March

Genese karoa 1 bona 2 baita duahimu neganai, baita itaiamu Adam bona Heva ese e moalelaiava ura kwalimuna na hari ina negai taunimanima ese e ura heniamu ura kwalimuna​—asie lalohekwarahiva, asie gariva, bona ta ese se daḡedaḡe henidiava. Idia na aniani, ḡaukara, gorere, bona mase dainai asie lalohekwarahiva. (Gen. 1:​27-29; 2:​8, 9, 15) To, ura kwalimu ta herevalaiamu neganai, baita laloatao ḡauna badana na, Iehova Dirava sibona ena ura kwalimu na asi hetoana. Dahaka dainai? Badina ia na ḡau iboudiai Ihavaradia Tauna bona siahu idoinai Pavapavana. (1 Tim. 1:17; Apok. 4:11) Una dainai, guba bona tanobada ai e maurimu ḡaudia iboudiai edia ura kwalimu na mai hetoana. Namona na bae diba Iehova Dirava sibona na mai ena maoro hahemaoro maoromaoro taravatudia, taravatu maoromaorodia, bona baita badina diba taravatudia baine ato. Una na matamana negana ai, Iehova Dirava ese taunimanima e karadia neganai e kara heḡereḡerena. w18.04 4 par. 4, 6

Ina nega lalonai, ita na Iehova ena heduru dainai ta haheaukamu. (2 Kor. 4:​7, 8) To mani Iehova asie hetura heniamu taudia a lalodia, reana ediai na auka bae haheauka. Iesu heḡereḡerena, ta bogadia hisimu dainai ta uramu idia ediai sivarai namona baita herevalaia. Haida o hadibadiamu neganai ba haheauka. Ba helalotao, ita mai dibada hereva momokanidia haida na asi dibadia. Bona momo na edia tomadiho ai e hadibadia ḡaudia na dounu e badinamu. Reana e laloamu edia tomadiho ese edia ruma bese, kastom, bona hanua taudia e hatamonadiamu. Bema ta uramu taunimanima na e abi daeva hahediba hereva ‘gunadia’ bae rakatani, ḡau ginigunana na baita durudia e dibamu hereva momokani ‘matamatadia’ bae lalopararalai bona bae abi dae. Unu amo edia tomadiho ai e diba hahediba hereva gunadia bae rakatani. Unu senisi bae kara totona namona na mai haheaukada ida baita durudia.​—Roma 12:2. w19.03 23 par. 10, 12; 24 par. 13

Iehova ena lalokau bona lalonamo herevadia ese e hadibadamu, dala baita tahu haida baita hagoadadia totona. (Ioa. 5:20) Ta laloa badamu tauna ta ese e lalokau henidamu bona eda kara namodia daidiai e hanamodamu neganai, ta moalemu. Una heḡereḡerena, eda kongrigeisin ai tadikaka taihu bona ruma bese taudia baita lalokau henidia bona baita hagoadadia na namo. Haida baita hanamodiamu neganai, edia abidadama baita hagoadaiamu bona baita durudiamu Iehova bae badinaia. Tama sina ese natudia bae hagoadadia na namo. Mai momokanidia ida natudia bae hanamodia bona bae lalokau henidia neganai, natudia na be goadamu bona be moalemu. Ina hereva, “Lau ese oi na lalo namo henimumu,” ese e hahedinaraiamu Iehova na e diba momokani Iesu na mai lalona idoinai ida Tamana ena ura baine karaia. Iehova ese Natuna na e trastiamu dainai, ita danu baita abia dae Iesu ese Iehova ena gwauhamata iboudiai na baine haḡuḡurudia. (2 Kor. 1:20) Iesu ena haheitalai baita laloamu neganai, baita ura dikadikamu ia amo diba baita abi bona ena haheitalai baita tohotohoa.​—1 Pet. 2:21. w19.03 8 par. 3; 9 par. 5-6

Dava bada harihari ḡauna ta ena namo baita lalopararalaiamu neganai, una harihari ḡauna e heni tauna baita tenkiu heniamu. Israel taudia na Iehova ese Aigupto ena iḡui amo e ruhadia neganai, e henidia ura kwalimuna na asie laloa bada. E hamauridia bena hua haida muridiai, guna Aigupto ai e aniva anianidia e lalodia matama bona Iehova ena harihari ḡaudia na e maumauraiva, danu e urava Aigupto bae lou lao. Mani a laloa, idia ese ‘gwarume, kiukamba, melon, liki, onion, bona galik’ e lalodia badava, a Iehova ese e henidia ura kwalimuna amo Ia bae toma henia diho karana na asie laloa bada. Una dainai Iehova ese e badu henidia. (Num. 11:​5, 6, 10; 14:​3, 4) Una ese ḡau ta e hadibadamu. Aposetolo Paulo ese Kristen taudia e hadibadia Iehova ese Natuna, Iesu Keriso, ena amo e heni ura kwalimuna bae laloa bada na namo.​—2 Kor. 6:1. w18.04 9-10 par. 6-7

