¿Jamdaa pën tmëdooˈityë nuˈkxtakën?

Patricia,a diˈib tsënaapy Irlanda, jyënaˈany: “Kyajtsë nety nˈity seguurë pën jamë Dios. Per nmënuˈkxtakypyëts näˈä ganäˈäty. Ets oyëtsë nety ngaˈity seguurë pën jam pën tmëdooˈity, nˈawijxypyëtsë nety ets pën tmëdowët. Kyajtsë nety njotkujkˈaty ets ni nganijawëts tikots njukyˈaty. Kyajts ijty nmëbëkyë Dios mët ko nwinmayëts ko yëˈëyë myëbëjktëp pënaty pojënë yajwinˈëˈëndëp”.

¿DUˈUN mijts mnayjawëty extëmë Patricia? ¿Mmënuˈkxtakypyë Dios oy mgaˈity seguurë ko jyamëty? Pën duˈun, mayë jäˈäy duˈun jyattë.

◼ Tëgok, ojts yajwijtspëtsëmy ko 2,200 jäˈäy diˈib Bretaña, jeˈeyë 22% tmëbëktë ko tamë Dios diˈib myëdooˈijtypyë nuˈkxtakën. Per 55% jyënandë ko nuˈkxtaktëp näˈä ganäˈäty.

◼ Jatëgok, 10,000 jäˈäy diˈib tsoˈondëp mä taxkë continente ojts yajwijtspëtsëmy ko 30% nyuˈkxtäˈäktë diˈib jënandëp ko kyaj tmëbëktë Dios.

¿Tiko kyaj tmëbëktë?

Alan, tuˈugë yetyëjk diˈib tsoˈomp Inglaterra, tnimaytyaˈaky tiko nety kyaj tmëbëkyë Dios: “Duˈunëtsë nety nˈixy ko relijyonk jeˈeyë tyuny parë tˈaneˈemyë jäˈäy ets tpëjkë myeeny syentääbë. Tajëts ijty nwinmay: Koxyëbë Dios jyamëty, kyajxyëp tnasˈixë ets jyaˈˈatëdë axëkˈäjtën. Per oyëts ijty duˈun nwinmay, näˈäty unyaabyëts ets jamëts tii nmëgajpxy. Nan nnayajtëëwëbëts tiko të nmiˈinëm jukyˈäjtpë”.

Taaˈäjtp kanäk pëky tiko mbäät tuˈugë jäˈäy kyaj yˈity seguurë pën yaˈˈatsowëp ja nyuˈkxtakën. Ets may duˈun yajpäättë mët ko kyaj yaˈˈatsoojëmbity tijaty nayajtëëwëdëp, extëm nˈokpëjtakëm:

◼ ¿Jam pën Diˈib të xyajkojëm?

◼ ¿Tiko relijyonk jeˈeyë dyajjaˈˈatyë jotmay?

◼ ¿Tiko Dios tnasˈixë ets jyaˈˈatëdë ayoˈon?

Ets mijts, ¿mnuˈkxtäˈägëp mëbëjkën myëët ko xynyijawët wiˈix yaˈˈatsoojëmbity?

[Notë]