Nˈokjäˈäyˈäjtëm yujy tudaˈaky ixtëmë Jyobaa

1. ¿Tiko xyajmonyˈijx xyajmonyjyäˈäwëm ko Jyobaa jyaˈayˈaty yujy tudaˈaky?

KO NWINMÄˈÄYËM ja jäˈäyëty mëdiˈibë myëdäjttëbë kutujkën, ¿waˈandaa jyaˈayˈattë yujy tudaˈaky? Mbäät njënäˈänëm ko kyaj. Perë Jyobaa, ja Dios mëdiˈibë myëdäjtypy tukëˈëyë mëkˈäjtën, yujy tudaˈaky jyaˈayˈaty (Sal. 113:​5-8). Yëˈë xëmë dyajnigëxëˈëgyë yujyˈat tudaˈakyˈat ets ninuˈun tkamëdatyë mëjˈat këjxmˈat. Mä yäˈädë artikulo nˈixäˈänëm taxk pëky mä Jyobaa dyajnigëxëˈëgyë yujyˈat tudaˈakyˈat. 1) Ko mbäät nmëwingoˈonëm, 2) ko kyaj ja wyinmäˈäny ttimˈyajtunäˈäny, 3) ko maˈkxtujkp ets 4) ko yajmëjpëtsëëmbyë jäˈäy mëdiˈibë kyaj pën myëjpëjktäˈägëdë. Nnimaytyäˈägäˈänëm nanduˈun wiˈixë Jesús jyaˈayˈaty yujy tudaˈaky ixtëmë Tyeety. Yäˈädë yëˈë xypyudëkëyäˈänëm parë niˈigyë nmëwingoˈonëmë Jyobaa ets nduˈunëmë mëjääw parë njäˈäyˈäjtëm yujy tudaˈaky.

MBÄÄDË JYOBAA NMËWINGOˈONËM

2. ¿Wiˈixë Jyobaa yajnimaytyaˈaky mä Salmo 62:8? (Ix nanduˈunë dibujë).

² Tsip nmëwingoˈonëmë jäˈäy mëdiˈibë amëj agëjxm. Kom mëj këjxmë nyayjyawëty pääty kyaj pën myëwingonyëty ets axtë jeˈeyë yajnayeˈey. Perë Jyobaa ¡kyaj duˈun jyaˈayˈaty! Yëˈë yujy tudaˈaky ets axtë xyˈanëmäˈäyëm parë nmëwingoˈonëm ets ndukmëtmaytyakëm wiˈix nnayjyäˈäwëm ets tijaty nmëmäˈäy nmëdäjëm (käjpxë Salmo 62:8). Duˈun ixtëm tuˈugë uˈunkteety mëdiˈibë myëdoowˈijtypy tsuj yajxon ko ja yˈuˈunk yˈënäˈk tyukmëtmaytyaˈagyëty ja yˈamay jyotmay, nanduˈunë Jyobaa, myëdoowˈijtypy ko ja yˈuˈunk yˈënäˈk myënuˈkxtäˈägëdë. Päätyën dyajkujäˈäyë mä Biiblyë wiˈix myënuˈkxtakëdë parë xytyukˈijxëm ko mbäät nmëwingoˈonëm ets ko yëˈë myëdoowˈijtypy ti ndukmëtmaytyakëm (Jos. 10:​12-14; 1 Sam. 1:​10-18). Per oy duˈun njanijäˈäwëm, mbäät näˈäty tsyiptaˈaky nmënuˈkxtakëmë Jyobaa mët ko nnayjyäˈäwëm ko kyaj xypyat xynyitëjkëm. ¿Ti mbäät xypyudëjkëm?

3. ¿Tiko mbäät nˈijtëm seguurë ko Jyobaa tsyojkypy ets xëmë nmënuˈkxtakëm?

