December

Iehova be mai ena siahu mase taudia baine hatoredia isi lou, a? Oibe! Ia na “Siahu-idoinai Diravana.” (Apok. 1:8) Una dainai ia inaina iboudiai, mase danu, baine hadareredia diba. (1 Kor. 15:26) Dirava ese mase taudia baine hatoredia isi lou diba badina ma ta na, iena helalotao karana na asi hetoana. Ia ese hisiu ta ta ladadia e hatomu. (Isa. 40:26) Danu, e mase taudia na e lalodia taomu. (Iobu 14:13; Luka 20:38) Ia ese baine hatoredia isi lou taudia edia kara maraḡi-maraḡidia iboudiai na e lalotaomu, idia toadia, edia mauri ai e vara ḡaudia, bona edia memori danu. Momokani, Iehova ese e gwauhamatalaia tore isi louna na baita abia dae diba, badina ta dibamu ia na e ura dikadikamu bona mai ena siahu una gwauhamata baine haḡuḡurua. Tore isi lou gwauhamatana baita abia dae badina ma ta ina: Guna Iehova ese haida na e hatoredia isi lou. Baibul negadiai, Ia ese abidadama taudia haida bona Iesu na siahu e henidia mase taudia e hatoredia isi lou. w23.04 rau 9-10 par. 7-9

Bema mai aonegada bona manauda ida baita herevamu, taunimanima na be uramu bae kamonai bona dounu baita herevahereva. To, bema ta na e uramu ita ida baine hepapahuahu eiava ita e kirikirilaidamu, herevahereva na baita hadokoa. (Her. 26:4) To reana taunimanima haida na dia unu bamona, idia na e uramu bae kamonai. Manau karana baita hahedinaraia na mai anina bada. Bema ta na hepapahuahu e havaramu henanadaidia o ihadikada herevadia e gwauraimu, Iehova enai goada baita noia, mai manauda ida baita hereva totona. Ba helalotao, manau karana ese hepapahuahu be kouamu. Bona mai hemataurai ida bo herevamu neganai, kamonai taudia bo durudiamu ita edai bona Baibul ena hereva momokani ai lalohadai maorona be abiamu. Nega iboudiai “ba heḡaeḡae,” unu amo emui abidadama badina bae nanadailaimui taudia na ‘mai manaumui bona hematauraimui ida’ ba haere henidia. (1 Pet. 3:15) Momokani, manau karana amo emu goada ba hahedinaraia! w23.09 rau 19 par. 18-19

Baita haheauka daladia 4 mani aita herevalai. Ginigunana na, haheauka tauna na se badu haraḡamu. Haida ese e habaduamu neganai, ia na ena kara e biaguamu bona edia kara davadia na se haloumu. (Eso. 34:6) Iharuana na, haheauka tauna na e narimu. Ia na e nariamu ḡauna se vara haraḡamu neganai, se hesikumu bona se badu haraḡamu. (Mat. 18:​26, 27) Ihatoina na, haheauka tauna na se haraḡa-haraḡamu. Haheauka tauna na ḡaukara badana ta baine haḡuḡurua totona basine haraḡa-haraḡamu, bona baine karaia ḡauna na be haeroa namonamomu. Unu amo baine karaia ḡauna na nega korikori ai be haḡuḡuruamu. Ihahanina na, haheauka tauna na hahetoho e haheaukalaimu bona se maumaumu. Ia na dounu baine haheauka totona, ia na be hekwarahimu ḡau namodia be lalomu bona ena hesiai ḡaukara be goadalaiamu. (Kol. 1:11) Ita na Kristen taudia dainai, tame herevalai daladia 4 baita badina na namo. w23.08 rau 21-22 par. 3-6

Kudouda baita gimaia badina badana ta na ina: Iehova ese kudouda na e itaiamu. Anina na ia ese eda lalohadai, hemami bona ura na e itamu, bona mai dibana ita be taunimanima ede bamodia. Ia ese ita na be lalokau henidamu bema iena aonega sisibadia baita badinamu. (Ioa. 4:14) Unu baita kara tomamu neganai, Satana bona ena tanobada edia kara dikadia bona hereva koikoidia ese basie hadikadamu. (1 Ioa. 5:​18, 19) Iehova baita raka henia kahimu neganai, iseda lalokau bona hemataurai ia enai na be badamu. Asita uramu Tamada lalona baita hahisia dainai, kara dika ikarana urana danu baita dadaraiamu. Croatia ai, taihu ta ladana Marta na matabodaḡa ikarana hedibaḡanina e davaria. Ia na eto: “Egu ai na e auka baina lalo maoromaoro bona una kara dika ikarana urana baina dadaraia. To Iehova igari henina karana ese e durugu.” Edena dala ai? Marta na abi hidi kererena ese baine havara ḡaudia dikadia e lalodia dobu. Ita danu unu baita kara toma. w23.06 rau 20-21 par. 3-4

