¿Tikots nxëʼattë Jyobaa tyestiigëty?

Mayë jäʼäy wyinmaytyë ko ëëtsëty, Jyobaa tyestiigëty, yëʼë tuʼugë relijyonk diʼib jemy. Per tam nyëjkxnë 2,700 jëmëjt mä ojts yajxëëmoʼoytyë “testiigëty” diʼib myëduundë ja Diosë tëyʼäjtënbë (Isaías 43:10-12). Mä nety tkapäätynyëmë jëmëjt 1931, jatsë nety nyajtijtë diʼib yʼËxpëjktëbë Biiblyë. Per ¿tikotsë net nxëʼattë Jyobaa tyestiigëty?

Yëʼë ko duʼunën nyigëxëʼëky pën diʼibëts nDiosʼäjttëp. Ko tëëyëp yajjääyë Biiblyë këʼam, kanäk milʼok japë Dios xyëë yajkujäʼäyë, Jyobaa. Mä mayë Biiblyë të yajjoʼotsyë Diosë xyëë ets jeʼeyë të yajpëjtaʼaky Dios o Wintsën. Perë Diosë tëyʼäjtënbë ojts nyaynyigajpxyëty mä Moisés ko yëʼën xëʼäjtp Jyobaa ets tʼanmääy: “Duʼuntsën nxëʼaty winë xëë winë tiempë” (Éxodo 3:15). Duʼunën nyayajnigëxëʼkë ko tëgatsy mëdë wiink dios. Ëëtsëty, jantsy oyëts nnayjawëdë kojëts nmënëjkxtë Diosë xyëë diʼib wäʼäts.

Yëʼë ko duʼunën nyigëxëʼëky diʼibëts të nyajtuknipëktë. Desde tëëyëp mä Abel jyukyʼajty, ja ogäʼänë jäʼäy dyanigëxëʼktë ko myëbëjktëbë Jyobaa. Ko yʼaknäjxyë tiempë, ta jyukyʼajtyë Noé, Abrahán, Sara, Moisés etsë David, diʼib nanduʼun “yajnigëxëʼk ja myëbëjkën” o testiigëʼäjttë (Ebreeʉsʉty 11:4–12:1). Tyam, nanduʼunëtsë nwinmäʼäny të nbëjtäʼäktë parëts nidestiigëʼatäʼändë Dios etsë jäʼäy tnijawëdët pënën yëʼë, duʼun extëm tuʼugë jäʼäy tnidestiigëʼaty ja diʼib yajniwäämbajtp mä tuʼugë gobiernë o kuduunk.

Yëʼë ko duʼuntsën nbanëjkxtë Jesusë yʼijxpajtën. Mä Biiblyë jyënaʼany ko Jesus yëʼë “nyigajxypy es ttuny ja tëyʼäjtën”, pääty yajtijy testiigë (Diʼibʉ Jatanʉp [Apocalipsis] 3:14). Jesus këʼëm jyënany: “Päätyëts të nminy naxwiiny esëts nʼanëëmët ja jäʼäyëty diʼibë dën tëyʼäjtën”. Yëʼë, nyimaytyak ja Tyeetyë xyëë (Fwank 17:26; 18:37). Pääty, pënaty tyam jyantsy pyanëjkxtëbë Jesus, tsojkëp tmënëjkxtëdë Diosë xyëë ets tnigäjpx tnimaytyäʼäktët. Ets ëëtsëty, Jyobaa tyestiigëty, duʼuntsën tyam ndundë.

• ¿Tiko diʼib yʼËxpëjktëbë Biiblyë yajxëëmooytyë Jyobaa tyestiigëty?

• ¿Desde näʼä jyaʼʼatyë Jyobaa tyestiigëty yä Naxwiiny?

• ¿Pën diʼib mas mëj ijtp extëmë Jyobaa tyestiigë?