³ Mbäädë Jyobaa nmënuˈkxtakëm axtë pën nnayjyäˈäwëm ko kyaj xypyat xynyitëjkëm ets xytsyojkëm. ¿Wiˈix nnijäˈäwëm ko dyuˈunëty? Min nˈoknimaytyakëm ja ijxpajtën mëdiˈibë Jesús pyëjktak. Yëˈë nyimaytyak ja uˈunkteety mëdiˈibë pyaˈˈayoow ja myäänk. Yäˈädë mixy wyinmääy ko kyaj nyekypyaaty nyekynyitëkëty jyëmbitët mä ja fyamilyë, pes të nety mëjwiin kajaa tyëgoy. ¿Ti ja uˈunkteety tyuun ko ja yˈuˈunk jyëmbijty? Ko tˈijxmiiny, ta tnibëyëˈktsoˈony ets nëgooyë ojts tpaˈˈayoownë, ta tmëneeny ets ta ojts ttsuˈkxy (Luc. 15:​17-20). Jyobaa duˈun ixtëmë yäˈädë uˈunkteety. Pääty ko myënuˈkxtaˈagyëty ja mëdiˈibë amäˈäts tukmäˈätsë jyot kyorasoon jyäˈäwëp mët ko tpäätyë amay jotmay o mët ko jam ti tpokyjyawë, Jyobaa ta tˈijxkuk tjaygyukë mët ko yujy tyudaˈagyëty (Lam. 3:​19, 20). Ets mët ko tpaˈˈayoy duˈunxyëp ixtëm tjëjpëyëˈëgëˈëky parë tjotkujkmoˈoyaˈany, ttukˈixäˈäny ko ttsoky ets ko myeˈkxypy (Is. 57:15). Ets parë duˈun ttuny, yëˈë xëmë yajtuumbyë mëjjäˈäytyëjk, ja jëëky mëguˈuk mëdiˈibë Testiigë ets ja mëdiˈibë mëët nˈëxpëjkëm (Sant. 5:​14, 15). Jyobaa xypyudëjkëm mët ko tsyojkypy ets nmëwingoˈonëm.

4. ¿Wiˈixë Jesús dyajnigëxëˈky ko mbäät oypyënëty myëwingonyëty?

⁴ Jesús duˈun jyaˈayˈaty ixtëmë Tyeety. Ko yajpaty yä Naxwiiny mayë jäˈäy ojts myëwingonyëty ets yajtëëwë tijaty (Mar. 4:​10, 11). Ja jäˈäyëty yˈatsoowëmbijttëp ijtyë Jesús ko ti yajtëwëdë (Mat. 16:​13-16). Ets ko ti ttuundëgooytyë kyaj tsyëˈkëdë ko Jesús jyotˈambëkët, pes nyijäˈäwëdëbë nety ko oyjyaˈay, paˈˈayoop ets maˈkxtujkp (Mat. 17:​24-27). Ko Jesús jyaˈayˈajty ixtëmë Tyeety, ta ja yˈëxpëjkpëty niˈigyë tˈixyˈäjttë Jyobaa (Juan 14:9). Nyijäˈäwëdë ko Jyobaa yujy tudaˈaky ets ko mbäät yajmëwingony kyaj dyuˈunëty ixtëm pënaty nyiwintsënˈäjttëbë relijyonk mëdiˈibë mëj këjxmëty ets kyaj pyaˈˈayowdë.

