November

Hebou ai ededia dala ma haida ai baita hahegoada heheni diba? Bema oi na tama ta eiava sina ta, natumu ba durudia laḡanidia heḡereḡeredia ai bae heni haeredia bae heḡaeḡaelai. Nega haida, hekwakwanai badadia, heḡereḡere headava lalonai e varamu hekwakwanaidia o kara ḡoevadia e hadikamu ḡaudia, na stadi ai ta herevalaimu, to reana natu ese paragraf ta o rua ai haere baine heni diba. Danu, natumu ba durudia bae laloparara dahaka dainai nega haida imadia be abi isimu neganai tadikaka ese basine abidia hidimu. Una ese be durudiamu basie lalohisihisi. (1 Tim. 6:18) Ita iboudai eda haere karana ese Iehova be hanamoamu bona eda tadikaka taihu be hagoadadiamu. (Her. 25:11) Reana nega haida eda ekspiriens kwadoḡina ta baita gwauraia, to namona na siboda sivaraida basita herevalai momo. (Her. 27:2; 2 Kor. 10:18) To, namona na Iehova, ena Hereva, bona ena taunimanima baita herevalaidia.—Apok. 4:11. w23.04 rau 24-25 par. 17-18

Lalokau karana ese be durudamu hanaihanai baita noga bona baita lalo maoromaoro. (Mat. 22:​37-39) Dirava ilalokau henina karana ese e durudamu mai eda haheauka ida ta haroromu, ena be hahetoho ta davarimu. (2 Tim. 1:​7, 8) Dirava asie hesiai heniamu taudia ta lalokau henidiamu dainai, haroro ḡaukarana na dounu ta karaiamu, telefon bona revareva amo danu ta haroromu. Namona na baita abia dae taunimanima na nega ta edia kara be haidaumu bona kara maorodia be karamu. (Esek. 18:​27, 28) Eda tadikaka taihu danu baita lalokau henidia. Una lalokau ta hahedinaraiamu dalana na, ‘ta hahealo hehenimu’ bona ‘ta hahegoada hehenimu.’ (1 Tes. 5:11) Tuari lalonai tuari taudia na e ḡaukara heboumu bona e heduru hehenimu heḡereḡerena, ita danu ta hahegoada hehenimu. Asita dibamu tadikaka taihu na ta hahisidiamu eiava edia dika ta hadavamu. (1 Tes. 5:​13, 15) Eda lalokau baita hahedinaraia dalana ma ta na, kongrigeisin e gunalaiamu tadikakadia baita matauraidia.—1 Tes. 5:12. w23.06 rau 10 par. 6; rau 11 par. 10-11

Eda abidadama baita hagoadaia dalana ta na, mauri idavalaina boubouna baita laloa dobu. Una mauri idavalaina boubouna dainai, ta dibamu Dirava ena gwauhamata na be ḡuḡurumu. Dirava ese una mauri idavalaina boubouna e heni badina bona anina baita lalohadailaimu neganai, eda abidadama baita hagoadaiamu bona baita abia daemu Dirava ese e gwauhamatalaia tanobada matamatana na be varamu. Dahaka dainai unu ta gwau tomamu? Dirava ese mauri idavalaina boubouna be ede e heni toma? Iehova ese Natuna vara-edeana na guba amo e siaia tanobada ai e vara. Iesu na tanobada ai hahetoho idauidau e haheaukalaidia. Bena hisihisi bada e davari bona e mase. Momokani, Iehova ese dava bada ḡauna amo ita e hoida. Eda lalokau Diravana ese Natuna na basinema siaia baine hisihisi eiava baine mase, ita ese nega kwadoḡi lalonai mauri namona baita moalelaia totona. (Ioa. 3:16; 1 Pet. 1:​18, 19) To, Iehova ese Natuna lalokauna e heni dainai, ita ese tanobada matamatana ai mauri hanaihanai baita abia diba. w23.04 rau 27 par. 8-9

Iehova be e ura dikadikamu mase taudia baine hatoredia isi lou, a? Oibe. Ia ese Baibul itorena taudia e hasiahudia vaira negana ai baine vara tore isi lou gwauhamatana e torea. (Isa. 26:19; Apok. 20:​11-13) Bona Iehova na hanaihanai ena gwauhamata na e haḡuḡurumu. (Ios. 23:14) Momokani, Iehova na e ura dikadikamu mase taudia baine hatoredia isi lou. Iobu ena hereva mani aita laloa. Ia na mai dibana ena be baine mase, to Iehova na e uramu baine hatorea isi lou. (Iobu 14:​14, 15) Iehova ena ura na se idau, ena hesiai taudia na mase amo baine hatoredia isi lou. Ia na e ura dikadikamu baine hatoredia isi lou neganai, basie gorere bona mauri namona bae moalelaia. To, Iehova asie dibaia bena e mase taudia iboudiai be ede bamona? Eda Dirava lalokauna na e uramu idia danu baine hatoredia isi lou. (Apos. 24:15) Ia na e uramu idia na ia turana ai baela bona tanobada ai bae mauri hanaihanai.—Ioa. 3:16. w23.04 rau 9 par. 5-6