Ita iboudai na ta uramu haida ese bae lalokau henida, bona bae kara namo henida. Bema lalokau bona hahemaoro maoromaoro na lasi, baita mamiamu eda mauri na asi anina eiava asi eda helaro. Iehova na mai dibana ita na ta ura dikadikamu haida ese bae lalokau henida bona hahemaoro maoromaoro ai bae kara henida. (Sal. 33:5) Ta dibamu eda Dirava ese ita na e lalokau henidamu bona e uramu haida ese bae kara namo henida. Iehova ese Mose amo Israel besena e henia Taravatuna ai una e hahedinaraia ḡoevaḡoeva. Mose ena Taravatu baita stadilaiamu neganai, eda lalokau Diravana, Iehova, ena hemami baita dibamu. (Roma 13:​8-10) Ta dibamu lalokau dainai Iehova ese Mose ena Taravatu e ato, badina Iehova na lalokau ai ḡau iboudiai e karamu. (1 Ioa. 4:8) Iehova ese Taravatu e ato badidia badadia rua na ini: Dirava ba lalokau henia, bona dekemu tauna ba lalokau henia. (Lev. 19:18; Deu. 6:5; Mat. 22:​36-40) Una dainai Taravatu 600 bona haheḡani ma haida ese Iehova ena lalokau ai ḡau haida e hadibadamu. w19.02 20-​21 par. 1-4

Iobu ese hahine idaudia ediai ena kara nahuadia na e tohova. (Iobu 31:1) Ia na mai dibana hahine idaudia baine ḡahusidia na kerere. Hari, mahuta hebou urana e havaraiamu hedibaḡanidia na momo herea. Iobu heḡereḡerena, namona na headava tauna o hahinena ese ma ta basine ḡahusia. Danu dala idauidau ai matabodaḡa laulaudia na basita ita. (Mat. 5:28) Bema dina ta ta ai siboda baita hebiagumu, una ese be hagoadadamu Dirava baita badinaia totona. Danu Iobu na Iehova e kamonai heniava dainai kohu bona moni ai lalohadai maorona e abia. E laloparara bema ena taḡa baine abidadama henia, kara dika badana ta baine karaia diba bona bae panisia na namo. (Iobu 31:​24, 25, 28) Hari, taunimanima momo na kohu bona moni mo e lalomu. Baibul ena hereva heḡereḡerena, bema moni bona kohu ai lalohadai maorona baita abiamu, una ese be hagoadadamu Dirava baita badinaia hanaihanaimu.​—Her. 30:​8, 9; Mat. 6:​19, 20. w19.02 6 par. 13-​14

Iesu na e kara ḡaudia iboudiai lalodiai Iehova ena lalokau e hahedinaraia ḡoevaḡoeva. (1 Ioa. 4:​8-10) Mai anina bada ḡauna na, Iesu na mai kudouna idoinai ida ita daidai ena mauri e heni. Herevana ita na horoa taudia eiava “mamoe idaudia,” to Iehova bona Natuna ese una boubou ḡauna amo e hahedinaraia lalokauna ese e durudamu. (Ioa. 10:16; 1 Ioa. 2:2) Danu, Memorial hebouna ai e ḡaukaralai ḡaudia mani aita lalo; unu ese Iesu ena lalokau e hahedinaraia bona ena hahediba taudia e lalodia bada. Edena dala ai? Iesu ese ena horoa tadikakadia ediai ena lalokau e hahedinaraia dalana ta na, e hamatamaia hebouna ai ḡau momo se ḡaukaralai, unu amo idia ese bae badinaia na dia auka. Una nega amo, unu horoa taudia na e laloparara laḡani ta ta ai Memorial hebouna bae karaia na namo, ena be edia noho daladia na idauidau, eiava dibura ruma ai bae atodia. (Apok. 2:10) Idia ese Iesu ena haheḡani e badinaia eiava? Oibe. Aposetolo edia nega amo ema bona hari, Kristen momokanidia na e ḡaukara goadamu Iesu ena mase bae laloatao totona. w19.01 24 par. 13-​15

Ta moalemu badina Dirava ese tomadiho koikoi, babalau karadia bona ḡau ma haida amo e ruhada. Dia una mo, to vaira negana ai “Dirava natuna edia ura-kwalimu herea-daena” baita abiamu. (Roma 8:21) Hari una ura kwalimu bo moalelaia dibamu bema ‘Keriso ena hereva’ o hahediba herevadia bo badinamu. (Ioa. 8:​31) Unu amo, dia “hereva momokani” mo bo dibamu to bo badinaiamu danu. Ina nega oromana lalonai, taunimanima ese e gwauraiamu mauri namona na basine mia daudaumu. Ita na asi dibada kerukeru be dahaka be varamu. (Iak. 4:​13, 14) Una dainai, aonega karana na “mauri korikori” eiava mauri hanaihanai dalana ai ba raka. (1 Tim. 6:19) Momokani, Dirava ese ita na se doridamu una dala ai baita raka totona. Abi hidi na ita ta ta edai. Iehova na ‘ahumu’ ai ba halaoa. (Sal. 16:5) Ia ese e henimumu “ḡau namodia” ba lalodia bada. (Sal. 103:5) Bona bavabia dae ia ese emu moale baine habadaia diba, bona una moale na baine mia hanaihanai.​—Sal. 16:11. w18.12 28 par. 19, 21

