Bukwasi ku Banakazi Babalingile Mwamubi

Omu mukemwo muinashangumukila ñanda ya mutwe wa “Kunyungilila Banakazi—Biyendeka Mbimbiliya.” ije ili ha jw.org. Mwasa kulinga daunilodi ei ñanda mu cifwa ca kupulinta kupangesa linki ibanamwesa kumamaneselelo ayo. Kutundaho nga mwamanesa kuipulinta, co mwasa kweteka lipapelo luwana mangana mupange trakiti. Ndokazi Stacy wa ku United States wendekele ngwendi: “Njapulintile makopi amo. Co nange na ndokazi umo twatwalele aje makopi kuli munakazi uje wakele ku njibo ibakanyungila banakazi baje bali mu bushonde.”

Munu umo uje akapanga kuje ku njibo walombele makopi akwabo a ije trakiti mangana akane baje bakele kuje ku njibo. Ngeci baje bandokazi babali batwalele matrakiti a kupwa 40 na makadi a kumwesa banu mwakuila ha jw.org a kupwa 30. Ha bungenzi bukwabo, muka-kutwamenena kuje ku njibo watondele ngwendi baje bandokazi bamwese banakazi bakele kuje ku njibo mwakulilongesela Mbimbiliya.

Ndokazi Stacy na bandokazi bakwabo babali baile ku njibo ikwabo ibakanyungila banakazi, co kuje ku njibo banu bakatambwile makopi atanu a ije trakiti na kulomba ngwabo bakabanenele akwabo. Munakazi umo uje akapanga kuje ku njibo wendekele ngwendi: “Awa matrakiti akwasa manene banakazi bali kuno mwafwa ali na biñanda bya seho manene.” Baje bandokazi mubelukilileko, banakazi babangi balikungulwile mangana bamone mucikendela cilongesa ca Mbimbiliya. Co banakazi babali bendekele ngwabo bashaka kuya ku biwano bya calumingo cateleko ku Njibo ya Bumwene.

Ndokazi Stacy wendekele ngwendi: “Twakomokele manene kumona mubabwahelelele banu kutanda ei ñanda yaibwa manene. Kupulinta na kweteka ei trakiti yapwa ngila yaibwa ya kwambulwilamo muzimbu wa Bumwene bwa Njambi ku banakazi baje babali na kulinga mwamubi. Tunabwahelelele kumona banu batambula ei ñanda mu kubwahelela. Co lalo tunabandamena kumona Yehova mwatukwasela omwo tutwalelelaho kwambulwila aba banakazi muzimbu waubwa.”