi sʼele xi jechixan kʼoa tsakui tʼatsʼe nga tsje kjuinkoaa yaoná. Ninga kʼoalani, tjíojin tsa jngo kʼoa tsa jao párrafo jñani koa̱n tsjoá comentariole je xtiʼndí. Kʼoati koa̱n kʼoakʼuínlao je xtiʼndíno nga tsín tongantsjai nga je kʼoaile comentario. Tsa kʼoakʼuínlao je ʼndíxtino alikui chʼao sa̱tío kon nga kjaʼaí xi kʼoaile comentario (1 Tim. 6:18). Ngatsʼiñá nga koa̱n koationda comentarioná nga chʼa̱sjengʼaa je Jeobá kʼoa nga kʼoainganʼiole je ndsʼee (Prov. 25:11). Ningalani koa̱n kʼoéyanajmí sakʼoa xi tʼatsaan, tonga alikui koa̱n to yaoná nʼio si̱kʼaxkiaa (Prov. 27:2; 2 Cor. 10:18). Je xi si̱kʼaxkiaa jéní Jeobá, je Énle kʼoa kao naxinandále (Apoc. 4:11). w23.04 24, 25 párr. 17, 18

Nga tjenyatokon kuiyoaa kʼoa nga nda si̱kjaʼaitsjeen, machjén nga koakoá kjoatsjoacha (Mat. 22:​37-39). Kʼianga tsjoachaa Niná tosi tonda ʼmiyasoán ninga sakʼoa ñʼai maná (2 Tim. 1:​7, 8). Kʼoati tsjoachaa je chjota kuinga ʼmiyanilee Énle Niná, ninga kao teléfono kʼoa tsa kao carta. Alikui tobʼejngoaa tokoán ninga tsín sasén sakʼoale. Kui xi mená nga kuicho nichxin nga sikʼantjaiya yaole kʼoa nga kui kʼoasʼin xi kixi tíjna (Ezeq. 18:​27, 28). Kʼoati tsjoachaa je ndsʼee. Kʼoa kʼoasʼin bakoñá nga tsjoachaa kʼianga bʼainganʼiolee kʼoa nga ninʼiojinngañá xíngiaa (1 Tes. 5:11). Je sondado binyakaongañá xínkjín. Alikuikʼia nga toxá ni̱kiʼaonñá je ndsʼee kʼoa tsínkʼia nga nijndangajaoñá tsa jme xi sikaoná (1 Tes. 5:​13, 15). Ijngo koya josʼin bakoá nga tsjoachaa je ndsʼee kʼiaa nga ʼyaxkoán je xi xá kjinele ya jinjtín (1 Tes. 5:12). w23.06 10 párr. 6; 11 párr. 10, 11

Jngo koya xi koasenkaoná nga nʼio sʼe̱jna kjoamakjainná kʼiaa nga si̱kjaʼaitsjenjiaan nga tsakʼéchjíntjainá Jesús, nga̱ kui xi bʼéjngo tokoán nga kuitjoson jme xi tso Niná. Machjén nga si̱kjaʼaitsjenjiaan jósʼin tíjna nga tsakʼéchjíntjainá je Jesús, kʼoa ánni nga kitsjoaʼndeni Jeobá nga kʼienntjainá je ʼNdíle. Nga koa̱njinná jebi, sʼe̱jngo tokoán nga kjoaʼaíkao Jeobá jngo sonʼnde chjotse jñani koa̱n kuiyoaa ngantsjai nichxin. Ánni kʼoabixónñá. Si̱kjaʼaitsjenjinla jósʼin tíjna nga tsakʼéchjíntjainá Jesús. Je Jeobá kisikasén je ʼNdíjngole i̱ Sonʼnde, xi nʼio miyole mani, nga jo chjotatsje sʼin kitsin. Kʼianga tsakʼejna Jesús i̱ Sonʼnde kjoañʼai tsakjaʼá kʼoa tsee kjoañʼai kinikjaʼá nga kinikʼien. Alikuijin choa ñʼai koanle Jeobá nga kisikasén ʼNdíle. Je Jeobá nʼio tsjoakená, alikui kui xá kisikasénni ʼNdíle nga kʼoasikji tse kjoañʼai kinikjaʼá tsa tochoatseni nga nda kuiyoaa (Juan 3:16; 1 Ped. 1:​18, 19). Tsee kjoama̱ tsakʼéngi Jeobá nga tsakʼéchjíntjainá, kʼoa alikui tokjoatjao kʼoakisʼin, kuinga kʼoatsoni nga koa̱n kuiyoaa ngantsjai nichxin. w23.04 27 párr. 8, 9

Je Jeobá mele nga sikjaʼáyanile je xíngiaa xi jekʼien. Jé xi kʼoasʼin koanmele nga kui kinchja̱ni xi tʼatsʼe kjoafaʼáya je chjota xi kiski Biblia (Is. 26:19; Apoc. 20:​11-13). Je Jeobá sítjoson ngantsjai jmeni xi tso (Jos. 23:14). Kʼoa ʼyañá nga nʼio mele Jeobá nga sikjaʼáyanile xi jekʼien. Je Job ñaki tsakʼéjngo kon nga sikjaʼáyanile Jeobá kʼiatsa kuiyálani (Job 14:​14, 15, nota). Nʼio mele nga sikjaʼáyanile ngatsʼi choʼndale kʼoa kui xi mele nga nda koatio kʼoa nga tsín tijme chʼin sʼe̱nile. Kʼoati mele Jeobá nga sikjaʼáyanile je chjota xi tsín tsabexkon (Hech. 24:15). Kui xi mele nga miyole koa̱n chjota jebi kʼoa nga koa̱n koatio ngantsjai nichxin (Juan 3:16). w23.04 9 párr. 5, 6