Iesu bona Iehova ese headava e matauraiamu heḡereḡerena, namona na Kristen taudia iboudiai bae hekwarahi edia headava bae matauraia. To, haida ediai una na auka, badina ita na dia ḡoevadae tauda. (Roma 7:​18-23) Una dainai, basita daradara badina aposetolo edia negai danu Kristen taudia haida edia headava lalonai hekwakwanai na e varava. Paulo eto, “hahine ese tau basine dihotania”; to haida ese una sisiba na se badinaia. (1 Kor. 7:​10) Paulo ese headava e pararava badina na se herevalaia. Ta dibamu tau o hahine ta na ena matabodaḡa karana dainai, adavana baine ura neganai ena headava baine hadokoa, to hekwakwanai na dia una. Paulo na eto, adavana e dihotania hahinena na “vadona ai bema noho, eiava adavana enai ma bema daro dae lou.” Badina Dirava matanai idia raruosi na dounu tamona. Paulo ena sisiba na eto herevana dahaka hekwakwanai bae vara, bona bema una na dia matabodaḡa karana ta, namona na raruosi bae maino lou. Danu kongrigeisin elda amo Baibul ena heduru herevadia bae tahu. w18.12 13 par. 14-​15

Hari ina negai, Dirava na e uramu ena taunimanima na ia turana ai baela bona haroro ḡaukara bae goadalaia. (Mat. 28:​19, 20; Iak. 4:8) Haida na eda hesiai ḡaukara be koua tohomu. Heḡereḡere, dahaka ba kara diba bema emu bosi na e uramu dagi ta baine henimu bona pei baine habadaia, to una dagi dainai asi emu nega ba haroro eiava hebou baola? Eiava dahaka ba kara diba bema sikuli gabunai emu hahediba ese bae hadibamu, gabu daudau sikulina ta baola emu diba ba habadaia totona? Bema emu ai una baine vara, namona na ba ḡuriḡurilaia, haida ida ba herevalaia, bena abi hidi ba kara. Namona na hari Iehova ena lalohadai ba tahua bona ba badinaia. Bena, vaira nega ai hahetoho unu bamodia bae vara neganai, bo hanaidiamu na dia auka, badina lalomu vada o hadaia Dirava ena hesiai ḡaukara bavatoa guna. w18.11 27 par. 18

Solomon na maraḡinai Israel edia king ai ela. E lohia matama neganai, Iehova na nihi ta amo enai e hedinarai bona e hamaoroa, eto: “A hereva, dahaka baina henimu.” Solomon e haere, eto: “Lau na mero maraḡina mo. . . . Lau na asi dibagu ede baina raka lasi toma bona ede baina raka vareai toma. Taunabunai, emu hesiai tauna na lalo-parara ba henigu, emu orea taudia baina biagudia.” (1 Han. 3:​5-10) Solomon na e diba ena aonega na dia heḡereḡere dainai, Dirava e noia “lalo-parara” baine henia. Una na manau karana, ani? Una dainai ta dibamu Iehova ese Solomon e lalokau henia! (2 Sam. 12:24) Eda Dirava na Solomon enai e moale dainai “aonega bona lalo-parara” e henia. (1 Han. 3:12) Solomon na Dirava e badinaia dainai hahenamo momo e abi. Ia ese dubu helaḡa ta e haginia “Iehova, Israel Diravana, ladana ena.” (1 Han. 8:20) Dirava ese e henia aonegana dainai ladana na e bada. Bona Dirava ena hahekau henunai e gwaurai herevadia na Baibul bukadia toi ai e tore. Idia ta na Hereva Lada-isidia bukana. w19.01 14 par. 1-2

Taunimanima haida na asie uramu ma haida ese edia lalohadai bae hamaoromaoro. Idia na ini e gwau tomamu: “Lau sibogu egu lalohadai baina badinaia.” Reana edia hereva anina na, sibodia edia abi hidi bae kara, bona unu bae kara toma na dia kerere. Asie uramu haida ese bae biagudia eiava bae doridia ma haida bae tohotohodia. To namona na baita diba, bema Iehova ena lalohadai baita abia dae, abi hidi na dounu baita kara dibamu. Korinto Iharuana 3:17 ena hereva heḡereḡerena, “Lohiabada Laumana e nohomu gabudia ai ura kwalimu danu e nohomu.” Ita na mai eda ura kwalimu dainai abi hidi baita kara diba taunimanima ede bamodia ai baitala totona. Reana ta ura henimu ḡaudia bona ta dibamu ḡaudia haida baita abi hidi dibamu. Momokani, Iehova ese ita e karada neganai ura kwalimu e henida, to namona na baita ḡaukaralaia namonamo. (1 Pet. 2:16) Maoro bona kerere iabi hididia karana ai, Iehova na e uramu ena Hereva ai e hahedinaraia lalohadaina ese baine hakauda. w18.11 19 par. 5-6