Iesu na mai dibana Iehova ena ura na ladana baine hahelaḡaia, anina na ladana e hadikaiamu herevadia iboudiai baine hamaoromaorodia. Una dainai ia ese ena hahediba e hamaorodia ini bae ḡuriḡuri toma: “Tamamai e, guba ai o nohomu, Oi ladamu baia hahelaḡaia.” (Mat. 6:9) Iesu na e laloparara una na mai anina bada aneru bona taunimanima iboudiai ediai. Iunives ibounai lalonai Iehova ladana e hahelaḡaia ḡoevaḡoeva tauna na Iesu. To inaina ese ia e arestia neganai, idia na e gwa Iesu na Tamana ladana e hadikaia! To ia enai, ta ese Tamana ladana baine hadikaia na kara dika rohorohona. Una dainai, ia do se arestia neganai, ia ese e lalo-hekwarahilaia bada herea ḡauna badana na una.—Luka 22:​41-44. w24.02 rau 11 par. 11

Mauri ena heau-helulu lalonai, Iehova bona Iesu ilalokau henidia karana ese varavarada ilalokau henidia karana baine hereaia na namo. (Mat. 10:37) To, dia namo ruma bese madunadia baita dadarai badina ta laloamu unu ese Dirava bona Keriso baita hamoaledia karana e kouamu. Dirava bona Keriso ihamoaledia totona, namona na eda ruma bese madunadia baita haḡuḡuru. (1 Tim. 5:​4, 8) Unu baita kara tomamu neganai, baita moalemu. Iehova na mai dibana ruma bese na baine moale bema tau bona hahine bae helalokau heheni bona bae hemataurai heheni, tama sina ese natudia bae lalokau henidia bona bae hadibadia, bona natu ese tamadia sinadia bae kamonai henidia. (Efe. 5:33; 6:​1, 4) Ena be ruma bese lalonai dahaka maduna o huamu, to ḡau badana na Baibul ai aonega herevadia ba badina, dia emu hemami, kastom, eiava diba bada taudia edia hereva. Iseda pablikeisin idauidau ba ḡaukaralaidia namonamo. Unu pablikeisin ese Baibul ena hahekau herevadia ba badina daladia e herevalaimu. w23.08 rau 28 par. 6-7

Kristen taihu na mauri ai ia baine durua ḡaudia baine dibadia na namo. Kekeni ta na maraḡina ai e diba ḡaudia ese ena mauri ibounai lalonai be duruamu. Heḡereḡere, duahiduahi bona toretore ba diba namonamo. Gabu haida ai, taunimanima na e laloamu kekeni na duahiduahi bona toretore bae diba na dia ḡau badana. To Kristen taudia ediai una na mai anina bada. (1 Tim. 4:13) Una dainai ḡau ta ese oi basine koumu, duahiduahi bona toretore ba diba totona. Ena namo be dahaka? Una ese oi na be durumumu moni ḡaukarana ta bo davariamu. Danu oi na be durumumu Dirava ena Hereva bo dibaia namonamomu bona bo hahedibalaiamu. A hereadaena be Dirava ena Hereva bo duahiamu bona bo laloa dobumu neganai, ia turana namona ai bo laomu.—1 Tim. 4:15. w23.12 rau 20 par. 10-11

Iehova ena heduru baita noia, hedibaḡani baita dadarai totona. Ita na dia ḡoevadae dainai, kara dika idadaraina totona hanaihanai baita hekwarahi na namo. Satana na ḡau idauidau e karamu ita baine hamoruda totona. Dala ta na, moale karadia dikadia amo e uramu eda lalohadai baine hadikaia. Unu moale karadia baita lalodiamu ese laloda be hamirodiamu bona kara dika badadia baita karamu. (Mar. 7:​21-23; Iak. 1:​14, 15) Iehova ena heduru baita abia na namo bema ta uramu hedibaḡani ta baita dadaraia. Iesu ese e hahedibalaia ḡuriḡurina lalonai, ina noinoi herevana danu e gwauraia, eto: “Hedibaḡani ai basio hakaumai vareai, a dika amo ba hamaurimai.” (Mat. 6:13) Iehova na e uramu ita baine duruda, to namona na ita ese iena heduru baita noia. Danu, eda ḡuriḡuri heḡereḡerena baita kara na namo. w23.05 rau 6-7 par. 15-17