Jméni xi sʼiain nga tosi tonda kao kjoatsjoa chóyalai je kjoanda xi tsjoáná Niná. Kʼiatsa kui choyalai nga i̱ Sonʼnde kuijnai, tʼexkiai jmeni xi tso Biblia tʼatsʼe ʼndenaxó kʼoa tikjaʼaitsjenjin jokoa̱nchon (Is. 25:8; 32:​16-18). A fiya jkui nga ya tijnai. Kʼiatsa kjitʼa si̱kjaʼaitsjenjiaan josʼin kuiyoaa ya ʼndenaxó koa̱njinná nga totífaʼato je kjoa xi tibitjatojiaan ndʼaibi (2 Cor. 4:17). Je kjoachoya xi tsjoáná Jeobá koasenkaoná nga chókjoajinná je kjoa xi bitjatojiaan. Nkjín koya jmeni xi tsjoáná Jeobá xi koasenkaoná nga nʼiojin koaan. Tobʼelañá, tsa ñʼai maná nga bitjosonná je xá xi sʼenená jinnaxinandále, nga chókjoajinná je kjoa xi bitjatojiaan kʼoa tsakuije̱ nga tosi tonda kao kjoatsjoa si̱xálee je Jeobá. Je xi koasenkaoná kuinga kʼoétsʼoaa kʼoa nga chótʼayá je Biblia, kʼoati koa̱n kʼoaiʼndelee je ndsʼee tsa mele kuinyakaoná kʼoa tosi tonda si̱kjaʼaitsjenjiaan je kjoachoya xi tjínná. Je Jeobá tsjoáná nganʼiole ánni nga chókjoajinniná je kjoa xi kuitjátojiaan kʼoa nga tsjoa sa̱tío tokoán (Col. 1:11). w23.10 17 párr. 19, 20

Kʼianga kʼoétsʼoaa nkjín koya jmeni xi koa̱n si̱kʼaxkiaa nga kʼoailee kjoanda. Kʼoailee kjoanda xi totʼatsʼe jme xi tsjoáná, nga̱ tʼatsʼe nroani ngayeje jmeni xi ndatjín (Sant. 1:17). Tobʼelañá, koaan kʼoailee kjoanda nga naskánachon ʼnde jña tiyoaa, tʼatsʼe jmeni xi kisinda, nga tiyochoán, nga tjío xíngiaa, nga tjínná miyo kʼoa nga títsjoáná jngo kjoachoya. Kʼoati koa̱n kʼoailee kjoanda nga miyoná kjima. Ánni nga bʼainilee kjoanda je Jeobá. Sakʼoa ñʼai maná nga bʼailee kjoanda, nga̱ je chjota tsín tijme kjoanda tsjoáni. Tokui makjáojinle jmeni xi símekon kʼoa tsín tsjoá kjoanda tʼatsʼe jmeni xi tjínle. Tsa kʼoati sʼiaan tsanda ñá tokuijin si̱jé ʼndeʼndee jmeni xi mená kʼianga kʼoétsʼoaa. Nga tsín kʼoakatamaa machjén nga kʼoailee kjoanda Jeobá xi totʼatsʼe ngayeje jmeni xi tsjoáná (Luc. 6:45). w23.05 4 párr. 8, 9

Tsjoakená Jeobá kʼoa tsín nda sʼe kon nga kjoañʼai chjaʼá (Is. 63:9). Tonga alikui tongantsjai nga faʼáxinná Jeobá je kjoa xi bitjatojiaan, xi ya mangóson xo̱ngá kao lʼí (Is. 43:2). Kʼoatsoná Jeobá nga je koasenkaoná nga chókjoajinná tojme kjoa xi kuitjátojiaan kʼoa tsín tsjoáʼnde nga tondiaa kjoañʼai chja̱ʼá. Kʼoati tsjoáná nganʼiotsjele nga chókjoajinná je kjoa xi bitjatojiaan (Luc. 11:13; Filip. 4:13). Kuinga machjénni nga kʼoéjngoaa tokoán nga je Jeobá koasenkaoná nga chókjoajinná je kjoa xi kuitjátojiaan kʼoa nga kixi kjuintʼalee. Kui xi mele Jeobá nga je si̱nʼiotʼaa (Heb. 11:6). Kʼianga tse kjoa bitjatojiaan sakʼoajin kʼoasʼin nikjaʼaitsjeen nga tsín basenkaoná je Jeobá. Je Biblia kʼoatso nga je Niná tsjoáná nganʼiole nga chókjoajinná tojme kjoani (Sal. 18:29). Kuinga tsín jao kʼoéñá tokoán, tosa ntsjaintsjai kʼoétsʼoaa nga̱ ʼyañá nga kjuinrʼoéná je Jeobá (Sant. 1:​6, 7). w23.11 22 párr. 8, 9

