Mworoto Jwa Mũrungu Kĩrĩ antũ Nĩ Jũrĩkũ?

1. Mworoto jwa Mũrungu kĩrĩ antũ nĩ jũrĩkũ?

MŨRUNGU arĩ na mworoto jũmwega kĩrĩ antũ. Oombĩre muntũ mũrũme na muntũ mũka wa mbere, Adamu na Hawa, batũũra muundene jũmũthongi. Mworoto jwawe jwaarĩ bagĩe aana, baethie nthĩgũrũ yonthe paradiso, na bamenyeere nyomoo.—Kiambiriria 1:28; 2:8, 9, 15; tega Nteto Irĩa irĩ Mũthia, 6.

2. (a) Tũrĩmenya atĩa Mũrungu akoojũria mworoto jwawe? (b) Bibiria yugaga atĩa bwegiĩ gũtũũra kenya na kenya?

² Ũrĩona atĩa, kwĩrĩo tũgatũũra paradiso? Jehova arĩtwĩra: “Nini mberekeretie na nkathithia.” (Isaya 46:9-11; 55:11) Nĩ mma, Mũrungu akoojũria mworoto jwawe na gũtĩkĩo gĩkamũrigĩĩria. Jehova atwĩraga oombĩre nthĩ arĩ na gĩtũmi. ‘Atamiumbire amitiga thirune.’ (Isaya 45:18) Arĩenda antũ batũũra nthĩgũrũne yonthe. Nĩ antũ bakari Mũrungu akwenda batũũra nthĩgũrũne, na arĩenda batũũra ĩgiita rĩng’ana? Bibiria yugaga: ‘Baria aagiru [kana, aathĩki] nibo bakaa eene rugai rwa nthi, na batuurage ku magita jonthe.’—Zaburi 37:29; Kugwurirwa 21:3, 4. 

3. Tontũ antũ nĩ baajagua na bagakua-rĩ, ũũmba kũũria atĩa?

³ Ĩndĩ naarua antũ nĩbaajagua na bagakua. Gũntũ gũkwingĩ nĩbarũũjaga na bakooragana. Jũu mma tĩ mworoto jwa Mũrungu. Kwou nĩatĩa gwakarĩkĩre, na nĩkĩ? Nĩ Bibiria akĩ yũũmba gũtaarĩria.

MŨNTHŨ WA MŨRUNGU

4, 5. (a) Nũũ waarĩrie na Hawa gũkũrũkĩĩra njoka muundene jwa Edeni? (b) Nĩatĩa muntũ mwĩtĩkĩkua oomba kwaa mwamba?

⁴ Bibiria ĩtwĩraga Mũrungu arĩ mũnthũ wĩtagwa ‘Nkoma na nowe Shaitani.’ Shaitani aatumĩĩre njoka kwaranĩria na Hawa muundene jwa Edeni. (Kugwurirwa 12:9; Kiambiriria 3:1) Aatũmĩre kwonekana ta njoka ĩkwaria.—Tega Nteto Irĩa irĩ Mũthia, 7.

⁵ Kwou-rĩ, Mũrungu nĩwe wombĩre Shaitani, Nkoma? Arĩ! Mũraĩka ũmwe ũrĩa waarĩ ĩgũrũ, rĩrĩa Mũrungu aathuranagĩra nthĩ nĩũntũ bwa Adamu na Hawa, agarũkĩre na araa Nkoma. (Ayubu 38:4, 7) Bũu bwombĩkanĩre atĩa? Nĩatĩa muntũ mwĩtĩkĩkua agarũkaga akaa mwamba? Atĩciaragwa arĩ mwamba. Ĩndĩ neka airiragĩĩria, kana akeenda, gĩntũ gĩtĩ kĩawe. Akaraga agĩkĩthũgaanagĩria, na mairĩrĩĩria jaawe jamaaĩ jakagĩta inya mono. Rĩu kaanya kooneka, akaiya gĩntũ kĩu. Aigarũraga wengwa akaa mwamba.—Thooma Jakubu 1:13-15; tega Nteto Irĩa irĩ Mũthia, 8.