Headava taudia ese Tamadia guba ai ihetura henina karana be laloa badamu neganai, be uramu iena sisiba bae badina, bona una ese be durudiamu edia lalokau baine hakerua hekwakwanaidia bae dadarai eiava bae hanaidia. Edia hetura karana Iehova ida e hagoadaiamu taudia na e hekwarahimu Iehova bae tohotohoa bona iena kara namodia, heḡereḡere hebogahisi, haheauka, bona dika igwautaona karadia e hahedinaraimu. (Efe. 4:32–5:1) Headava taudia ese unu kara be hahedinaraimu neganai, edia lalokau bae habadaia na dia auka. Taihu ta ladana Lena, ena headava laḡanidia na 25 mai kahana, na e gwa: “Iehova e laloa badamu tauna ba lalokau henia bona ba matauraia na dia auka.” Baibul sivaraina ta aita laloa. Iehova ese Mesia tamana bona sinana ai baela taudia e abidia hidi neganai, ia na David ena bese amo Iosef bona Maria e abidia hidi. Dahaka dainai? Idia ta ta sibodia edia hetura karana Iehova ida na goada, bona Iehova na mai dibana idia ese edia headava lalonai Ia be atoa gunamu. w23.05 rau 21 par. 3-4

Ita Ihakauda Tauna, Iesu na ḡoevadae, to ia ese ita ihakauda totona e abidia hidi taudia na dia ḡoḡoevadae. Una dainai nega haida edai na be aukamu idia baita badinadia bema e noidamu baita karaia ḡauna na ita ese asita uralaiamu ḡauna. Aposetolo Petro na nega ta unu e kara toma. Aneru ta ese e hamaoroa Mose ena Taravatu ese e taravatu animal baine ani neganai, ia na nega toi e gwa basine ani. (Apos. 10:​9-16) Dahaka dainai? Unu animal na se ani manada dainai, ia enai na e auka una haheḡani matamatana baine badinaiaTo Aposetolo Paulo na hahekau herevadia e badina, Ierusalem ai Kristen tau badadia ese Paulo e hamaoroa tatau 4 ida baela dubu helaḡa bona sibona baine haheḡoeva, unu amo baine hahedinaraia ia ese Mose ena Taravatu na e badinaia. Paulo na dibana Kristen taudia na vada dia Mose ena Taravatu henunai. Bona ia na kerere ta se karaia. To, Paulo ese “hari tatau e bamodia; kerukeru, idia ida e haheḡoeva.” (Apos. 21:​23, 24, 26) Momokani, Paulo na ena kamonai karana dainai tadikaka bogaraḡidiai lalotamona e havaraia.—Roma 14:​19, 21. w23.10 rau 10 par. 15-16

Reana basio laloamu gari karana ese hetura namona baine havaraia. To, Iehova turana namona ai e uramu baela taudia ese ‘ia garina bae gari’ na namo. Ena be ede daudauna Iehova vada ta hesiai henia, to dounu ia baita gari henia na namo. Dirava baita gari henia anina be dahaka? Dirava e gari heniamu o e matauraiamu tauna ese ia e lalokau heniamu bona se uramu kara ta amo ena hetura karana Ia ida baine hadikaia. Iesu na “Dirava garina e gariva.” (Heb. 5:7) Ia na dia ḡau dikana ta enai baine vara garina dainai e gari. (Isa. 11:​2, 3) To, Iehova e lalokau henia bada bona e ura baine badinaia. (Ioa. 14:​21, 31) Iesu heḡereḡerena, ita ese Iehova baita matauraia bada, badina ia na lalokau, aonega, hahemaoro maoromaoro bona siahu idoinai Diravana. Danu, ta dibamu Iehova ese ita na e lalokau henidamu, bona ia ese e laloa badamu ḡauna na, ita be iena hereva ta badinamu eiava lasi. Oibe, eda kara amo Iehova lalona baita hahisia o baita hamoalea diba.—Sal. 78:41; Her. 27:11. w23.06 rau 14 par. 1-2; rau 15 par. 5

King Usia na e goada neganai, ia na e helaloboio iena goada bona e abi hahenamodia na Iehova ena amo. Dahaka ta dibamu? Namona na baita helalotao ita ta abimu hahenamodia na Iehova ena amo e maimu. Ita na ta haḡuḡuru ḡaudia daidiai basita heaḡi, to Iehova baita imodaia badina ia ese e durudamu. (1 Kor. 4:7) Namona na mai manauda ida baita abia dae ita na dia ḡoevadae bona sisiba baita abi na namo. Tadikaka ta, laḡanina na 60 heḡereḡerena, na e gwaumu: “Na diba basina badu o basina lalomanoka na namo. Nega haida egu kerere daidiai sisiba na abimu negadiai, na hekwarahimu egu kara baina hanamodia bona baina goada.” Baita manaumu bona Iehova baita badinaiamu neganai, baita moalemu.—Her. 22:4. w23.09 rau 10 par. 10-11

