KĨTHOOMO KĨA 8
Nĩkĩ Mũrungu Arekeeretie Ũthũũku na Mĩthangĩko?
1.Ũthũũku bwambĩrĩrie atĩa?
Mũrungu narekeeretie antũ baciatha ĩgiita rĩraaja, nĩkenda onania ũnene bwao bũtĩũmba kũthirĩria antũ mathĩĩna
Ũthũũku bwambĩrĩrie nthĩgũrũne rĩrĩa Shaitani aarĩrie ũrongo bwa mbere. Shaitani atoombĩtwe arĩ mũraĩka ũmũũĩ, aarĩ mũraĩka ũmwagĩru, ĩndĩ ‘atatuurire ndene ya nteto cia mma.’ (Johana 8:44) Naakũrĩrie mairĩrĩĩria ja kwenda kũthaathagua kũrĩa kwaagĩrĩte Mũrungu wenka. Shaitani aaĩrĩrie mũka wa mbere Hawa, na aramwoneeria amwathĩkĩre antũ a kwathĩkĩra Mũrungu. Adamu naagwatanĩĩre na Hawa kũrega kwathĩkĩra Mũrungu. Ĩtua rĩu rĩa Adamu nĩrĩaretere mĩthangĩko na gĩkuũ.—Thooma Kiambiriria 3:1-6, 19.
Rĩrĩa Shaitani onereerie Hawa atige kwathĩkĩra Mũrungu, nĩ ũregani na Ũnene bũrĩa bũrĩ ĩgũrũ buru bwa Mũrungu aambĩrĩrie. Antũ babaingĩ nĩbagwatanĩrĩte na Shaitani kũrega Mũrungu ethĩrwa arĩ Mũnene wao. Na njĩra ĩu, Shaitani atwĩkĩte “munene wa nthiguru iji.”—Thooma Johana 14:30; 1 Johana 5:19.
2.Ka ũũmbi bwa Mũrungu bwaarĩ na ĩatia?
Ngũgĩ cionthe cia Mũrungu nĩ imbũjũru. Antũ na araĩka boombĩtwe nĩ Mũrungu ũrĩa boomba kũmwathĩkĩra na njĩra ĩmbũjũru. (Kuriikanithia Maathana 32:4, 5) Mũrungu atũũmbĩte tũrĩ na ũciathi bwa kũthuura kũthithia weega kana ũũĩ. Ũciathi bũũ bũtũeejaga kaanya ka kwonania nĩtwendeete Mũrungu. —Thooma Jakubu 1:13-15; 1 Johana 5:3.
3.Nĩkĩ Mũrungu arekeeretie mĩthangĩko mwanka nandĩ?
Ĩgiitene rĩna, Jehova narekereetie antũ baregana na ũnene bwawe bũrĩa bũrĩ ĩgũrũ buru. Nĩkĩ? Nĩkenda oonania antũ batĩũmba gũciatha bongwa na njĩra ĩrĩna mpongeeri batĩkũmwĩrĩgĩĩra. (Mutumiiria 7:29; 8:9) Nyuma ya mĩaka 6,000 ya mũtũũrĩre jwa antũ, ũmma bwa ũntũ bũbũ nĩ bwonekete. Moonene ja antũ nĩjaremetwe kũthiria buru ndwaa, ũtunyani, wagi bwa ĩota, kana mĩrimo. —Thooma Jeremia 10:23; Aroma 9:17.
Mwanya mono na waathani bwa antũ, waathani bwa Mũrungu nĩbũgunaga barĩa babwĩtĩkagĩra. (Isaya 48:17, 18) Kagiita gatĩ kũraaja, Jehova akathiria buru moonene jonthe ja antũ. Barĩa bonka bakũthuura kwathwa nĩ Mũrungu, nĩbo bagatũũra nthĩgũrũne.—Isaya 11:9.—Thooma Danieli 2:44.
Tega vidio ĩjĩ Nĩkĩ Mũrungu arekeeretie mĩthangĩko mwanka nandĩ?
4.Weteeri bwa Mũrungu bũtũete kaanya ka kũthithia atĩa?
Shaitani augĩre gũtĩ muntũ ũũmba gũtumĩkĩra Jehova ũtheri. No weende kwonania Shaitani nĩ mũrongo? No woonanie! Weteeri bwa Mũrungu, bũtũete kaanya ka kwonania kethĩra twendeete waathani bwa Mũrungu, kana nĩ bwa antũ. Mũtũũrĩre jwetũ nĩju jũkoonania.—Thooma Ayubu 1:8-12; Njuno 27:11.
5.Nĩatĩa tũũmba kũthuura Mũrungu ae Mũnene weetũ?
Matua jeetũ nĩjoonanagia kethĩra nĩtũkwenda Mũrungu ae Mũnene weetũ
Twomba kũthuura Mũrungu ae Mũnene weetũ na njĩra ya gũcwaa ũthaathayia bwa mma na kũmũtumĩkĩra ta ũrĩa kwonanĩtue ndeene ya Bibiria. (Johana 4:23) Twomba kũregana na waathani bwa Shaitani na njĩra ya kũrega gwĩtonyithania na mantũ ja gĩciaca, na ndwaa, ta ũrĩa Jesũ aathithĩrie. —Thooma Johana 17:14.
Shaitani atumagĩra inya yaawe kwaĩĩria antũ batũũre mĩtũũrĩre ĩtĩ ĩmĩega na ya kũbathũũkia. Rĩrĩa twarega mĩĩtĩre ĩu, acoore bamwe kana antũ ba nja boomba gũtũmaria kana kũregana naatwĩ. (1 Petero 4:3, 4) Kwou, no mwanka tũthithie ĩtua. Twĩ rĩ, tũkagwatanĩra na antũ barĩa bendeete Mũrungu? Tũkaathĩkĩra mawaatho jaawe ja ũũme na wendo? Twathithia ũu, tũkeethĩrwa tũkĩonania Shaitani naarĩrie ũrongo rĩrĩa augĩre gũtĩ muntũ ũũmba kwathĩkĩra Mũrungu arĩna mĩthangĩko. —Thooma 1 Akorintho 6:9, 10; 15:33.
Wendo bwa Mũrungu kĩrĩ antũ bwonanagia kamma atĩ, ũthũũku na mĩthangĩko bikathira. Barĩa boonanagia nĩbetĩkĩtie mantũ jau bakagwĩrĩrua gũtũũra nthĩgũrũne kenya na kenya. —Thooma Johana 3:16.