Edena dala ai emu helaro ba hagoadaia? Heḡereḡere, bema oiemu helaro na tanobada ai ba mauri hanaihanai, namona na Baibul ai Paradaiso e herevalaiamu siridia ba duahi bona ba lalodia dobu. (Isa. 25:8; 32:​16-18) Mani tanobada matamatana ai be varamu maurina a laloa. Bema tanobada matamata helarona baita laloa badamu, eda hekwakwanai na ḡau “asi metauna bona asi vanahana ḡauna” ai be laomu. (2 Kor. 4:17) Una helaro amo Iehova ese oi na goada e henimumu, emu hekwakwanai ba haheaukalaidia. Ia ese heduru ḡaudia vada e heni unu amo baita goada. Una dainai bema o uramu asainmen ta ba haḡuḡurua, hekwakwanai ta ba haheaukalaia, eiava emu hesiai ḡaukara ai dounu ba moale, namona na Iehova ba ḡuriḡuri henia goadagoada bona sibomu emu stadi karana amo iena heduru ba tahua. Danu Kristen tadikaka taihu edia heduru bavabidae. Dia una mo, hanaihanai emu vaira nega helarona ba laloa. Unu amo “siahu idoinai ese baine hagoadamui, [Dirava] siahuna herea-daena heḡereḡerena; bena ba haheauka bona ba boga auka mai moalemui ida.”—Kol. 1:11. w23.10 rau 17 par. 19-20

Badi momo daidiai eda ḡuriḡuri ai Iehova baita tenkiu henia. Ta davarimu ḡau namodia daidiai ia baita tenkiu henia; badina harihari ḡaudia namodia iboudiai na ia ena amo e maimu. (Iak. 1:17) Heḡereḡere, tanobada hairaina bona e kara ḡaudia idauidau, ta maurimu, eda ruma bese, turada, bona eda helaro daidiai ia baita tenkiu henia. Danu Iehova ta tenkiu heniamu badina ia ida eda hetura karana ta moalelaiamu. Namona na ita ta ta ese nega baita ato Iehova baita tenkiu henia badidia baita lalodia. Hari ina negai, taunimanima momo ese tenkiu karana na asie hahedinaraiamu. Idia na e uramu bae abi ḡaudia mo e lalomu, to tenkiu ihahedinaraina karadia na asie lalomu. Bema edia kara baita tohotohomu, ita na eda ura ḡaudia mo baita ḡuriḡurilaimu. Una basine vara totona, namona na hanaihanai Iehova enai eda tenkiu karana baita hahedinaraia, ita daidai e karamu ḡaudia iboudiai daidiai.—Luka 6:45. w23.05 rau 4 par. 8-9

Iehova na Tamada lalokauna dainai se uramu baita hisihisi. (Isa. 63:9) To, ia ese eda hekwakwanai iboudiai, sinavai o lai na heto hekwakwanaidia na se koudiamu. (Isa. 43:2) To, ia na e gwauhamata ita baine duruda unu hekwakwanai baita hanaidia. Bona herevana dahaka hekwakwanai ta davarimu, to ia ese be durudamu eda hetura karana ia ida baita hagoadaia totona. Danu iena lauma helaḡa amo be durudamu baita haheaukamu. (Luka 11:13; Fili. 4:13) Una dainai, baita abia dae momokani ia ese eda dabu ḡaudia korikoridia na be henidamu, unu amo baita haheaukamu bona ia baita badinaia hanaihanaimu. Iehova na e uramu ia baita abidadama henia. (Heb. 11:6) Nega haida, baita lalomu ta davarimu hekwakwanaidia na basita hanaidia dibamu. Bona reana baita daradaramu Iehova be ita be durudamu eiava lasi. To, Baibul ese e hadibadamu Dirava ese be henidamu goadana amo “maḡu” na heto hekwakwanaidia baita hanaidiamu. (Sal. 18:29) Una dainai basita daradara, to mai eda abidadama ida Iehova baita ḡuriḡuri henia, bona baita abia dae ia ese eda ḡuriḡuri na be haerelaidiamu.—Iak. 1:​6, 7. w23.11 rau 22 par. 8-9

