Mukanda Wakulibanga wa Samwele
6 Cikasha ca Yehova cakele bingonde 7 mu mutambela wa Bafilistiya. 2 Bafilistiya basanene tupilistu na baka-kuumikiya na kubehula ngwabo: “Tunapande kulinga bati eci cikasha ca Yehova? Tulekeni tuzibuke mutunapande kucilwisila ku mwela waco.” 3 Bakumbulwile ngwabo: “Nga mwilwisa cikasha ca Yehova Njambi ya Isalele, keti mucilwise kwa kujeneka bwana. Munapande kulinga mwoshe mumwasela kumwilwisilaco na bwana bwa mulonga. Nga mulinga ngoco mukanguka, co muzibuka binalingisa liboko lyendi lijeneke kutunda hali yeni.” 4 Ngeci, babehwile ngwabo: “Bwana muka bwa mulonga butunapande kumutumina?” Bakumbulwile ngwabo: “Kwesekesa naha habanapu baka-kuyula Bafilistiya, tumeni bifwisa bitanu bya mikila bya goudi na bimuku ba goudi batanu, mwafwa neni na baka-kumiyula munaliwana na bukalu bwa kulifwa. 5 Munapande kufula bifwisa bya mikila yeni na bimuku baje bali na kubiisa lifuti lyeni, co munapande kusingimika Njambi ya Isalele. Hamo atepulula ku kulema kwa liboko lyendi lije lili hali yeni na ha binjambi beni na ha lifuti lyeni. 6 Bika bimukaluwisila bimbunge byeni, ngwe mubakaluwisilile bimbunge byabo baka-Ijipiti na Falo? Njambi mwabanene kashitiko, batabesele Baisalele baye, co baile. 7 Bwaheseni litemba lyaliha, na kwambata bingombe babali ba lwabo baje bali na bana, co lalo kanda babake joko. Kutiiyeni obo bingombe ku litemba, oloni bana babo belwiseni kwimbo na kubatundisa ku bisemi babo. 8 Ambateni cikasha ca Yehova na kucaka mu litemba, co ambateni obyo bimumufulila ha goudi kupwa bwana bumumutumina na kubyaka mu cikasha ceka na kwaka oco cikasha kuyehi na cikasha cendi. Co ceceleni ciliile. 9 Kengeni kuciya: Nga ciya mu ngila iya ku Bethi-shemeshi, ku mutambela waco, co ikeye natunenela obu bukalu bwakama. Oloni nga kuciimo, co tuzibuka ngwetu keti liboko lyendi lyatunenela obu bukalu bwakama ngacije. Bunatwizila lika.”
10 Obo banalume balingile bibabalekele. Bambatele bingombe babali ba lwabo baje bakele na bana na kubakutiiya ku litemba. Bana baboco babakutiiye hembo. 11 Co bambatele cikasha ca Yehova na kucaka mu litemba. Bakelemo na cikasha cije cakele na bimuku ba goudi na bifwisa bya mikila bibafulile. 12 Co obo bingombe batalesele mu ngila iya ku Bethi-shemeshi. Bendele lika omwo mu tapalo oku bohya. Kubaile ku cilyo nambe ku cimoshwe. Co baka-kuyula Bafilistiya babakabele munima kuketa na ku nginga ya Bethi-shemeshi. 13 Banu ba mu Bethi-shemeshi bakele na kuteja tiliku mu cana. Mubandwile mesho, bamwene cikasha, co babwahelelele manene. 14 Litemba lyezile mu lihya lya Joshua wa mu Bethi-shemeshi na kwimana kuyehi na limanya lyakama. Co batabozwele biti bya litemba kubipwisa bikuni, na kwana baje bingombe kupwa bwana bwa kwenyeka kuli Yehova.
15 Balevi bashulwisile cikasha ca Yehova na cikasha cakele kuyehi naco cije cakele na byuma bya goudi bibafulile, co babyakele oho ha limanya lyakama. Banu ba mu Bethi-shemeshi banene Yehova bwana bwa kwenyeka na milambu lije litangwa.
16 Baje baka-kuyula Bafilistiya batanu mubamwene byalingiwile, belukile ku Ekroni lije bene litangwa. 17 Ebi bikebyo bifwisa bya mikila bya goudi bibatumine Bafilistiya kupwa bwana bwa mulonga kuli Yehova: Cimo ca Ashidodi, cimoco ca Gaza, cikwabo ca Ashikeloni, cikwaboco ca Gathi, co cikwabo ca Ekroni. 18 Co namba ya bimuku ba goudi yalitombwele na namba ya binganda byoshe bya Bafilistiya bije byapwile bya baka-kubayula batanu, na binganda bibananyungilila, na membo aje akele hashandangala.
Co limanya lyakama habakele cikasha ca Yehova linapu bukaleho kweta na lelo lino, mu lihya lya Joshua wa mu Bethi-shemeshi. 19 Oloni Njambi watsiile banu ba mu Bethi-shemeshi mwafwa bakengele cikasha ca Yehova. Watsiile banu 50,070 hakati kabo, co banu bashangumukile kulila mwafwa Yehova wabatsiile manene. 20 Co banalume ba mu Bethi-shemeshi behwile ngwabo: “Iya asa kwimana halutwe lwa Yehova, ou Njambi wa kujela? Kuli kwatalesela ou Njambi mangana atutunde?” 21 Ngeci, batumine tutumwa kuli baje bakele mu Kiliyathi-jealimu ngwabo: “Bafilistiya banelwisa cikasha ca Yehova. Ijeni mwakucambate.”