April

Ita be Dirava ena lalohadai ta badinaiamu eiava tanobada ena? Momokani, ita na Dirava ena taravatu heḡereḡerena ai eda kara ta haidau. To eda lalohadai be ede bamona? Iehova ena lalohadai heḡereḡerena, eiava? Lalohadai maorona baita abia totona, baita hekwarahi na namo. To, ta ese ina tanobada ena lalohadai baine abia na dia auka. Badina ina tanobada ena lalohadai ese taunimanima e veridiamu. (Efe. 2:2) Danu, taunimanima na nega momo sibodia edia namo e lalomu dainai, reana baita uramu una lalohadai baita abia dae. Oibe, tanobada ena lalohadai iabina na haraḡa, a Iehova ena lalohadai iabina be mai hekwarahina. To, bema tanobada ese eda lalohadai baine biagua, siboda eda namo mo baita lalomu, bona baita laloamu ita na mai eda maoro dahaka be maoro bona dahaka be kerere baita abi hidi. (Mar. 7:​21, 22) Una dainai, ḡau badana na Dirava ena lalohadai baita abia, dia taunimanima edia. w18.11 18 par. 1; 19 par. 3-4

Iehova ese nega idaudia toi ai guba amo Iesu e hereva henia eto ia na e lalokau henia neganai, una ese Iesu na e hagoadaia. Iesu na Ioridane Sinavaina ai e bapatiso murinai, Iehova ese ataiai e hetore herevana e gwauraia. Ioane Bapatiso sibona na ia ida bona unu hereva e kamonai. Gabeai, laḡani ta do vairai bena Iesu baine mase neganai, aposetolo tatoi na Iehova ese Iesu e herevalaia neganai e kamonai, eto: “Natugu binai, egu lalokau; lau ia na lalo namo heniamu: ia erena ba kamonai.” (Mat. 17:5) Dokonai, Iesu ena mase dinana e kahikahiva ai, Iehova ese guba amo Natuna ma e hereva henia. (Ioa. 12:28) Ena be Iesu na mai dibana bae hahemaraia, bae hamasea, bona bae gwauraia Dirava ladana ihadikana tauna, to ena ḡuriḡuri ai eto Iehova ena ura baine vara, dia ia ena. (Mat. 26:​39, 42) Iesu ese “satauro e haheaukalaia” hemaraina na se laloa, to e ura Tamana sibona ese baine laloatao bona baine hanamoa, dia ina tanobada.​—Heb. 12:2. w18.07 10-​11 par. 15-​16

Iesu ese Memorial hebouna e hamatamaia murinai, e vara gaudia ese e hahedinaraia ia na se gari. Edena dala ai? Iesu na Tamana ena ura e abia dae, ena be dibana unu baine kara toma neganai bae hamasea badina e gwauraiava ia na Dirava ladana ihadikana tauna. (Mat. 26:​65, 66) Iesu na hanaihanai Dirava e badinaiava, unu amo Iehova ladana e hahelaḡaia, iena lohia siahuna e abia isi, bona dala e kehoa helalo-kerehai taudia ese mauri hanaihanai bae abia. Danu, Iesu na ena hahediba taudia e haheḡaeḡaedia gabeai bae davari hahetohodia bae haheaukalaidia totona. Iesu se gari dalana ma ta na, ena lalohekwarahi ḡaudia na se lalodia momo to ena aposetolo taudia edia dabu ḡaudia hari e lalo. Iuda e siaia oho murinai, Iesu ese Memorial hebouna e hamatamaia, una hebou ese baine horodia taudia baine hadibadia Iesu rarana bona kontraka matamatana amo namo bae davaria.​—1 Kor. 10:​16, 17. w19.01 22 par. 7-8

Iesu na Tamana ese guba amo e hereva henia, eto: “Vada name heatolaia; ma baina heatolaia.” Iesu lalona na e hekwarahiva badina ia na e urava Iehova baine badinaia namonamo. Iesu na dibana ia na do bae dadabaia bona bae hamasea. (Mat. 26:38) Ena be unu na bae vara, to ia ese e laloa bada ḡauna na, Tamana ladana baine heatolaia. Haida na e gwauva Iesu na Dirava ladana e hadikaia tauna, una dainai ia na se ura ena mase ese Dirava ladana baine hadikaia. Iesu heḡereḡerena, ita danu asita uramu haida ese Iehova ladana bae hadikaia. Reana Iesu enai e vara heḡereḡerena, ita na haida ese se kara namo henidamu. Eiava inaida ese sivarai koikoidia e halasimu dainai ta lalohisihisimu. Unu sivarai koikoidia ese Iehova ladana e hadikaiamu. Nega unu bamodia ai, Iehova ena hereva ese laloda e hagoadamu. Iehova ese ladana na baine heatolaia ela bona hanaihanai.​—Sal. 94:​22, 23; Isa. 65:17. w19.03 11-​12 par. 14-​16

