Nˈokmëdäjtëm “ja tiˈigyëˈäjtën diˈibë ja espiritë santë yajkypy”

APOSTËLË PABLO duˈun tˈanëmääy ja Diosmëduumbëty mëdiˈibë Éfeso: “Mëdattë maˈxtujkën mët ja wiinkpëty. [ . . . ] Ëxtäˈäytyë es xymyëdattët ja tiˈigyëˈäjtën diˈibë ja espiritë santë yajkypy, es jikyˈattë jotkujk nixim niyam” (Éfes. 4:2, 3, JKJ).

Apostëlë Pablo jyënany ko ja tuˈugyëˈäjtën mëdiˈibë nmëdäjtëm yëˈë mëdiˈibë “ja espiritë santë yajkypy”, jaˈa njënäˈänëm, mëdiˈibë xymyoˈoyëm ja Diosë myëjääw. Per jënan nanduˈun ko mëjjääwën yajtuunäämp parë nˈijtëm tuˈugyë. ¿Pënën mbäät ttundë ja mëjääw? Niduˈuk niduˈugën ja Diosmëduumbë mbäät dyajjaˈˈaty ja tuˈugyëˈäjtën mëdiˈibë “ja espiritë santë yajkypy”.

Okpawinmay ko pën mnamoˈoyëty tuˈugë karrë. ¿Pënëdaa patëp tkuentëˈatët? Pes mijts. Ko myäˈädët ja karrë kyaj yëˈë xypyokyˈixäˈäny pën të mnamoˈoyëty, mijtsënë mboky ko kyaj të xykyuentëˈaty.

Nanduˈun ja tuˈugyëˈäjtën mëdiˈibë nmëdäjtëm, yëˈë Dios të xynyamoˈoyëm, pääty niduˈuk niduˈuk xypyatëm parë nyajjaˈäjtëm. Per pën kyaj oy nˈijtëm mët tuˈugë nmëguˈukˈäjtëm, oy ko nnayajtëˈëwëm: “¿Nduumbyëtsë mëjääw parëts nyajaˈˈaty ja tuˈugyëˈäjtën mëdiˈibë ja espiritë santë yajkypy etsëts nyaˈoyë ja jotmay?”.

“ËXTÄˈÄYTYË ES XYMYËDATTËT JA TIˈIGYËˈÄJTËN”

Ixtëm yä të nˈijxëm, Pablo jyënany ko tsojkëp yajtunët ja mëjääw parë nyajjaˈäjtëm ja tuˈugyëˈäjtën mëdiˈibë ja espiritë santë yajkypy ets mas niˈigyë ko pën axëëk xyajnayjyäˈäwëm. Ëjtsäjtëm nyajaˈˈatäˈänëm ja tuˈugyëˈäjtën, pääty ko nety pën axëëk të xyajnayjyäˈäwëm, ¿oyëdaa ko ndimyˈanëmäˈäygyojëm? Kyaj. Oy ko jawyiin nnayajtëˈëwëm: “Kojëts nmëtmaytyäˈägët ja mëdiˈibëts axëëk të xyajnayjyawëty, ¿oyëyäämp ja jotmay o niˈigyë kyajaajëyaˈany?”. Näˈäty, niˈigyë yˈoybyëtsëmy ko njäˈäytyëgoˈoyëm wiˈix pën të xytyuˈunëm ets nbokymyaˈkxëm (Prov. 19:11; Mar. 11:25).

Yaˈixy kanäägë dibujë mä wiˈix tuˈugë nmëguˈukˈäjtëm kyaj tmëjpëjktaˈaky ko yaˈoojy. 1. Jeˈeyë tmëdoowˈity ko ja myëguˈuk myëkmëgajpxyëty. 2. Twinmay ti ja myëguˈuk të ttuny. 3. Ta tkajpxyë Biiblyë ets tpawinmay. — “Kojëts yëˈëyë njotˈatët wiˈixëts të nyajtuny, ¿yajjaˈˈataambyë tuˈugyëˈäjtën o niˈigyë kyajaajëyaˈany ja jotmay?”.

Pablo duˈun dyajky ja käjpxwijën: “Mëdattë maˈxtujkën mët ja wiinkpëty” (Éfes. 4:2, JKJ). Tuˈugë liibrë duˈun tnimaytyaˈaky ko yäˈädë yëˈë yˈandijaampy ngupëjkëm wiˈix pën jyaˈayˈaty, o ja tuk pëky njënäˈänëm, ngupëjkëm ko ja nmëguˈukˈäjtëm pokyjyaˈay nanduˈun yajpäättë. Tëyˈäjtën ko të njapaduˈudëjkëm “ja jembyë jikyˈäjtën”, per nipën kyamadaˈaky parë ttunët tijaty ixtëmë Dios tjatsoky (Éfes. 4:23, 24, JKJ; Rom. 3:23). Ko duˈun njaygyujkëm, yëˈë xypyudëkëyäˈänëm parë nnaymyëmaˈkxtujkëm nixim niyam, nbokymyaˈkxëm ja nmëguˈukˈäjtëm ets duˈuntsoow nyajjaˈäjtëm “ja tiˈigyëˈäjtën diˈibë ja espiritë santë yajkypy”.

Mbäät nˈijtëm tuˈugyë mët ja nmëguˈukˈäjtëm pën nbokymyaˈkxëm ets njäˈäytyëgoˈoyëm wiˈix të xytyuˈunëm. Ko mä Éfesʉ 4:3 jyënaˈany: “Jikyˈattë jotkujk nixim niyam”, mä ayuk grieegë yëˈë yˈandijaampy ixtëm ja tsay eemy twoˈonˈity ja wääy päjk. Nanduˈun ko nˈijtëm tuˈugyë ets ntsojkëm ja nmëguˈukˈäjtëm, yëˈë xypyudëkëyäˈänëm parë kyaj nmëjagamgakëm oy ti jotmay mëët nmëdäjtëm.

Pääty ko tuˈugë nmëguˈukˈäjtëm jam wiˈix xytyuˈunëm, xyajnayjyäˈäwëm axëëk o axtë dyajkëxy ja maˈkxtujkën, oy ko nyajnigëxëˈkëm ja paˈˈayoˈowën ets kyaj jeˈeyë nˈijxëm mäjaty tyëgoy (Col. 3:12). Kom niˈamukë ak pokyjyaˈay nyajpatëm seguurë ko të nanduˈun pën axëëk nyajnayjyäˈäwëm. Ko njamyajtsëmë yäˈädë, yëˈë xypyudëkëyäˈänëm parë nyajjaˈäjtëm “ja tiˈigyëˈäjtën diˈibë ja espiritë santë yajkypy”.