Kui bakóyaná texto jebi nga tʼatsʼe Jeobá nroani kjoatsjoacha. Kʼoa kʼoati kui tsoyaná nga koa̱n tsjoake koa̱n xínkjín ngantsjai nichxin jngo xʼin kao jngo chjoón xi jechixan. Xi jechixan machjén nga koakongañále kjoatsjoacha xínkjín ánni nga tosi tonda tsjoake koa̱nni xínkjín ngantsjai nichxin. Si̱kjaʼaitsjenla joma kʼianga lʼí bʼetsee, kʼianga tsín kjuitsʼaoya kjitʼaa binyajiaan chikín. Kʼoati ma je kjoatsjoacha, tjínnele koakongañále kjoatsjoacha xínkjín xi jechixan ánni nga tosi tonda tsjoake koa̱nni xínkjín. Tonga tsakui nichxin tsín tinanda koakonile kjoatsjoacha xínkjín kʼiatsa jme kjoa kjoaʼatojin, jolani tsa tao̱n ñʼai koa̱nle, tsa chʼin ska̱tʼale kʼoa tsakuije̱ nga xtile sikuinda. Je xi koasenkao nga tosi tonda tsjoake koa̱n xínkjín kʼiaa nga miyole Jeobá koa̱n nga jngó jngó. w23.05 20 párr. 1-3

Ningalani nʼiojin je xijcháná alikui xi tsonile tsa kʼoati nʼiojiaan tsanda ñá. Kʼianga nʼiojin maa, yaa mangóson tsa jmeni xi mená koa̱nná. Kʼianga koa̱nná tsa jmeni xi mená sʼiaan tjínnele nda chótsenlee je xi tíbakóyaná kʼoa chjénngilee. Tikʼoasʼinni, kʼianga nʼiojin koaan tjínnele chjénngilee je xi nʼiojin kʼoa kʼoati sʼiaan josʼín. Tojo kisʼin Daniel, tjínnele nda chótʼayá je Énle Niná, miyole Jeobá katamaa, ñaki ni̱ma̱ná katanroajinni nga kʼoétsʼoalee kʼoa ñaki kʼoéjngoaa tokoán nga je koasenkaoná. Kʼiatsa kʼoasʼiaan, nʼiojin koaan nga chótʼayakao kjoamakjainná. Nga nʼiojin maa nda bichómani. Kʼoati binyakao chjota nga mamesale be jotjínni xi tʼatsʼe Jeobá. Kuinga nʼio chjínile nga nʼiojin koaan. w23.08 2 párr. 2; 4 párr. 8, 9

Kʼianga én griego, je xi “chótʼajion” sʼin jaʼatoya, kui nchja̱ni nga chotʼa je oro kʼoa tsa plata tsa ñaki kui. Kʼoati machjén nga kʼoasʼiaan tsanda ñá, nga ndakjoan kuijnatsʼinyaa a ñaki kʼoatjín jmeni xi tíʼminá kʼoa tsa jmeni xi bʼexkiaa. Nʼio chjíle nga kʼoasʼiaan nga̱ sa chrian sa chrian tíjna je kjoañʼai xi nʼio tse. ʼNdele nga tokoa̱nkjainyejená jmeni xi ʼminá ningósonkaoñá jmeni xi noʼyá kʼoa jmeni xi bʼexkiaa tsa mangóson kao jmeni xi tso je Biblia kʼoa kao jmeni xi tso naxinandále Niná. Tsa kʼoasʼiaan, alikui kui kʼoanachaná jmeni xi kaníbason je sénnichxin xi chʼaokjoan (Prov. 14:15; 1 Tim. 4:1). ʼYañá nga kuinje̱ngi je naxinandále Niná kʼianga kjoaʼaí kjoañʼai xi nʼio tse. Tonga alikui ʼyaa jmeni xi koa̱nná nga jngó jngoá nyaonli jngiliján (Sant. 4:14). Tsa kuitjátojin tjínkoaan kjoañʼai xi nʼio tse kʼoa tsa tongini kuiyá, je Jeobá tsjoáná kjoabijnachon xi tsínkʼia fetʼa tsa kixi kjuintʼalee. Nga kjesa kʼoamajin tosi tonda si̱kjaʼaitsjenjiaan je kjoachoya xi tjínná kʼoa kuiyondalee ngantsjai je nichxinle Jeobá. w23.06 13 párr. 15, 16

Alikui ʼyaa josʼin kuitjoson kʼa je én xi tongini kinokjoa (Dan. 12:​8, 9). Ninga tsín majinná jokjoansʼin kuitjoson je én xi tongini kinokjoa alikui xi tsonile tsa tsín kʼoakoa̱n. ʼYañá nga kʼiakjoan kʼoejnatsen je Jeobá josʼin tsoyanile kʼianga kuicho choa̱le tojo kisʼin nichxin kjoatse. Je naxinandá i kuitso: “Jo nda nyʼán tiyoaa. Nijmejin xi koa̱nná” (1 Tes. 5:3). Kʼoa je chjotaxá kʼiaa kʼoetʼale je religión ndiso kʼoa sikjeson ngatsʼi (Apoc. 17:​16, 17). Xijekoa̱n, sajé naxinandále Niná kʼoetʼangále (Ezeq. 38:​18, 19). Kʼoa kʼiaa koaitsʼia je Armagedón (Apoc. 16:​14, 16). Ñaki tjínjngoo tokoán nga jeme kuitjoson jebi. Kʼianga kjesa kʼoamajin, kuenta sʼiaan josʼin tíbitjoson je én xi tongini kinokjoa kʼoa kʼuínyalee xi kjaʼaí nga kʼoati katasʼín. Tsa kʼoasʼiaan, kʼoasʼin kʼoainilee kjoanda je Jeobá. w23.08 13 párr. 19, 20