Hahediba na e kamonai herevadia daidiai e hoa. Badina e laloava Iesu ese Israel ena Basileia baine haginia lou, to ia na eto hisihisi baine davari bona baine mase. Aposetolo Petro ese Iesu e hamaoroa: “Lohiabada e, dia unuheto; unu basie karamu toma.” To Iesu ese e gwau henia, eto: “Satana e, murigu kahana aola: o hahekwakwanaigumu; badina be emu lalohadai na dia Dirava ena, to taunimanima edia.” (Mat. 16:​22, 23; Apos. 1:6) Iesu ena hereva amo e hahedinaraia, Dirava ena lalohadai na idau Satana ese e biaguamu tanobadana ena lalohadai amo. (1 Ioa. 5:19) Petro na ina tanobada ena lalohadai​—ta sibona ena namo e laloa badamu karana​—e hahedinaraia. To Iesu na mai dibana Tamana ena lalohadai na dia unuheto. Iesu ese Petro e haere henia karana amo e hahedinaraia ḡoevaḡoeva, ia ese Iehova ena lalohadai e abia dae a tanobada ena be e dadaraia. w18.11 18 par. 1-2

Mani a laloa, tanobada heḡeḡemadai Lohiabada ena Anibou hebouna ai hutuma e hegogomu neganai, Iehova ese idia be ede e lalodia tomamu? Ia na una hebou e laomu taudia iboudiai e itadiamu bona ta ta e lalodiamu. Heḡereḡere, e itaiamu, haida na laḡani ta ta una hebou na se reaiamu. Idia bogaraḡidiai reana haida na daḡedaḡe bada e davarimu to dounu e maimu. Haida be pura ta ta heboudia asie maimu, to Memorial hebouna be e maimu badina e dibamu una hebou na mai anina bada. Danu, haida be reana edia nega ginigunana Memorial e maimu, badina e uramu ina hebou ai e varamu ḡaudia bae diba. Oibe, Iehova na e moalemu badina hutuma na Memorial e maimu. (Luka 22:19) To, ia ese e laloa badamu ḡauna na, idia e maimu badina. Ita be ta ura dikadikamu Iehova bona ia ese e ḡaukaralaiamu oreana ese baine hadibada?​—Isa. 30:20; Ioa. 6:45. w19.01 26 par. 1-3

Iesu na mai ena ura ida ena hahediba taudia daidiai e mase, dia una mo, to danu ena mauri lalonai idia edia namo e laloa bada. Heḡereḡere, ena be tauanina e hesiku bona lalona e hekwarahi bada hereava, to nega e ato ena hahediba taudia baine hagoadadia. (Luka 22:​39-46) Bona ma haida baine durudia dalana e laloa bada, dia ia bae durua dalana e laloa. (Mat. 20:28) Ita na Kristen tadikaka oreana lalonai ta nohomu, bona mai moaleda ida haida ta boiridiamu ita bae bamoda. To, ta uramu eda “ekalesia taudia,” e manoka taudia, baita durudia. (Gal. 6:10) Idia ediai eda lalokau baita hahedinaraia totona, baita hagoadadia eda hebou iboudiai, Memorial hebouna danu, baema. Iehova bona Iesu heḡereḡeredia, ta moale dikadikamu bema manoka tauna ta na Iehova e lou heniamu.​—Mat. 18:14. w19.01 29 par. 12, 14; 30 par. 15-​16

