¿Pën yajtijp Diˈib wyoowˈyoˈoytyëbë Jyobaa tyestiigëty?

Diˈib wyoowˈyoˈoytyëbë Jyobaa tyestiigëty, yëˈë tuk grupë Dios mëduumbë diˈib abëtsemy nyaxwinyëdë tijaty tyukniwijtsëdëp. Ets majtsk pëky diˈib tyuundëp:

• Yëˈë yˈijxtëp wiˈix yˈoyë ëxpëjkpajn diˈib mä Biiblyë ets tijaty näjxp mä tyuˈukmuktë Jyobaa tyestiigëty ets mäjaty tyunyëtyë eskuelë (Lukʉs 12:42).

• Yëˈë tyukniwijtsëdëp tijaty tyuundëbë Jyobaa tyestiigëty abëtsemy nyaxwinyëdë. Wiˈix kyäjpxwäˈkxtë ets wiˈix tyunyë meeny sentääbë diˈib yajˈyäjkp tsojkëngyëjxm.

Diˈib wyoowˈyoˈoytyëbë Jyobaa tyestiigëty, yëˈë pyanëjkxtëbë yˈijxpajtënë ja “apostëlëty es ja mëjjäˈäytyëjkëty” diˈib Jerusalén mä primer siiglë. Yëˈë ojts ttukniwitsëdë wiˈix tijaty yajtunäˈäny mäjaty tyuˈukmujktë ja myëguˈuktëjk (Apostʉlʉty o Hechos 15:2). Duˈun extëm yëˈëjëty ttuundë, nenduˈun tyam tyundë Diˈib wyoowˈyoˈoytyëbë Jyobaa tyestiigëty, kyaj tniwintsënˈattë Diosë kyäjpn. Yëˈëjëty xëmë tpayeˈeytyë tijaty mä Biiblyë parë nyëˈëmoˈoy tyuˈumoˈoyëdë ets tˈëxkaptë ko Jesus yëˈë diˈib nyigëbäjkˈäjtypy mäjatyëts nduˈukmuktë (1Korintʉ 11:3; Éfesʉ 5:​23).

¿Pënaty tyam tuundëp mä Diˈib wyoowˈyoˈoytyëbë Jyobaa tyestiigëty?

Yëˈë tuundëbë Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, etsë Jeffrey Winder. Niˈamukë ak jap tyundë mä kyopkë Jyobaa tyestiigëty Warwick, (Nueva York).

Diˈib wyoowˈyoˈoytyëbë Jyobaa tyestiigëty, ¿wiˈix yˈittë tukniwits tukniwääbë?

Diˈib wyoowˈyoˈoytyëbë Jyobaa tyestiigëty të dyajnaxkëdaˈaky tëdujkë komitee diˈib kanäk pëky yˈijxtëp wiˈix tyundë Jyobaa tyestiigëty. Ets niduˈugaty tyundë mëdë tyäˈädë komitee.

• Komitee diˈib yˈijxypy ko ti jotmay jyaˈˈaty: Yëˈë yˈijxypy tijaty jotmay jaˈäjtp mä yajkutujkpëty ets tijaty naybyudëkë tëgoyˈäjtp ko tijaty yˈayoˈonbëjtaˈaky, nenduˈun ko ti jotmay kyëxëˈëky diˈib mbäät yˈaxëktunëdë Jyobaa tyestiigëty ets ko kyubokyë ryelijyonk.

• Komitee diˈib yˈijxypy tijaty yajtuump Betel: Yëˈë yˈijxypy wiˈix tijaty tyuˈuyeˈey Betel o pënaty tuundëp mä Jyobaa tyestiigëty tmëdattë sukursal.

• Komitee diˈib yˈijxypy wiˈix pyëtsëmyë ëxpëjkpajn: Yëˈë yˈijxypy wiˈix kyojˈyë ëxpëjkpajn ets yajkexy, nenduˈun ko yajkojˈyë tëjk mä yˈëxpëktë Jyobaa tyestiigëty, Betel etsë ofisinë mä yajkäjpxnaxyë ëxpëjkpajn.

• Komitee diˈib yˈijxypy wiˈix ngäjpxwäˈkxëm: Yëˈë yˈijxypy wiˈix yajkäjpxwaˈkxy ja “oybyë ayuk diˈibë nyimaytyakypy ja tsäjpotmëdë kutujkën” (Matewʉ 24:14).

• Komitee diˈib Tukniˈˈijxëp: Yëˈë yˈijxypy tijaty yaˈëxpëjkëp mä nduˈukmujkëm, mäjaty jyaˈˈatyë eskuelë ets tijaty pëtsëëmp mä audio etsë bideo.

• Komitee diˈib jyaaytyëbë ëxpëjkpajn: Yëˈë jyaaytyëbë ëxpëjkpajn diˈib pëtsëëmp ets tijaty pajtp mä Internet ets tˈixy tijaty yajkäjpxnaxäämp.

Diˈib wyoowˈyoˈoytyëbë Jyobaa tyestiigëty kyaj jeˈeyë tyundë mëdë tyäˈädë komitee, nenduˈun tyuˈukmuktë sëmään sëmään parë tnimaytyäˈäktë tijaty yajtëgoyˈajtypyë Diosë kyäjpn. Ko duˈun tyuˈukmuktë, ta tˈixtë wiˈixë Biiblyë jyënaˈany ets tnasˈixëdë parë Diosë myëjääw tyuˈumoˈoyëdët. Ets xëmë tijaty tˈëmuk tkäjpxmuktë parë tuˈugyë tijaty ttundë (Apostʉlʉty 15:25).

¿Wiˈix yajpudëkëdë ja Diˈib wyoowˈyoˈoytyëbë Jyobaa tyestiigëty?

Diˈib wyoowˈyoˈoytyëbë Jyobaa tyestiigëty diˈib tuundëp mä tuˈuk tuˈugë komitee, myëdäjttëp diˈib pudëjkëdëp, tyäˈädë Dios mëduumbëty nyijäˈäwëdëp tijaty yajtuump mä tuˈuk tuˈugë komitee diˈib të yajtuknipëktë (1 Korintʉ 4:2). Pënaty duˈun pudëjkëdëp, nan nëjkxtëp mä tyuˈukmuktë sëmään sëmään ja komitee. Yëˈë kyaj ttukniwitsëdë tijaty, per nyigäjpxtëp wiˈix wyinmaytyë, ets mbäät jam ti tnigäjpxtë diˈib tunëp. Per duˈun ttundë extëm ja komitee dyajwingëdäˈäktë. Diˈib wyoowˈyoˈoytyëbë Jyobaa tyestiigëty, nan yëˈë kyajxtëp ja diˈib pudëjkëdëp parë nëjkx tkuˈixëdë ja Testiigëty diˈib yajpattëp wiink paˈis, yajpäättët mä pyëtsëmdë pënaty të yˈËxpëktë Galaad ets nan yajpattëp mä tyunyëtyë reunyonk diˈib win jëmëjt.