6. Nĩatĩa mũraĩka ũmwe aaere mũnthũ wa Mũrungu?

⁶ Ũu nĩu gwakarĩkĩre kĩrĩ mũraĩka ũu. Nyuma ya Jehova kũũmba Adamu na Hawa, aaberĩre bagĩe aana na ‘boojurie nthiguru.’ (Kiambiriria 1:27, 28) Kwombĩka mũraĩka ũu aathũgaanĩrie: ‘antũ baa bonthe boomba kũnthaathayia, antũ-a Jehova!’ O ũrĩa aathũgaanagĩria ũntũ bũu, nou airiragĩĩria kĩrĩa kĩrĩ kĩa Jehova. Mũraĩka ũu eendaga antũ bamũthaathayia. Kwou araaĩĩria Hawa na aramwatithia. (Thooma Kiambiriria 3:1-5.) Na njĩra ĩu, araa Shaitani, Nkoma, mũnthũ wa Mũrungu.

7. (a) Nĩkĩ Adamu na Hawa baakuĩre? (b) Nĩkĩ tũtindiraga na tũgakua?

⁷ Adamu na Hawa bataathĩkĩre Mũrungu, bararĩa ĩtunda. (Kiambiriria 2:17; 3:6) Nĩbeĩĩrie Jehova, na nyumene barakua, o ta ũrĩa Jehova aaugĩte gũgakara. (Kiambiriria 3:17-19) Aana ba Adamu na Hawa baarĩ eeyia, kwou nĩbaakuĩre. (Thooma Aroma 5:12.) Kenda tũmenya nĩkĩ aana ba Adamu na Hawa kinya bo baarĩ eeyia, jũkia ngerekano ĩjĩ. Thũgaanĩria ũkĩrugaga mũgate na karaĩ karĩ na kamũkũnjo. Mũgate kinya ju jũkethĩrwa jwĩna kamũkũnjo o ta karaĩ. Rĩrĩa Adamu aaregere kwathĩkĩra Mũrungu, naeere mwĩyia. Tontũ tũrĩ aana ba Adamu, twinthe tũrĩ eeyia kana twĩna “kamũkũnjo” o ta we. Na tontũ twinthe tũrĩ eeyia, nĩtũtindiraga na tũgakua.—Aroma 3:23; tega Nteto Irĩa irĩ Mũthia, 9.

8, 9. (a) Nĩatĩa Shaitani eendaga Adamu na Hawa beetĩkia? (b) Nĩkĩ Jehova atooragĩre aregani bau o rĩmwe?

⁸ Shaitani aambĩrĩĩrie ũregani-na Jehova rĩrĩa aaĩrie Adamu na Hawa baarega kwathĩkĩra Mũrungu. Eendaga Adamu na Hawa beetĩkia atĩ Jehova nĩ mũrongo, mwathani ũmũũĩ, ũrĩa ũtabendagĩra jameega. Shaitani oonanĩrie antũ batĩkũbatara Mũrungu abeera jarĩa babuĩrĩte kũthithia, na atĩ Adamu na Hawa baabuĩrĩte gwituĩra bongwa jarĩa meega na jarĩa maaĩ. Kwou Jehova aabuĩri kũthithia atĩa? Arĩngĩũmba kũũraga aregani bau na kũthiria ũregani. Ĩndĩ-rĩ, bũu bũrĩngĩonania Shaitani nĩ mũrongo? Arĩ, bũtĩngĩonania.