5. Ko njäˈäyˈäjtëm yujy tudaˈaky, ¿wiˈix xypyudëkëyäˈänëm parë ja nmëguˈukˈäjtëmëty niˈigyë xymyëwingoˈonëm?

⁵ ¿Wiˈix mbäät nbanëjkxëmë Jyobaa yˈijxpajtën? Ko njäˈäyˈäjtëm yujy tudaˈaky, ta xymyëwingonäˈänëmë jäˈäy mët ko yˈixandëp ko maˈkxtujkëm, pokymyaˈkxëm ets ko oy njäˈäyˈäjtëm. Per pën yˈijxtëp ko mëj këjxm nnayjyäˈäwëm ets ko kyaj nbokymyaˈkxëm ja nmëguˈukˈäjtëm tsip parë xymyëwingoˈonëm (Col. 3:​12-14). Pënaty tuundëp mëjjäˈäy, niˈigyë mbäät ttundë mëjääw parë myëwingonëdët ja myëguˈuktëjk. Per parë mbäät myëwingonëdë, tsojkëp mëët yajpäättët. Pääty oy ko ja mëjjäˈäytyëjkëty nyëjkxtët reunyonk ets kyaj jeˈeyë nyaygyonektaratëdët pën kyaj ti jotmay tpäättë. Ets nanduˈun nyëjkxtët jënˈayeˈepy tëjkˈayeˈeybyë mët ja myëguˈuktëjk. Ko duˈun ttundët, ta niˈigyë yˈixyˈatäˈänëdë ets myëgäjpxäˈänëdë koogoo dyajtëgoyˈattët ja naybyudëkë.

JYOBAA KYAJ WYINMÄˈÄNY TTIMˈYAJTUNÄˈÄNY

6, 7. Nimaytyäˈäk wiˈixë Jyobaa tkupëjky ti ja yˈuˈunk yˈënäˈk amdoow pëjktsoowëdë.

⁶ Pënaty mëj këjx nayjyäˈäwëdëp, yëˈë wyinmäˈäny tyim yajtunandëp. Perë Jyobaa, oy tukëˈëyë wijyˈäjtën tjamëdaty ets tjanijäˈäwëtyaˈay mëdiˈibë oy, yujy tudaˈaky jyaˈayˈaty ets kyaj yëˈë wyinmäˈäny ttimˈyajtunäˈäny. Min nˈokˈijxëm ti tyuun ko Míriam mëdë Aarón tnibëdëˈktë Moisés. Moisés yëˈë nety kyudënaabyë Jyobaa, pääty ko Míriam tnibëdëˈkyë Moisés yëˈë nety jam nyibëdëˈkypy Jyobaa. Päätyënë Jyobaa jyantsy tyukjotˈambëjkë ets yajpäˈämbajtë mëdë leprë. Ta netë Aarón tˈanëmääyë Moisés parë tpudëkët ja myëgaˈax, etsë Moisés ta tmënuˈkxtakyë Jyobaa parë yˈagëdäˈägëdë Míriam. ¿Ti tyuunë Jyobaa? ¿Tyukumëdoowˈadëˈëtsanë Míriam? Tuˈugë jäˈäy mëdiˈibë mëj këjxm duˈunxyëp ttuuny, per komë Jyobaa yujy tudaˈaky, ta dyaˈˈagëdakyë Míriam ixtëm yˈamdoow pyëjktsoowë Moisés (Núm. 12:​1-15).

⁷ Min nˈokˈijxëm ja tuk pëky wiˈixë Jyobaa dyajnigëxëˈky ko yujy tudaˈaky. Tëgok ojts tkexy tuˈugë kyugajpxy parë nëjkx tˈanëëmë ja rey Ezequías ko ogäämbë nety. Ezequías, ta tmëjëëytyaky tmënuˈkxtakyë Jyobaa ets tˈanëmääy parë yajtsoˈogëdët. ¿Ti net tyuunë Jyobaa? Pyaˈˈayoow ets ta ojts tˈakˈyajˈyoonë ja xyëëw jyukyˈäjtën ja 15 jëmëjt (2 Rey. 20:​1, 5, 6). Ixtëm nˈijxëm, mët ko Jyobaa yujy tyudaˈagyëty, ta tpaˈˈayoyë jäˈäy ets tmëdoowˈity wiˈix yˈanëˈëmxëty.

