Ëxpëjkën 4

¿Pënën Mʉjkuˈugópk?

Tadë Mʉjkuˈugópk (Mʉjkuˈu) Satanás, ¿wiˈix ojts jyaˈty? (1, 2)

¿Wiˈix twinˈëënyë naxwinyëdë jäˈäy? (3-7)

¿Tiko kyaj mbäät xytyuny diˈibë Mʉjkuˈugópk tsyojkypy? (7)

1. Pën mas niˈigyë myëtsipˈäjtypyë Dios, yëˈë Mʉjkuˈugópk, diˈib mëk kuˈanëë ets niwäämbajtp. Tyäˈädë Mʉjkuˈugópk nandëˈën yajxëëmoˈoy «Satanás» diˈib yˈandijpy mëtsip. Wäˈätsë Dios ojts yajkojyëty ets jamë nety mëët tsyëënë tsäjpotm, per ok ta tyuktëjkë mëjˈat këjxmˈat ets ttsojky ja awdäjtënë diˈibë Dios patëp (Matewʉ 4:8-10).

2. Tyäˈädë Satanás, dyajtuuny tuˈugë tsäˈäny parë myaytyaky mëdë Eevʉ, ets mët ko twinˈëˈëny ta ttukmëduundëgooyë Dios. Dëˈëntsoojë Satanás tnibëdeˈky ja madakënë diˈibë Dios myëdäjtypy parë yˈanaˈamët, ets dëˈën dyajjaygyukëyanë ko Dios kyaj mbäät oy yˈaneˈemy. Ets ko nan ni tuˈugë jäˈäy tkamëdunëdë Dios xëmë. Ko dëˈën yˈadëtsy ta jyëmbijty Diosë myëtsip. Pääty yajxëëmoojy Mʉjkuˈugópk ets Satanás (Génesis 3:1-5; Job 1:8-11; Diˈibʉ Jatanʉp 12:9).

3. Satanás yˈëxtaabyë winmäˈäny wiˈix twinˈëënëdë naxwinyëdë jäˈäy ets yˈawdatëdët (2 Korintʉ 11:3, 14). Tuk nax wiˈix wyinˈëëny, ja mä dyajtunyë relijyonk diˈib kyaj tyëyˈäjtënëty. Pën tuˈugë relijyonk kyaj tnimaytyaˈaky tëyˈäjtënë Dios, yëˈë nety tyuunëbë Satanasë tsyojkënë (Fwank 8:44). Tadë jäˈäyëty diˈib tyukˈijtëbë relijyonk diˈib kyaj tyëyˈäjtënëty mbäät amumduˈukjot tmëbëktë ko yëˈë yˈawdäjttëp Diosë tëyˈäjtënbë, per yëˈë dëˈën myëduundëbë Satanás, pes yëˈë diˈib anaˈamp yä Naxwiiny (2 Korintʉ 4:4).

4. Satanás nan wyinˈiˈimbyë jäˈäy ko ttuktunyë brujëˈäjtk. Näägë jäˈäy tmëgäjxtë tsuu poj ets kyuwäˈänëdët o tˈaxëktunëdë wiink jäˈäy, yajxëwëj yajxëmayëdët o parë yaˈaybyat yajtsoybyatët. Per pën mooyëbë mëjää ets dëˈën ttundët yëˈë Satanás. Pääty pën nyajjotkujkˈatäˈänëmë Dios, tsojkëp njëjpkudijëtyaˈayëm tëgekyë brujë winmäˈäny. (Deuteronomio 18:10-12; Apostʉlʉty 19:18, 19).

5. Satanás myëmadakypy nandëˈënë naxwinyëdë jäˈäy ko dyajmëj dyajkëjxmëdë mët ko wiink käjpn tsyoony o wiink koloor yˈixˈattë, ets ko nandëˈën dyajmëjpëtsëmdë gobiernë. Näägë jäˈäy wyinmaytyë ko kyäjpn o kyoloor wiˈix yˈixˈattë yëˈë dëˈën waanë oy ets kyaj dyëˈënëtyë wiink nax wiink käjpn. Per kyaj dyëˈënëty extëm wyinmaytyë (Apostʉlʉty 10:34, 35). Wiinkpë net tˈawixtë etsë gobiernë dyaˈoyëdë amay jotmay diˈib jaˈäjtp. Dëˈëntsoo tjëjpkudijëdë Diosë yˈAnaˈamënë diˈib jeˈeyë mbäät dyaˈoyë amay jotmay (Diˈibʉ Jatanʉp 11:15).

6. Satanás nan myëmadakypyë jäˈäy ko ttukˈatsokyë axëkˈäjtënë. Jyobaa xyˈanmäˈäyëm ets kyaj nduˈunëmë axëkˈäjtënë yëˈko nyijäˈäp ko mbäät xyˈaxëktuˈunëm (Galasyʉ 6:7, 8). Mbäät näägë jäˈäy mˈanëˈëmxëty ets xytyunët ti yëˈë tyuundëp. Per jamyats ko pën tsyojkypy ets xytyunëdë axëkˈäjtënë yëˈë Satanás (1 Korintʉ 6:9, 10; 15:33).

7. Satanás mbäät nandëˈën dyajtunyë jäˈäy ets mnibëdëˈëgëdët o mëtsiptsoonëdët ets mijts xymyastuˈudëdë Jyobaa. Mbäät näägë mjiiky mëguˈuk mdukjotˈambekyëty ko xyˈëxpekyë Biiblyë. O mbäädë net nääk jeˈeyë mnixiˈiky mdukxiˈigyëty. Per, ¿pën myajjukyˈäjtëp? Satanás jeˈeyë mˈatsëˈëgëyaˈanyëty parë kyaj xyˈëxpëkëdë Jyobaa yˈää yˈayuk. Per katë xyajmadaˈaky (Matewʉ 10:34-39; 1 Peedrʉ 5:8, 9). Ko xykyatunët diˈibë Mʉjkuˈugópk tsyojkypy, mbäät xyajxondaˈagyë Jyobaa ets mbäät xyaˈixyëty ko mbuwäˈkëbë yˈAnaˈamënë (Proverbios 27:11).

[Letrë diˈib miimp mä dibujë mä pajina 9]

Satanás wyinˈiˈimbyë jäˈäy mët yëˈëgyëjxmë relijyonk diˈib kyaj tyëyˈäjtënëty, brujëˈäjtk ets ko nax käjpn dyajnayˈaxëkˈixëdë

[Letrë diˈib miimp mä dibujë mä pajina 9]

Ëxpëk niˈigyë Jyobaa yˈää yˈayuk ets dëˈën kyaj xytyunët diˈibë Mʉjkuˈugópk tsyojkypy