Hereva momokani ta diba neganai, Iehova ena ura ta atoa guna, a iseda ura be gabeai. Hereva momokani dalanai baita raka totona ita na ḡau haida ta dadarai. To, reana laḡani haida muridiai, baita itamu haida na mobael fon, kompiuta eiava televisen matamatadia e hoimu, eiava ḡau namodia haida e moalelaimu. Reana baita gwaumu ‘idia be mai edia kohu lau be lasi.’ Baita lalomu dekedai miadia ḡaudia na dia heḡereḡere, una dainai eda hesiai ḡaukara na basita laloa badamu to baita taḡa daladia baita tahumu. Dema enai una na e vara. Ia ese “ina tanobada” e ura henia dainai aposetolo Paulo ida e karaiava hesiai ḡaukarana e rakatania. Dahaka dainai Dema ese Paulo e rakatania? Baibul ese una na se herevalaia. Reana Dema na kohu e ura heni bada dainai hesiai ḡaukaradia na se lalo, eiava se ura ḡau haida baine dadarai Paulo ida baine ḡaukara hebou totona. Bema basita henahua tohomu, kohu iura henina karana ese be biagudamu bena hereva momokani na basita ura heniamu. w18.11 10 par. 9

Satana ena koikoi herevana na dika herea, badina mai dibana bema Heva ese ena hereva be abia daemu bona au huahuana be aniamu, ia na be masemu. Heva bona Adam ese Iehova ena taravatu e utua neganai e mase. (Gen. 3:6; 5:5) Dia una mo, edia kara dika dainai, “mase ese taunimanima iboudiai e butudia tao.” Momokani, ‘mase vada e kwalimu . . . ena be haida ese Adam ena kara dika asie tohotohoa, to e mase.’ (Roma 5:​12, 14) Matamanai Dirava ena ura na taunimanima ese mauri ḡoevadaena bae moalelaia, to hari idia na asie mauri daudaumu. Ena be laḡani 70 eiava 80 bema mauri, to edia mauri na dounu “hekwarahi ai bona lalohisihisi ai e honu honu” dae. (Sal. 90:10) Madi, unu na Satana ena koikoi dainai e varamu! Iesu ese Diabolo ena kara e herevalaia neganai, eto: “Hereva momokani se badinaiamu; badina be ia lalona ai hereva momokani na lasi.” (Ioa. 8:44) Satana lalonai hereva momokani na lasi dainai, doini “tanobada idoinai e koiamu.” (Apok. 12:9) To, asita uramu Diabolo ese baine koida. w18.10 6-7 par. 1-4

Maino e karamu taudia na e moalemu. Hahediba tauna Iakob na eto: “Kara maoromaoro anina be maino ai e hadoamu, herohemaino taudia ediai.” (Iak. 3:18) Bema kongrigeisin ai eiava ruma bese lalonai ta ida ta hepapahuahu, Dirava enai heduru baita noi baita herohemaino totona. Danu, Iehova ese ena lauma helaḡa amo be durudamu, kara maorodia baita karamu bena baita moalemu. Iesu ese e hahedinaraia maino baita kara na mai anina bada. Eto: “Taunabunai, emu boubou ḡauna pata helaḡana ai bavatoa negana ai na ba helalo une, tadikakamu enai mai emu kerere, emu boubou ḡauna pata helaḡana vairanai ba rakatania, baola, tadikakamu ida ba herohemaino guna, gabeamo ba lou lao, emu boubou ḡauna pata helaḡana latanai bavatoa.”​—Mat. 5:​23, 24. w18.09 21 par. 17

Iesu na ena hanuaboi ginigabena ai, ena hahediba ida e herevaherevava neganai, ia ese lalokau na nega 30 heḡereḡerena e gwauraia. Ena hahediba e hamaorodia bae “helalokau heheni” na namo. (Ioa. 15:​12, 17) Edia helalokau heheni karana amo taunimanima na bae diba idia na Keriso ena hahediba taudia korikoridia. (Ioa. 13:35) Una lalokau na dia hebogahisi kava hemamina amo bae hahedinaraia. Iesu ese e herevalaia lalokauna na, sibodia edia ura bae dadaraia lalokauna. Eto: “Lalokau herea-daena binai, ta ese ena mauri baine atoa diho, turana daidiai. Egu haheḡani ba badina, unu amo lau turagu ai baola.” (Ioa. 15:​13, 14) Hari ina negai, momo na e dibamu Iehova ena hesiai taudia na e helalokau hehenimu bona lalotamona ai e nohomu. (1 Ioa. 3:​10, 11) Ta moalemu badina ena be eda bese, iduhu, gado bona mauri daladia na idauidau, to Keriso ena lalokau ta hahedinaraiamu! w18.09 12 par. 1-2

