¿Pënëts ëëtsëty Jyobaa tyestiigëty?

¿Ninääk xyʼixyʼatyë Jyobaa tyestiigëty? Waʼan mëët mduunmuky o waʼan nääk xymyëdëjkʼaty, o mëët mʼeskuelëʼaty. Ets waʼan të ndukmëtmaytyäʼägëdë Biiblyë. Per ¿pënëtsën ëëtsëty ets tikotsë jäʼäy ndukmëtmaytyäʼäktë tijatyëts nmëbëjktëp?

Ëëtsëty, duʼun extëmë oytyim pënëty. Määyëmëts ntsoondë ets wiʼixëmëts ja jukyʼäjt madakën nmëdattë. Nan tap diʼibë nety tyukʼijttëdëbë wiinkpë relijyonk, ets tap diʼibë nety kyaj ttimmëbëktë Dios; per niʼamukëtsë tiempë të njuuttë parëts yajxon të nʼëxpëktë tijatyë Biiblyë tukniʼʼijxëp ets tajëtsë net të njäʼttë Jyobaa tyestiigë (Apostʉlʉty 17:11). Kojëts të njaygyukëdë diʼibëts të njattë, tajëtsë njot nwinmäʼäny të nbëjtäʼäktë parëts nmëdunäʼändë Jyobaa Dios.

Kajaats ndukʼoyʼattë kojëts nʼëxpëktë Biiblyë. Nmëdäjttëbëtsë jotmay extëm niʼamukë jäʼäy ets nan tëgooytyëbëts, per kojëts ndundë mëjää parëts nguytyundë Biiblyë kyäjpxwijën, tajëts mas oy njukyʼattë (Salmo 128:1, 2). Päätyëts nanduʼunë jäʼäy ndukmëtmaytyäʼäktë ja oyʼäjtënë diʼibëts të njattë mä Biiblyë.

Yëʼëjëts nguytyuundëbë Diosë kyäjpxwijën. Tyäʼädë käjpxwijën diʼib yajpatp mä Biiblyë, yëʼëts xypyudëjkëdëp parëts oy njukyʼattët, parëtsë jäʼäy nwintsëʼëgëdët, ndundëdëts tijaty tëyʼäjtën myëët ets nʼittëdëts oyjyaʼay. Nan xypyudëjkëdëbëts parëts oy ngunaxʼat ngugäjpnʼattët, nʼittëdëts tuʼugyë mëdëtsë nfamilyë, oy njukyʼattëdëts ets parëts oy nnayjawëdët. Seguurëts nʼittë ko “Dios nidëgekyë jäʼäy ttsojktäʼäy”. Pääty tuʼugyëts nʼittë abëtsemy nyaxwinyëdë, kyajts xyajnaywyäʼkxëdë politikë ets ni yëʼë kojëts wiink lugäär ntsoondë. Ets oyëts nduʼunʼattë extëmë oytyim pënëty, tëgatsy ja relijyonk diʼibëts ndukʼijtëdëp (Apostʉlʉty 4:13; 10:34, 35).

• ¿Tiko njënäʼänëm ko Jyobaa tyestiigëty duʼun extëmë oytyim pën jäʼäyëty?

• ¿Tijaty käjpxwijënë të nnijäʼäwëm mä Biiblyë?