Una na lalokau korikorina e herevalaiamu! Unu hereva ese headava taudia e hagoadadiamu. Emui headava lalonai lalokau korikorina ba hahedinaraia diba. Headava lalonai tau bona hahine na bae hekwarahi bae helalokau heheni totona. Ini aita haheitalaia toma: Lahi ta baine ara hanaihanai totona, namona na au baita raku loulou. Bema unu basita kara tomamu, lahi na be bodomu. Una heḡereḡerena, tau bona hahine padadiai lalokau baine mia hanaihanai totona, namona na edia headava bae hagoadaia. Nega haida, headava taudia na moni hekwakwanaidia, gorere, eiava natu inaridia lalohekwarahidia ese e hametaudiamu. Una dainai headava taudia ese “Iah ena lahi hururu-hururuna” bae habadaia totona, namona na bae hekwarahi edia hetura karana Iehova ida bae hagoadaia. w23.05 rau 20-21 par. 1-3

Dahaka baita kara unu amo baita lalo goada? Ena be tamada sinada ese be hamaorodamu baita lalo goada, to idia ese ita daidai una kara na basie hahedinaraiamu. Lalo goada karana na ḡaukara matamatana ta idibana karana ida baita haheḡereḡerea. Una ḡaukara ba dibaia namonamo totona, e hadibamumu tauna ena kara ba itaia bona ba tohotohoa. Una heḡereḡerena, lalo goada karana baita dibaia totona, ma haida ese una kara e hahedinaraiamu dalana baita itaia namonamo bona baita tohotohoa. Daniel heḡereḡerena, namona na Dirava ena Hereva baita dibaia namonamo. Bona Iehova baita ḡuriḡuri henia hanaihanai, unu amo eda hetura karana ia ida baine goada. Danu Iehova baita abidadama henia, bona baita abia dae ia ese ita na e durudamu. Bena eda abidadama bae tohoa neganai, baita lalo goada dibamu. Baita lalo goadamu neganai, ma haida ese be matauraidamu. Bona ma haida baita durudiamu Iehova be dibaiamu. Momokani, badi namodia daidiai baita lalo goada. w23.08 rau 2 par. 2; rau 4 par. 8-9

Grik gado ai ina hereva “ba diba toho” e hahanaia neganai, una na vaitani taunimanima ese gold eiava silver auridia e tohomu, unu amo bae diba idia be ḡau korikoridia eiava lasi. Una heḡereḡerena, ta kamonaimu eiava ta duahimu herevadia na baita tohodia o baita tahudia namonamo unu be hereva momokanidia eiava lasi. Hari ina negai hisihisi bada hereana e kahikahimu lalonai ita edai danu una na mai anina bada. Haida edia hereva na basita abi dae kava, to darada baita ḡaukaralaia, ta duahimu bona ta kamonaimu herevadia na Baibul bona Iehova ena orea amo e maimu herevadia ida baita haheḡereḡere. Unu baita kara tomamu neganai demoni edia lalo veri hereva koikoidia baita dadarai dibamu. (Her. 14:15; 1 Tim. 4:1) Ta dibamu Dirava ena hesiai taudia na hisihisi bada hereana amo be roho maurimu. To ita ta ta, na asi dibada kerukeru be dahaka baine vara. (Iak. 4:14) Ena be hisihisi bada hereana amo baita roho maurimu o hisihisi bada hereana do lasi ai baita masemu, to bema Dirava baita badinaia hanaihanaimu, ia ese mauri hanaihanai be henidamu. Una dainai laloda baita hadai eda helaro namona baita laloa bada, bona Iehova ena dina totona baita noho heḡaeḡae! w23.06 rau 13 par. 15-16

Ita na asi dibada Baibul ena peroveta herevadia haida be ede be ḡuḡuru tomamu. (Dan. 12:​8, 9) Ena be peroveta herevadia bae ḡuḡuru daladia na asi dibada namonamo, to basitato idia na basie ḡuḡurumu. Namona na baita abidadama Iehova ese nega korikori ai be hadibadamu, gunaguna e kara heḡereḡerena. Tanobada besedia ese maino bona noho namo herevana bae gwauraia. (1 Tes. 5:3) Bena tanobada ena politikol gavamanidia ese tomadiho koikoidia be tuari henidiamu bona be haoredia vaitanimu. (Apok. 17:​16, 17) Una murinai, idia ese Dirava ena taunimanima be tuari henidiamu. (Esek. 38:​18, 19) Bena Aramagedono tuarina vada be matamamu. (Apok. 16:​14, 16) Ta diba momokanimu unu peroveta herevadia na kahirakahira be ḡuḡurumu. Una nega ta nariamu lalonai, Baibul ena peroveta herevadia baita haerodia bona ma haida baita durudia unu bae kara toma, unu amo Tamada lalokauna enai eda tenkiu karana baita hahedinaraia. w23.08 rau 13 par. 19-20