Iehova na e uramu ena hesiai taudia ese edia ruma bese bae naridia. Heḡereḡere, reana moni ḡaukara o karamu tauani dalanai emu ruma bese ba ubua totona. Sina haida be ruma ai e nohomu natudia maraḡidia e naridiamu. Bona natu badadia haida be tamadia sinadia gogorere daidiai e naridiamu. Unu na mai anidia bada ḡaukaradia haida. Bema oi na una maduna ta o huaiamu, reana asi emu nega tiokratik ḡaukaradia haida ai ba vareai. To basio lalomanoka! Emu ruma bese o nariamu dainai, Iehova na e moalemu. (1 Kor. 10:31) Bema ruma bese lalonai emu maduna na dia bada, gorere eiava buruka tadikakadia bona taihudia, eiava idia e naridiamu taudia ba durudia diba, a? Emu kongrigeisin ai heduru e uramu taudia ba tahudia. Unu bo kara tomamu neganai, oi na reana ta ena ḡuriḡuri haerena, bona Iehova ida o ḡaukara heboumu.​—1 Kor. 10:24. w18.08 24 par. 3, 5

Iosef laḡanina 17 neganai, kakana veridia ese e mama henia dainai e hoihoilaia hesiai tauna ta na heto. Una do se vara lalonai, Iosef na tamana ese e lalokau henia badava merona. (Gen. 37:​2-4, 23-28) Mani a laloa, laḡani 13 lalodiai Iosef na tamana se itaia, badina Aigupto ai hesiai ḡaukaradia e karava bona dibura ruma ai e nohova. Dahaka ese Iosef e durua basine lalomanoka bona basine badu? Dibura ruma ai e nohova neganai, reana Iehova ese e hanamoava daladia e lalova. (Gen. 39:21; Sal. 105:​17-19) Danu maraḡinai e abia nihina reana e laloa lou neganai, e diba momokani Iehova ese ia na e lalonamo henia. (Gen. 37:​5-11) Nega momo ena lalohekwarahi na Iehova e hamaorolaiava. (Sal. 145:18) Iehova ese ena ḡuriḡuri e haerelaia dalana na, lalogoada e henia bona e hadibaia, baine davari hahetohodia lalodiai baine “bamoa.” w18.10 28 par. 3-4

Taḡa dainai ma haida baita lalodia kerere dibamu. To edena dala ai ta na ena taḡa eiava ogoḡami dainai baita laloa kerere diba? Solomon na lauma helaḡa ese e hagoadaia dainai dia ḡoevadae taudia e herevalaidia, hari dina ena siri ese e hahedinaraia heḡereḡerena. Ina aonega herevana ese dahaka e hadibadamu? Bema basita henahua tohomu, baita uramu mai edia kohu tadikakadia mo baita hebamo henidia, a ogoḡami tadikakadia basita ura henidiamu. Dahaka dainai mai edia kohu eiava asi edia kohu taudia baita hahemaoro henidia na mai ena dika? Badina unu baita kara tomamu neganai, kongrigeisin baita hapararaia dibamu. Hahediba tauna Iakobo ese e hahedinaraia aposetolo edia negai una hekwakwanai ese kongrigeisin haida e hapararadia. (Iak. 2:​1-4) Hari ina negai namona na baita henahua toho, una lalohadai ese eda kongrigeisin basine hapararaia totona. w18.08 10 par. 8-​10

Tadikakada baita kara henidia dalana amo baita hahedinaraia, eda hetura karana namona Iehova ida na ta laloa badamu. Idia danu Iehova ena. Bema una baita laloataomu, hanaihanai tadikaka taihu baita bogadia hisimu bona baita lalokau henidiamu. (1 Tes. 5:15) Iesu ese ena hahediba e hamaorodia: “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Malaki na eto, Iehova ese ena taunimanima na “e hakala henidia, bona edia hereva e kamonai.” (Mal. 3:16) Momokani, Iehova na “ena taunimanima iboudiai vada dibana.” (2 Tim. 2:19) Ta karamu ḡaudia bona ta herevalaimu ḡaudia iboudiai na mai dibana. (Heb. 4:13) Tadikakada asita kara namo henidiamu neganai, Iehova ese una na e itaiamu. Danu heabidae karadia, hariharibada, dika igwautaona, bona kara namodia ta hahedinaraimu neganai, Iehova ese unu na e itamu.​—Heb. 13:16. w18.07 26 par. 15, 17