⁹ Kwou, Jehova atooragĩre aremi bau o rĩmwe. Ĩndĩ naarekereerie ĩgiita antũ baciatha bongwa. Bũu bũrĩngĩonania bwega atĩ Shaitani nĩ mũrongo, na Jehova naijĩ kĩrĩa kĩega kĩrĩ antũ. Tũkairitana ũntũ bũu nkũrũki Kĩthoomone kĩa 11. Ĩndĩ ũrĩthũgaania atĩa bwegiĩ ĩtua rĩa Adamu na Hawa? Nĩkwaagĩrĩte beetĩkia Shaitani, na barega kwathĩkĩra Mũrungu? Jehova naaete Adamu na Hawa birĩa bionthe baarĩ nabio. Naabaete mwoyo jũmũũjũru, gũntũ gũkũthongi kwa gũkara, na ngũgĩ ĩnjega. Ĩndĩ gũtĩ ũntũ kinya bũmwe bũbwega Shaitani aabathithĩrĩtie. Kethĩra nĩ waarĩ o ũrĩngĩthithia atĩa?

10. Nĩ ĩtua rĩrĩkũ rĩa bata o muntũ abuĩri kũthithia?

¹⁰ Naarua, o muntũ arĩ na ĩtua o ta rĩu rĩa kũthithia, na ũtũũro bwetũ bwĩrĩgagĩĩra ĩtua rĩu. No tũthuure kwathĩkĩra Jehova arĩ Mũnene weetũ, na gũtetheeria kwonania Shaitani nĩ mũrongo. Kana no tũthuure Shaitani arĩ mũnene weetũ. (Zaburi 73:28; thooma Njuno 27:11.) Nĩ antũ baakai mono nthĩgũrũne baathĩkagĩra Mũrungu. Nĩ mma, tĩ Mũrungu ũkwaatha nthĩgũrũ ĩjĩ. Ĩndĩ kethĩra tĩwe, nũũ?

NŨŨ WATHAGA NTHĨGŨRŨ?

11, 12. (a) Nĩmbi tũkwiritana kuumania na kĩrĩa Shaitani eendaga kwaa Jesũ? (b) Nĩ maandĩko jarĩkũ jakwonania Shaitani nakwatha nthĩgũrũ?

¹¹ Jesũ naaijĩ nũũ wengwa wathaga nthĩgũrũ. Ĩgiita rĩmwe, Shaitani naamwonerie “monene jonthe ja nthiguru na mwago jwajo.” Shaitani aramwĩra: “Jaja jonthe ngakwa kethira ukaigwithia nthi [kana ũgaturia maru] unthathayie.” (Mathayo 4:8, 9; Luka 4:5, 6) Ciũrie, ‘Kethĩra moonene jau jataarĩ ja Nkoma-rĩ, arĩngĩĩra Jesũ akamwaa jo? Arĩ. Jesũ ataakararia thirikarĩ cionthe nĩ cia Shaitani.

¹² No ũrigare: ‘Nĩatĩa Shaitani oomba kwĩthĩrwa nĩwe mũnene wa nthĩgũrũ? Ntĩkuuga Jehova Mũrungu nĩwe Mweneinya yonthe, na nĩwe mũũmbi wa ĩgũrũ na nthĩ?’ (Kugwurirwa 4:11) Nĩ mma nĩwe, ĩndĩ Jesũ eetĩre Shaitani “munene wa nthiguru iji.” (Johana 12:31; 14:30; 16:11) Mũtũmwa Paũlo eetĩre Shaitani, Nkoma “murungu jwa nthiguru iji.” (2 Akorintho 4:3, 4) Na mũtũmwa Johana aandĩkĩre “nthiguru iji yonthe niujuritwe ni inya ya uria mui.”—1 Johana 5:19.

NĨATĨA NTHĨGŨRŨ YA SHAITANI ĨKATHIRUA?

13. Nĩkĩ tũkũbatara nthĩgũrũ ĩnjerũ?

¹³ Nthĩgũrũ ĩjĩ ĩrĩĩta ĩkĩongeerekaga ũgwati nkũrũki na nkũrũki. Ndwaa, nkukumano, waayia, na ũtaatima bũtũthiũrũnkĩte kunthe. Antũ batĩũmba kũthiria mathĩĩna jaja jonthe, kinya bakageria bũng’ana. Ĩndĩ kagiita gatĩ kũraaja, Mũrungu akathiria nthĩgũrũ ĩjĩ nthũũku ndweene yaawe ya Amagedoni, na areete nthĩgũrũ ĩngĩ ĩnjerũ ĩrĩ na waagĩru.—Kugwurirwa 16:14-16; tega Nteto Irĩa irĩ Mũthia, 10.