Aposetolo Paulo ese abidadama, helaro bona lalokau e herevalaidia neganai, ia na e gwa “herea-daena be lalokau mo.” (1 Kor. 13:13) Dahaka dainai Paulo na unu e hereva toma? Vaira negai Dirava ena gwauhamata na vada be ḡuḡurumu dainai, unu gwauhamata na ma basita larodia loumu. To eda lalokau Iehova bona taunimanima ediai na be mia hanaihanaimu. Bona eda lalokau idia ediai na baita habadaiamu. Danu, Kristen taudia korikoridia edia kara badana na lalokau. Iesu ese ena aposetolo taudia e hamaorodia, eto: “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Danu, baita helalokau hehenimu neganai lalotamona ai baita nohomu. Paulo na e gwa lalokau “na ihatamonada ḡauna herea-daena.” (Kol. 3:14) Aposetolo Ioane ese tadikakana e tore henidia neganai eto: “Dirava e ura heniamu tauna ese tadikakana danu baine ura henia.” (1 Ioa. 4:21) Baita helalokau hehenimu neganai, baita hahedinaraiamu Dirava na ta lalokau heniamu. w23.11 rau 8 par. 1, 3

Baibul ese eda Kristen maurina na heau-helulu ida e haheḡereḡerea. Una heau-helulu bae haḡuḡurua taudia ahudia na mauri hanaihanai. (2 Tim. 4:​7, 8) Namona na baita hekwarahi dounu baita heau, badina dokona na kahirakahira. Aposetolo Paulo ese heau-helulu ai baita kwalimu totona baine duruda ḡauna na e herevalaia, eto: “E hametaudamu ḡaudia idoidiai . . . baita ato tabe, bena heau-helulu vairadai e hure na baita heau mai haheaukada ida.” Paulo ena hereva anina be Kristen tauna ese maduna ta basine huaia, a? Lasi, iena hereva anina na Kristen tauna ese ḡau asi anidia na baine ato tabe. Unu ḡau ese ia na bae koua o bae hahesikua diba. Mai haheaukada ida baita heau totona, namona na bae hametauda ḡaudia baita dibadia bona baita kokidia haraḡa, to baita huadia madunadia na basita nege. Unu amo heau-helulu lalonai dounu baita heaumu.—2 Tim. 2:5. w23.08 rau 26 par. 1-2

Lalo maoromaoro karana ese baine duruda ma haida edia lalohadai baita matauraidia. Heḡereḡere, taihu haida be makeup e atomu, a haida be lasi. Kristen taudia haida na alkahol taidia e inumu, a haida be lasi. Kristen taudia ta ta na tauanidia inaridia totona e abi hidimu ḡaudia na idauidau. Bema ta lalomu ita ta abi hidimu ḡaudia na hanaihanai mamaoro bona ma haida vairadiai baita herevalaidia momomu, idia baita hahekwakwanaidiamu bona kongrigeisin baine parara diba. (1 Kor. 8:9; 10:​23, 24) Eda heḡoeva daladia ai, Iehova na dia taravatu aukadia e ato to hahekau herevadia e heni. Ita na Dirava ena hesiai taudia dainai, eda heḡoeva dalana amo baita hahedinaraia ta lalo maoromaoromu, ta manaumu, bona ta hematauraimu. (1 Tim. 2:​9, 10) Ita na asita uramu eda heḡoeva dalana amo taunimanima na ita toada mo bae laloa. Baibul ena hahekau herevadia ese elda taudia be durudiamu, dabua bona heḡoeva daladia ai edia taravatu basie ato. w23.07 rau 23-24 par. 13-14

Iehova ese ita edai bae vara ḡaudia e hadibadamu. “Kavakava hahinena” ena boiboi e abia daemu taudia na e uramu matabodaḡa karadia bae kara. Edia kara daidiai idia na “mase ena dobu gabudia” e lao henimu na heto. (Her. 9:​13, 17, 18) To, “aonega” korikorina e laulaulaia hahinena ena boiboi e abia daemu taudia ediai e varamu ḡauna be ma idau. (Her. 9:1) Ita na Iehova ese e ura henimu ḡaudia ta ura henimu bona e inai henimu ḡaudia ta inai henimu. (Sal. 97:10) Danu ta moalemu badina ma haida ta boiridiamu “aonega” korikorina amo namo bae davari. Una na vaitani ‘hanua lalonai atai gabudia amo ta boiboimu, ta tomu: Daika na asi aonegana, ia na iniseni ai baine raka vareai.’ Ita bona una boiboi e abia daemu taudia ese baita abimu hahenamodia na be mia daudaumu dainai, ‘laloparara dalana ai baita rakamu’ unu amo baita “mauri” hanaihanaimu.—Her. 9:​3, 4, 6. w23.06 rau 24 par. 17-18