Iehova baita badinaia na aonega karana. Ta na dia eda Dirava heḡereḡerena mai ena siahu bada, aonega, bona lalokau! Momokani, ita na baita uramu Dirava ena kaha ai baita gini. (Sal. 96:​4-6) To, Dirava e tomadiho heniava taudia haida na ediai ḡau haida e vara neganai, Iehova ena kaha ai na asie gini. Kain enai e vara ḡauna aita laloa. Ia na dirava idaudia se tomadiho henidiava to Iehova sibona mo. To, Kain ena tomadiho dalana na Dirava ese se abia dae. Badina kara dika urana na ia kudouna ai e tubuva. (1 Ioa. 3:12) Iehova ese Kain e durua bona e hamaoroa: “Boma kara namo, basinama abimu dae a? Basioma kara namo, kara havara be iduara badinai e narimumu; e ura henimumu, to oi ese ba hadarerea.” (Gen. 4:​6, 7) Vaitani Iehova na Kain e hamaoroa, ‘Bema ba helalo-kerehai bona egu kaha ai ba gini, lau danu, emu kaha ai baina gini.’ To Kain ese ena sisiba na se kamonai. w18.07 rau 17 par. 1, 3; 18 par. 4

Eda diari baita hahedinaraia dalana ta na, sivarai namona baita harorolaia bona hahediba ḡaukarana baita karaia. (Mat. 28:​19, 20) Danu, eda Kristen kara namodia amo Iehova baita hanamoa diba. Ruma taudia bona raka hanai taudia ese eda kara na e itamu. Baita kiri henidiamu bona hahenamo herevadia baita gwauraimu neganai, be dibamu ita be daidia bona edena Dirava ta tomadiho heniamu. Iesu ese ena hahediba e hamaorodia: “Ruma na ba raka vareai negana ai na ba hanamoa.” (Mat. 10:12) Iesu bona ena aposetolo taudia e haroro momova gabudia ai, taunimanima ese idau taudia na edia ruma ai e abidia daeva. Hari ina negai, gabu momo ai unu na asie kara tomamu. To, kara namodia bo hahedinaraimu bona ola badina bo herevalaiamu neganai, ruma tauna na basine lalohekwarahimu eiava basine daradaramu. Nega momo herevahereva ihamatamana dalana namona na kiri toana ba hahedinaraia. Tadikaka bona taihu ese pablik haroro ai pablikeisen e hahedinaraimu troli eiava teibolo e ḡaukaralaiamu neganai, unu e kara tomamu. Bo davariamu nega momo taunimanima na emu kiri toana bona hahenamo herevana ese lalodia be verimu. w18.06 22 par. 4-5

Aposetolo Petro na nega momo Iuda taudia mo e bamodiava. To gabeai Dirava ese e hahedinaraia Kristen taudia ese taunimanima oromadia na basie lalo, una dainai Petro ese Korenelio, Roma edia tuari tauna ta, e haroro henia. (Apos. 10:​28, 35) Una murinai, Petro na Idau Bese taudia ida e aniani hebouva bona e bamodiava. To, laḡani haida muridiai, Antioka hanuana ai Petro na Idau Bese taudia ida se aniani hebouva. (Gal. 2:​11-​14) Una dainai, Paulo ese Petro e sisiba henia, bona Petro ese una sisiba na e abia dae. Petro ese Asia Minor ai Iuda bona Idau Bese Kristen taudia ediai ena revareva ginigunana e torea neganai, tadikaka ilalokau henidia karana e herevalaia. (1 Pet. 1:1; 2:​17) E hahedinaraia ḡoevaḡoevamu, aposetolo taudia na Iesu ena haheitalai amo “taunimanima iboudiai” ilalokau henidia karana e dibaia. (Ioa. 12:32; 1 Tim. 4:​10) Ena be nega daudau lalonai e hekwarahi, to edia lalohadai dalana na e haidaua. Unu Kristen ginigunadia na “tau matamatana” e hahedokilaia dainai, e diba Dirava matanai taunimanima iboudiai na heheḡereḡere.​—Kol. 3:​10, 11. w18.06 11 par. 15-​16

Aposetolo edia nega ai, Roma tuari tauna ese kemena ai e atoava dabuana na auri amo e karaia. Una dabua na baine sekea loulou unu amo baine diba unu auri be heheato namonamo eiava. Una dala amo ia kemena bona tauanina regedia ma haida baine gimadia diba. Una na Iehova ena kara maoromaoro taravatudia e laulaulaidiamu, unu taravatu ese kudouda bae gimaia diba. (Her. 4:​23) Dia namo tuari tauna kemena dabuana gabunai auri manokana amo e karaia dabuana baine atoa, una heḡereḡerena asita uramu Iehova ena taravatu gabudiai siboda eda lalohadai baita badina. Ita na dia heḡereḡere siboda baita hegima totona. (Her. 3:​5, 6) Una dainai, kudouda igimana totona namona na hanaihanai baita heseke bema Iehova ese e henida auri dabuana be heato namonamo eiava lasi. Dirava ena hereva momokanidia baita ura henidiamu neganai, ‘kemeda’ dabuana baita hahedokilaia namonamomu, anina na, Dirava ena kara maoromaoro taravatudia baita badinamu.​—Sal. 111:​7, 8; 1 Ioa. 5:3. w18.05 28 par. 3-4, 6-7

