Mëjjäˈäytyëjkëty mëjwiin kajaa tsyobäättë mä Diosë kyäjpn

Waˈan mijts nanduˈun mjaty ixtëmë yäˈädë nmëguˈukˈäjtëm, kyaj mbäät nëgoo ti xyˈoktuunë ixtëm ko mˈënäˈkˈäjty. Ets oy xyjanijawë ko kanääk jëmëjt kujk xymyëduunë Jyobaa, waˈan mon tuk mnayjyawëty ko xywyinmay wiˈix xymyëduuny ets ko tyam kyaj mbäät duˈun xyˈokmëduunë. ¿Ti mbäät mbudëkëty?

TI JYOBAA TSYOJKYPY ETS MIJTS XYTYUNËT

Oy ko mnayajtëwëdët: “¿Ti Jyobaa tsyojkypy etsëts ëjts ndunët?”. Deuteronomio 6:5 jyënaˈany: “Tsokë Jyobaa mëdiˈibë mDiosˈäjtypy amumduˈukjot ets mët tukëˈëyë mniniˈkx mgëbäjk ets mët tukëˈëyë mjot mëjääw”. Ixtëmë yäˈädë tekstë jyënaˈany mbäät mjotkujkmoˈoyëty. ¿Tiko?

Yëˈko yëˈë xytyukˈijxëm ko Jyobaa tsyojkypy ets mijts xymyëdunët nuˈun mmadaˈaky. Ko yäˈädë xyaˈitët mwinmäˈänyoty, yëˈë mbudëkëyanëp parë kyaj mnayˈijxkijpxyëdët mëdë nmëguˈukˈäjtëm ets parë kyaj mwinmayët ko kyaj tyam duˈunë Jyobaa xyˈokmëduunë ixtëm ko mˈënäˈkˈäjty.

Okwinmayë yäˈädë: ko mˈënäˈkˈäjty, mmëdunë Jyobaa nuˈun mmadaˈaky mä taabë tiempë ets tyam mduumpy nanduˈunë mëjääw parë xymyëdunyë Jyobaa nuˈun mmadaˈaky. Pääty pën mwinmaapy, kyaj tyëgatsy, tëëyëp mmëduunë Jyobaa nuˈun mmadaky ets tyam nan mmëduumpy nuˈun mmadaˈaky.

MBÄÄT XYPYUDËKË JA MMËGUˈUKTËJK MËJWIIN KAJAA

En lugäär mwinmayët ko kyaj mbäät ti xyˈoktuunë mët ko të mëjjäˈäy mëˈˈënäˈkënë, winmay wiˈix mbäät xypyudëkë ja mmëguˈuktëjk. Pes mbäät mas niˈigyë ja naybyudëkë xyaky ets kyaj dyuˈunëty ko mˈënäˈkˈäjty. Min nˈokˈijxëm ti mbäät xytyuny.

Tukmëtmaytyäˈäk ja mmëguˈuktëjk wiˈix të mjukyˈaty. Min nˈokˈijxëm wiˈix jyënandë rey David etsë Josué.

Ja rey David jyënany: “Ojtsëts nˈënäˈkˈaty ets tyam tëjëts nmëjjäˈäyënë, per kyajnëmëts nˈixy nituˈugë oyjyaˈay yajjäˈäytyëgoy, ni ja yˈuˈunk yˈënäˈk tˈëxtäˈäytyëdë tsäjpkaaky” (Sal. 37:25).

Josué jyënany: “Tyam, ¡ixtë! Ooganëbëts, ets mijtsëty yajxon xynyijawëdë mët tukëˈëyë mgorasoon ets mët tukëˈëyë mjukyˈäjtën ko nituˈugë oybyë ayuk tijaty të twandaˈagyë Jyobaa mëdiˈibë mDiosˈäjtypy duˈunyë të kyatëgoy. Tukëˈëyë të yˈadëëwdäˈäy parë mijtsëty. Nituˈugë yˈayuk mëdiˈibë kyaj të yˈadëy” (Jos. 23:14).