Iesu na ena mase Ilalotaona hebouna e hamatamaia neganai, ia ese Lagau-hanai ariana ai e ḡaukaralai paraona bona wain mo e ḡaukaralai. Iesu ese ena aposetolo e hamaorodia unu ḡau ruaosi na ia tauanina bona rarana ḡoevadaedia e laulaulaidia, idia daidiai do baine bouboulai. Una hebou matamatana ai Iesu ese ḡau momo se ḡaukaralai neganai aposetolo taudia na se daradara. Dahaka dainai? Hua haida gunadiai, ia na turana namodia Lasaro, Mareta, bona Maria e vadivadidia. Edia ruma ai, Iesu ese e hadibadia matama. Mareta danu noho, to ia na Iesu dainai aniani bada herea e heḡaeḡaelaiva. Iesu ese una e itaia neganai, Mareta e sisiba henia, e durua unu amo baine laloparara aniani momo baine heḡaeḡaelai na dia ḡau badana. (Luka 10:​40-42) Gabeai, Iesu na ena mase negana e kahikahiva neganai, e gwauraia sisibana na ia sibona ese e badinaia danu. Memorial hebouna ai ḡau momo se ḡaukaralai. w19.01 20-​21 par. 3-4

Iehova ese Iesu na e hanamoa bona una na dia Iesu ese e laloa dalana ai. Dirava ese e hatorea isi lou bena guba ai “lada” o dagi hereadaena ta e henia, bona basine mase diba maurina danu​—una mauri na ta ese nega ta do se abia. (Fili. 2:9; 1 Tim. 6:16) Oibe, Iesu ena abidadama karana dainai una hahenamo hereadaena e abia! Dahaka ese baine duruda ina tanobada ese baine abida dae lalohadaina baita dadaraia? Baita helalotao, Iehova na hanaihanai ena abidadama hesiai taudia na e lalodiataomu, bona nega momo asie laloamu dalanai e hanamodiamu. Asi dibada vaira negana ai dahaka hahenamo ma haida baita abimu. To hari, ina tanobada dikana ai hekwakwanai bona hahetoho ta haheaukalaimu lalonai, namona na baita helalotao ina tanobada na baine lao bubuni. (1 Ioa. 2:17) Tamada lalokauna, Iehova, “na asi ena kara gageva-gageva” ia ese ‘eda ḡaukara bona eda lalokau ia ladana dainai vada ta hahedinarai’ na basine lalodia boio.​—Heb. 6:10. w18.07 11 par. 17-​18

Iesu na ena aposetolo ida edia aniani hebou ginigabena ai, ia ese lalotamona karana na e laloa bada. Idia ida e ḡuriḡuri neganai, ena ura ḡauna e herevalaia, una na ena hahediba iboudiai bae tamona, ia bona Tamana e tamona heḡereḡerena. Edia lalotamona karana ese baine hahedinaraia, Iehova ese Iesu na e siaia tanobada ai Dirava ena ura baine karaia totona. Lalokau na Iesu ena hahediba korikoridia edia kara badana ta, una kara ese edia lalotamona karana baine habadaia. (Ioa. 13:​34, 35) Ta dibamu dahaka dainai Iesu ese lalotamona karana e herevalaia momo. Ena aposetolo ida aniani hebou ginigabena e karaia neganai e itaia idia na asie lalotamonava. Guna e vara heḡereḡerena, idia na sibodia e hepapahuahu heheni “daika vada e herea.” (Luka 22:​24-​27; Mar. 9:​33, 34) Nega ma ta ai, Iakobo bona Ioane na Iesu e noia ena Basileia baine abia neganai ia badinai bae helai.​—Mar. 10:​35-​40. w18.06 8 par. 1-2

Iehova na e uramu headava taudia na bae helalokau heheni, unu amo edia lalokau na baine mia hanaihanai. (Mat. 19:​3-6) Heudahanai na kara dika rohorohona. Una dainai, Taravatu 10 lalonai taravatu namba 7 ese heudahanai karana na e taravatua. (Deu. 5:18) “Dirava vairanai” heudahanai na kara dikana bona ta adavana ihadikana karana. (Gen. 39:​7-9) E heudahanai tauna adavana na laḡani momo lalodiai be lalohisihisimu. Iehova ese danu natu edia namo na e lalodia badamu. Iehova ese tama sina e haḡanidia natudia na dia tauani dalanai mo bae naridia to lauma dalanai danu bae durudia. Tama sina na dala idauidau ai natudia bae durudia Iehova ena Taravatu bae lalodia bada bona Ia bae lalokau henia. (Deu. 6:​6-9; 7:13) Tama sina ese natudia na basie dadaraidia eiava basie kara auka henidia. To idia na Iehova ena harihari ḡaudia dainai bae lalodia bada.​—Sal. 127:3. w19.02 21 par. 5, 7