Ena be Israel taudia na Mose ese laḡani momo lalodiai mai manauna ida e hakaudia, to idia na ranu lasi dainai e maumau, dia una mo, Mose danu e maumauraia, e gwauva iena kerere dainai idia na asi edia inuinu ranudia. (Num. 20:​1-5, 9-11) Mose na e badu dikadika dainai se manau. Ena be Iehova ese e hamaoroa nadi baine hereva henia, to Mose na mai baduna ida taunimanima e gwau henidia bona e gwa ia sibona ese hoa karana ta baine karaia. Bena nega rua nadi e kwadia bona ranu e aru lasi. E hekokoroku bona e badu dainai, kerere badana ta e karaia. (Sal. 106:​32, 33) Mose na una nega sisina lalonai se manau dainai, Dirava ese e hamaoroa ia na Gwauhamata Tanona ai basine vareai. (Num. 20:12) Una sivarai amo mai anidia bada ḡaudia haida ta dibamu. Ḡau ginigunana na, hanaihanai baita hekwarahi baita lalomanau. Bema unu basita kara tomamu, baita hekokorokumu bena hereva kereredia baita gwauraimu bona kara kereredia baita karamu. Ḡau iharuana be, ta lalometaumu neganai baita lalomanaumu na auka, una dainai namona na baita hekwarahi baita manau, hekwakwanai negadiai danu. w19.02 12-​13 par. 19-​21

Iesu ese e gwauraia haroro ḡaukara haheḡanina ibadinana karana be maduna metauna, a? Lasi. Iesu ese vine parabolena anina e herevalaia murinai, eto ita na Basileia iharorolaina taudia dainai, baita moalemu. (Ioa. 15:11) Ia ese e hadibada ia e abia moalena na ita ese danu baita abia. Edena dala ai? Iesu na eto, ia na vine bona ena hahediba be rigi. (Ioa. 15:5) Vine ese rigi e dogodia taomu. Rigi na una vine gabana baine badinaia neganai, vine gabana amo e dihomu ranuna baine abia diba bena baine tubu namonamo. Una heḡereḡerena, Keriso baita badinaia totona, aena gabudia ai baita rakamu neganai, ia ese Tamana ena ura ikarana ai e abia moalena na baita abia dibamu. (Ioa. 4:34; 17:13; 1 Pet. 2:21) Hanne, laḡani 40 mai kahana e painia taihuna ta, na eto: “Haroro ḡaukara na karaiamu murinai na mamiamu moalena ese e hagoadagumu Iehova baina hesiai henia hanaihanai.” Momokani, baita moalemu neganai, una ese be hagoadadamu haroro ḡaukara baita karaia hanaihanai, ena be taunimanima bae kamonai eiava lasi.​—Mat. 5:​10-12. w18.05 17 par. 2; 20 par. 14

Kristen ginigunadia edia negai, aposetolo taudia padadiai tadikaka e hagoadadia momova tauna na aposetolo Paulo. Ia na lauma helaḡa ese e siaia dirava momo e tomadiho henidiava Greek bona Roma taudia baine haroro henidia. (Gal. 2:​7-9) Paulo na ela hari ina negai e gwauraiamu Turkey hanuana, bona Greece bona Italy ai, idau bese taudia bogaraḡidiai Kristen kongrigeisin e haginidia. Unu Kristen taudia matamatadia na edia ‘bese taudia ese vada e hahisidia’ bona tauhalo bae abi na namo. (1 Tes. 2:14) Laḡani 50 C.E. heḡereḡerena ai, Paulo ese Tesalonika kongrigeisin matamatana e tore henia, eto: “Ai na nega iboudiai Dirava a hanamoamu umui daimui ai, bona emai ḡuri­ḡuri ai umui ladamui a hato louloumu. Emui kamonai karadia, bona emui ura heni ḡaukaradia, bona emui helaro . . . a lalo taomu.” (1 Tes. 1:​2, 3) Danu, e haḡanidia ta ta bae hahegoada heheni, eto: “Ba hahealo heheni, ba hahegoada heheni.”​—1 Tes. 5:11. w18.04 18-19 par. 16-17

