Ja Jyobaa tsyojkënë ninäˈä kyakugëxë

1, 2. ¿Wiˈix mayë nmëguˈukˈäjtëm nyayjyawëdë ko tpäättë amay jotmay?

IXTËM nˈijxëmë dibujë mä pajina 13, ko myinyë mëk poj tuu mejyˈitkujky, këjxmaty ja mejy jyantsy pyëdëˈëky ets xitsow yatsow dyajnëjkxy ja barkë axtë mbäät dyajkiny. Pääty parë ja barkë tyëëyˈawët ets kyaj xitsow yatsow ja mejy yajnëjkxëdët, ta pënaty yajˈyeˈeytyëp ja barkë tkujëbijpnaxtë tuˈugë pujxn ixtëm yaˈixy mä dibujë.

² Ets mijts, ¿ti mbäät xytyuny parë amëk jotmëk xywyinguwäˈägët tuˈugë jotmay? Waˈan kyaj xynyijawë ti mdunëp, ets näˈäty mjënäˈäny ko tamë Jyobaa mbudëkëty ets ko waanë yˈity ta mjënäängojnë ko kyaj pën tnijawë wiˈix mjaty mgëbety (Sal. 10:1; 13:1). Waˈan tuˈugë mëtnaymyaayëbë mˈagujkmooy mjotkujkmoˈoyëty ets yëˈë mëdiˈibë mbudëjkëp parë ja mˈääw jot kyujkë (Prov. 17:17; 25:11). Per ko waanë ja tiempë nyaxy, ta jatëgok wiink mnayjyawëty. O waˈan mwinmay ko kyaj mnitëkëty etsë Jyobaa mtsokëdët. Pën duˈun jam mjaty, ¿ti mbäät mwoˈonˈityë ixtëm ja barkë wyoˈonˈityë ja pujxn ets xëmë mˈitët seguurë ko Jyobaa mtsojkëp ets mëjotmaybyatëp?

3. 1) ¿Ti yˈandijpy ko jyënaˈany ja tsojkën mëdiˈibë ninäˈä kyakugëxë? (Salmo 31:7; 136:1). 2) ¿Tiko njënäˈänëm ko yëˈëyë Jyobaa mëdiˈibë duˈun yaˈijxëp ja tsojkën? (Ix nanduˈunë dibujë).

³ Tuk pëky mëdiˈibë mbäät nduˈunëm yëˈë ko njamyajtsëm ko ja Jyobaa tsyojkën ninäˈä kyakugëxë (käjpxë Salmo 31:7; 136:1). Ko jyënaˈany ja tsojkën mëdiˈibë ninäˈä kyakugëxë, yëˈë yˈandijaampy ko tuˈugë jäˈäy xëmë ntsojkëm ets ninäˈä ngamastutëm, etsë Jyobaa duˈunën xytsyojkëm (Éx. 34:​6, 7). Pes mä Biiblyë duˈun yajnimaytyaˈaky: “Ja mtsojkën mëdiˈibë ninäˈä kyakugëxë, mdukˈijxypy mëjwiin kajaa niˈamukë pënaty mmëgäjpxëp” (Sal. 86:​5, TNM). Yäˈädë yëˈë yˈandijaampy ko Jyobaa ninäˈä tkamastuˈutyë yˈuˈunk yˈënäˈk, ets ko duˈun nyaˈijtëm winmäˈänyoty yëˈë xypyudëkëyäˈänëm parë mëk ndënäˈäyëm oy ti amay jotmay nwinguwäˈkëm (Sal. 23:4).

JATUˈUGË TËYˈÄJTËN MËDIˈIBË MIIMP MÄ BIIBLYË YËˈË KO DIOS XYTSYOJKËM

4. ¿Tijaty tëyˈäjtën të ngupëjkëm mëdiˈibë tukniˈˈijxëbë Biiblyë? ¿Ets tiko kyaj mbäät pën xyajwinmääytyëgäjtsëm?