Iobu na Dirava ese baine henia davana namona e laloa. Ia na e abia dae Dirava ese ena lalo-maoromaoro karana na e laloa badava. Ena be hahetoho idauidau e davari, to e diba momokani Dirava ese dokonai be hanamoamu. Una ese e durua Dirava baine badinaia. Iehova na Iobu enai e moale dainai e hanamoa ena be Iobu na dia ḡoevadae. (Iobu 42:​12-17; Iak. 5:11) Nega vairai danu hahenamo momo be abimu. Eda Dirava na se idaumu. (Mal. 3:6) Bema baita helalotaomu Dirava ese ia ta badinaiamu karana na e laloa badamu, kudouda ai eda vaira nega helarona na baita laloa badamu. (1 Tes. 5:​8, 9) Nega haida, reana bo mamiamu turamu eiava ma haida ese Dirava na asie badinaiamu, to basio lalomanoka. Tanobada heḡeḡemadai Dirava e badinaiamu taudia na momo. Danu, oi na Dirava e badinaiava abidadama tataudia bona hahinedia bogaraḡidiai​—ena be dibadia bae hamasedia.​—Heb. 11:​36-38; 12:1. w19.02 7 par. 15-​16

Memorial murinai, siboda ini henanadai baita lalo: ‘Edena dala ai Iesu ena lalokau baina tohotohoa? Lau be tadikaka taihu edia namo na lalomu eiava sibogu egu namo na lalomu? Lau be na uramu tadikaka bona taihu ese ḡaukara iboudiai bae kara, eiava edia goada hetoana na laloamu?’ Namona na Iesu baita tohotohoa bona baita “hekaha heheni.” Keriso ena mase ilalotaona hebouna na basita karaia hanaihanaimu. Hisihisi badana negana ai Iesu “bainema” neganai, “e abidia hidi taudia” na guba ai baine haboudia, una nega amo Memorial na ma basita karaia loumu. (1 Kor. 11:26; Mat. 24:31) Ena be nega ta Memorial hebouna na basita karaiamu, to baita laloataomu ḡauna na, una hebou amo ta diba Iesu na manau tauna, se gari, bona lalokau bada e hahedinaraia. w19.01 25 par. 17-​19

Tauanida baita naria namonamomu neganai, kudouda danu baita naria namonamomu. Tauanida baine goada totona ḡau ginigunana na, aniani namodia baita ani bona baita eksasais hanaihanai na namo. Una heḡereḡerena, kudouda baine namo totona, hanaihanai Baibul bona Baibul e herevalaiamu pablikeisen baita duahi na namo, bona baita hahedinaraia ita na Iehova ta abidadama heniamu. Eda abidadama baita hahedinaraia dalana ta na, ta dibamu ḡaudia baita badina bona haida ediai baita herevalai. (Roma 10:​8-10; Iak. 2:26) Ḡau iharuana na, reana baita lalomu tauanida toana na namo to tauani lalonai e miamu gorerena na asi dibada. Una heḡereḡerena, reana tiokratik ḡaukara idauidau ta karamu dainai baita lalomu eda abidadama na goada, to ura dikadia na laloda ai bae vara diba. (1 Kor. 10:12; Iak. 1:​14, 15) Baita helalotao Satana na e uramu ena lalohadai baita badinaia. w19.01 15-​16 par. 6-7

Reana siboda baita henanadai: ‘Lau be unu na kara tomamu, a? Lau be Samaria tauna heḡereḡerena ma haida na bogadia hisimu, a?’ (Luka 10:​30-​35) ‘Eiava hisihisi e davarimu taudia na bogadia hisimu bona idurudia totona kara haida na karamu, a? Heḡereḡere, lau ese tadikaka taihu burukadia, vabu bona ihareha, tamadia o sinadia dia Witnes taudia, na durudiamu, a? Lau ese “manoka taudia” na hagoadadiamu, a?’ (1 Tes. 5:14; Iak. 1:27) Ma haida baita bogadia hisimu neganai, ḡau ihenina ena moale baita mamiamu. Danu, ta dibamu una ese Iehova e hamoaleamu. (Apos. 20:35; Heb. 13:16) Hebogahisi karana e hahedinaraiamu tauna na King David ese ini e herevalaia toma: “Iehova ese e gimaiamu bona e hamauriamu; tano ai namo e gwauraiamu.” (Sal. 41:​1, 2) Ma haida baita bogadia hisimu neganai, Iehova ese ita danu be bogada hisimu bona baita moale hanaihanaimu.​—Iak. 2:13. w18.09 19 par. 11-​12