Kʼianga kui kinchja̱ni je pastro Pablo xi tʼatsʼe kjoamakjain, kjoachoya kao kjoatsjoacha, kʼoakitso nga kui kjoatsjoacha xi ngisa títjon tíjna (1 Cor. 13:13). Kuinga kʼoakitsoni nga̱ je kjoachoya xi tjínná kʼoa kao jmeni xi makjainná ndʼai, kʼiaa kuitjoson nga jeʼndenaxó koa̱n Sonʼnde. Tonga je kjoatsjoacha alikuikʼia kjoetʼa, nga̱ tosi tonda tsjoacha koaan je Jeobá kao je xíngiaa tokʼia saʼndani. Xi ijngosani, nga tsjoachaa xíngiaa kʼoasʼin bakoñá nga chjotatjenngile Cristo maa. Je Jesús i kitsole chjotatjenngile: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Xi ijngosani, je kjoatsjoacha jtín síkatíoná. Kuinga i̱ kitsoni je Pablo: “Je kjoatjaocha xi nda bʼékjaoná, kʼoa síjngoná” (Col. 3:14). Je pastro Juan kʼoakitso nga tjínnele tsjoacha koaan je ndsʼee (1 Juan 4:21). Kʼianga tsjoachaa je ndsʼee kʼoasʼin bakoñá nga tsjoachaa je Jeobá. w23.11 8 párr. 1, 3

Je Biblia kʼoatso nga jngoyale titokanachaa xi chjotale Cristo maa. Kuinga kʼoatinʼiañá nga mená kuichotjenngiaa je kjoabijnachon xi tsínkʼia fetʼa (2 Tim. 4:​7, 8). Tjínnele nga nʼio kʼoénelee yaoná nga̱ jeme bichotjenngiaa. Je pastro Pablo kʼoakitso jmeni xi sʼiaan nga kuichotjenngiaa kjoanda jebi. I kitso: “Si̱kʼéjna tʼaxián ngayije xi ai […]. Tókalandaa kao kjoatsejta je kjoatokanacha xi tíjna ngixkoaan”. Kui kinchja̱ni Pablo nga tsínkui nʼio kuenta sʼiaan jmeni xi tsín tjínle kjoandosin. Tsa kuilani kuenta sʼiaan, alikuijin kuitjosonná je xá xi kjinená. Kuinga machjénni nga tokjoan chja̱ʼaxinlee yaoná tsa jmeni xi bʼetʼaná ánni nga tosi tonda kuitjosonniná je xále Niná. Tonga kʼoati machjén nga tosi tonda kui kʼoasʼiaan jmeni xi koasenkaoná ánni nga kuichotjenngisíñá kjoabijnachon xi tsínkʼia fetʼa (2 Tim. 2:5). w23.08 26 párr. 1, 2

Kʼiatsa chosonnilee jonʼia kʼoati jchaxkoán josʼin síkjaʼaitsjen xi ngikʼa. Tobʼelañá, tjínkʼa tichjaa xi síkʼi yaole kʼoa tjínkʼa xi tsín kʼoasʼín. Tjínkʼa ndsʼee xi ʼbi choa xi xán tjínle kʼoa tjínkʼa xi mai. Ngatsʼiñá nga nikuindaa yaoná nga tsín jme chʼin katakatʼaná, tonga kjaʼaí kjaʼaísʼin nikuindaa yaoná nga jngó jngoá. Kʼiatsa kʼoasʼin si̱kjaʼaitsjeen nga ngisa ndatjín jmeni xi nʼia kʼoa tsa kʼoakʼuínlee xi ngikʼa nga kʼoati katasʼín, si̱katéngijián je ndsʼee kʼoa xkoa̱yajin sʼin kuiyoaa ya jinjtín (1 Cor. 8:9; 10:​23, 24). ʼNdele nga kʼoenená, je Jeobá to kjoafaʼaitsjen tsjoáná jokjoan najño xi chʼa̱kjá kʼoa josóyoaa. Tjínnele nga je Niná chʼa̱sjengʼaa josóyoaa kʼoa jokjoan najño xi chʼa̱kjá. Tjínnele koakoá nga maná nikjaʼaitsjeen kʼoa nga chosonnilee jonʼia (1 Tim. 2:​9, 10). Alikui mená nga tokui kuenta katasʼín xíngiaa jokjoan najño xi chʼakjá. Je kjoafaʼaitsjen xi faʼaitʼa Biblia kʼoati kuinyakao xi chjotajchínga sʼin tjío nga tsín sikʼatone choa̱le jokuitso tʼatsʼe jokjoan najño xi chʼa̱kjá kʼoa jokʼoé ntsja̱jkoaa. w23.07 23, 24 párr. 13, 14