Paulo ena negai Kristen taudia bae haheauka na namo. Idia e davariva hekwakwanaidia na taunimanima momo ese e davariva hekwakwanaidia heḡereḡeredia, bona idia na Kristen taudia dainai hekwakwanai ma haida danu e davari. Kristen taudia momo na Iuda tomadiho igunalaina taudia, Roma gavamanina, bona edia ruma bese ese e daḡedaḡe henidiava. (Mat. 10:21) Bona kongrigeisin lalonai, nega momo e hekwarahiva aposteit taudia bona edia hahediba koikoidia bae dadarai. (Apos. 20:​29, 30) To, unu Kristen taudia na e haheauka. (Apok. 2:3) Edena dala ai? Idia ese Baibul ai haheauka karana e hahedinaraia taudia sivaraidia e lalodia dobu, heḡereḡere Iobu sivaraina. (Iak. 5:​10, 11) Bona idia na Dirava enai goada e noi. (Apos. 4:​29-31) Dia una mo to edia haheauka karana dainai Iehova amo bae abia ahuna e laloa. (Apos. 5:41) Ita danu baita haheauka dibamu bema hanaihanai Dirava ena Hereva bona eda pablikeisin ai, haheauka karana e hahedinaraia taudia sivaraidia baita stadilaimu bona baita lalodia dobumu. w23.07 rau 3 par. 5-6

Iehova bona Iesu ese ita na e laloda badamu. Aposetolo Petro na Iesu e ḡorea murinai, ia na baine abi hidi, ia be dounu Keriso baine badinaia eiava? Iesu ese Iehova e noia Petro baine durua ena abidadama baine hagoadaia. Iesu ese ena ḡuriḡuri herevana na Petro e hamaorolaia bona e hadibaia ia na gabeai tadikakana baine hagoadadia. (Luka 22:​31, 32) Petro na Iesu ena hereva e lalodia lou neganai, una ese e hagoadaia! Ita ese abi hidi badana ta, ta uramu baita karaia neganai, Iehova ese elda taudia amo be hagoadadamu, ia dounu baita badinaia totona. (Efe. 4:​8, 11) Iehova ese Petro bona aposetolo ma haida na tauanina dalanai e durudia heḡereḡerena, ia ese iseda dabu ḡaudia na be henimu bema iena hesiai ḡaukara baita atoa gunamu. w23.09 rau 24-25 par. 14-15

Iehova ese ma haida daidiai ta karamu kara namodia iboudiai na e itamu. Ia ese unu kara na e lalo badamu, unu na vaitani ia enai ta heni torehaimu bona ia ese davana baine haloua. Bema guna oi na hesiai tauna o elda madunana o abia, Iehova ese guna o kara ḡaukaradia bona o hahedinaraia lalokauna na se laloaboiomu. (1 Kor. 15:58) Danu una lalokau dounu o hahedinaraiamu dalana na e itaiamu. Iehova na e uramu ia bona ma haida ilalokau henidia karana baita habadaia. Iehova enai eda lalokau baita habadaia dalana na, iena Hereva baita duahia bona baita laloa dobu, bona hanaihanai ia baita ḡuriḡuri henia. Danu, tadikaka taihu ediai eda lalokau baita habadaia dalana na, dala idauidau ai baita durudia. Eda lalokau be badamu neganai, iseda hetura karana Iehova bona tadikaka taihu ida na be goadamu. Bona unu hetura karadia na baita moalelai hanaihanaimu! w23.07 rau 10 par. 11; rau 11 par. 13; rau 13 par. 18