8. Oknimaytyäˈäk wiˈixë Jesús dyajnigëxëˈëky ko kyaj yëˈë wyinmäˈäny ttimˈyajtunäˈäny (Marcos 3:​1-6).

⁸ Jesús duˈun jyaˈayˈaty ixtëmë Tyeety. Ko yajpaty yä Naxwiiny kyaj mëktaˈaky ttimypyanëjkxany ja Ley parë tpudëjkë ja jäˈäy. Ixtëm nˈokpëjktakëm, yajtsok yaˈˈagëdak ja jäˈäy sääbëdë xëëw oy jyotˈambëjktë pënatyë nety nyiwintsënˈäjttëbë relijyonk (käjpxë Marcos 3:​1-6). Ets axtë tyambäät, duˈunyëmë Jesús jyaˈayˈaty mä tnigëbäjkˈatyë Diosë nyax kyäjpn. Ixtëm ko pën pyokytyuny mëjwiin kajaa, myëmaˈkxtujkypy ets myoobyë tiempë parë nyayajtëgatsëdët (Apoc. 2:​2-5).

9. ¿Wiˈix mbäät nbanëjkxëmë Jyobaa yˈijxpajtën ko njaygyujkëm wiˈix pën yaˈixy yajpääty? (Ix nanduˈunë dibujë).

⁹ ¿Wiˈix mbäät nbanëjkxëmë Jyobaa yˈijxpajtën? Ko nwinmäˈäyëm ets nduˈunëm tijaty ixtëm yëˈë (Sant. 3:17). Ja tääk teety mëdiˈibë jyaygyujkëdëp wiˈix ja yˈuˈunk yˈënäˈk yaˈix yajpäättë, kyaj ttuktunäˈändë tijaty kyaj tmëmadäˈäktë, per nan kyajë net naspëk nastunë dyaˈittë. Tuˈugë oybyë yˈijxpajtën yëˈë mëdiˈibë yajnimaytyakp mä Génesis 33:​12-14 mä tnigajpxy wiˈixë Jacob ojts dyajnigëxëˈëky ko myëmaapy myëdajpyë nety ja yˈuˈunk yˈënäˈk. Ja tääk teety mëdiˈibë yujy tudaˈaky jyaygyujkëdëp wiˈix ja yˈuˈunk yˈënäˈk yaˈix yajpäättë ets kyaj ak yëˈëyë tˈijxkijpxyë. Pënaty tuundëp mëjjäˈäy, oy ko kyaj ttimytyukpëtsëmäˈänët ja wyinmäˈäny. Pën ja myëguˈuktëjk të dyajwingëdäˈäktë tuˈugë jotmay ets kyaj tninaxtë ja Diosë yˈanaˈamën, oy ko tkupëkët (1 Tim. 3:​2, 3). Ets oy ko niˈamukë nduˈunëmë nmëjääw parë njaygyujkëm wiˈix ja nmëguˈukˈäjtëm wyinmay oyë nety kyatuˈugyë ja winmäˈäny (Rom. 14:1). Niduˈuk niduˈuk, yëˈë nbanëjkxäˈänëmë yäˈädë käjpxwijën: “Waˈan niˈamukë tnijawëdë ko mgajpxyjyaygyujkëdëp” (Filip. 4:​5, TNM).

JYOBAA MAˈKXTUJKP

10. ¿Mäjatyë Jyobaa dyajnigëxëˈky ko maˈkxtujkp?