Jméni xi machjén nga sʼiaan tsa mená nga tsjoa sa̱tío tokoán nichxin xi sʼa nroa. Je xi bʼaʼénle jotso je chjoónchini kui mele bʼétsaojinkao je kjoachajngi. Tokui síkjaʼaitsjen jmeni xi mele. Tonga to kjoabiya kuichomani nga kʼoasʼín (Prov. 9:​13, 17, 18). Tonga je xi nrʼoéle xi “ñaki kjoachjine” nda bichómani jmeni xi sʼín (Prov. 9:1). Nga títsoyaná Jeobá tsjoacha kjimaa jmeni xi tsjoake kʼoa jtichaa kjima jmeni xi jtike (Sal. 97:10). Kʼoati tsjoa satío tokoán nga ʼmiyalee xi kjaʼaí je xi “ñaki kjoachjine”. Yaa mangósoán joni je yánchjín choʼnda xi síkʼaxki̱ ya capítulo 9 xi tsʼe Proverbios, xi ya tjíonchja̱ ya jñani ngʼa chon ya naxinandá. Kʼoati bixoán jotjíotso: “Toʼyani xi tsínle kjoankjíntokon, katanroa i̱bi”. Ñá kʼoa kao ʼyani xi nrʼoé jmeni xi tsoná je Jeobá tsee kjoanda tjínná ndʼaibi. Tonga kʼoati tse kjoanda sʼe̱ná nichxin xi sʼa nroa. Tsa tosi tonda ya kuitsomayaa ndiaa xi tsʼe kjoankjíntokon, koaan kuiyoaa ngantsjai nichxin (Prov. 9:​3, 4, 6). w23.06 24 párr. 17, 18

Tsakui nichxin nokjoaan nga kui kjonanginá tʼatsʼe josʼin makjainná je xi ñatjen nixá kʼoa tsa je xi ñatjen mangián skuela. Kʼoa kʼianga kui kjonanginá je chjota yaa ʼyañá jmeni xi mandosinle kʼoa jema chjakaoñá je Énle Niná. Ninga kʼoalani, tjínkʼa chjota xi toxkia fákaoná, tonga tsakui nichxin kui kʼoatsoni nga tsín sasénle jmeni xi tsakʼinle xi tʼatsʼe testigole Jeobá (Hech. 28:22). Kʼoa xi ijngosani, kuinga nichxin fetʼa tiyoaa nga kjaʼaí kjaʼaísʼin síkjaʼaitsjenni nga jngó jngó chjota kʼoa ngisaa tsʼen kjimaje̱ (2 Tim. 3:​1, 3). Tsakui nichxin kui nikjaʼaitsjenjiaan josʼiaan nga tsín yaoná si̱jtilee kʼianga toxkia fákaoná chjota nga kui kjonanginá tʼatsʼe josʼin makjainná. Je xi koasenkaoná kuinga ndʼé koaan, nga̱ je chjota xi ndʼé alikui tokjoan síjtile yaole kʼianga jme xi ʼmile. w23.09 14 párr. 1, 2

Kjoanda tsaanñá tsa si̱tjosoán jotso naxinandále Niná. Jolani nga kʼoatso nga tsínkui tsjoacha katamaa je tao̱n kʼoa nga tsínkui kʼoasʼiaan jmeni xi bʼéchjoa kjoatéxomale Niná. Tsa kjuintjenngiaa kjoafaʼaitsjen xi tsjoáná Jeobá alikui kui kjoa jtsaojiaan je kjoa xi tsaojin xi tsín sítjoson kjoatéxomale Niná kʼoa nda sa̱tío tokoán (Is. 48:​17, 18; 1 Tim. 6:​9, 10). Tojo chjota sichjén Jeobá xi koandiaaná kʼianga kjoaʼaí je kjoañʼai xi nʼio tse kʼoa kʼianga koatexoma Jesús i̱ Sonʼnde xi jngo jmi nó. A si̱tjosonñá nga kui nichxin ninga ñʼai koa̱nná. Tsa tinitjosoán ndʼaibi josʼin tíbándiaaná Jeobá kʼoajin tisʼiaan nga kʼia. Kuinga machjénni nga si̱tjosoán josʼin bándiaaná kʼoa si̱tjosonlee je chjota xi kjoéjin nga bándiaaná (Is. 32:​1, 2; Heb. 13:17). Tjínjngoo tokoán nga ndasʼin kuichomani tsa si̱tjosoán josʼin bándiaaná Jeobá, nga̱ basenkaoná nga tosi tonda miyole koaan kʼoa kui kjoanda sʼe̱ná nga kuiyoaa ngantsjai nichxin kʼianga jeʼndenaxó koa̱n Sonʼnde. w24.02 25 párr. 17, 18

Tsjoa kisʼe kon je pastro Pablo nga kitsoyason, tonga kʼoati tse kjoa jaʼatojin. Tobʼelañá, xkón chon ndiaa jña tsakʼamje kʼianga kjin kikakóyason, kʼianga xo̱ngá jaʼatojin, nga ché tjín ya yandiaa, kʼoa sakʼoa totaon tsabe je chjota xi jtike (2 Cor. 11:​23-27). Kʼoa je chjotale Cristo sakʼoa likui tsabechjí jmeni xi kisʼin je pastro Pablo nga tsakasenkao (2 Cor. 10:10; Filip. 4:15). Jmé xi tsakasenkao Pablo nga tosi tonda je Jeobá kisixánile. Kʼianga kiskotʼayajin xo̱n escritura tsabe jokjoan Jeobá, koanjinle josʼin tsakasenkao kʼoa ñaki tsakʼéjngo kon nga tsjoake Jeobá (Rom. 8:​38, 39; Efes. 2:​4, 5). Je Pablo kʼoati nʼio tsjoake koan je Niná kʼoa kʼoasʼin tsakakóni nga tsjoake kʼianga kisisinle chjotale Cristo (Heb. 6:10). w23.07 9 párr. 5, 6

