Mukanda Wakulibanga wa Samwele

5 Bafilistiya mubambatele cikasha ca Njambi wa busunga, bacitundisile ku Ebeneza na kucitwala ku Ashidodi. 2 Bafilistiya bambatele cikasha ca Njambi wa busunga na kucitwala mu njibo* ya Dagoni, co bakacitumbikile kumukulo wa Dagoni. 3 Lyamukwabo baka-Ashidodi mubendukile mutondo, bawanene Dagoni nau, co natalesa ca mesho hasi, kulutwe lwa cikasha ca Yehova. Ngeci, bambatele Dagoni na kumwilwisa mu mwela wendi. 4 Litangwa lyateleko mubendukile lalo mutondo, bawanene Dagoni nau, co natalesa ca mesho hasi, kulutwe lwa cikasha ca Yehova. Mutwe wa Dagoni na maboko endi oshe abali byamungukile. Co byawililile ha cipamba. Mubila wendi uje wapwile ngwe isi ukewo lika wasaleleko. 5 Mukemwo kweta na lelo lino, tupilistu ba Dagoni na boshe baje bakakobela mu njibo ya Dagoni kubesi kulyata ha cipamba ca njibo ya Dagoni mu Ashidodi.

6 Liboko lya Yehova lyalwisile baka-Ashidodi, co wabayandesele omwo wanenelele banu ba mu Ashidodi na mitambela yayo mushongo wa mikila. 7 Banu ba mu Ashidodi mubamwene byuma byakele na kulingiwa bendekele ngwabo: “Keti mwecelele cikasha ca Njambi ya Isalele cikale netu, mwafwa liboko lyendi linatuyandesa manene hamolika na njambi yetu Dagoni.” 8 Ngeci, basanene bamyata ba Bafilistiya na kubakungulwila hamo, co babehwile ngwabo: “Tunapande kulinga bati eci cikasha ca Njambi ya Isalele?” Bakumbulwile ngwabo: “Cikasha ca Njambi ya Isalele ciye ku Gathi.” Co cikasha ca Njambi ya Isalele bacitwalele ku Gathi.

9 Mubacitwaleleko, liboko lya Yehova lyalwisile ije nganda na kuilingisa ikale mu ciluwaluwa. Walwisile banu bomu mu nganda, kushangumukila kuli wamundondo kutwala kuli wakama, co bashangumukile kubinja mushongo wa mikila. 10 Ngeci, batwalele cikasha ca Njambi wa busunga ku Ekroni. Cikasha ca Njambi wa busunga mucetele lika mu Ekroni, baka-Ekroni bashangumukile kwendeka ngwabo: “Bananene cikasha ca Njambi ya Isalele kuli yetu mangana tutse hamolika na banu betu!” 11 Ngeci, basanene bamyata boshe ba Bafilistiya na kubakungulwila hamo na kwendeka ngwabo: “Twaleni cikasha ca Njambi ya Isalele kweka. Ciluke ku mwela waco mangana yetu na banu betu keti tutse.” Mwafwa banu boshe ba mu nganda balishoshomwenene kutsa. Liboko lya Njambi wa busunga lyabalemenene manene. 12 Baje kubatsile, babinjile mushongo wa mikila. Co kulila kwa banu bomu mu nganda kwa kulomba bukwasi kwetele mu melu.