¹⁰ Waˈan mijts të xyˈixy ko tuˈugë jäˈäy mëdiˈibë mëj këjxm ninuˈunën kyamaˈkxtuky ets ninuˈun tkaˈoyjyawë ko pën tˈëwxity. Perë Jyobaa ¡kyaj duˈun jyaˈayˈaty! Nipën duˈun kyamaˈkxtuky ixtëm yëˈë. Ixtëm nˈokpëjktakëm, ja tiempë mä jyukyˈajtyë Noé, ja myaˈkxtujky 120 jëmëjt parë dyajkutëgooy ja axëkjäˈäytyëjk (Gén. 6:3). Päätyë Noé tmëdäjtyë tiempë parë ojts dyajˈyeeky dyajpetyë yˈuˈunk yˈënäˈk ets ojts tkojtë ja arkë. Ko tiempë nyajxy, ta Jyobaa ttuknibëjktakë dyajkutëgoyaˈanyë Sodoma etsë Gomorra, etsë Abrahán ta tijaty jyantsy yajtëëwë. Tuˈugë jäˈäy mëdiˈibë mëj këjxm ojtsxyëp yˈanëˈëmxëty: “Kyaj mijts mbääty mnitëkëty parëts tijaty xyajtëwët”. Perë Jyobaa kyaj duˈun tˈanëmääyë Abrahán mët ko maˈkxtujkp ets yujy tudaˈaky (Gén. 18:​20-33).

11. Ixtëm jyënaˈanyë 2 Peedrʉ 3:​9, ¿tiko Jyobaa myaˈkxtuky?

¹¹ Tyam duˈunyëmë Jyobaa myaˈkxtuky, yëˈë yˈëwxijtypy ttukjäˈtët ja tiempë parë dyajkutëgoyët ja axëkjäˈäytyëjk. ¿Tiko nëgooyë tmëmaˈkxtujknë naxwinyëdë jäˈäy? Jaˈko “yajkypy ja tiempë es ja pojpë jäˈäy jyodëmbittët, [ . . . ] këdiibë kyutëgoytyët” (käjpxë 2 Peedrʉ 3:​9, JKJ). ¿Wiˈix të wyimbëtsëmy ko Jyobaa myaˈkxtuky? Miyonkˈamë jäˈäy të yˈixyˈatyëty ets nˈëwxijtëm parë nimay yˈakˈixyˈatëdët, per këxäämp ja myaˈkxtujkën. Mëkë jäˈäy ttsoky, per kyaj tnasˈixëyaˈany ets ttundët ti yëˈë tyim tsojktëp, nan kyaj tnasˈixëyaˈany ets xëmë jyaˈˈatët ja axëkˈäjtënë yä Naxwiiny (Hab. 2:3).

12. ¿Wiˈixë Jesús nanduˈun myaˈkxtuky ixtëmë Jyobaa?

¹² Jesús duˈun jyaˈayˈaty ixtëmë Tyeety. Nuˈun kujkë tiempë pyety kyuˈty duˈun të myaˈkxtuky ixtëmë Tyeety, pes të tˈixy wiˈixë Satanás të tniwäämbetyë Jyobaa ets nanduˈun pënaty mëduunëp (Gén. 3:​4, 5; Job 1:11; Apoc. 12:10). Jesús nan të tˈixy wiˈixën ja naxwinyëdë jäˈäy yaˈˈayowëdë amay jotmay. ¿Mbawinmaapy nuˈunën tjantsy tsyojkënyëˈaty dyaˈoyëyaˈany mëdiˈibë ja Mëjkuˈugopk tyuumpy? (1 Juan 3:8). ¿Tidaa pudëjkëp parë myaˈkxtukët axtë koonëmë Jyobaa jyënäˈänët ko të ja tiempë tpääty parë kyutëgoyët tijatyë Satanás tyuumpy? Tuk pëky, yëˈë ko jyaˈayˈaty yujy tudaˈaky ets nyijäˈäwëp ko yëˈëyë Jyobaa patëp jyënäˈänët näˈä winë ttunäˈäny (Hech. 1:7).

13. ¿Wiˈixë Jesús dyajnigëxëˈky ko myëmaˈkxtujkypyë nety ja yˈapostëlëty, ets tiko?