Je chjota majinle nga machjénná chjotaxá kʼoa nga tjínnele sitjoson kʼa je kjoatéxoma xi bʼasje. Tonga kʼianga tsín sasénle jmeni xi tso je chjotaxá alikui sítjoson. Jolani nga bʼechjíntjé jmeni xi tjínná. Je Biblia kʼoatso nga je chjotaxá kjoañʼai síkjaʼá je chjota, jé Na̱i kjinentsja kʼoa jeme ni̱kjeson (Sal. 110:​5, 6; Ecl. 8:9; Luc. 4:​5, 6). Kʼoati tso nga kontra tíbʼejnale josʼin tjínndajinle Niná je xi tsín sítjosonle je chjotaxá. Ndʼaibi, je Jeobá títsjoáʼndee nga katasʼe je chjotaxá ánni nga katasʼesíni kjoatéxoma, kʼoa kui xi mele nga jchaxkoán. Kuinga machjénni nga kʼoéchjíntjé je tsojmi xi tjínná, nga jchaxkoán xi xá tjínle kʼoa nga si̱tjosonlee (Rom. 13:​1-7). Tsakui nichxin kʼoasʼin si̱kjaʼaitsjen sakʼoa nga tsín skénndiaaná nga si̱tjosoán jngo kjoatéxoma, tsa tsín kixi tíjna kʼoa ngisaa tsa tao̱n sijéná je chjotaxá. Tonga ñá, jé Jeobá nitjosonlee kʼoa kʼoatsoná nga si̱tjosonlee je chjotaxá. Tokʼiaa nga tsín si̱tjosonlee tsakui kʼoakuitsoná nga kui kʼoasʼiaan jmeni xi kontra tíjnale je kjoatéxomale Niná (Hech. 5:29). w23.10 8 párr. 9, 10

Kʼianga kitsin Sansón, jé chjota filisteo tjíobatéxomale chjota israelita kʼoa totaon tjíobe (Juec. 13:1). Tse kjoañʼai tsakjaʼá je chjota israelita nga̱ nʼio tsʼen je chjota filisteo. Kuinga je Sansón kiskoejinni Jeobá nga tsakʼasjentjai je naxinandále (Juec. 13:5). Jé Jeobá tsakasenkao nga kitjosonle je xá xi kisʼenele. Jngojtín chjota filisteo kichokásjai je Sansón ya Lehí, jngo ʼnde xi tíjna Judá. Nga nʼio kitsokjon je chjota xi Judá tsʼe tsakakó jñani tíjna Sansón. Kʼoa tijé tsakánʼioni nga kikao jñani tjío chjota filisteo (Juec. 15:​9-13). Tonga jé nganʼiotsjele Jeobá kitsjoanganʼiole je Sansón nga kitjoʼale yaole. Xijekoan, jngo ninda ngiʼba búrró koansjaile kʼoa kui tsakále je chjota filisteo. Nga kʼia 1,000 chjota filisteo kisikʼien (Juec. 15:​14-16). w23.09 2 párr. 3, 4

Je Jeobá yaa Biblia tsakʼétʼa jmeni xi tjínndajinle nga sʼin. Be josʼín nga bitjoson ngantsjai jmeni xi bʼéndajin, nga̱ tsín jme xi bʼéchjoale Jeobá nga bitjoson jmeni xi tso (Prov. 16:4). Kʼoa jmeni xi tjínndajinle sʼe̱jna ngantsjai nichxin. Jméni xi tjínndajinle Jeobá kʼoa jósʼin tísítjoson. Je Niná kʼoakitsole je Adán kao Eva jme xá kisikatíoni i̱ Sonʼnde. I kitsole: “Nkjín xti katasʼeno kʼoa katamankjínyao, titsao sonʼnde kʼoa jon tjanentsjao, [ . . . ] kao ngatsʼi cho̱ xi tjío i̱ tʼanangi” (Gén. 1:28). Kʼianga yátsʼi̱n tsakinyále Niná je Adán kao Eva alikui kui tsakʼéchjoale nga tsín kitjoson jmeni xi tjínndajinle Jeobá. Ningalani tsakajngijée je Adán kao Eva, je Jeobá tsakásjaile jokisʼin ánni nga tosi tonda kuitjosonni jme xi tjínndajinle. Kʼoasʼin tsakʼéndajin nga jngo Chjotaxá koatexoma ya ngʼajmi je xi sitjoson jmeni xi kitso “saʼnda nga totsʼinle kjoa” (Mat. 25:34). w23.10 20 párr. 6, 7

Kʼoati je Jeobá koasenkaoná nga tosi tonda si̱ndayaa yaoná. Ñʼai maná nga nindayaa yaoná, ngisaa tsa jekjoatse nga mená si̱kʼéjnaa jmeni xi tsín nda tinʼia. Kʼoa tsa kʼoasʼin nikjaʼaitsjeen nga ngisa chʼao tinʼia tikʼoajinni Pedro, tonga jé Jeobá koasenkaoná nga tosi tonda si̱ndayaa yaoná (Sal. 94:​18, 19). Kataʼyala je choa̱le jngo ndsʼee xi nʼio nkjín nó nga tixʼin xínkjín koantsjoakeni kʼianga kjesa bejin Énle Niná. Ninga tsín tikʼoasʼínni, sakʼoa kui faʼaitsjenle. Jmé xi tsakasenkao nga kisindaya yaole. Itso: “Jé Jeobá tsjoánganʼioná, tiʼbeña nga kui nganʼiotsjele Jeobá basenkaoná nga tosi tonda je nixálee”. Kʼoa itsosa: “Kui kjoanda títsjoána Jeobá nga je tisixále. Ningalani sakʼoa ñʼai mana, jé basenkaona”. w23.09 23 párr. 12