David mëdë Josué nyijäˈäwëdëbë nety ti yˈëëw kyäjpxtëp, pes kanääk jëmëjtë nety të tmëduunëdë Jyobaa ets të tˈixtë wiˈix yˈijxˈijt kyuentëˈäjtëdë. Pääty, tsobatpë nety ja yˈääw yˈayuk. Nanduˈun mijts, kom jeky kujk xymyëduunë Jyobaa, tsobatp ja mˈääw mˈayuk.

Pën kanääk jëmëjt kujk xymyëduunë Jyobaa, tukmëtmaytyäˈäk ja mmëguˈuktëjk wiˈix të xytyukˈoyˈaty ets wiˈix ja kunuˈkx kuwäˈänënë të xyˈaxäjë. ¿Mjamyejtsypy wiˈixë Jyobaa ojts tpudëkë ja nyax kyäjpn? Tukmëtmaytyäˈägë mmëguˈuktëjk. Pes ko tmëdowdët pudëkëyanëdëp ets mijts mnayjyawëyanëp agujk jotkujk (Rom. 1:​11, 12).

Ja tuk pëky wiˈix mbäät xymyëjääwmoˈoy ja mmëguˈuktëjk, yëˈë ko mnëjkxët reunyonk koogoo oy mëk myajpäädët. Ko duˈun xytyunët, kyaj jeˈeyë mijts mbudëkëyaˈanyëty, pudëkëyanëp nanduˈun ja mmëguˈuktëjk. Connie, mëdiˈibë të yˈokˈyajmaytyakpë jyënaˈany: “Kojëts nëjkxy reunyonk, xypyudëjkëbëts parëts kyaj mon tuk nnayjyawëdët. Pes ¿wiˈixëts duˈun nˈoknayjyawëdët ets pën nayˈijx naybyatëbëts mëdëtsë nmëguˈuktëjk? Ndukˈijxtëbëts nanduˈun ko ntsojktëbëts kojëts ti namoˈoytyë. Nduumbyëtsë mëjääw parëts duˈunyëm mëët nDiosmëdundë”.

JYOBAA YAJTSOBATYPY TIJATY MDUKMËDUUMPY

Mä Biiblyë yajnimaytyakpë jäˈäy mëdiˈibë Jyobaa tsojkëdë oyë nety kyaj mbäät ti tˈoktuunëdë. Niduˈuk, yëˈë Simeón, tuˈugë israelitë mëdiˈibë nety të myëjjäˈäyënë ko Jesús myaxuˈunkˈäjty. Koogoo ijtyë Simeón nyijkxy mä ja templë, waˈan tˈijxy wiˈix ja ënäˈktëjkëty jap tyundë. ¿Waˈandaa wyinmääy ko Jyobaa kyaj nëgoo nyeky yajtsobäätyëty mët ko mëjjäˈäy mëˈˈënäˈknë? Kyaj, pesë Jyobaa jyënany ko “oyë nety jyukyˈaty” ets ko mëduunëp amumduˈukjot. Jyobaa tyukˈijxë Simeón ko mëjwiin kajaa nety dyajtsobääty, pes tyukˈijxë Jesús mä nety të myaxuˈunkˈaty ets ojts ttuknaskäjpxë ko Jesús yëˈë Mesíasˈatäämp (Luc. 2:​25-35). Ixtëmë Simeón yajnimaytyaˈaky, yëˈë xytyukˈijxëm ko Jyobaa kyaj yëˈë tˈijxy ko kyaj ti yˈokmääyënë, yëˈëjën yˈijx nuˈunën tmëdatyë mëbëjkën. Pesë Biiblyë jyënaˈany ko Simeón, “yëˈë netyë Diosë myëjääw nëˈëmooy tuˈumooyëp”.