Iehova ihamoalena karadia e lalo badamu matamata tauna na e uramu haroro ḡaukara baine karaia. Haroro ḡaukara na mai anina bada dainai, eda mauri ai baita laloa bada na namo. Palani ba kara diba ba haroro hanaihanai totona, a? Ba painia diba, a? To bema haroro ḡaukara so moalelaiamu be ede bamona? Bona edena dala ai ma haida ba haroro henidia namonamo diba? Bae durumu diba ḡaudia rua bini: Ba heḡaeḡae namonamo, bona basio hesiku to o diba ḡaudia na ma haida ba hadibadia. Unu amo haroro ḡaukara bo moalelaiamu. Sikuli ai turamu ese nega momo e henimu henanadaina ena haere ba heḡaeḡaelaia, heḡereḡere, “Dahaka dainai o abia daemu Dirava na e nohomu?” Eda jw.org websait ai atikol momo ese matamata taudia baine durudia una henanadai ena haere bae diba totona. Unuseni ai worksheet ta bo davariamu sinadona na “Why Do I Believe in God?” Una worksheet ese be durumumu emu haere ba heḡaeḡaelaia totona. w18.04 27 par. 10-11

Ena be matamanai Adam bona Heva na dala momo ai edia ura kwalimu e moalelaiava, to idia ese taravatu haida danu e badinava. Unu taravatu haida na Dirava ese idia e karadia neganai, lalodia ai e ato. Heḡereḡere, Adam bona Heva na mai dibadia bae mauri totona bae hahodi, bae aniani, bae mahuta, bona ma ḡau haida bae kara diba. Unu e karava neganai edia ura kwalimu e haboioa, a? Lasi, badina Iehova na mai dibana unu ḡau idauidau bae kara neganai, idia na dounu bae moale diba. (Sal. 104:​14, 15; Koh. 3:​12, 13) Iehova ese Adam bona Heva e haḡanidia tanobada bae hahonua bona bae biagua. Una haheḡani ese edia ura kwalimu e koua, a? Lasi! Una haheḡani ese dala e kehoa Ihavaradia Tauna ena ura bae karaia​—tanobada ibounai na paradaiso ai bae halaoa bona taunimanima ḡoevadaedia ese bae noholaia. (Sal. 127:3; Isa. 45:18) Adam bona Heva ese bema moalelai hanaihanai ḡaudia haida na edia headava bona edia ruma bese. w18.04 4-5 par. 7-8

Bema mai haheaukada ida taunimanima baita haroro henidiamu, basitato nega ginigunana e kamonaimu hereva momokanidia na be lalopararalaimu eiava be abi dae haraḡamu. Heḡereḡere, reana ta baita durua tanobada paradaisona ai baita abia mauri hanaihanai helarona baine lalopararalaia. Momo edia lalohadai na, ta e masemu neganai ia na ma basine mauri loumu, eiava e laloamu kara namo taudia iboudiai guba baela. Tadikaka ta ese taunimanima e durudiamu dalana namona ta mani aita laloa. Ia na Genese 1:28 e duahia gunamu. Bena, ruma tauna e nanadaiamu, ‘Dirava ese taunimanima ginigunadia be edeseniai e atodia bona mauri ede bamona e moalelaia?’ Momo na e gwaumu, “Tanobada ai, bona mauri namona bae moalelaia.” Bena, tadikaka na ma Isaia 55:11 e duahiamu, bena e henanadaimu, ‘Dirava ena ura be ma e haidaua eiava?’ Nega momo, ruma tauna na e gwaumu, lasi. Dokonai, tadikaka ese Salamo 37:​10, 11 e duahiamu bena e henanadaimu, ‘Vaira negana ai dahaka be varamu?’ Baibul na una dala ai e ḡaukaralaia namonamomu dainai, momo vada e durudia bae laloparara Dirava ena ura na taunimanima namodia na tanobada Paradaisona ai bae mauri hanaihanai. w19.03 24 par. 14-​15; 25 par. 19

Iehova ese e hahedinaraia, ia na e uramu Natuna ena hereva baita kamonai bona baita badina. Iesu ese ia murinai e raka taudia e hadibadia sivarai namona be ede bae harorolaia toma, bona bae gima herevana na e gwauraia loulou. (Mat. 24:42; 28:​19, 20) Danu e haḡanidia bae ḡaukara goada bona basie hesiku. (Luka 13:24) Iesu ese e hagoadadia bae helalokau heheni, lalotamona ai bae noho, bona iena haheḡani bae badina. (Ioa. 15:​10, 12, 13) Hari ina negai unu sisiba na dounu mai anidia bada. Iesu eto: “Hereva momokani ibadinana taudia iboudiai ese lau eregu e kamonaimu.” (Ioa. 18:37) Iesu erena baita kamonai dalana ta na baita ‘haheauka heheni’ bona ‘dika baita hegwau tao heheni.’ (Kol. 3:13; Luka 17:​3, 4) Erena ta kamonaimu dalana ma ta na, “nega namodia ai bona nega dikadia ai” sivarai namona na mai eda ura ida baita harorolaia.​—2 Tim. 4:2. w19.03 10 par. 9-​10