Kʼiatsa sʼa xti, kuenta tʼiain nga nichxin tjenkao nga sa nda sa nda chjénngiaa je choa̱le Jesús. Je chjénngilai xi nda choa̱ batío, nda tikjaʼaitsjain, nda titjosuin xá xi sʼeneli, katamali xá kʼoa tongini tijnandalai josʼin kuijnai nga koa̱nskanni. Tsakui nichxin kʼoasʼin nikjaʼaitsjain nga nʼio tse jmeni xi sʼiain. Ali nikʼajenjinlai tokuin. Jé Jeobá koasenkaoli nga kuitjosonli (Is. 41:​10, 13). Kʼoati koasenkaoli je ndsʼee kao tichjaa xi tjío ya jinjtín. Nʼio tsjoa sʼe̱ tokuin kʼiatsa kʼoasʼin kuitjosonli josʼin mele Jeobá. Nʼio chjí ʼyatokonlaijin kʼoa jé Jeobá koasenkaoli nga sa nda sa nda kʼuíntjenngi je choa̱le Jesús. w23.12 29 párr. 19, 20

Tobʼelañá, tsa mená foto chʼa̱sjee kao ndsʼee nga tibʼetsaojiaan, nga mená nda katabitjo nkjín kʼa chʼasjee foto. Tonga nga tjínkʼa jñani tsín nda matsen je foto, tonichajonñá kʼoa tokui nikatioá xi nda bitjo. Kui xá nikatíotjaoñá nga nikjaʼaitsjenjiaan jokji tsjoa kisʼe tokoán nga tsakʼetsaojiaan nga kui nichxin. Tonga tsa kuilani kʼoakisʼin jngo ndsʼee xi tsín kisasenná, machjén nga si̱chajiaan tojo nikoaa je foto xi tsín nda bitjo nga nichajoaan (Efes. 4:32). Nga jeʼyaxkoaan ndsʼee jebi kʼoa nga nda mangínkoaa kui xi basenkaoná nga tsínkui kuenta nʼia jñani tsín nda sʼín. w23.11 12 párr. 16, 17

Je én griego xi kisichjén Pablo kui xi tsonile nga kui kʼoakjá je tichjaa najño xi nda matsen kʼoa nga kuenta katasʼín je kjoafaʼaitsjenle xi ngikʼa. Nʼio tsjoa maná nga fitjenngi tichjaa je kjoafaʼaitsjen xi tsjoá Énle Niná. Kʼianga ninkjínlee tokoán títjonkjoanla nikjaʼaitsjeen jmeni xi nʼia. Kui xi tsonile nga ʼyaa jméni xi ndatjín kʼoa jméni xi chʼaotjín, kʼoa kui kʼoanʼia xi ndatjín. Kataʼyala je choa̱le Abigaíl. Nga tsín nda kisʼin xʼinle koanjinle nga tse kjoa kuichomani, kuinga kjitʼanangi kisikjaʼaitsjenni jmeni xi sʼin. Nga kʼoakisʼin alikui ʼya xi kinikʼien (1 Sam. 25:​14-23, 32-35). Kʼianga ninkjínlee tokoán majinná kʼiáni machjén nga kuinókjoaa kʼoa kʼiáni nga jyó kuiyoaa. Kʼoa kʼianga kui chjonangilee je ndsʼee josʼin tjíoni alikui kui chjonangilee jmeni xi chʼao kʼoe kon (1 Tes. 4:11). w23.12 20 párr. 8, 9

Jmeni xi tso texto jebi jé xokitsole Pablo je chjotale Cristo xi Roma tsʼe. Kʼianga tsabe jotjínni xi tʼatsʼe Jeobá kao Jesús koankjainle kʼoa chjotale Cristo koan. Je Niná chjotakixi sʼin tsabekon chjota jebi kʼoa kitsjoale nganʼiotsjele (Rom. 5:1). Ñaki kʼoatsakatío kon nga tjoéle je kjoanda xi kiskoyale. Je Pablo kʼoakitsole jme kjoachoya xi tsjoále Niná je chjotale Cristo xi Éfeso tsʼe. Kʼoakitsole nga jngo kjoatjao sʼe̱le (Efes. 1:18). Kʼoa je chjotale Cristo xi Colosas tsʼe kʼoakitsole nga ya ngʼajmi tjoéle je kjoanda xi tjíokoyale (Col. 1:​4, 5). Je chjotale Cristo jebi yaa ngʼajmi kjoaʼáyanile kʼoa yaa koatexomakao Jesús (1 Tes. 4:​13-17; Apoc. 20:6). w23.12 9 párr. 4, 5