Abidadama taihuna ta ladana Yoshiko na sivarai dikana ta e kamonai. Ena dokta ese e hamaoroa ia na basine noho daudaumu. Ia be dahaka e kara? Yoshiko na ena feiva sirina ta, hari dina ena siri, e laloa, bena dokta e hamaoroa, Iehova ese imana e dogoataomu dainai ia na se garimu. Una siri ena hereva ese eda taihu na e durua mai kudouna idoinai ida Iehova baine abidadama henia. Una siri tamona ese ita danu baine duruda hahetoho idauidau lalodiai basita gari. Matamanai, Iehova na Isaia e hamaoroa unu hereva baine tore, unu amo Iuda taudia na gabeai Babulono bae laohaidia neganai unu hereva ese bae hagoadadia. Iehova ese unu hereva na dia iḡui ai e nohova Iuda taudia daidiai mo e tore, to una nega amo ema bona hari ena taunimanima iboudiai idurudia totona e tore. (Isa. 40:8; Roma 15:4) Hari, ita na “nega dikadia” ai ta nohomu dainai, Isaia bukana ena hahegoada herevana na mai anina bada ita edai.​—2 Tim. 3:1. w19.01 2 par. 1-2

Ena be e noho pararamu, to idia na dounu headava, bona herevana bae parara, to hekwakwanai na dounu be davarimu. Aposetolo Paulo ese tau bona hahine bae noho hebou badina na e gwauraia: “Ekalesia hahinena ese adavana murimuri tauna na e hahelaḡaiamu; bona ekalesia tauna ese adavana murimuri hahinena na e hahelaḡaiamu. Bema lasi, natumui basiema helaḡa; ḡau tamona, idia na harihari hehelaḡa.” (1 Kor. 7:14) Kristen taudia momo na mai haheaukadia ida adavadia, dia Witnes taudia, doini e badinadiamu, ena be hekwakwanai badadia e varamu. Unu e kara tomamu dainai e moalemu badina adavadia na gabeai Witnes taudia ai e laomu. (1 Kor. 7:16; 1 Pet. 3:​1, 2) Hari tanobada heḡeḡemadai, Kristen kongrigeisin lalonai edia headava e moalelaimu taudia na momo herea. Emu kongrigeisin ai unu headava taudia momo bo davaridiamu. Tadikaka ese adavadia e lalokau henidiamu bona taihu ese danu adavadia na e lalokau henidiamu, unu amo e hahedinaraiamu headava na e matauraiamu.​—Heb. 13:4. w18.12 14 par. 18-​19

Eden anina na ‘Moale,’ bona una imea na mai hairaina. Aniani na momo herea, gabu na mai hairaina, bona taunimanima bona animal na maino ai e nohova. (Gen. 1:​29-31) Grik herevana pa·raʹdei·sos, Heberu gado ai e hahanaia herevana na “imea.” M’Clintock bona Strong edia buka ta (Cyclopaedia) na e gwa, Greek loaloa tauna ta ese ina hereva pa·raʹdei·sos e kamonaiamu neganai, ia na ini ḡau e lalomu: taunimanima e laḡa-animu gabuna mai hairaina, hahedika eiava hahegari ḡauna ta na lasi, sinavai badidiai e varamu audia na mai hairaidia, bona unu au momo na mai huahuadia, bona sinavai isenai dia bona mamoe seridia e loaloamu. (Genese 2:​15, 16 ba itaia) Dirava ese Adam bona Heva na paradaiso unu bamona ta ai e atodia, to idia ese Dirava e gwau-edeede henia dainai, natudia ida Paradaiso ai asie noho. (Gen. 3:​23, 24) Ena be paradaiso ai ta se nohova, to toana na una imea na e mia ela bona Noa ena negai e vara Abatana ese e hadikaia. w18.12 3-4 par. 3-5

Tama sina na e hekwarahimu natudia na kara namodia bae hadibadia. Bema natu na tamadia sinadia edia amo e diba ḡaudia bae badina, abi hidi maorodia bae kara diba. Unu amo hekwakwanai eiava lalohisihisi bae havara ḡaudia bae hanaidia diba. Iehova na tama namona ta na heto, e uramu natuna na bae moale. (Isa. 48:​18) Una dainai, kara maorodia bona haida ikara namo henidia daladia ai hahekau herevadia e henimu. Ḡau unu bamodia ai Iehova na ita e noidamu ena lalohadai bona ena ura baita badinaia. Una ese ita na se biaguda aukamu, to aonega e henidamu bona e durudamu abi hidi maorodia baita kara. (Sal. 92:5; Her. 2:​1-5; Isa. 55:9) Danu, ta karamu abi hididia daidiai baita moalemu bona huahua namodia baita havara diba. (Sal. 1:​2, 3) Oibe, Iehova ena lalohadai baita abia na mai ena namo! w18.11 19-​20 par. 7-8

