Baibul Istadilaina Karana Ba Hanamoa Bona Ba Moalelaia Dalana

IOSUA ese Israel besena na Gwauhamata Tanona ai baine hakaudia vareai. Una na mai hekwarahina. To, Iehova ese e hadibaia ia na baine kwalimu, bona e hagoadaia, eto: ‘Ba goada bona ba haheauka. Egu taravatu ba badina. Ba laloa boi, ba laloa rani, unu amo ia lalonai e tore herevadia iboudiai ba badinadia bona karadia ba kara, bena emu raka baine namo bona emu kara anidia bae namo.’—Ios. 1:7, 8.

Ita na ini “dina gabedia ai nega dikadia” lalodiai ta nohomu dainai, hekwakwanai momo baita davarimu. (2 Tim. 3:1) Iosua heḡereḡerena, Iehova ena sisiba baita badinamu neganai baita kwalimu dibamu. Namona na Baibul baita duahia hanaihanai, bona ena hahekau herevadia baita badina namonamo.

To, ita momo na baita gwaumu stadi dalana na asi dibada bona stadi karana na auka. To, Baibul istadilaina karana na mai anina bada dainai, maua ladana “Ini Heduru Herevadia Ba Tohodia” ba riviulaia, una ese be durumumu emu stadi karana ba hanamoa bona ba moalelaia totona.

Salamo itorena tauna na eto: “Emu haheḡani dalana ai ba hakaugu, badina be una dala na moalelaiamu.” (Sal. 119:35) Oi ese Dirava ena Hereva na bo moalelaia dibamu. Iena hereva bo tahua namonamomu neganai ḡau namodia momo bo davarimu.

Ena be bese ta so hakauamu, Iosua e kara heḡereḡerena, to hekwakwanai momo o davarimu. Una dainai, Iosua heḡereḡerena, Dirava ena Hereva ba stadilaia bona ba badinaia. Unu bo kara tomamu neganai, bo kwalimumu bona abi hidi maorodia bo karamu.

INI HEDURU HEREVADIA BA TOHODIA

Do so stadi lalonai ba ḡuriḡuri guna. Baibul lalonai siahu idoinai Diravana ena lalohadai mimia, idia na oi idurumu totona e tore. Una dainai Baibul ba duahia neganai, Iena heduru ba noia, ba duahia ḡauna ba lalopararalaia, ba laloatao, bona emu mauri ai ba badinaia totona.—Esr. 7:10.
Sibomu henanadai haida ba heni Baibul eiava pablikeisen ta o duahiamu neganai. ‘Ina kaha ese Iehova be ede e herevalaia toma? Edena dala ai Baibul ena sinado badana e hahedinaraia? Ini hereva be edena dala ai baina ḡaukaralaidia ma haida baina durudia?’
O stadilaimu ḡaudia ba lalodia dobu. Nega sisina lalonai emu duahiduahi karana do ba hadokoa, bena ba lalohadai. Ina hereva ese lau be edena dala ai e durugumu? Dahaka dainai unu na hemami tomamu? Edena dala ai una ese guna egu ai e vara ḡaudia, harihari egu ai varamu ḡaudia, eiava vaira nega ai bae vara ḡaudia e herevalai? Edena dala ai ini hahekau herevadia Baibul ai bona ina sisiba baina badinadia diba? (Iobu 23:5; Sal. 49:3) Ba lalo dobu neganai, ba itaia dahaka dainai Iehova ese ena taunimanima e hamaorodia kara haida bae dadarai, eiava ba laloa bema ta na kara idauna ta baine karaia, dahaka dika baine vara diba.—Deu. 32:28, 29.
Lalomu ai ba lalohadailai. Baibul siridia o duahimu neganai unu ba kara toma. Heḡereḡere, mani ina a laloa, Iosef na kakana ese Ismael taudia ediai e hoihoilaia. (Gen. 37:18-28) Dahaka o itamu, o kamonaimu, eiava o hairumu? Sivarai ai e gwauraidia taudia edia kara ba lalo. Edia lalohadai bona hemami be ede bamona? Lalomu ai unu bo lalohadailaimu neganai, emu stadi bo lalopararalaiamu bona bo moalelaiamu.
Stadi tuludia ba ḡaukaralai. Orea ese tulu idauidau e halasi emu hetahu karana ba hanamoa totona. Emu gado ai e halasi tuludia iḡaukaralaidia daladia ba diba namonamo, Intanet bona e printi ḡaudia ai. Basio hemarai to ma haida ba noidia unu tulu ba ḡaukaralai namonamo daladia bae hadibamu. Heḡereḡere, The Watch Tower Publication Index eiava Iehova Ena Witnes Taudia Edia Stadi Indeks, ese bae durumu topik idauidau bona Baibul siridia momo e herevalai herevadia ba davari totona. Mai dibamu gadona ta ai e hahanaia New World Translation of the Holy Scriptures ena apendiks ba ḡaukaralaia. Idia ese Baibul e gwaurai tanodia, ḡau idauidau e vara negadia, metau ihahetohodia ḡaudia eiava sikele, bona ma ḡau haida e herevalai.
Hereva badadia ba riviulaidia. Una ese be durumumu o stadilai ḡaudia ba lalodiatao. To, namona na ma haida ediai ba herevalai. O dibaia ḡauna be emu hesiai ḡaukara ai ba ḡaukaralaia diba, a? Unu bo kara tomamu neganai, hereva badadia bo lalodia taomu, bona o stadilai ḡaudia amo ma haida bo durudiamu.