14. Nũũ Mũrungu athuurĩte aa Mũnene wa Ũnene Bwawe? Nĩatĩa Bibiria yaroretie bwegiĩ Jesũ?

¹⁴ Jehova naathuurĩre Jesũ Kristũ aa Mũnene wa Ũnene, kana thirikarĩ Yaawe ya ĩgũrũ. Mangiri ja mĩaka karaaja, Bibiria nĩ yaroretie atĩ Jesũ arĩngĩathana arĩ “Munene wa thiiri,” na thirikarĩ yaawe ĩtĩkorothira. (Isaya 9:6, 7) Jesũ aaritanĩre athingati baawe barombe thirikarĩ ĩu ĩĩje rĩrĩa aaugĩre: “Unene bwaku bwije; Uria wendete gwe buthithague nthi iji, Ta uria buthithagua kuu Iguru.” (Mathayo 6:10) Kĩthoomone kĩa 8, tũkairitana ũrĩa Ũnene bwa Mũrungu bũkaathana antũ-a thirikarĩ irĩa irĩo nthĩgũrũne. (Thooma Danieli 2:44.) Rĩu Ũnene bwa Mũrungu bũkaeethia nthĩgũrũ paradiso ĩnthongi.—Tega Nteto Irĩa irĩ Mũthia, 11.

NTHĨGŨRŨ ĨNJERŨ ĨRĨ AKUĨ!

15. “Nthiguru injeru” nĩmbi?

¹⁵ Bibiria ĩrĩ na wĩrane bũbũ: “Tukaraga tweteerete Iguru ririeru, na nthiguru injeru, naku niku gutwire wagiru.” (2 Petero 3:13; Isaya 65:17) Ĩgiita rĩngĩ rĩrĩa Bibiria ĩkwarĩĩria “nthiguru,” ĩthagĩrwa ĩkĩarĩĩria antũ barĩa batũũraga nthĩgũrũne. (Kiambiriria 11:1) Kwou “nthiguru injeru” ya waagiru nĩ antũ bonthe barĩa baathĩkagĩra Mũrungu, na bakatharimwa nĩwe.

16. Nĩ kĩewa kĩrĩkũ gĩa kũrigaria Mũrungu akaa barĩa bagatũũra nthĩgũrũne yaawe ĩnjerũ, na no mwanka tũthithie atĩa kenda twĩja kwona kĩewa kĩu?

¹⁶ Jesũ eeranĩĩre barĩa bagatũũra nthĩgũrũne ĩnjerũ bakoona “mwoyo jwa kenya-na-kenya.” (Mariko 10:30) No mwanka tũthithe atĩa kenda twona kĩewa gĩkĩ? Itũ bu thooma Johana 3:16 na 17:3 kenda wona ĩcookio. Tiga nandĩ twone ũrĩa Bibiria yugaga ũtũũro bũkethĩrwa bũkari Paradiso nthĩgũrũne.

17, 18. Nĩatĩa tũkũmenya gũkethĩrwa na thĩĩrĩ na ũkaria kunthe nthĩgũrũne?

¹⁷ Ndwaa, ũthũũku, uuni waatho, ũgĩti na ũthangani bikathira. Gũtĩtigara muntũ ũmũũĩ nthĩgũrũne. (Zaburi 37:10, 11) Mũrungu ‘akathiria ndua mwanka ituri bia nthiguru.’ (Zaburi 46:9; Isaya 2:4) Nthĩgũrũ ĩkoojũrwa nĩ antũ aathĩki, na eendi Mũrungu. Gũkethĩrwa na thĩĩrĩ mwanka gũtĩrĩo.—Zaburi 72:7.