Hereva momokani dalanai baita raka totona, haida edia hedori karadia baita dadarai. Hereva momokani ta dibaia neganai, bamoda bona eda ruma bese​—dia Witnes taudia​—ibamodia karana na e idau. Haida ese na se kouda, a haida ese be e daḡedaḡe henida. Nega haida ruma bese taudia, ta ḡaukara heboumu taudia, bona ta sikuli heboumu taudia ese be doridamu edia moale karadia ai baita vareai. Bema idia ese e doridamu Iehova se hamoaleamu kastom karadia bona dina helaḡadia ai baita vareai, edena dala ai baita dadaraidia? Namona na Iehova ese unu kara se moalelaimu badidia baita lalopararalai. Eda pablikeisen ai e halasi herevadia baita tahu unu amo dina helaḡadia e hematama badidia baita diba namonamo. Baibul ena sisiba heḡereḡerena ai unu dina helaḡadia ai e karamu karadia ta dadaraimu neganai, “Lohiabada” ta hamoaleamu. (Efe. 5:10) Iehova bona ena Hereva baita abidadama henidiamu neganai, taunimanima na basita gari henidiamu.​—Her. 29:25. w18.11 11 par. 10, 12

Mauri ai ḡau haida e idau haraḡamu neganai, reana ḡau momo ta lalohekwarahilaimu. Iosef enai una na bema vara diba. To, ia na ḡau haida e kara bena Iehova ese e hanamoa. Ena be ia na dibura ruma ai, to dibura rumana igimana tauna ese e heniava ḡaukaradia iboudiai e haḡuḡuruva, Potifara enai e ḡaukarava heḡereḡerena. (Gen. 39:​21, 22) Iosef heḡereḡerena, eda mauri ai e varamu ḡaudia na basita haidau dibamu. To, bema baita haheaukamu bona baita ḡaukara goadamu, Iehova ese be hanamodamu. (Sal. 37:5) Momokani, ena be nega haida baita ‘daradaramu,’ to aposetolo Paulo ena hereva heḡereḡerena, ‘darada na basine dokomu.’ (2 Kor. 4:8) Paulo ena hereva na edai baine ḡuḡuru diba, bema hanaihanai eda hesiai ḡaukara baita laloa bada. w18.10 29 par. 11, 13

Bema mai dibamu bona o matauraiamu tauna ta ese ladamu baine laloa boio eiava basine lalomu tao, emu hemami be ede bamona? Reana bo lalohisihisimu. Dahaka dainai? Badina ita ta ta na ta uramu ma haida ese bae abida dae. To dia una mo, ita na ta uramu bae diba ita be taunimanima ede bamodia bona ta karamu ḡaudia bae diba bena bae hanamoda. (Num. 11:16; Iobu 31:6) Ita na dia ḡoevadae tauda dainai, baita uramu ma haida ese bae laloda bada bona bae imodaida. Bona dia dala maorona ai baita uramu bae matauraida. Satana ena tanobada ese taunimanima lalodia e verimu, dagi bona lada bada itahuna karana bae ura heni totona, una dainai Tamada guba ai, Iehova Dirava, asie hanamoamu bona asie tomadiho heniamu.​—Apok. 4:11. w18.07 7 par. 1-2

Satana bona ena demoni ese dagi bada taudia amo ‘koikoi’ herevadia e halasimu neganai asita daradaramu. (1 Tim. 4:​1, 2) Dubu igunalaina taudia na mai edia kerere, badina edia koikoi herevadia amo haida e hakaudia kereremu. Bema ta na hahediba koikoina ta e abia daemu bona Dirava ese e inai heniamu karana ta e karaiamu, ena mauri baine haboioa diba. (Hos. 4:9) Iesu na mai dibana ena negai dubu igunalaina taudia ese taunimanima momo e koidiava. Ia ese e hamaorodia: “Itorena taumui bona Farisea taumui, koikoi taumui, madi ihabaimui! Badina be davara bona tanobada e heḡeḡe madai, helalo-kerehai tauna tamona iabina; O abiamu, bena Gehena natuna ai o halaoamu, ia ese emui dika e hereaia haruamu.” (Mat. 23:15) Iesu ese unu tomadiho igunalaina taudia koikoidia na e gwau henidia. Idia na momokani ‘tamadia Diabolo ena amo ema, ia na ala-ala tauna.’​—Ioa. 8:44. w18.10 7 par. 5-6