Namona na Kristen taudia ta ta na bae abi hidi idia sibodia tauanidia be ede bae naria toma. Kristen taudia ese medikol hedurudia ai abi hidi e karamu neganai, Baibul ai ini taravatu, heḡereḡere rara bona babalau karadia bae dadarai taravatudia, bae badina na namo. (Apos. 15:20; Gal. 5:​19, 20) To gorere ihanamona daladia ma haida ai, sibodia edia abi hidi bae kara diba. Ena be baita lalomu gorere ihanamona ḡauna ta na namo eiava lasi, to namona na tadikaka taihu ese e karamu abi hididia baita matauraidia. Una dainai, ini poin 4 baita lalodiatao: (1) Dirava ena Basileia sibona ese gorere iboudiai be hanamodiamu. (Isa. 33:24) (2) Namona na Kristen taudia ta ta na bae diba dahaka ese idia be durudiamu. (Roma 14:5) (3) Haida basita hahemaoro henidia bona ihahekwakwanaidia ḡauna ta basita karaia. (Roma 14:13) (4) Kristen taudia ese lalokau bae hahedinaraia, bona bae laloparara kongrigeisin ena lalotamona karana na mai anina bada.—Roma 14:​15, 19, 20. w23.07 rau 24 par. 15

Oi ese Iehova o lalokau henia badamu, a? A dibamu haerena na oibe! Idaunega amo ema bona hari momo na oi heḡereḡeremu Iehova e lalokau heniamu. (Sal. 104:​33, 34) Bona idia momo na ḡau haida e dadarai Iehova bae tomadiho henia. Idaunega Israel ai Nasiri taudia na unu e kara toma eiava e gwauhamatalai. Una hereva Nasiri na Israel taudia haida e herevalaidia, idia na mai edia ura ida ḡau haida e dadaraidia Iehova ena hesiai ḡaukara helaḡana bae karaia totona. Mose ena Taravatu henunai tau ta o hahine ta na Iehova baine gwauhamata henia diba Nasiri tauna ai bainela. Bona ede daudauna una gwauhamata baine badinaia na ia sibona ese baine abia hidi. (Num. 6:​1, 2) Una gwauhamata dainai ia na taravatu haida baine badina. Dahaka dainai una Israel tauna na Nasiri gwauhamatana baine karaia? Badina una Israel tauna na Iehova e lalokau henia bada bona Iena hahenamo e moalelai dainai una gwauhamata e karaia.—Deu. 6:5; 16:17. w24.02 rau 14 par. 1-2

Baibul ai, Heberu gado ai e hahanaia herevana “badinaia,” o “mia hanaihanai lalokauna,” anina na Dirava ese ena hesiai taudia ediai e hahedinaraiamu lalokauna e herevalaiamu. Una hereva tamona na e ḡaukaralaia Dirava ena hesiai taudia bogaraḡidiai e miamu lalokauna e herevalaia. (2 Sam. 9:​6, 7, NWT) Iehova na e uramu ita danu ia baita badinaia. To una badinaia karana na taina ruana be goadamu. Mani Daniel ese una kara e hahedinaraia dalana aita laloa. Daniel na Iehova e badinaiava lalonai hahetoho momo e davari. To ia laḡanina 90 mai kahana neganai, hahetoho badana ta e davaria. King ena ruma ai e ḡaukarava taudia ese Daniel na asie ura heniava bona ia ese e tomadiho heniava Diravana na asie matauraiava. Una dainai plen e kara Daniel bae alaia. Idia ese King e hamaoroa taravatu ta baine torea, unu amo Daniel bae tohoa ia be Dirava baine badinaia eiava King baine badinaia. Daniel na king baine badinaia bona basie hamasea totona dina 30 lalodiai Iehova basine ḡuriḡuri henia. To ia na dounu Iehova e badinaia.—Dan. 6:​12-15, 20-22. w23.08 rau 5 par. 10-12

Iehova na e uramu tadikaka taihu ilalokau henidia karana baita goadalaia. Bema ta ese e kara auka henidamu basita badu haraḡa na namo. Bona baita helalotao, ia danu e hekwarahimu Iehova baine hamoalea. (Her. 12:18) Dirava ese ena abidadama hesiai taudia na e lalokau henidiamu, ena be mai edia manoka ḡaudia. Danu eda kerere na se duahimu, bona ena badu na se mia hanaihanaimu. (Sal. 103:9) Ta moalemu badina Iehova ese eda dika e gwautaomu, ita danu baita hekwarahi ma haida edia dika baita gwautao! (Efe. 4:32–5:1) Baita helalotao dokona na e kahikahimu dainai, tadikaka taihu ida eda hetura karana na baita hagoadaia. Daḡedaḡe karadia danu be badamu. Eda abidadama dainai dibura ruma ai bae atoda diba. Nega unu bamodiai, tadikaka taihu edia heduru baita abia na mai anina bada.—Her. 17:17. w24.03 rau 15-16 par. 6-7

