Mũrungu Nũũ?

1.Nĩkĩ tũbuĩrĩte kũthaathayia Mũrungu?

Mũrungu wa mma nĩ ũrĩa Woombĩre into bionthe. Atĩ kĩambĩrĩria na gũtĩrĩo akethĩrwa arĩ na mũthia. (Zaburi 90:⁠2) Nĩwe Kaumo ka nkuma ĩnjega ĩrĩa ĩrĩ ndeene ya Bibiria. (1 Timotheo 1:11) Tontũ Mũrungu nĩwe ũtũete mwoyo, nĩwe akĩ tũbuĩrĩte kũthaathayia.​—Thooma Kugwurirwa 4:11.

2.Mũrungu akari atĩa?

Gũtĩ muntũ woona Mũrungu tontũ we nĩ Kĩrundu. Kũũ nĩ kuuga ũtũũro bwawe nĩ bwa ĩgũrũ nkũrũki ya biũmbe birĩa bitũũraga nthĩgũrũne. (Johana 1:​18; 4:​24) Amwe na bũu, no tũmenye nkuma ciawe gũkũrũkĩĩra into birĩa oombĩte. Ngerekano, mĩthemba ĩmiingĩ ya matunda na maũa ĩtũmenyithagia wendo na ũũme bwawe. Ũrĩa nthĩgũrũ ĩrĩ ĩnene nĩgũtũmenyithagia inya yaawe.​—Thooma Aroma 1:​20.

No tũmenye nkũrũki ũrĩa Mũrungu akari na njĩra ya kũthooma Bibiria. Ngerekano, Bibiria nĩtwĩraga jarĩa Mũrungu endeete na jarĩa athwĩre, ũrĩa athithagĩria antũ, na ũrĩa athithagia mantũũne mwanya mwanya. ​—Thooma Zaburi 103:​7-​10.

3.Mũrungu arĩ riĩtwa?

Jesũ augĩre: ‘Baaba wetu uria uri iguru, riitwa riaku riathurwe.’ (Mathayo 6:⁠9) Kinya kethĩra Mũrungu arĩ mariĩtwa jamaingĩ ja gĩtĩĩo, arĩ riĩtwa rĩmwe akĩ. O antũ barĩgwetaga mwanya mwanya kũringana na mũgambo jwao. Kĩrĩ Kĩmĩĩrũ rĩgwetagwa “Jehova.” Ĩndĩ antũ bamwe barĩgwetaga “Yahweh.”​—Thooma Kuuma 6:⁠3.

Kĩrĩ Bibiria inyiingĩ riĩtwa rĩa Mũrungu nĩrĩriti, na antũ arĩo gwekĩrwa mariĩtwa ja gĩtĩĩo, Mwathani kana Mũrungu. Ĩndĩ rĩrĩa Bibiria yaandĩkĩrwe, riĩtwa rĩa Mũrungu rĩarĩ ku ta maita 7,000. Jesũ naamenyithagia antũ riĩtwa rĩa Mũrungu, rĩrĩa abaritanaga mantũ jegiĩ Mũrungu.​—Thooma Johana 17:⁠26.

Tega vidio ĩjĩ Mũrungu arĩ riĩtwa?

4.Jehova natũmenyagĩĩra?

Tontũ bwa ũrĩa mĩthangĩko ingĩĩte nthĩgũrũne rĩ, nĩ kuuga Jehova atĩtũmenyagĩĩra? Antũ bamwe baugaga Jehova nĩwe ũtũgeragia na mĩthangĩko, ĩndĩ tĩ mma.​—Thooma Jakubu 1:​13.

Mũrungu naete antũ kaanya ga kũthuura ũrĩa bakwenda. Rĩ, tũtĩgwĩragĩrua kwona Mũrungu natũete kaanya ga kũthuura kũmũtumĩkĩra? (Joshua 24:15) Ĩndĩ antũ babaingĩ nĩbathuuraga kũthithĩria bangĩ mantũ jamaaĩ. Nĩkĩo gĩtũmĩte mĩthangĩko yingĩĩa nthĩgũrũne. Waagi bũbũ bwa ĩota, nĩbũtũmaga Jehova aigua bũbũũĩ.​—Thooma Kiambiriria 6:​5, 6.

Jehova nĩ Mũrungu ũrĩa ũtũmenyagĩĩra. Endaga tũgwĩrĩrua ũtũũro. Kagiita gatĩ kũraaja, akathiria mĩthangĩko yonthe na barĩa bamĩretaga. Kagiitene gaka, arĩ na gĩtũmi gĩkĩega kĩa kũreekeria mĩthangĩko ĩgiita rĩĩkai. Kĩthoomone kĩa 8 tũkairitana gĩtũmi kĩu.​—Thooma 2 Petero 2:9; 3:7, 13.

5.Nĩatĩa tũũmba kũthengeera Mũrungu?

Jehova nendaga tũmũthengeere na njĩra ya kwaranĩria nawe gũkũrũkĩĩra maromba. Arĩ bata nabaatwĩ tũrĩ o muntũ ũmwe ũmwe. (Zaburi 65:2; 145:18) Nendaga gũtũrekera. Nonaga wĩru bwetũ bwa kũthithia mantũ jarĩa endeete, kinya kethĩra nĩtwĩagia magiita jamwe. Kinya kethĩra tũtĩũjũri, no tũgwĩrĩrue ngwatanĩro ĩnjega amwe na Mũrungu. ​—Thooma Zaburi 103:12-14; Jakubu 4:8.

Tontũ Mũrungu nĩwe ũtwete mwoyo, nĩwe tũbuĩrĩte kwenda nkũrũki ya muntũ kinya ũrĩkũ. (Mariko 12:30) O ũrĩa ũgwĩta na mbere kwonania wendo bwaku kĩrĩ Mũrungu, na njĩra ya kwiritana mantũ jaawe nkũrũki, na kũthithia jarĩa eendaga, nou ũgeeta na mbere kũmũthengeera. ​—Thooma 1 Timotheo 2:4; 1 Johana 5:3.