⁴ Ja tukpëky mëdiˈibë mbäät xypyudëjkëm parë nwinguwäˈkëm ja amay jotmay, yëˈë ko ngupëjkëm ja tëyˈäjtën ko Jyobaa xytsyojkëm. Ixtëm mijts, ¿tijaty tëyˈäjtën të xykyupëky mëdiˈibë miimp mä Biiblyë? Të xykyupëky ko Dios txëwˈaty Jyobaa, ko Jesús yëˈë Diosë yˈUˈunk, ko ja oˈkpëty kyaj tii tˈokjäˈäwëndë, ko ja Naxwinyëdë jyëmbitäˈäny jantsy tsuj ets ko njukyˈatäˈänëm xëmëkyëjxm (Sal. 83:18; Ecl. 9:5; Juan 3:16; Apoc. 21:​3, 4). Komë yäˈädë tëyˈäjtën të ngupëjkëm, tsip pën xyajwinmääytyëgäjtsëm mët ko nˈijtëm seguurë ko tëyˈäjtën. Nanduˈunën ko ngupëjkëm ja tëyˈäjtën ko Jyobaa xytsyojkëm, kyaj nëjkx pën xyajwinmääytyëgäjtsëm ko Jyobaa kyaj xytsyojkëm o ko kyaj xykyupëjkëm. Min niˈigyë nˈaknimaytyakëm.

5. Oknimaytyäˈäk wiˈix tuˈugë jäˈäy tmäjtstuty ja mëbëjkënë mëdiˈibë kyaj tyëyˈäjtënëty.

⁵ Ko ojts xyˈëxpëjktsondaˈagyë Biiblyë, ¿ti ojts mbudëkëty parë xymyäjtstuty tijaty nety mmëbëjkypy? Waˈan mbudëjkë ko ojts xyˈijxkijpxyë wiˈixë nety tijaty myajtukniˈˈijxë mä mrelijyonk ets wiˈixë Biiblyë jyënaˈany. Nˈokpëjktakëm ko yëˈë nety mmëbëjkypy ko Jesús yëˈë Dios, per ko xynyijäˈäwë wiˈixë Biiblyë jyënaˈany, waˈan mnayajtëëwë: “¿Tëyˈäjtënëdaa?”. Ko niˈigyë xyˈëxpëjkˈadëtsyë Biiblyë, ta xypyëjkyë kuentë ko Jesús kyaj yëˈëjëtyë Dios ets ta kyaj xynyekymyëbëjky. Ta xykyupëjky ja tëyˈäjtën ko Jesús yëˈë tim jawyiinë Dios ojts yajkojˈyëty ets ko yëˈë “ja Dios ja tyuˈukˈUˈunk” (Fwank 3:​18, JKJ; Col. 1:15). Taaˈäjtp kanääk pëkyë mëbëjkënë mëdiˈibë tsiptakp nmäjtstutëm mët ko duˈun të nmëyaˈk të nmëbajtëm (2 Cor. 10:​4, 5). Per ko nmäjtstutënë, ¿këdii tsip ets jatëgok nnijëmbijtëm? (Filip. 3:13).

6. ¿Tiko mä Salmo 136 kanääk ok jap jyënaˈany ko Jyobaa “tsyojkënë ninäˈä kyakugëxë”?

⁶ Mbäät nan tim duˈun xytyuny ets xymyëbëkët ja tëyˈäjtën ko Jyobaa mjantsy tsyojkëp. Ixtëm nˈokpëjktakëm, ko nety xyajnaxyë amay jotmay ets winmay ko Jyobaa kyaj mtsokyë, oknayajtëwëdë: “¿Tëyˈäjtënë ixtëmëts nwinmay?”. Ta net xyˈijxkijpxyët mëdë Biiblyë wiˈix tnimaytyaˈaky ko Jyobaa xytsyojkëm, ixtëm jyënanyë mä Salmo 136:​1, mëdiˈibë tyuktsondakypy yäˈädë artikulo. ¿Tiko jyënaˈany ko Jyobaa tsyojkënë ninäˈä kyakugëxë? ¿Ets tiko 26 ok jyënaˈany mä yäˈädë Salmo ko Jyobaa tsyojkën xëmëkyëjxm yˈijty? Ixtëm yä nˈijxëm, ko Jyobaa xytsyojkëm yëˈë tuˈugë tëyˈäjtën mëdiˈibë mbäät ngupëjkëm, duˈun ixtëm ojts ngupëjkëm kanääk pëky ja tëyˈäjtën mëdiˈibë ojts nyajtukniˈˈijxëm. Pääty kupëk ko Jyobaa mtsojkëp ets duˈun ixtëm xyjyëjpkudijë ja tukniˈˈijxënë mëdiˈibë kyaj tyëyˈäjtënëty, nanduˈun mbäät xyjyëjpkudijë ko mwinmayët ko Jyobaa kyaj mtsokyë.

7. ¿Mëdiˈibë tekstë jënäämp ko Jyobaa xyjyantsy tsyojkëm?