¹³ Ko Jesús yajpaty yä Naxwiiny, myëmaˈkxtujk ja yˈapostëlëty. Ko dyajtsiptaktë pën niˈigyë mëj ijtp, kyaj ojts tmëtsipkeˈexy ets tnikatukjotˈambëjky, niˈigyë tmëmaˈkxtujky (Luc. 9:46; 22:​24-27). Ijtpë nety seguurë ko yajtëgatsandëbë jyaˈayˈäjtën. Ets ëjtsäjtëm, ¿nmëdäjtëm tuˈugë jotmay mëdiˈibë yëˈëyëm xyajtëgoˈoyëm? Pën duˈun, mëjwiin kajaa nguˈëˈëw ngukäjpxëm ko ja mëdiˈibë nReyˈäjtëm jyaˈayˈaty yujy tudaˈaky ets myaˈkxtuky.

14. ¿Ti xypyudëkëyäˈänëm parë niˈigyë nmaˈkxtujkëm?

¹⁴ ¿Wiˈix mbäät nbanëjkxëmë Jyobaa yˈijxpajtën? Parë nwinmäˈäyëm ets nduˈunëm tijaty ixtëm yëˈë, tsojkëp nmëdäjtëm “ja Jesukristë wyinmäˈäny” (1 Kor. 2:​16, JKJ). ¿Ets ti xypyudëkëyäˈänëm? Yëˈë ko ngäjpxëm ja taxkpë Evangelio ets njuˈtëmë tiempë parë nbawinmäˈäyëm tijatyë Jesús tyuuny ets tiko duˈun ttuuny. Nan oy ko nˈamdoˈowëmë Jyobaa nyaybyudëkë parë njäˈäyˈäjtëm yujy tudaˈaky ixtëmë yˈUˈunk. Ko mas niˈigyë nˈixyˈäjtëmë Jesús, ta njäˈäyˈatäˈänëm ixtëmë Jyobaa ets yëˈë xypyudëkëyäˈänëm parë nmëmaˈkxtujkëm ja nmëguˈukˈäjtëm ets parë këˈëm nnaymyëmaˈkxtujkëm (Mat. 18:​26-30, 35).

JYOBAA YAJMËJPËTSËËMPY JA MËDIˈIBË JÄˈÄYˈÄJTP YUJY TUDAˈAKY

15. Oknimaytyäˈäk wiˈixë Jyobaa dyaˈixyëty ko myëjpëjktakypy ja jäˈäy mëdiˈibë kyaj pën tyunëdë kuentë ixtëm jyënaˈanyë Salmo 138:6.

¹⁵ (Käjpxë Salmo 138:6). Okpawinmay ja Dios mëdiˈibë tukëˈëyë kutujkën myëdäjtypy, nyiˈˈijxkëdakypy pënaty kyaj yajtundë kuentë. Min nˈokˈijxëm wiˈixën duˈun të ttuny nuˈun kujk ja tiempë pyety kyuˈty. Tëëyëp, jukyˈäjttë jäˈäyëty mëdiˈibë kyaj nëgoo pën myëjpëjktakëdë, perë Jyobaa myëjˈijx myëjpëjktak. Niduˈuk, yëˈë Débora, yäˈädë toˈoxytyëjk yëˈë tuumbëˈäjtëdë Isaac etsë Jacob naa 125 jëmëjtën. Kyaj nëgoo yajnijawë pënënë yäˈädë toˈoxytyëjk, perë Jyobaa wyinmäˈänymyooyë Moisés parë xyëëw yajkujayët mä Biiblyë, nan yajkujäˈäyë mëdiˈibë yajnigëxëˈkypy ko mëk yajtsojky (Gén. 24:59; 35:​8, notë). Ko tiempë nyajxy, Jyobaa wyinˈijxë David, tuˈugë mixyˈuˈunk mëdiˈibë nety borreegë kuentëˈäjtp parë tyunët rey jam Israel (2 Sam. 22:​1, 36). Ets ko Jesús myaxuˈunkˈäjty, yëˈë Jyobaa tim jawyiin tyuknijäˈäwë ja borreegë kuentëˈäjtpëty ko të nety myaxuˈunkˈaty jam Belén ja mëdiˈibë tunäämp Mesías (Luc. 2:​8-11). Ets ko José mëdë María ojts tmënëjkxtë ja yˈuˈunk mä ja templë, ta japë Simeón etsë Ana tˈijxtë ja uˈunk, duˈuntsoowë Jyobaa dyajmëjpëtsëëmyë yäˈädë nimajtskpë mëjjäˈäytyëjk (Luc. 2:​25-30, 36-38). Ixtëm nˈijxëm, oyë Jyobaa këjxm yajpääty, nyiˈˈijxkëdakypyë jäˈäy mëdiˈibë yujy tudaˈaky.