Baibul ese matamata taudia e sivarailaidia, idia na Iehova turana ai ela, iena lalonamo e abia, bona edia mauri na e moalelaia. Idia ta na David. Ia na ena matamata negana ai Dirava e badinaia, bona gabeai king namona ta ai ela. (1 Han. 3:6; 9:​4, 5; 14:8) David sivaraina bo stadilaiamu neganai, una ese oi na be hagoadamumu. Eiava emu stadi projek ai Mareko eiava Timoteo sivaraina ba stadilaia. Idia na edia matamata negana amo Iehova e hesiai henia dainai, iena lalonamo e abia. Emu matamata negana ai bo karamu abi hididia ese emu mauri be hanamoamu eiava be hadikaiamu. Bema Iehova bo abidadama heniamu, bona sibomu emu laloparara basio abidadama heniamu, ia ese be durumumu. Emu mauri na bo moalelaiamu. Ba helalotao, Iehova ese ia dainai o karamu ḡaudia na e lalo badamu. Emu mauri lalonai Tamada lalokauna, Iehova, ba hesiai henia na hahenamo badana. w23.09 rau 13 par. 18-19

Aposetolo Paulo na mai dibana Kristen tadikaka taihu na dia ḡoḡoevadae. Heḡereḡere, ia na hahediba ta ai ela neganai, kongrigeisen taudia ese e gari heniava. (Apos. 9:26) Gabeai, haida ese e maumauraia badina e urava ia ladana bae hadikaia. (2 Kor. 10:10) Bona Paulo ese elda ta ena abi hidi kererena amo haida e hahekwakwanaidia karana na e itaia. (Gal. 2:​11, 12) Nega ma ta ai be turana Mareko ese lalona e hahisia bada. (Apos. 15:​37, 38) Unu lalohisihisi karadia daidiai Paulo ese idia na basinema bamodia. To, ia ese lalohadai maorona e abia dainai, tadikaka taihu na e lalodia badava bona dounu Iehova e hesiai heniava. Dahaka ese Paulo e durua e haheauka? Paulo ese tadikaka taihu na e lalokau henidia bada. Una dainai edia kerere na se lalova, to edia kara namodia hari e lalova. Danu lalokau dainai hari dina ena siri ai e gwauraia herevana e badinaia. w24.03 rau 15 par. 4-5

Baibul ai sivarai momo ese e hahedinaraimu manau karana na mai anina bada. Mani Isaak ena haheitalai aita laloa. Ia na Filistia tanona ta, Gerara ai e nohova neganai, Filistia taudia na e mama dainai, ia tamana ena hesiai taudia ese e ḡei ranu guridia e tahunidia. Isaak na idia ida unu ranu guri daidiai se heai, to ena ruma bese na gabu ma ta e laohaidia bona ranu guri ma haida e ḡei. (Gen. 26:​12-18) To, Filistia taudia na e gwa unu ranu guri danu idia edia. Ena be unu e vara, to Isaak na maino dalanai e kara. (Gen. 26:​19-25) Dahaka ese e durua e manau? Ia ese tamana sinana edia haheitalai namona e itaia. Ia tamana Abraham na maino daladia ai ḡau e karava bona sinana Sara na lalo manau hahinena.—1 Pet. 3:​4-6; Gen. 21:​22-34. w23.09 rau 15 par. 4

Iehova na mai lalokauna ida Natuna roboana e siaia tanobada ema, taunimanima na una Basileia baine hahedibalaidia bona ena mauri baine heni unu amo kara dika bona mase amo baine ruhada. Bena Iehova ese Iesu na mase amo e hatorea isi lou bona King ai e halaoa, ena Basileia baine lohiaia totona. Baibul ena hereva badana na Iehova ese ladana baine hahelaḡaia, una na Keriso ese Dirava ena Basileia amo tanobada ai Iena ura baine haḡuḡurua neganai baine vara. Iehova ena ura na basine idau diba. Bona ia na e gwauhamata ia e gwaurai ḡaudia iboudiai na bae ḡuḡuru. (Isa. 46:10; Heb. 6:​17, 18) Vaira negai, tanobada na paradaiso ai be laomu, bona Adam bona Heva besedia haida, Dirava e badinaiamu kara maoromaoro taudia, na unuseniai be ḡoevadaemu bona mai moaledia ida be ‘mauri hanaihanaimu.’ (Sal. 22:26) To, Iehova na dia una mo be haḡuḡuruamu. Ia ese guba ai bona tanobada ai ena hesiai taudia iboudiai na lalotamona ai baine hanohodia. Bena ia na edia King dainai, idia iboudiai na ia sibona mo be badinaiamu. (Efe. 1:​8-11) Momokani, Iehova ese ena ura e haḡuḡuruamu dalana na hoa ḡauna, ani? w23.10 rau 20 par. 7-8