Iesu ena hereva anina be dahaka? Ia na ma eto: “Ba moale, ba moale hisi dae, badina be guba ai davamui baine bada; badina be e gunalaimui taudia, peroveta taudia, na unu e daḡedaḡe henidia tomava.” (Mat. 5:12) Aposetolo taudia e dadabadia bona e hamaorodia basie haroro lou neganai, idia na “kaunsil e rakatania mai moaledia ida.” Momokani, e dadabadia bona e hahisidia. To, e moale “badina be Iesu ladana bagunai hisi e ani.” (Apos. 5:41) Hari ina negai, Iehova ena taunimanima na Iesu ladana dainai e hahisidiamu, eiava hahetoho idauidau e davarimu to mai moaledia ida e haheaukamu. (Iak. 1:​2-4) Momokani, aposetolo heḡereḡeredia, e hahisidamu neganai asita moalemu. To bema Dirava baita badinaiamu, ia ese goada be henidamu baita haheauka totona. “Moale Diravana” ena lalonamo baita abiamu neganai, ena be eda abidadama dainai daḡedaḡe baita davari, eiava ruma bese taudia ese bae inai henida to dounu baita moalemu.​—1 Tim. 1:11. w18.09 21 par. 18-​20

Ini “nega dikadia” ai momo na e lalometaumu bona mauri e hesikulaiamu. (2 Tim. 3:​1-5) Ripoti haida ese e hahedinaraimu laḡani ta ta ai taunimanima 800,000 mai kahana na sibodia e hematamu​—sekeni 40 lalodiai ta na e masemu. Kristen taudia haida danu e lalometaumu bona sibodia e hematamu. Hari ina negai, eda tadikaka bona taihu ediai hekwakwanai idauidau e varamu dainai baita hagoadadia na namo. Haida na daḡedaḡe e davarimu bona e kirikirilaidiamu. A Haida be edia ḡaukara gabudiai e gwauraidia dikamu eiava e maumauraidiamu. Eiava e hesikumu badina ovataim e karamu o edia ḡaukara na bada herea. To ma haida na edia ruma bese lalonai hekwakwanai e davarimu, reana adavadia na dia witnes taudia. Unu hekwakwanai bona ma ḡau haida daidiai, kongrigeisin lalonai momo na e hesikumu bona e lalomanokamu. w18.09 rau 13 par. 3, 5

Kristen tama sina ese natudia e durudiamu tiokratik ḡaukaradia bae ato guna neganai, idia na Iehova ida e ḡaukara heboumu. Unu e kara toma tama sina momo na gabeai e itaia natudia memerodia bona kekenidia na ruma e rakatani ful-taim hesiai ḡaukaradia bae kara totona. Haida na misinari taudia; ma haida na pablisa dia momo tanodia ai e painiamu; haida be Betele ai e ḡaukaramu. Natu na gabu daudau ai e nohomu dainai tama sina ida na asie hebamo momomu, dia guna heḡereḡerena. To, sibodia edia ura e dadaraimu tama sina ese natudia na e hagoadadiamu edia hesiai ḡaukara bae lalo bada. Dahaka dainai? Idia na e moalemu badina e itaiamu natudia na Basileia ḡaudia e ato gunamu. Reana unu tama sina momo edia hemami na Hana ena heḡereḡerena, ia na eto natuna Samuel na Iehova vada e “henia.” Unu tama sina ediai Dirava ida e ḡaukara heboumu na hahenamo namona ta. Bona asie uramu una hahenamo na bae reaia.​—1 Sam. 1:28. w18.08 24 par. 4