⁷ Mä Biiblyë miimp kanäägë tekstë mëdiˈibë xytyukˈijxëm ko Jyobaa xytsyojkëm. Min nˈokˈijxëm majtsk, Jesús duˈun tˈanëmääy ja yˈëxpëjkpëty: “Niˈigyë miits mtsoowbäättë këdiinëm ja may joon” (Mat. 10:​31, TY). Yëˈë kyaj jyënany: “Waˈan mijtsëty niˈigyë mtsoowbäättë këdiinëmë may joon”. Etsë Jyobaa duˈun tˈanëmääy ja kyäjpn: “Ëjts mijts njotmëkmoˈoyaampy, duˈun, ëjts mijts nbudëkëyaampy, nwijtsˈitaampy mëdëtsë nˈaˈoygyëˈë mëdiˈibë tyuumbyë tëyˈäjtën” (Is. 41:​10, TNM). Jyobaa kyaj jyënany: “Waˈanëts mijts nbudëkët”. Ixtëm nˈijxëm, mä yäˈädë tekstë kyaj jyënaˈany waˈan, mëdiˈibë xytyukˈijxëm ko Jyobaa xyjyantsy tsyojkëm. Pääty mëdiˈibë mbudëkëyanëp ko xywyinguwäˈägëdë amay jotmay, yëˈë ko xykyäjpxëdë duˈumbë tekstë parë xymyëbëkët ko mjantsy tsyojkëbë Jyobaa. Pawinmay wiˈix jyënaˈanyë duˈumbë tekstë ko xykyäjpxët ets tukmëtmaytyäˈägë Jyobaa wiˈix mnayjyawëty. Pën mduumpy duˈun, ta nanduˈun nëjkx mjënäˈäny ixtëm jyënandë ja Dios mëduumbëty mä primer siiglë: “Të nnijäˈäwëm ets të nmëbëjkëm ko ja Dios xytsyojkëm” (1 Juan 4:​16, TY).a

8. ¿Ti mbäät nduˈunëm pën jeˈeyëm nwinmäˈäyëm ko kyaj Jyobaa xytsyojkëm?

⁸ ¿Ti mdunëp pën jeˈeyëm mwinmay ko kyaj Jyobaa mtsokyë? Yëˈë ko xywyinmayët wiˈixë Jyobaa yajnimaytyaˈaky mä Biiblyë, pes jap jyënaˈany ko Jyobaa xytsyojkëm. Jamyats ko Biiblyë kyaj wyinˈëëny, per ja mjot mwinmäˈäny mbäät mwinˈëënyë. Pën winmäˈäyëm ko Dios kyaj xytsyojkëm, duˈunë nety njënäˈänëm ko Biiblyë winˈëˈëmp ko jyënaˈany “ko Dios yëˈë dëˈën ja tsojkën” (1 Fwank 4:​8, JKJ).

¿TI JESÚS MYAYTYÄˈÄGAN KO JYËNANY: “JA NDEETYËS KËˈËM MIITS MTSOJKËDËP”?

9, 10. ¿Ti nety Jesús myaytyäˈägaampy ko tˈanëmääy ja yˈëxpëjkpëty “ja nDeetyëts këˈëm miits mtsojkëdëp”? (Juan 16:​26, 27; ix nanduˈunë dibujë).

⁹ Ja tuk pëky mëdiˈibë mbäät xypyudëjkëm parë nˈijtëm seguurë ko Jyobaa xyjyantsy tsyojkëm, yëˈë ko njaygyujkëm tiko Jesús tˈanëmääy ja yˈëxpëjkpëty: “Ja nDeetyëts këˈëm miits mtsojkëdëp” (käjpxë Juan 16:​26, 27, TY). ¿Tiko duˈun tˈanëmääytyë? ¿Yëˈëdaa parë ja yˈëxpëjkpëty oy nyayjyawëdët? Kyaj. Pesë Jesús yëˈë nety jam nyimaytyakypy wiˈix tmënuˈkxtäˈäktëdë Jyobaa.