Babulono e rakatania Iuda taudia na Ierusalem ai e kau neganai, idia momo ediai na e auka edia ruma bese bae naridia. Danu, Parasa Gavamanina lalonai heriheri e varava bona badi besedia ese e daḡedaḡe henidiava, una dainai haida ediai na e auka Iehova ena dubu helaḡa ihagini louna ḡaukarana bae atoa guna. Iehova ese peroveta taudia rua Hagai bona Sekaraia, e siaidia idia bae hagoadadia, bona edia hahegoada herevadia ese namo bada e havara. (Hag. 1:1; Sek. 1:1) To kahirakahira laḡani 50 muridiai, Iuda taudia na e manoka dainai, hahegoada bae abia lou na namo. Una dainai Esera, Taravatu itorena tauna ta, na Babulono amo ela Ierusalem idia baine hagoadadia Iehova itomadiho henina karana bae atoa guna. (Esr. 7:​1, 6) Idaunega ai Hagai bona Sekaraia edia peroveta herevadia ese Dirava ena taunimanima e durudia daḡedaḡe negadiai Iehova enai bae tabekau heḡereḡerena, hari inai nega ai ita danu be durudamu ta davarimu hekwakwanai lalodia ai Iehova enai baita tabekau.—Her. 22:19. w23.11 rau 14-15 par. 2-3

Ededia dala ai tadikaka taihu ediai lalokau ta hahedinaraiamu? Dala ta na, idia baita hagoadadia. Hebogahisi dainai ta uramu baita “hahegoada heheni.” (1 Tes. 4:18) Edena dala ai eda helalokau heheni karana baine goada? Baita hekwarahi ma haida edia dika baita gwautao. Dahaka dainai hari helalokau heheni karana na mai anina bada? Petro ese badina e gwauraia, eto: “Ḡau iboudiai dokodia vada be kaumu; . . . ba heura heheni mai lalomui idoidiai.” (1 Pet. 4:​7, 8) Ina tanobada dikana na kahirakahira be oremu dainai, dahaka be varamu? Iesu ese ena hahediba e hamaorodia, eto: “Lau ladagu dainai bese iboudiai ese bae inai henimui.” (Mat. 24:9) Baita gini goada totona, namona na lalotamona ai baita noho. Unu baita kara tomamu neganai, Satana ese ita na basine hapararadamu, badina ita na ta helalokau hehenimu.—Fili. 2:​1, 2. w23.11 rau 13 par. 18-19

Dirava ena Hereva momokani na mai siahuna. Taunimanima ta durudiamu Iehova ena kara korikori e dibamu neganai, ḡau namodia e varamu. Taunimanima na e lalopararamu Satana ena hereva na koikoi bona e dibamu, Tamada lalokauna ena kara na nanamo heherea. Bona idia na e hoamu badina iena siahu na asi hetoana. (Isa. 40:26) Idia na e moalemu badina Ia na hahemaoro ḡoevaḡoeva Diravana. (Deu. 32:4) Iena aonega na dobu herea dainai, idia na ḡau momo e dibamu. (Isa. 55:9; Roma 11:33) Bona e dibamu Iehova na lalokau Diravana dainai una ese e hagoadadiamu. (1 Ioa. 4:8) Iehova e dibaiamu lalonai, e abia daemu, mauri hanaihanai helarona na momokani. Taunimanima ta durudiamu Iehova bae hakahikahia na hahenamo badana! Bema unu baita kara tomamu, Iehova na be moalemu badina ita na ia ida ta “ḡaukara heboumu.”—1 Kor. 3:5. w24.02 rau 12 par. 15

Bema oi na Baibul stadi ta eiava tamamu sinamu na Iehova ena Witnes bona hereva momokani ai o bada, oi danu bapatiso iabina lalohadaina o abiamu, eiava? Bema oibe, una na goal namona! To namona na Iehova enai emu mauri ba gwauhamatalaia guna bena gabeai ba bapatiso. Emu gwauhamata Iehova enai be ede ba karaia toma? Ḡuriḡuri amo Iehova ba hamaoroa oi na o uramu ia mo ba tomadiho henia, bona emu mauri ibounai lalonai ena ura bavatoa guna. Oi na o gwauhamatamu, Iehova na “mai lalomu idoinai, [emu mauri] idoinai, mai daramu idoinai, [bona] mai goadamu idoinai” ba lalokau henia. (Mar. 12:30) Una gwauhamata na oi bona Iehova padamui ai bo karaiamu ḡauna. To bapatiso be idau, una na taunimanima vairadiai bo hahedinaraiamu oi na gwauhamata ta vada o karaia. Una gwauhamata na helaḡa dainai, namona na ba haḡuḡurua, badina Iehova danu e uramu oi na unu ba kara toma.—Koh. 5:4. w24.03 rau 2 par. 2; rau 3 par. 5