Bema ḡaukara eiava skuli ai turamu ta ese o abi daemu ḡaudia e henanadailaimu neganai, emu hemami be ede bamona? O garimu, a? Ita momo na unu ta hemami tomamu. To idia edia henanadai amo edia lalohadai eiava e abi daemu ḡaudia baita lalopararalaimu, bona dala be kehoamu sivarai namona baita harorolaiamu. Nega haida, ta e henanadaimu badina na e uramu ita ida baine hepapahuahu. Reana unu e kara tomamu badina na haida amo ita e sivarailaida koikoi herevadia e kamonaimu. (Apos. 28:22) Danu, ita na “dina gabedia ai” ta nohomu dainai, momo na asie lalo-tamonamu bona e daḡedaḡemu. (2 Tim. 3:​1, 3) Reana bo lalomu, ‘Bema ta na lau ese na abi daemu ḡaudia daidiai e hepapahuahumu, dahaka ese baine durugu mai gado namo ida baina hereva?’ Manau karana ese baine durumu diba. Manau tauna na se badu haraḡamu bona sibona e hebiagumu ena be haida ese e habaduamu eiava asi dibana ede baine haere toma. w23.09 rau 14 par. 1-2

Nega haida, Iehova ena orea amo ta abimu sisiba herevadia ese e durudamu kohu momo itahuna karana bona Dirava ena taravatu e utumu karadia baita dadarai. Unu sisiba baita badinamu neganai, Iehova ena hahenamo baita davarimu. (Isa. 48:​17, 18; 1 Tim. 6:​9, 10) Hisihisi badana negana amo ela Iesu ena Lohia Laḡanidia 1,000, Iehova ese taunimanima na dounu be ḡaukaralaidiamu ena orea baine hakaua. Una nega ai, ita be hahekau dalana baita badinaiamu, eiava? Unu baita kara toma dibamu, bema hari Iehova ese e hakaudamu dalana baita badinaiamu. Una dainai, hanaihanai Iehova ena hahekau dalana baita badinaia; ia ese e abidia hidi ta’taudia amo e halasimu herevadia na baita badina. (Isa. 32:​1, 2; Heb. 13:17) Oibe, namona na Ihakauda Tauna Hereadaena, Iehova baita abidadama henia, badina ia ese lauma dalana ai baine gimada diba bona baine hakauda ela bona tanobada matamatana ai baine hakauda vareai. w24.02 rau 25 par. 17-18

Ena be aposetolo Paulo na mai moalena ida Iehova e hesiai heniava, to hekwakwanai momo e davari. Heḡereḡere, nega momo ia na gabu daudaudia e laova, bona unu negai laolao unu bamodia na mai hekwarahina. Iena laolao lalodiai, nega haida “sinavai ai” bona “dadidadi taudia” amo dika e davariva. Danu nega ma haida inaina ese e dadabaiava. (2 Kor. 11:​23-27) Bona nega haida tadikakana ese iena heduru na asie lalo badava. (2 Kor. 10:10; Fili. 4:15) Dahaka ese Paulo e durua dainai dounu Iehova e hesiai henia? Paulo ese Toretore Helaḡadia bona enai e vara ḡaudia amo Iehova ena kara namodia e diba. Paulo na e abia dae momokani Iehova Dirava ese ia na e lalokau heniava. (Roma 8:​38, 39; Efe. 2:​4, 5) Una dainai ia ese Iehova na e lalokau henia bada. Paulo na hanaihanai ‘helaḡa taudia e durudiava’ karana amo ena lalokau Iehova enai e hahedinaraia.—Heb. 6:10. w23.07 rau 9 par. 5-6

Baibul ese gavamani na e gwauraidiamu “lohia taudia.” Taunimanima momo na e abia daemu gavamani ese ita bae narida na namo, bona gavamani ese e atomu taravatudia haida na baita badina. To bema idia na e laloamu taravatu ta na dia maoro eiava ibadinana na auka, idia na se uramu bae badinaia. Baibul ese e hahedinaraiamu taunimanima edia gavamani ese hisihisi e havaramu, badina Satana ese e biagudiamu, to idia na kahirakahira be oremu. (Sal. 110:​5, 6; Koh. 8:9; Luka 4:​5, 6) Danu, Baibul na e gwaumu “lohia e laoa ahumu tauna ese Dirava ena haheḡani e gwaua tubumu” o dadaraiamu. Gavamani ese ita inarida totona taravatu maorodia e atomu neganai baita kamonai henidia, badina Iehova na e uramu unu baita kara toma. Una dainai, namona na ‘iboudiai na ena ḡau ena ḡau baita henidia,’ anina na tax monina baita henidia, baita matauraidia, bona edia hereva baita badinadia. (Roma 13:​1-7) Ita na reana baita lalomu, taravatu ta baita badinaia na dia maoro eiava auka. To ita na Iehova ta badinaiamu, bona ia na e gwaumu gavamani baita kamonai henidia bema idia edia taravatu ese iena taravatu na se utumu.—Apos. 5:29. w23.10 rau 8 par. 9-10

