Ëxpëjkën 3

¿Pënën Jesukristʉ?

¿Tiko Jesús yajtijy Diosë kyaˈaxkopk Uˈunk? (1)

¿Tiko yajtijy ja «Ayuk»? (1)

¿Tiko kyëdakyë Jesús extëmë naxwinyëdë jäˈäy? (2-4)

¿Tiko Jesús ttuunyë mëjˈäjtënë? (5)

Mä tiempë myiny kyëdaˈaky, ¿ti tyunaambyë Jesús? (6)

1. Jesús jamë nety tsyëënë tsäjpotm extëm tuˈugë anklës mä kyakëdaˈakynyëm yä Naxwiiny. Yëˈë tim jawyiinë Dios ojts yajkojyëty; pääty yajtijy Diosë kyaˈaxkopk Uˈunk (Kolosʉ 1:15; Diˈibʉ Jatanʉp 3:14). Jyobaa naytyuˈugë Jesús ojts dyajkojy kyaj pën pyudëjkë. Per ko net ojts dyajkojtäˈäy tëgekyë diˈib jaˈäjtp yä Naxwiiny ets jam tsäjpotm, yëˈë pudëjkë Jesús, päätyë Jesús yajtijy oybyutuˈunëbë (Proverbios 8:22-31; Kolosʉ 1:16, 17). Jesús yajtuunë nandëˈënë Dios extëmë yajkajxynyäjxpë. Päätyë Jesús yajtijy «ja Ayuk» (Fwank 1:1-3; Diˈibʉ Jatanʉp 19:13).

2. Dios yajtëgäjts ja Jesusë jyukyˈäjtënë ta tpëjtaky mä Mariiʉ yˈuˈunk tëjk. Päätyë Jesús kyaj tteetyˈajtyë naxwinyëdë jäˈäy ets kyaj tmëdäjty ja poky etsë tëgoˈoyën. Tëgëk peky jyaˈaty tidën ko Dios tkejxyë Jesús yä Naxwiiny: 1) yëˈë parë tnimaytyakyë Dios tëyˈäjtën mëët (Fwank 18:37), 2) yëˈë parë tpëtaky tuˈugë ijxpajtën diˈib mbäät mbanëjxëm ko tmëmadaktääjy tëgekyë amay jotmay ets kyaj tyëgoojy (1 Peedrʉ 2:21) ets 3) yëˈë parë dyojxyë jyukyˈäjtënë ets nˈawäˈätspëtsëˈëmëm mä poky ets mä oˈkën. ¿Tiko nety jyëjpˈamëty ets dyoxëdë jyukyˈäjtënë? (Matewʉ 20:28.)

3. Adán ja tim jawyiimbë yetyëjk, kyaj tmëmëdooyë Diosë yˈanaˈamën, ta ttuuny diˈibë Biiblyë tyijpy poky. Päätyë Dios tyuknikäjxpajtë oˈkënë (Génesis 3:17-19). Kyaj tneky myëmadaky tkuytyunëdë Diosë yˈanaˈamën yëˈko të nety pyokytyuunë. Wanaty wanaty ojts myëjäˈäyënë, axtë ko ojts yˈoˈknë. Niˈamukë ja yˈuˈunk yˈënäˈk ttukninäjxy ja poky. Pääty ëtsäjtëm nandëˈën nbäˈämbajtëm, nmëjjäˈäyëm ets nˈoˈkëm. ¿Wiˈixë net yˈawäˈätspëtsëmët ja naxwinyëdë jäˈäy? (Romanʉs 3:23; 5:12.)

4. Jesús wäˈäts jäˈäy yˈijty dëˈën extëmë Adán. Per mä kyaj ojts kyijxyë mëdë Adán, ja mä Jesús tmëmëdoojy yajxonë Dios, myëmëdoo axtë mä twinguwäˈkë oˈkën. Ets pääty yëˈë mbäädë nety dyaky ja jyukyˈäjtënë wäˈätspë, ets xyjuˈuybyëtsëˈëmëm mä ja Adangë pyoky. Biiblyë jyënaˈany ko «tkëbejty tkumëdoojy ja nyitsokënë nidëgekyë naxwinyëdë jäˈäyëty». Dëˈëntsoo ja Adangë yˈuˈunk yˈënäˈk mbäädë nety yˈawäˈätspëtsemy mä të yajtuknikäjpxpattë oˈkën. Niˈamukë pënaty pyëjtaktëbë mëbëjkënë mä Jesús mbäät yajpokymyaˈxtë ets tpäättët ja jukyˈäjtënë winë xëë winë tiempë (1 Timotee 2: 5, 6; Fwank 3:16; Romanʉs 5:18,19).

5. Ko Jesús yˈijty yä Naxwiiny, ojts dyaˈagëdaˈagyë päˈäm jäˈäy, ojts tmoˈoyë kyaˈay yˈukën diˈib yuˈoˈkëdëp ets ojts dëˈënyë dyajwëˈëmë mëk poj. Axtë ojtsë oˈkpë dyajpëdeˈeky. ¿Tiko ttuunyë mëjˈäjtënë? 1) Yëˈko pyaˈayoo ja jäˈäyëty diˈib ayoodëp ets pyudëkëyan. 2) Ja mëjˈäjtënë diˈib tyuun yëˈë yaˈijxë ko yëˈë Dios yˈUˈunkˈatyëty. Ets 3) ja mëjˈäjtënë diˈib nandëˈën tyuun yëˈë yaˈijxë ti tyukmëdunaambyë naxwinyëdë jäˈäy diˈib mëdoop ko tyëkët anaˈambë extëmë Rey (Matewʉ 14:14; Markʉs 2:10-12; Fwank 5:28, 29).

6. Jesús oˈk, per ta Dios yajpëdëˈkë extëmë jäˈäy diˈib kyaj yaˈixy ets ta jyëmbijty tsäjpotm (1 Peedrʉ 3:18). Ok, ta Dios pyëjtakë ets tyunët Rey. Tim tsojkë Jesús dyajjëjptëgoyaˈanyë ayoˈon etsë axëkˈäjtënë diˈib jaˈäjtp yä Naxwiiny (Salmo 37:9-11; Proverbios 2:21, 22; 2 Peedrʉ 2:9).

[Letrë diˈib miimp mä dibujë mä pajina 7]

Ko Jesús yˈijty yä Naxwiiny ojts yaˈëxpeky, tyuunë mëjˈäjtënë ets axtë kyëyäjkë jyukyˈäjtënë mët ëtsäjtëmgyëjxm