Mijts mbäät nanduˈun mˈity seguurë ko Jyobaa yajtsobatypy tijaty mdukmëduumpy oy nëgoo mganekymyadaˈaky. Yëˈë agujk jotkujk nyayjyawëty tijaty ndukmëduˈunëm niduˈuk niduˈuk, pesë Biiblyë jyënaˈany ko ‘kyëwentëpëkäämpy ja Dios wiˈix pën myëdaˈagyën, Dios käˈäp pën tˈamëdoy mëdiˈibë käˈäp tii tmëëdëtyën’ (2 Cor. 8:​12, TY).

Ko duˈun xywyinmayët, yëˈë mbudëkëyanëp parë xytyunët tijaty mbäät xymyëmadaˈaky. Ixtëm nˈokpëjktakëm, winmay wiˈix mbäät mˈëwaˈkxy mgäjpxwaˈkxy oy jeˈeyë tuk ratë. Mbäät nanduˈun xymyëjääwmoˈoy ja mmëguˈuktëjk ko xymyëgäjpxët mä telefënë o xyjyaˈayët tuˈugë nekyuˈunk. Pudëkëyanëdëp ja mmëguˈuktëjk mëjwiin kajaa ko duˈun xytyunët mët ko jeky kujk xymyëduunë Jyobaa.

Pën kyaj nëgoo mˈokmadaknë ti xytyunët, mbäät duˈunyëm xyˈakmëdunyë Jyobaa. Ixtëm nˈokpëjktakëm, mä yäˈädë rekuäädrë “Pyudëjkë tuˈugë toˈoxytyëjk parë kyaj nyayaˈoogëdët” xykyäjpxäˈäny wiˈix tuˈugë nmëguˈukˈäjtëm mëdiˈibë mëjjäˈäy mëˈˈënäˈknë tpudëjkë tuˈugë toˈoxytyëjk.

Jamyats ko ja mmëguˈuktëjkëty mbäät pyudëkëdë mëjwiin kajaa ko xyakyë oybyë ijxpajtën, pes jantsy kanääk jëmëjt kujk xymyëduunë Jyobaa ets duˈunyëm xymyëduunˈadëˈëtsy. Jamyats wiˈix jyënaˈanyë Ebreeʉsʉty 6:10: “Dios tyiimpy extëm pyaatyëty; kyaj tjäˈäytyëgoyët diˈibë miitsëty oy mduundëp. Dios jyamyatsëp ko miits xyaˈijxëdë mtsojkën mët ja jyaˈayëty, mët ko xypyudëjkëdë es dëˈënyëm xyˈaktimpudëkëdë”.

DUˈUNYËM PUDËKË JA MMËGUˈUKTËJK

Të yaˈëxpëjkpëtsëmy ko mëjjäˈäytyëjk tpudëkëdë wiink jäˈäy, niˈigyë yˈoyˈat myëkˈattë, mas oy wyinmaytyë ets mas jeky jyukyˈattë.

Per oy njapudëjkëmë nmëguˈukˈäjtëm, duˈunyëm nwinguwäˈägëyäˈänëmë jotmay mëdiˈibë miimp ko ja xëëw jëmëjt wyimbajnë. Yëˈëyë Diosë yˈAnaˈam Kyutujkën mëdiˈibë mbäät dyajjëgeˈeky ja mëjjäˈäyˈat ets ja oˈk tëgoˈoyën, pes päätyën duˈun njäjt ngëbajtëm mët ko nbokyjyaˈayˈäjtëm (Rom. 5:12).

Tukëˈëyë tijaty mdukmëduumbyë Jyobaa, ixtëm ko xypyudëkë jäˈäy parë yˈixyˈatëdët, mbäät mbudëkëty parë niˈigyë xymyëbëkët tijaty miimp këdakp ets axtë parë mˈoyˈat mëkˈatët. Pääty ninäˈä xykyajäˈäytyëgoyët ko Jyobaa yajtsobatypy tukëˈëyë tijaty mdukmëduumpy, ets ja mëguˈuktëjkëty myajtsobatëdëp nanduˈun ko tˈixtë wiˈix xymyëdaty ja mëbëjkën.