Samson e vara neganai, Filistia taudia na Israel besena e lohiaiava bona e hahisiava. (Hah. 13:1) Idia edia lohia dalana dikana dainai Israel taudia na hisihisi bada e davari. Una dainai Iehova ese Samson e abia hidi, “Israel na Filistia taudia imadia amo baine hamauridia.” (Hah. 13:5) To Samson na una ḡaukara baine haḡuḡurua totona, Iehova enai baine tabekau na namo. Nega ta, Filistia tuari oreana ta na Samson iḡuina totona Lehi ela, una na Iuda ai. Iuda taudia na e gari dainai lalodia e hadai Samson na inaidia imadia ai bae atoa. Samson na iena taunimanima ese varo matamatadia rua amo e ḡuia bona e hakaua lao Filistia taudia dekedia. (Hah. 15:​9-13) To, “Iehova ena lauma ese Samson e rohea badabada” bona imana e ḡuilai varodia na e heruha. Bena Samson ese “doniki aukina turiana matamatana ta e davaria,” e abia bona e ḡaukaralaia Filistia tatau 1,000 e aladia mase!—Hah. 15:​14-16. w23.09 rau 2 par. 3-4

Baibul ai Iehova ese ena “mia hanaihanai urana” na taina ruana e hahedinaraia. Bona Iehova na dala idauidau ai “ḡau iboudiai e kara, ena ura baine haḡuḡurua.” (Her. 16:​4, NWT) Bona ia ese e kara ḡaudia amo bae vara ḡaudia na bae mia hanaihanai. Iehova ena ura be dahaka, bona una ura baine haḡuḡurua totona ia be dahaka e kara? Dirava ese tau bona hahine ginigunadia ediai ena ura e gwauraia hedinarai. Ia ese e hamaorodia, eto: “Besemui ba havaradia, ba hutuma; tanobada ba hahonua bona . . . mauri ḡaudia tanobada ai e loamu iboudiai ba biagudia.” (Gen. 1:28) Adam bona Heva e gwau-edeede neganai, idia ese kara dika na besedia ediai e heni hanai, to una ese Iehova na se koua ena ura baine haḡuḡurua. A Iehova ese una ihaḡuḡuruna dalana hari e haidaua. Maoromaoro, guba ai Basileia ta ihaginina lalohadaina e karaia, unu amo taunimanima bona tanobada daidiai e ura baine karaia ḡauna baine haḡuḡurua.—Mat. 25:34. w23.10 rau 20 par. 6-7

Iehova ena heduru amo baita haheauka dibamu. Bema ita na nega daudau lalonai eda manoka ḡauna ta ihanaina totona ta hekwarahimu, reana baita haheaukamu na auka. Reana ita eda manoka ḡaudia haida na dia aposetolo Petro ena manoka ḡaudia heḡereḡeredia. To Iehova ese goada be henidamu, unu manoka ḡaudia ihanaidia karana ai baita haheauka. (Sal. 94:​18, 19) Haheitalai ta na ina, tadikaka ta na hereva momokani do se diba neganai, ia na tatau bona tatau e mahuta heboumu (homosexual) mauri dalana e badinaia. Gabeai ia na Baibul ena hereva e diba neganai, una mauri dalana na e rakatania. To, nega ta ta ai ura dikadia na e abiva. Dahaka ese e durua unu ura dikadia e dadarai? Ia na e gwa: “Iehova ese e durugu. Iena lauma helaḡa ena heduru amo na diba hereva momokani na dounu baina badinaia. Iehova ese e ḡaukaralaigumu, bona ena be na kara kereremu to dounu e durugumu baina goada.” w23.09 rau 23 par. 12