Je én xi “sikuinda” sʼin faʼatoya, kui nchja̱ni jokisʼin je sondado nichxin kjoatse nga kisikuinda naxinandá ánni nga tsín ʼya xi tsakʼetʼanile. Kʼoa je chjota xi ya tsʼe naxinandá alijme xi síkjáojin nga̱ be nga je sondado tjíosíkuinda. Kʼoatisʼinni, nga tsjoáná Niná je kjoanyʼán xi tʼatsʼe tínroani nda sʼe tokoán kʼoa alikui nokjoaan (Sal. 4:8). Ningalani tsín ndi̱to̱n tjóxinná je kjoa xi tibitjatojiaan nda sʼe tokoán tojo koan je Ana (1 Sam. 1:​16-18). Kʼoa ngisaa choa ñʼai maná nga nikjaʼaitsjeen kʼoa nga kui chjoéjiaan xi ndatjín. Tojo sʼín chjota nga kʼoatsole sondado nga katasíkuinda, kʼoati koa̱n kʼoakʼuínlee je Jeobá nga katasíkuindaná. Ntsjaintsjai kʼoétsʼoalee josaʼnda nga nda sʼe̱ tokoán (Luc. 11:9; 1 Tes. 5:17). Tsa ñʼai tjín kjoa tibitjatojin, ntsjaintsjai tʼetsʼoai. Jé Jeobá sikuinda ni̱ma̱li kao kjoafaʼaitsjenli (Rom. 12:12). w24.01 21, 22 párr. 5, 6

Nga tsakʼasjetsje jaʼaínle Niná je Jesús kichokjoajinle nga totaon tsaʼya, nga énndiso kisʼene kʼoa nga tse kjoañʼai kinikjaʼá. Ninga kʼoakoantʼain alikui chʼao kisʼe kon nga̱ kisitjosonle Niná (Heb. 12:2). Koanjinle nga je Na̱i xi kjoañʼai kisikjaʼá (Luc. 22:​2-4; 23:​33, 34). Je Na̱i kui xi koanmele nga tsínti kixi katafitʼanile Niná je Jesús. Tonga tsín je kʼoakoanle nga̱ tsakakó Jesús nga to énndiso jmeni xi kitso je Na̱i kʼoa tsakakó nga kixi fitʼale Jeobá je choʼndale ninga tse kjoa faʼatojin. Kʼiatsa mená kjoáyatsjoaa kon Jesús, xi Rey sʼin tíjnaná, tjínnele tosi tonda chʼa̱sjengʼaa je jaʼaínle Jeobá kʼoa kʼuínyalee xi kjaʼaí jokjoan. Kʼiatsa kʼoasʼiaan, jé Jesús tichjenngilee (1 Ped. 2:21). Kʼoa tojo kisʼin je, kʼoasʼin kjoáyatsjoaa kon je Jeobá kʼoa koakoñá nga to énndiso jmeni xi tso je Na̱i. w24.02 10, 11 párr. 11-13

Je xi aon nó tífaʼato tsʼato jngo millón chjota jekisʼenngindá nga testigole Jeobá koan. Kʼianga bʼaitʼalee yaoná Niná kui tsoyanile nga chjotatjenngile Cristo maa kʼoa kui ngisa bʼailee kjoandosin josʼin mele Niná. Jósʼin tíjna jebi. Je Jesús i kitso: “Toʼyanibe xi mele nga chjotana koa̱n, katatsjionkon yaole” (Mat. 16:24). Je én griego xi “katatsjionkon yaole” sʼin faʼatoya kʼoati kui xi tsonile nga “tsín to yaoná nitjosonlee”. Kʼianga bʼaitʼalee yaoná je Jeobá alikui tikui kʼoanʼiañá jmeni xi tsín sasénle (2 Cor. 5:​14, 15). Alikui kui kʼoanʼia jme xi símekon yaoná, jolani je kjoachajngi (Gál. 5:​19-21; 1 Cor. 6:18). Alikui ñʼai koa̱nná nga si̱tjosoán jebi tsa ñaki tsjoachaa je Jeobá kʼoa tsa tjínjngo tokoán nga kjoanda tsaanñá jmeni xi tsoná (Sal. 119:97; Is. 48:​17, 18). w24.03 2 párr. 1; 3 párr. 4

Je Jeobá tsjoále nganʼiotsjele je xi ndatjío ngixko̱n (Mat. 12:18). Koaan si̱kjaʼaitsjenjiaan jebi: “A tísʼena je kjoanda xi tsjoá nganʼiotsjele Niná. Tobʼelañá, a ngisaa tsejta kjima ndʼai tikʼoajinni jokjoan nga kjesa ʼbexkonjian je Énle Niná”. Kʼianga jchai nga tísʼeli je kjoanda xi tsjoá je nganʼiotsjele Niná ngisaa sʼe̱jngo tokuin nga sasénle Jeobá jme xi tinʼiai. Xi totʼatsʼe nga tsakʼéchjíntjainá Jesús, je Jeobá síchatʼale jéele je chjota xi sasénkon (1 Tim. 2:​5, 6). Ningalani makjainná nga tsakʼéchjíntjainá Jesús kʼoa ninga jetsangínsʼenngindá, jméni xi kuenta sʼiaan tsa tsín makjainná nga sasénle Jeobá jmeni xi nʼia. Kuenta sʼiaan nga sakʼoa bʼanachaná je ni̱ma̱ná, tonga je Jeobá alikui kʼoasʼín, koaan koa̱nkjainná ngantsjai jmeni xi tso. Kixi bekon Niná je chjota xi makjainle nga tsakʼéchjíntjainá Jesús kʼoa kʼoatso nga sichikontʼain (Sal. 5:12; Rom. 3:26). w24.03 30 párr. 15, 17