¹⁰ Jesús yˈanëmääy ja yˈëxpëjkpëty ets nyuˈkxtäˈäktët xyëëwgyëjxm, per kyaj yëˈë yajmënuˈkxtäˈägët (Juan 16:​23, 24). Jëjpˈamë nety tjaygyukëdët. ¿Tiko? Kom oyë nety të yˈittë mëdë Jesús ets të nety dyajnigëxëˈëky ko mëk tsyokëdë, mbäädë nety wyinmaytyë ko yëˈë myënuˈkxtäˈäktëbë Jesús ko pyatëjkënët tsäjpotm ets nidëyë dyajnaxët mä ja tyeety. Päätyë Jesús yajxon tyukjaygyujkëdë ko kyaj nety yˈoyëty ets duˈun wyinmaytyët, duˈun yˈanëmääyëdë: “Ja nDeetyëts këˈëm mijts mtsojkëdëp”. Yäˈädë tekstë yëˈë xytyukˈijxëm ko Jyobaa mëkën xyjyantsy tsyojkëm. Pääty yëˈë këˈëm ttimymyëdoowˈity wiˈix nˈanëmäˈäyëm, yäˈädë yëˈë tuˈugë tëyˈäjtënë mëdiˈibë Biiblyë tukniˈˈijxëp. Nan tim duˈun ëjtsäjtëm ko ojts nˈëxpëjktsondakëmë Biiblyë, ta ojts nˈixyˈäjtëmë Jesús ets ntsojkëm (Juan 14:21). Per duˈun ixtëm ja yˈëxpëjkpëty yëˈë myënuˈkxtaktë Jyobaa, nanduˈun ëjtsäjtëm yëˈë nmënuˈkxtakëmë Jyobaa ets nˈijtëm seguurë ko myëdoowˈijty wiˈix nˈanëmäˈäyëm ets ko xytsyojkëm. Tëgok tëgok nmënuˈkxtakëm, yëˈë nety nyaˈijxëm ko njantsy myëbëjkëm ko Jyobaa xytsyojkëm (1 Juan 5:14).

PËN XYAˈˈAMAJTSK XYAJJOTMÄTSKËM

11. ¿Tiko Satanás xyondäˈägäˈäny pën winmäˈäyëm ko Jyobaa kyaj xytsyojkëm?

¹¹ ¿Pën xyajwinmäˈäyëm ko Jyobaa kyaj xytsyojkëm? Waˈan nwinmäˈäyëm ko yëˈë Satanás. Ets jantsy duˈunë duˈun. Yëˈë Mëjkuˈu “dëˈën jyëdity extëm ja kää” ets xyajkäˈäjäˈänëm niduˈuk niduˈuk, tsyojkypy nwinmäˈäyëm ko Jyobaa kyaj xytsyojkëm (1 Peed. 5:​8, JKJ). Perë Jyobaa mëk xytsyojkëm, pääty ojts xytyuknigajxëmë yˈuˈunk ets ojts xyjuuybyëtsëˈëmëm. Jeˈeyë ko Satanás xyajwinmayäˈänëm ko kyaj xypyat xynyitëjkëm ets xytsyojkëm (Heb. 2:9). ¿Pën xondakp ko nwinmäˈäyëm ko Jyobaa kyaj xytsyojkëm? Satanás. ¿Ets pënën xondakp ko nˈëxtëkëwäˈkëm mä ja amay jotmay nbatëm? Nan yëˈë Satanás. Per ko nˈokwinmäˈäyëm: ¡Yëˈë duˈunë Satanás mëdiˈibë Jyobaa kyaj nyekytsyokyë! ¡Ets ixën xyajwinmayäˈänëm ko ëjtsäjtëm kyaj Dios xytsyojkëm ets ko kyaj xykyupëjkëm! Yäˈädë yëˈë xytyukˈijxëm ko duˈunën ja tuk pëky tyuny parë xytyukmäjtstuˈudäˈänëmë Dios (Efes. 6:11). Ko duˈun nnijäˈäwëm, ¿ti net mbäät nduˈunëm? Tsojkëp mëk njëjpkudijëm ko duˈunë Satanás xyajwinmayäˈänëm (Sant. 4:7).

12, 13. ¿Tiko ja poky kaytyey xyajwinmäˈäyëm ko kyaj xytsyojkëmë Jyobaa?

¹² Per kyaj yëˈëyë Satanás xyajwinmäˈäyëm ko kyaj xytsyojkëmë Jyobaa, nan päätyën duˈun nwinmäˈäyëm mët ko pokyjyaˈay nyajpatëm (Sal. 51:5; Rom. 5:12). Yëˈë poky kaytyey të xytyukmëjagamgakëmë Dios, të dyajmäˈätyë jot winmäˈäny ets ja niniˈkx këbäjk.