Matamata tadikakamui, ba ḡaukara goada lo Kristen tauna ta ai baola. Namona na haheitalai namodia ba tohotoho, ḡau ba haero namonamo, ba ḡaukara goada, mauri ai bae durumu ḡaudia ba diba, bona vaira madunadia totona ba heḡaeḡae. Nega haida, oi ese ba kara ḡaudia iboudiai bo haeromu neganai, reana bo laloamu unu na auka. To oi ese unu na ba kara diba. Ba helalotao Iehova na e ura dikadikamu oi baine durumu. (Isa. 41:​10, 13) Danu, kongrigeisin ai tadikaka taihu ese oi na be durumumu. Lo Kristen tauna ta ai bo laomu neganai, emu mauri ai hahenamo idauidau bo davarimu bona bo moalemu. Ai ese umui matamata tadikakamui na a lalokau henimuimu. Namona na Iehova ese baine hanamomui badina o ḡaukara goadamu lo Kristen taudia ai baola. w23.12 rau 29 par. 19-20

Mani ina haheitalai a laloa: Oi na tadikaka taihu haida ida o moale heboumu. Una moale hebou ai grup foto ta o abia. To, foto ma rua o abi badina reana foto ginigunana na dia namo. Hari, dekemuai foto na toi, to foto ta ai tadikaka ta na se kiri. Una dainai foto na bo kokiamu, badina foto ruaosi lalodiai, umui iboumui ai na o kiri, una tadikaka danu. Tadikaka taihu ida ta moalelai negadia na iseda memori namodia. To reana una moale hebou negana ta ai, tadikaka ta o taihu ta ena hereva eiava kara ese e hahisida. Dahaka baita kara? So ura heniamu foto o kokiamu heḡereḡerena una memori danu ba kokia. (Efe. 4:32) Namona na baita laloboio, badina ia ida nega namodia momo ta moalelai hebou. Oibe, ita na ta uramu memori unu bamodia baita lalodia tao. w23.11 rau 12-13 par. 16-17

Paulo ese e ḡaukaralai Grik herevadia ese e hahedinaraimu Kristen taihudia ese edia heḡoeva dalana amo ma haida edia hemami eiava lalohadai na basie hadika. Ta moalemu badina eda lo Kristen taihudia ese una sisiba na e badinaiamu! Lo Kristen taihudia ese e hahedinaraiamu karana ma ta na haero-haero namonamo karana. Una anina be dahaka? Anina na ia ese maoro bona kerere edia idau e lalopararalaimu bona dala maorona e abia hidimu. Mani Abigail ena haheitalai aita laloa. Ia adavana na abi hidi kererena ta e karaia dainai edia ruma bese na dika bada bema davari diba. Abigail na kara haraḡa kara ta e karaia. Ia na dala maorona e badinaia dainai momo edia mauri e gimadia. (1 Sam. 25:​14-23, 32-35) Danu, haero-haero namonamo karana dainai ita na baita dibamu ededia nega ai baita hereva bona ededia nega ai asi reḡereḡeda baita noho. Bona be durudamu ma haida edia namo baita lalomu dainai baita hereva henidiamu neganai eda hereva nahuadia na baita tohomu.—1 Tes. 4:11. w23.12 rau 20 par. 8-9

Aposetolo Paulo ese unu hereva na Roma kongrigeisin e tore henidia. Unuseniai tadikaka bona taihu na Iehova bona Iesu e dibadia, edia abidadama e hagoadaia, bona Kristen taudia ai ela. Dirava ese edia ‘abidadama dainai maorodia vada e gwaurai,’ bona lauma helaḡa amo e horodia. (Roma 5:1) Oibe, idia na helaro hereadaena e abia. Gabeai aposetolo Paulo ese Efeso ai horoa Kristen taudia e tore henidia neganai, Dirava ese e henidia helarona e herevalaia. Idia ese “ahuna herea-daena, davana bada ḡauna helaḡa taudia edia” bae abia. (Efe. 1:18) Danu Paulo ese Kolose tadikakadia e hamaorodia, edia helaro be edeseni ai bae abia. Ia na e gwa: “Emui helaro na guba ai.” (Kol. 1:​4, 5) Una dainai, horoa Kristen taudia edia helaro na, bae toreisi lou bona guba ai mauri hanaihanai bae abia, unuseniai idia na Keriso ida bae lohia.—1 Tes. 4:​13-17; Apok. 20:6. w23.12 rau 9 par. 4-5

