Yajpudëkëdë ja toˈoxytyëjkjäˈäyëty mëdiˈibë axëëk yajtuundëp

Mä sitio jw.org miimp tuˈugë artikulo mëdiˈibë xëwˈäjtp “Seguridad para la mujer: ¿Qué dice la Biblia?”, mbäät nyajjënäjkëmë yäˈädë artikulo, nyajpëtsëˈëmëm etsë net nˈanaˈkmujkëm. Stacy, tuˈugë nmëguˈukˈäjtëm mëdiˈibë Estados Unidos, tnimaytyaˈaky: “Nyajpëtsëëmëts kanäägë yäˈädë artikulo ets mët tuˈugë nmëguˈukˈäjtëm ojtsëts nmënëjkxtë mä yˈittë toˈoxytyëjkjäˈäyëty mëdiˈibë axëëk yajtuundëp, pes wingonëtsë nety xywyëˈëmxëdë taabë lugäär”.

Niduˈuk ja toˈoxytyëjkjäˈäy mëdiˈibë nety jap tuump, ojts niˈigyë tˈakˈamëdoyë yäˈädë neky parë tmoˈoyaˈany ja toˈoxytyëjkjäˈäyëty mëdiˈibë nety jap ijttëp. Ja tkëyäjktë 40 yäˈädë neky ets 30 tarjetë parë mbäät tyëkëdë mä jw.org. Ets tëgok, ja mëdiˈibë nyiwintsënˈäjtypy ja lugäär ojts jyënaˈany ko tsyojkënyëˈajtypyë nety ets ja toˈoxytyëjkjäˈäyëty mëdiˈibë jap ijttëp yajtukˈixtët wiˈixë Jyobaa tyestiigëty dyaˈëxpëktë jäˈäy.

Stacy mët nimajtskë nmëguˈukˈäjtëm, jantsy oy ojts yaˈˈagëˈë yaˈˈaxäjëdë mä ja wiinkpë lugäär mä nanduˈun yˈittë toˈoxytyëjkjäˈäyëty mëdiˈibë axëëk yajtuundëp, myooytyë mëgoxkë artikulo ja mëdiˈibë jap tuump ets ta yˈakˈamëdoowëdë. Niduˈuk ja toˈoxytyëjkjäˈäy mëdiˈibë nety jap tuump, jyënany: “Yajtëgoyˈäjttëbë yäˈädë artikulo mët ko mëjwiin kajaa pyudëkëyäˈänëdë”. Ko jatëgok jap yˈojtstë, ta nyaymyujkëdë näägë toˈoxytyëjkjäˈäyëty parë tˈixandë wiˈixë jäˈäy nyaˈëxpëjkëm. Ets nimajtsk ta jyënandë ko nëjkxandëp nety mä reunyonk mëdiˈibë tunanëp mä taabë sëmään.

Stacy duˈun tnimaytyaˈaky: “Mëjˈixyëts njäˈäwë wiˈix ja toˈoxytyëjkjäˈäyëty jantsy oy ojts tˈaxäjëdë ja artikulo. Kojëts nyajpëtsëëmdë etsëts nˈanaˈkmujktë duˈun ojts wyëˈëmy ixtëm tuˈugë foyetë, päätyën tjantsy yˈoyˈijxtë ets tkäjpxandë. Agujk jotkujkëts nnayjyäˈäwëdë ko ojts tˈaxäjëdë ja Diosë yˈääw yˈayuk ets nˈëwxijt njëjpˈijxtëbëts parë Jyobaa tkunuˈkxëdë yäˈädë tuunk mäjëts ndukmëtmaytyäˈäktë jäˈäy ja oybyë ääw ayuk”.