¹⁸ Antũ ba Jehova bakethĩrwa barĩ na ũkaria. Ĩgiitene rĩa Bibiria, rĩrĩa Aisraeli baathĩkagĩra Mũrungu, bateethagĩrwa na ũgwati tontũ Mũrungu naabakaragia. (Mantu ja Alawi 25:18, 19) Paradiso, tũtĩkĩra muntũ kana gĩntũ kinya kĩrĩkũ. Tũkethagĩrwa rĩonthe twĩna ũkaria!—Thooma Isaya 32:18; Mika 4:4.

19. Nĩkĩ tũũmba gwĩtĩkia gũkethĩrwa na biakũrĩa bibiingĩ nthĩgũrũne ĩnjerũ ya Mũrungu?

¹⁹ Gũkethĩrwa kwĩna biakũrĩa bibiingĩ. ‘Nthiguru ikethirwa na irio mwanka irimene iguru.’ (Zaburi 72:16) Jehova, “Murungu wetu, agatutharima” na “nthiguru ikarita mpongeeri yayo.”—Zaburi 67:6.

20. Nĩatĩa tũkũmenya nthĩgũrũ ĩkaa paradiso?

²⁰ Nthĩgũrũ yonthe ĩkaa paradiso. Antũ bakethĩrwa beena miunda na nyomba inthongi. (Thooma Isaya 65:21-24; Kugwurirwa 11:18.) Nthĩgũrũ yonthe ĩkaa ĩnthongi o ta ũrĩa muunda jwa Edeni jwaarĩ. Rĩonthe Jehova agatwejaga kĩrĩa kĩonthe tũkũbatara. Bibiria yugaga ũjũ kũmũkonia: “Ukumbaturukagia njara yaku, na into bionthe biria biri mwoyo ukabinyiria o kiria biendaga.”—Zaburi 145:16.

21. Nĩatĩa tũkũmenya gũkethĩrwa na thĩĩrĩ gatĩgatĩ ka antũ na nyomoo?

²¹ Gũkethĩrwa na thĩĩrĩ gatĩgatĩ ka antũ na nyomoo. Nyomoo itĩũria antũ kaĩrĩ. Twaana tũniini tũkaigua twĩna ũkaria, kinya rĩrĩa tũrĩ amwe na nyomoo irĩa naarua irĩ inthũũku.—Thooma Isaya 11:6-9; 65:25.

22. Nĩatĩa Jesũ akathithĩria aajie?

²² Gũtĩwe ũkaajua kaĩrĩ. Rĩrĩa Jesũ aarĩ nthĩgũrũne, noorerie antũ babaingĩ. (Mathayo 9:35; Mariko 1:40-42; Johana 5:5-9) Ĩndĩ arĩ Mũnene wa Ũnene bwa Mũrungu, Jesũ akooria antũ bonthe. Gũtĩwe ũgacooka kuuga kaĩrĩ: “Nimbajitue.”—Isaya 33:24; 35:5, 6.

23. Nĩatĩa Mũrungu akathithĩria barĩa bakuĩte?

²³ Akuũ bagatũũra kaĩrĩ. Mũrungu ekĩte wĩrane akariũkia mamirioni ja antũ barĩa bakuĩte. Gũkethĩrwa na “kuriukua kwa antu baria beega o na baria baai.”—Thooma Johana 5:28, 29; Mathithio 24:15.

24. Nĩatĩa ũkwigua bwegiĩ gũtũũra Paradiso?

²⁴ Twinthe twĩna kaanya ga kũthuura. Twomba kũthuura kwiritana gũkonia Jehova na kũmũtumĩkĩra, kana tũthithie ũrĩa tũkwenda kũthithia. Kethĩra tũkathuura gũtumĩkĩra Jehova, tũkethĩrwa na ĩgiita rĩĩthongi mono rĩĩjĩte. Rĩrĩa muntũ ũmwe oorĩrie Jesũ amũriikane nyuma ya gũkua, Jesũ nĩamwĩkĩĩre wĩrane: ‘Ugakara amwe nani paradiso.’ (Luka 23:43) Tiga twiritane nkũrũki mantũ jegiĩ Jesũ Kristũ, na ũrĩa akoojũria mawĩrane ja Mũrungu ja kũrigaria.