Una hereva “gima” na Grik herevana ta amo e hahanaia. Una na hanua ta e gimaiava tuari taudia e herevalaidiamu. Hanua taudia na e mahuta namonamova bona asie e gariva, badina mai dibadia hanua na tuari taudia ese e gimaiava. Una heḡereḡerena, bema Dirava ena maino ese laloda bona darada be gimaiamu, ita na basita garimu. (Sal. 4:8) Hana heḡereḡerena, ena be eda hekwakwanai na basie ore haraḡamu to laloda na be mainomu. (1 Sam. 1:​16-18) Unu amo ita na baita lalohadai namonamomu bona abi hidi namodia baita karamu. Ita be dahaka baita kara? Hekwakwanai ese e hametaudamu negadiai, hanua taudia ese tuari taudia e noidiamu bae gimadia heḡereḡerena, ita danu Iehova baita noia baine gimada. Edena dala ai? Baita ḡuriḡuri loulou ela bona Dirava ena maino baita mamia. (Luka 11:9; 1 Tes. 5:17). Bema hekwakwanai badana ta na oiemu ai e varamu, ba ḡuriḡuri loulou, unu amo bo mamiamu Iehova ena maino ese lalomu bona daramu na be gimadiamu.—Roma 12:12. w24.01 rau 21 par. 5-6

Iesu na Tamana ladana baine hahelaḡaia helaoreana, ia na haheisi, hegwau heni, bona latanai e gwaurai koikoi herevadia iboudiai e haheaukalai. Ia na e diba ḡau iboudiai lalodiai ia ese Tamana na e badinaia ḡoevaḡoeva, una dainai baine hemarai na asi badina. (Heb. 12:2) Danu, ia na e diba, una nega aukana lalonai, Satana ese ia na e tohoava. (Luka 22:​2-4; 23:​33, 34) Momokani, Satana na e urava Iesu ese Iehova baine rakatania, to ia na se kwalimu. Oibe, Iesu ese e hahedinaraia ḡoevaḡoeva Satana na koikoi tauna bona Iehova e badinaiamu taudia na hahetoho auka hereadia lalodiai Iehova na be badinaiamu. Oi o uramu emu King ba hamoalea, a? Namona na hanaihanai Iehova ladana ba imodaia bona ma haida ba durudia ia bae dibaia. Unu bo kara tomamu neganai, oi na Iesu o tohotohoamu. (1 Pet. 2:21) Iesu heḡereḡerena, oi ese Iehova o hamoaleamu bona o hahedinaraiamu Ia inaina Satana na koikoi tauna. w24.02 rau 11-12 par. 11-13

Laḡani faiv lalodiai, taunimanima milion mai kahana na e bapatiso bona Iehova ena Witnes taudia ai ela. Iehova enai emu mauri o gwauhamatalaiamu neganai, o hahedinaraiamu oi na Iesu Keriso ena hahediba tauna ta bona emu mauri ibounai lalonai Dirava ena ura ikarana na mai anina bada. Una be ede ba karaia toma? Iesu na e gwa: “Tau ta bema ura lau murigu ai bema raka, ia na sibona bema hedadarai.” (Mat. 16:24) Ina hereva “sibona bema hedadarai” na Greek gado amo baita hahanaiamu neganai, ia anina ma ta na “ta sibona ena ura baine dadaraia.” Ita na Iehova enai eda mauri ta gwauhamatalaia tauda dainai, Iehova ese se moalelaimu karadia na baita dadarai. (2 Kor. 5:​14, 15) Anina na “tau-anina ena kara,” heḡereḡere, matabodaḡa karadia baita dadarai. (Gal. 5:​19-21; 1 Kor. 6:18) Unu taravatu ese emu mauri e ha-aukaiamu, a? Lasi, badina oi na Iehova o lalokau heniamu bona o abia daemu iena taravatu ibadinadia na mai edia namo.—Sal. 119:97; Isa. 48:​17, 18. w24.03 rau 2 par. 1; rau 3 par. 4

Iehova ese ena lauma helaḡa na e lalo namo henidiamu taudia e henidiamu. (Mat. 12:18) Mani sibomu ba henanadai, ‘Lau ese Dirava ena lauma huahuadia na hahedinaraimu eiava?’ Reana guna oi na so haheaukava, to hari Iehova o dibaia dainai o mamiamu oi na o haheaukamu, a? Momokani, Dirava ena lalo namo na bo abiamu bema oi na iena lauma huahuadia bo hahedinaraimu. Iesu ena boubou ḡauna dainai Iehova ese e lalo namo henidiamu taudia edia dika na e gwautaomu. (1 Tim. 2:​5, 6) Bema ta na Iesu ena boubou ḡauna e abia dae bona e bapatiso to e laloamu Iehova ese ia na se lalo namo heniamu be ede bamona? Baita helalotao, nega haida eda lalohadai na e kereremu dainai hanaihanai Iehova baita abidadama henia. Iesu ena boubou ḡauna e abidadama heniamu taudia na Iehova ese maorodia e gwauraimu bona e gwauhamata baine hanamodia.—Sal. 5:12; Roma 3:26. w24.03 rau 30 par. 15; rau 31 par. 17