Ũrĩona ũtũũro bũgakara atĩa ntukũ ciĩjĩte?

ŨRĨA BIBIRIA YUGAGA

“Murungu . . . akaangura methori jonthe jaume methone jao; na gikuu gutirio gigacoka gukara o kairi; na gutirio gugacoka kugita kieba kana kiriro, kana kinya murimo; tontu mantu jaria makuru jonthe nijathiritie gukuruka buru.”—Kugwurirwa 21:3, 4, The Bible in Kimeru, 1964.

ŨRĨA ŨNTŨ BŨBŨ BŨŨMBA GŨGŨTETHIA

Kwĩthĩrwa ũrĩ na ngũgĩ ya kũng’anĩrwa.—Isaya 65:21-23.

Gũtĩthĩrwa kũrĩ na mĩrimo kana mĩthangĩko kaĩrĩ.—Isaya 25:8; 33:24.

Gũkethĩrwa kũrĩ na kũgwĩrua amwe na antũ ba nja na acoore ũtũũrone bũtĩna mũthia.—Zaburi 37:11, 29.

NO TWĨTĨKIE BURU ŨRĨA BIBIRIA YUGAGA?

Ĩĩ, nĩũntũ bwa itũmi bibi biĩrĩ:

• Mũrungu arĩ na inya ya kũjũria wĩrane bwawe. Ndeene ya Bibiria, nĩ Jehova wenka akĩ wĩtagwa Mũrungu “Mweneinya yonthe,” tontũ inya yawe ĩtĩ mũthia. (Kugwurirwa 15:3) Kwou akojũria buru wĩrane bwawe bwa kũgarũra nthĩgũrũ ĩjĩ yetũ ĩbue buru. Ta ũrĩa Bibiria yugaga, ‘mantu jonthe nijombikaga kiri Murungu.’—Mathayo 19:26.

• Mũrungu arĩ na wendi bwa kũjũria wĩrane bwawe. Kwa ngerekano, Jehova nairiraĩĩria kũriũkia barĩa bakuĩte.—Ayubu 14:14, 15.

  Kinya Bibiria nĩyonanagia, Jesũ Mũtaana wa Mũrungu rĩrĩa arĩ nthĩgũrũne noragia antũ barĩa baajĩtue. Nĩkĩ tontũ aathithagia ũu? Tontũ naarĩ na wendi. (Mariko 1:40, 41) Jesũ onanĩrie na njĩra ĩmbũjũru ũrĩa Ĩthe arĩ na wendi bwa gũtethia barĩa barĩ na mathĩĩna.​—Johana 14:9.

  Kwou tũrĩ na mma atĩ Jehova na Jesũ nĩ bakwenda gũtũtethia tũgwĩrĩrua ũtũũro bũrĩa bwĩjĩte!—Zaburi 72:12-14; 145:16; 2 Petero 3:9.