Headava lalonai hekwakwanai na idauidau. Baibul ese e hahedinaraiamu headava taudia na “hisi do bae ani.” (1 Kor. 7:28) Dahaka dainai? Badina headava ese dia ḡoevadae taudia rarua e hatamonadiamu, idia ta ta edia kara, kastom, bona mauri daladia na i-daui-dau. Una dainai headava murinai be karamu karadia haida ese hekwakwanai be havaramu. Heḡereḡere hewakwanai e varamu neganai, tau bona hahine ese hekwakwanai ihamaoromaorona daladia se tahumu, to gwau na ta ese ma ta e heniamu. Una dainai e laloamu bae parara eiava bae divos na namo. To una ese hekwakwanai be hamaoromaoroamu, a? Lasi. Iehova na e uramu headava lalonai tau bona hahine na bae noho hebou ena be ta ena kara na auka. w24.03 rau 16 par. 8; rau 17 par. 11

Dirava o gwauhamata henia bona o bapatiso murinai, tanobada paradaisona ai mauri hanaihanai bavabia helarona na e goada e laova badina oi ese Iehova o dibaia namonamo bona emu lalokau ia enai o habadaia. (Heb. 5:13–6:1) Bena Roma 5:​2-4 ese e herevalai ḡaudia na oiemu ai e vara. Oi na hisihisi idauidau o davari, to o haheaukalaidia bona Dirava ena lalonamo o abia. O dibamu Dirava ese oi na e lalonamo henimumu dainai, o abia daemu ia ese e gwauhamatalai ḡaudia na bo abimu. Bena emu helaro na e goada, dia guna bamona. O abia dae una helaro na momokani. Bona una ese e durumu emu mauri dalana o hanamoa, emu ruma bese o kara henidiamu dalana, o abi hidimu ḡaudia bona emu nega o ḡaukaralaiamu dalana danu e haidaua. Aposetolo Paulo ese eda helaro dainai hahegoada herevana ta e gwauraia. Ia na e gwa emu helaro anina na baine ḡuḡuru.—Roma 15:13. w23.12 rau 12-13 par. 16-19

Hekwakwanai badana ta na edai e varamu neganai, eda hemami, lalohadai, bona kara na e idaumu. Una na vaitani lai gubana ese bouti ta e bibia laomu e bibia maimu na heto. Bema ita danu hemami unu bamodia ta abimu Iehova be edena dala ai ita e durudamu? Ia na e gwa, ita eda imuda ai bainela eiava baine haginida tutuka. Lai gubana ta e toamu neganai, kada badadia na hurehure ese hamareredia momomu. Una dainai kada basine hebubu totona, henudiai na stablizers, unu amo kada na basine marere momo bona pasendia ese edia laolao na bae moalelaia. Kada ena stablizers na be ḡaukaramu bema kada na dounu e heaumu. Una heḡereḡerena, bema nega aukadiai Iehova na dounu baita hesiai heniamu, ia ese ita na be haginida tutukamu. w24.01 rau 22 par. 7-8

O garimu eiava o lalohekwarahimu negadiai, sibomu ba henanadai, ‘Guna Iehova be dahaka e kara?’ Ia ese e havara ḡaudia ba haerodia. Heḡereḡere, manu bona flaoaflaoa, ena be Iehova asie tohotohoamu eiava asie toma henia dihomu, to Iehova ese e naridiamu, una dainai ta abidadamamu Iehova ese ita danu be naridamu. (Mat. 6:​25-32) Danu, Iehova ese ia e tomadiho henia taudia daidiai e kara ḡaudia ba lalo. Heḡereḡere, abidadama tauna o hahinena ta sivaraina Baibul ai ba stadilaia, eiava hari ina negai Iehova e hesiai heniamu tauna ta ena ekspiriens ba duahia. Iehova ese oi daimuai e kara ḡaudia danu ba lalodia dobu. Oi be ede e durumu toma unu amo ia o dibaia? (Ioa. 6:44) Oiemu ḡuriḡuri be ede e haerelai toma? (1 Ioa. 5:14) Ia Natuna lalokauna ena boubou ḡauna dainai dina ta ta ai oi be ede e durumu tomamu?—Efe. 1:7; Heb. 4:​14-16. w24.01 rau 4 par. 6; rau 7 par. 17