¹³ Ko nbokytyuˈunëm axëëk xyajnayjyäˈäwëm, xyajmäˈäy xyajtäjëm, xyaˈˈamajtsk xyajjotmajtskëm ets tsoytyuˈunëm. Per nan mbäät duˈun nnayjyäˈäwëm ko njamyajtsëm ko pokyjyaˈay nyajpatëm ets kyaj oy tijaty nduˈunëm ixtëmë Jyobaa ojts tjatuknibëjktäägë (Rom. 8:​20, 21). Ko pokyjyaˈay nyajpatëm, mbäät nˈijxkijpxyëm ixtëm ko tuˈugë karrë yantë xyeˈety, kyaj mbäät oy kyeky tyuny ixtëm ojts jyayajtuknigojë. Nanduˈunën ëjtsäjtëm nyajpatëm, pääty näˈäty nwinmäˈäyëm ko kyaj Jyobaa xynyekytsyojkëm. Ko duˈun nwinmäˈäyëm, nˈokjamyajtsëm ko Jyobaa yëˈë “ja Diosë mëjpë jaantsypyë”, mëdiˈibë xëmë tsyojkypy pënaty tsojkëp ets mëmëdoowëp (Neh. 1:​5, TNM).

14. Ko ojts nyajjuuybyëtsëˈëmëm, ¿wiˈix xypyudëjkëm parë kyaj nwinmäˈäyëm ko Jyobaa kyaj xytsyojkëm? (Romanos 5:8; ix nanduˈunë rekuäädrë “Exkëm ja poky mwinˈëënëdë”).

¹⁴ Näˈäty mbäät nnayjyäˈäwëm ko kyaj xypyat xynyitëjkëm etsë Jyobaa xytsyojkëm. Ets jantsy duˈunë duˈun, kyaj xypyat xynyitëjkëm. Per oy duˈun nnayjyäˈäwëm, Jyobaa jeˈeyëm xytsyojkëm. Ëjtsäjtëm kyaj mbäät tii nduˈunëm parë Jyobaa xytsyojkëm, per yëˈë mëk xytsyojkëm. Pääty ojts tkexy ja yˈuˈunk parë ojts xyjyuuybyëtsëˈëmëm ets mbäät xypyokymyaˈkxëm (1 Juan 4:10). Nˈokjamyajtsëm ko Jesús kyaj yëˈë tnimiinyë wäˈätsjäˈäy, yëˈë duˈunë nyimiin ja pokyjyaˈayëty (käjpxë Romanos 5:8). Jyobaa kyaj tˈëwxity tjëjpˈixy ets ak oy tijaty nduˈunëm, pes nyijäˈäwëp ko kyaj nmëmadakëm. Ixtëm të nˈijxëm, ja poky kaytyey yëˈë xyajwinmäˈäyëm ko Jyobaa kyaj xytsyojkëm, pääty nˈokjëjpkudijëm ko duˈumbë winmäˈäny xytyukmiˈinëm (Rom. 7:​24, 25).

NˈOKPËJKTAKËM JA WINMÄˈÄNY ETS NINÄˈÄ JYOBAA NGAMÄJTSTUTËM

15, 16. ¿Ti Jyobaa tyunaampy pën kyaj nmäjtstutëm, ets tiko? (2 Samuel 22:26).

¹⁵ Ko nwinguwäˈkëmë ayoˈon jotmay, nˈokpëjktakëmë winmäˈäny ets nˈaˈoˈkëmë Jyobaa (Deut. 30:​19, 20). Pën kyaj nmäjtstutëm, mbäät nˈijtëm seguurë ko yëˈë nan kyaj xymyäjtstudäˈänëm oy ti tyun jyatëdët (käjpxë 2 Samuel 22:26).

¹⁶ Ixtëm të nˈijxëm mä yäˈädë artikulo, ko nbatëmë ayoˈon jotmay, ¿ti mbäät xywoˈonˈijtëm ixtëm ja barkë wyoˈonˈityë ja pujxn? Yëˈë ko njamyajtsëm ko Jyobaa mëk xytsyojkëm ets ko xëmë xypyudëkëyäˈänëm. Ets pën ja näˈä nwinmäˈäyëm ko Jyobaa kyaj xytsyojkëm, nˈokjamyajtsëm ko Biiblyë jyënaˈany ko xytsyojkëm ets kyaj yëˈë nmëbëjkëm ixtëm ëjtsäjtëm nwinmäˈäyëm. Nˈokmëbëjkëm yäˈädë tëyˈäjtën mëdiˈibë miimp mä Biiblyë: Ko Jyobaa tsyojkënë ninäˈä kyakugëxë, xëmëkyëjxm yˈity.