Iesu na se gwa basine vareai diba. Danu eto: “Ogoḡami taumui be nanamo, badina be Dirava ena basileia na umui emui.” (Luka 6:20) To, una anina na dia ogoḡami taudia iboudiai ese Iesu ena hahediba herevadia bae abi dae bona hahenamo badana bae abi. Ogoḡami taudia momo na asie kamonai. Mai anina bada ḡauna na ina: Ta na ena kohu amo Iehova e hetura heniamu karana dainai basita hahemaoro henia. Ta moalemu badina eda tadikaka bona taihu momo, taḡa bona ogoḡami taudia, na mai kudoudia idoinai ida Iehova e lalokau heniamu bona e hesiai heniamu. Baibul ese taḡa taudia e hadibadiamu, “asie mia daudaumu kohudia na basie laro, a Mauri Diravana mo bae laroa.” (1 Tim. 6:​17-19) Danu, Baibul ese Dirava ena taunimanima iboudiai, taḡa bona ogoḡami taudia, e hadibadiamu moni iura henina karana ai nahuadia bae toho. (1 Tim. 6:​9, 10) Momokani, tadikakada na Iehova ese e itadiamu heḡereḡerena baita itadiamu neganai, edia taḡa eiava ogoḡami dainai basita hahemaoro henidiamu. w18.08 10-​11 par. 11-​12

Ta ura dikadikamu Iehova enai eda tenkiu karana baita hahedinaraia, badina Ia ese ena bese ai e halaoda. Ta dibamu eda mauri Ienai ta gwauhamatalaia karana na abi hidi maorona. Kara dikadia ta dadaraidia vaitani. Bona tadikakada ta lalokau henidiamu bona ta matauraidiamu, badina idia danu Iehova ena. (Roma 12:10) Baibul na e gwauhamata: “Iehova ese ena bese taudia na basine rakatanidia.” (Sal. 94:14) Una gwauhamata heḡereḡerena, herevana dahaka hekwakwanai baita davari to Iehova ese basine rakatanidamu. Danu mase ese ita na Iehova ena lalokau amo basine bibida oho diba. (Roma 8:​38, 39) “Ta maurimu eiava baita mase, ita na Lohiabada ena.” (Roma 14:8) Momokani, ta uramu Iehova ese turana namodia iboudiai mase amo baine hatoredia isi lou negana baita itaia. (Mat. 22:32) Bona hari ina negai hahenamo momo ta moalelaimu. Baibul ena hereva heḡereḡerena: “Iehova na ena Dirava ai e halaoamu besena be namo; vada e abidia hidi ia dihina ai baela taudia be nanamo.”​—Sal. 33:12. w18.07 26 par. 18-​19

Haida na e laloamu edia lalohadai heḡereḡerena abi hidi bae kara dainai, idia na mai edia maoro e moalelaimu ḡaudia haida, heḡereḡere edukeisen o moni ḡaukara bae abi hidi bema una ese lalodia mamina basie hadikaia. Reana idia ese Paulo ena hereva Korinto Kristen taudia ediai e laloamu, eto: “Dahaka dainai lau egu ura-kwalimu na idau tauna lalona ese baine laoa ahu?” (1 Kor. 10:29) Ena be mai eda maoro unu baita abi hidi, to namona na baita helalotao eda ura kwalimu na mai hetoana bona ta karamu abi hididia ese namo o dika bae havara diba. Una badi dainai, Paulo na hari dina sirina ai e hetore herevana e gwauraia. Una ese e durudamu eda mauri lalonai abi hidi baita kara neganai mai anina bada ḡaudia baita lalodia, dia siboda eda ura ḡaudia. w18.04 10 par. 10

Hari ina negai Kristen tauna ta na dala kererena baine badinaia diba, ena be baineto ia na Iehova e tomadiho heniamu. (Iuda 11) Heḡereḡere, ta ese matabodaḡa, mataḡaniḡani, bona tadikakana inai henina lalohadaidia baine abi diba. (1 Ioa. 2:​15-17; 3:15) Unu lalohadai ese baine hakaua kerere bena kara dikadia baine kara diba, ena be hesiai ḡaukaradia e goadalaimu bona kongrigeisin heboudia e lao hanaihanaimu. Ena be haida ese eda lalohadai bona kara na se itamu, to Iehova ese ḡau iboudiai e itamu bona mai dibana bema ita na dia kudouda ibounai ida ia ta badinaiamu. (Ier. 17:​9, 10) To, Iehova na se hesiku haraḡamu ita edai. Ta na Dirava ena amo e daudaumu neganai, Iehova ese e hamaoroamu: “A lou henigu.” Eda manoka ḡaudia daidiai ta hekwarahimu neganai, Iehova na e uramu kara dikadia baita dadaraidia. (Isa. 55:7) Bema unu baita kara tomamu, lauma dalanai, eda hemami ai, bona tauani dalanai goada be henidamu, unu amo ura dikadia baita ‘hadarerediamu.’​—Gen. 4:7. w18.07 18 par. 5-6