16. ¿Wiˈixë Jesús nanduˈun jyaˈayˈajty ixtëmë Tyeety?

¹⁶ Jesús duˈun jyaˈayˈaty ixtëmë Tyeety. Yëˈë yajmëjpëtsëëm ja jäˈäyëty mëdiˈibë kyaj pën tyunëdë kuentë. Tyukniˈˈijxë ja mëdiˈibë “kyaj tmëdattë ëxpëjkën” tijaty tyunaampy ja Dios yˈAnaˈam Kyutujkën (Apos. 4:​13, JKJ; Mat. 11:25). Yaˈˈagëdak pënatyë nety pëjk ijxëdëp ets tyukˈijx nanduˈun ko tsobattëp ets yajtsojktëp (Luc. 5:13). Mä nety jakumbom yˈooganë, ta ojts dyajtekypyujy ja yˈapostëlëty oyë nety yëˈë jyapäätyëty ttunët tuˈugë mëduumbë (Juan 13:5). Ets mä kyapatëkënëm tsäjpotm, ta ttuknipëjky tuˈugë tuungë jëjpˈambë ja yˈëxpëjkpëty mëdiˈibë axtë tyambäät nduˈunëm: yajpudëkët ja jäˈäy parë tpäättët ja jukyˈäjtënë xëmëkyëjxmbë (Mat. 28:​19, 20).

17. ¿Wiˈix mbäät nbanëjkxëmë Jyobaa yˈijxpajtën? (Ix nanduˈunë dibujë).

¹⁷ ¿Wiˈix mbäät nbanëjkxëmë Jyobaa yˈijxpajtën? Ko ndukmëtmaytyakëm oytyim pënëty ja oybyë ayuk, oy mä tsyoondë, oy wiˈix yˈixˈattë, oy yˈëxpëkyjyaˈayˈattë ets oy ti tkajat tkanijawëdë. Nbanëjkxëm nanduˈunë Jyobaa yˈijxpajtën ko nyajnäjxëm mëj ja nmëguˈukˈäjtëm oy ëjtsäjtëm ti njäjt nnijäˈäwëm ets oy ti tuunk nikëjxmˈäjtëm (Filip. 2:3). Ko yujy tudaˈaky njäˈäyˈäjtëm ets nyajnäjxëm mëj ja nmëguˈukˈäjtëm, agujk jotkujkë Jyobaa jyantsy nyayjyawëty (Sof. 3:12; Rom. 12:10).

18. ¿Tiko mijts mjäˈäyˈatäˈäny yujy tudaˈaky duˈun ixtëmë Jyobaa?

¹⁸ Ko nduˈunëmë mëjääw parë njäˈäyˈäjtëm yujy tudaˈaky ixtëmë Jyobaa, ta niˈigyë ja nmëguˈukˈäjtëm xymyëwingonäˈänëm, ta kyaj ja winmäˈäny ndimyyajtunäˈänëm ets ta nmaˈkxtukäˈänëm. Duˈun ixtëmë Jyobaa, ta ja nmëguˈukˈäjtëm ntsokäˈänëm ets nwingutsëˈëgëyäˈänëm. Pën nduˈunëmë mëjääw parë njäˈäyˈäjtëm yujy tudaˈaky, ta niˈigyë Jyobaa xyajtsobäädäˈänëm (Is. 43:4).