Ëxpëjkën 2

¿Pënën Dios?

¿Pënë tadë Dios diˈib tëyˈäjtën, ets ti txëˈaty? (1, 2)

¿Wiˈix yˈixëtyë nyiniˈx kyëbäjk? (3)

¿Wiˈixë Diosë jyaˈayˈäjtënë tmëdaty? (4)

¿Mbäät nyajtuˈunëmë awinax o kruus parë Dios nˈawdäjtëm? (5)

¿Wiˈix majtsk nax mbäät nˈixyˈäjtëmë Dios? (6)

1. Mayë jäˈäy tˈawdattë tijaty. Perë Biiblyë xyˈanmäˈäyëm ko jeˈeyë jyaˈaty tuˈugë Dios diˈib TËYˈÄJTËN. Yëˈë tëgekyë yajkoj diˈib ijtp yä Naxwiiny ets diˈib jamˈäjtp tsäjpotm, ets kom yëˈë të xymyoˈoyëmë jukyˈäjtën, yëˈën naytyuˈuk diˈib patëp nˈawdäjtëm (1 Korintʉ 8:5, 6; Diˈibʉ Jatanʉp 4:11).

2. Mä Biiblyë yajpatp kanäk nax wiˈixë Dios yajtijy, per jeˈeyë tmëdaty tuˈugë xyëë, txëˈaty JYOBAA. Mä mayë Biiblyë të yajjoˈotsyë Diosë xyëë ets jeˈeyë të yajpëtaˈaky Wintsën o Dios. Per ko yajjääyë Biiblyë, ja nety jap myiny kujayë tadë xëë Jyobaa naa 7,000 okën (Éxodo 3:15; Salmo 83:18, NM).

3. Jyobaa myëdäjtypyë nyiniˈx kyëbäjk, jeˈeyë ko kyaj dyëˈënëty extëmë niniˈxˈäjtëm. Biiblyë jyënaˈany: «Dios yëˈë dëˈën espiritë. Kyaj mbäät nˈijxëm» (Fwank 4:24, OTJ). Tuˈugë espiritë yëˈë tuˈugë jukyˈäjtënë diˈib mas yˈoyëty ets kyaj dyëˈënëtyë njukyˈäjtënëˈäjtëm. Ninäˈänëm tuˈugë naxwinyëdë jäˈäy tkaˈixyë Dios. Ets oyë Jyobaa tsyëënë tsäjpotm yˈijxtaapy tëgekyë (Fwank 1:18; Ebreeʉsʉty 4:13). ¿Ets tidën yˈandijpy espiritë santë? Yëˈë Diosë myëjää, kyaj yëˈëjëty tuˈugë jäˈäy extëmë Dios (Salmo 104:30; 1 Tesalónikʉ 4:8).

4. Tadë Biiblyë xytyukmëmaytyakëmë Jyobaa jyaˈayˈäjtënë. Myaytyakypy ko diˈibë jyaˈayˈäjtënë wäˈkpëtsëëmp yëˈë tsyojkënë, tëyˈäjtënë, wijyˈäjtënë etsë mëkˈäjtënë (Romanʉs 11:33, 34; 1 Fwank 4:8; Diˈibʉ Jatanʉp 11:17; 16:5). Nandëˈën tmaytyaˈaky ko Dios paˈayoop, mëk oyjyaˈay, pokymyaˈxp, yäjkpëjäˈäy ets maˈxtujkp. Pääty kom yëˈë xyˈuˈunkˈäjtëm tsojkëp njäˈäyˈäjtëm dëˈën extëm yëˈë (Éfesʉ 5:1, 2).

5. ¿Mbäät niwindakëm ets nmënuˈkxtakëmë awinax o kruus? Kyaj (Apostʉlʉty 17:24, 25, 29). Jyobaa jyënaˈany ko yëˈëyë naytyuˈuk mbäät nˈawdäjtëm. Yëˈë nipën mëët tkayajwaˈxyë myëjˈäjtënë. Ets tadë awinax nan kyaj tmëdatyë mëjää parë xypyudëjkëm (Salmo 115:4-8; Isaías 42:8; 1 Korintʉ 8:4).

6. ¿Wiˈix mbäät mas oyë Dios nˈixyˈäjtëm? Tuk nax yëˈko nˈijx nduˈunëm tëgekyë diˈib yëˈë të dyajkojtäˈäy mbawinmäˈäyëm këkpäät wiˈixë tyäˈädë kojy pëtaˈaky tnimaytyaˈagyë Dios. Kyojy pyëjtaˈagyë Dios yëˈë xytyukˈijxëm ko myëdäjtypyë mëjää etsë wijyˈäjtënë. Es mä tëgekyë diˈib të dyajkojy jam nˈijxëmë tsyojkën (Salmo 19:1-6; Romanʉs 1:20). Ja tuk nax wiˈix mbäät nˈixyˈäjtëmë Dios net ko nˈëxpëjkëmë Biiblyë. Jap yajnimaytyaˈaky mas niˈigyë wiˈixë tyäˈädë Dios jyaˈayˈaty. Nandëˈën xytyukmëmaytyakëm ti Dios tyuknibëjtakëp ets ti tsyojkypy nduˈunëm (Amós 3:7; 2 Timotee 3:16, 17).

[Letrë diˈib miimp mä dibujë mä pajina 5]

Mbäät nˈixyˈäjtëmë Dios ko nˈijxëmë kyojy pyëtaˈaky ets ko ngäjxëmë Biiblyë