Headava Dinana ai Iehova Ba Hamoalea Dalana

1-2. Iehova na e uramu headava dinana ai dahaka ba kara?

UMUI maoheni taumui be kahirakahira bo headavamu, a? Bema oibe, una na moale dinana. Reana umui na emui headava dinana ena plen o karamu dainai, taina o bisi badamu. Iehova na e uramu umui ese emui headava dinanaa na ba moalelaia, bona gabeai umui na ba noho hebou namonamo.—Prov. 5:18; Sol. 3:11.

² Emui headava dinana ai Iehova ba hamoalea na mai anina bada. Dahaka dainai? Ina atikol ena hahekau herevadia ese headava dinana ena plen e karamu maoheni taudia, idia be durudiamu taudia, be invaitidiamu taudia, o ita iboudai be durudamu una dina ai Iehova baita hamoaleamu.

IEHOVA BAITA HAMOALEA BADINA BE DAHAKA?

3. Maoheni tadikaka bona taihu ese edia headava plen e karamu neganai, dahaka bae laloa be namo, bona dahaka dainai?

³ Tadikaka bona taihu ese edia headava dinana ena plen e karamu neganai, namona na idia ese Iehova ena hahekau herevadia bae badina. Dahaka dainai? Badina headava na Iehova ese e hamatamaia. Matamana negana ai, Dirava ese Heva e heni, Adam ese e adavaia. (Gen. 1:28; 2:24) Una dainai, headava dinana ena plen e karamu maoheni taudia ese Iehova ena lalohadai bae matauraia na namo.

4. Maoheni taudia ese edia headava dinana ai Iehova bae hamoalea badi ma ta be dahaka?

⁴ Emui headava dinana ai Iehova ena lalohadai ba matauraia badina hereadaena be ina: Ia na Tamamui bona Turamui namo hereana. (Heb. 12:9) Umui na o uramu Dirava na umui turamui ai bainela ela bona hanaihanai. Danu asio uramu una dina o dina idauna ma ta ai kerere ta baine vara bena Dirava lalona ba hahisia. (Sal. 25:14) Iehova ese umui daimui ai e kara ḡaudia bona nega vaira ai baine kara ḡaudia iboudiai bo lalomu neganai, umui na emui headava dinana ai Iehova bo hamoaleamu.—Sal. 116:12.

EDENA DALA AI IEHOVA BAITA HAMOALEA?

5. Edena dala ai Baibul ese maoheni taudia be durudiamu edia headava ena plen bae karaia namonamo?

⁵ Tadikaka bona taihu ese edia headava dinana bona ariana ai bae kara o basie kara ḡaudia listana na Baibul ese se gwauraia. Una dainai, idia ese edia headava dinana ena plen na edia kastom bona noho dalana heḡereḡerena ai bae karaia na asi taravatuna. Idia ese gavamani ena headava taravatudia danu bae badinadia. (Met. 22:21) Ena be Baibul ai headava dinana ena plen listana ta se gwauraia, to bema maoheni taudia ese na Baibul ena hahekau heḡereḡerena plen be karaiamu, idia na Iehova e hamoaleamu karadia mo be abi hidimu. To, ededia hahekau herevadia ba lalotao be namo?

6. Dahaka dainai maoheni taudia ese gavamani ena headava taravatudia bae matauraidia na mai anina bada?

⁶ Gavamani ena taravatu iboudiai ba matauraidia. (Rom. 13:​1, 2) Tano momo ai, gavamani na e uramu maoheni taudia ese taravatu haida bae badina. Umui ese unu taravatu ba dibadia na namo. Bema umui na o uramu unu infomeisen bavabi, namona na elda ba noidia bae durumui.b

7. Edena dala ai emu headava dinana ai kara maorodia ba kara?

⁷ Kara maorodia ba kara. (1 Ko. 10:​31, 32) Umui na o uramu headava dinana ai Dirava ena kara namodia ba hahedinarai, dia tanobada ena kara. (Gal. 5:​19-26) Tadikaka na femli matamata kwarana ai be laomu dainai, plen namodia baine kara unu amo ena headava dinana ai baema taudia na bae moale bona una dina bae matauraia. Una baine vara dalana na, tadikaka ta ese Baibul amo wedin tok na mai lalokau, manau bona hemataurai ida baine heni, unu amo e kamonaimu taudia na be lalopararamu headava na Dirava ena harihari ḡauna ta. Danu, una tok ese ema taudia be durudiamu headava dinana ai hemataurai karadia bae kara totona. Unu daidiai, tadikaka bona taihu momo na Kingdom Hall ai e headavamu. Bema umui na o uramu Kingdom Hall ta ai ba headava, namona na emui noinoi revareva na nega bada lalonai una Kingdom Hall ena elda oreana ba siai henia.

8. Edena dala ai emu headava ariana ai Dirava ba hamoalea? (Roma 13:13)

⁸ Roma 13:13 ba duahia. Headava dinana ena aria ai, umui ese tanobada ena kara be ede ba koua toma? Grik gado herevana ta e hahanaia “reḡereḡe bada pati,” anina na ina: Aria haida ai, taunimanima na alkahol momo e inumu bona miusik e hataimu ela bona malo kahadia. (Rom. 13:​13, NWT-MO) Bema umui o uramu aria ai bia danu bavato lasi, nega bada lalonai ḡau haida ba kara, unu amo ta basine inu kekero.c Bema umui o uramu miusik danu ba hatai, ena volume o reḡe na gabu maorona ai baine mia, unu amo vadivadi taudia na edia herevahereva bae moalelaia. Danu, umui ese ane maorodia bavabi hidi, unu amo ta basio hahekwakwanaia.

9. Haida e uramu headava ariana ai moale karadia eiava hereva haida bae gwaurai, maoheni taudia be dahaka bae kara?

⁹ Tano haida ai, aria negadiai, headava taudia edia femli bona turadia na e gini toremu bena hereva kwadoḡidia haida e gwauraimu. Ma haida be headava taudia laulaudia e hahedinaraimu o moale karadia ma haida e karamu. Nega momo unu ese headava dinana e hanamoamu. To, umui na o uramu unu ese ta baine hagoadaia danu. (Flp. 4:8) Una dainai sibomui ba henanadai: ‘Idia ese ma haida be hahemaraidiamu eiava? Idia ese headava be matauraiamu eiava?’ Mai anina bada henanadaina be ina: ‘Idia ese Iehova be hamoaleamu eiava?’ Ena be ta ese hevaseha haida baine gwaurai na asi taravatuna, to ia ese lalohadai kereredia bae havara hereva mirodia eiava matabodaḡa hevasehadia na basine gwaurai. (Efe. 5:3) Bema femli bona turamu ta na e uramu aria ai ḡau ta baine gwauraia, namona na ba hadibaia namonamo unu amo oi uramu herevadia mo baine gwaurai.

10. Emui headava dinana ena plen o karamu neganai, dahaka dainai manau karana ba hahedinaraia? (1 Jon 2:​15-17)

¹⁰ Ba manau. (1 Jon 2:​15-17 ba duahidia.) Iehova na e moalemu bema ena hesiai taudia na sibodia ladadia se abi isimu to Ia e hamoaleamu ḡaudia e karamu. Una dainai, e manaumu tadikaka taihu na asie uramu bae ‘heaḡi bona moni bada bae nege. Headava dinana ai umui ese ḡau momo basio kara ena namo be dahaka? Norway ai, tadikaka ta, Mike, na e gwa: “Ai na emai headava dinana totona asia abitorehai, una dainai dounu a painiava. Ena be una dina ai ḡau momo asia kara, to una moale dinana na doini a laloa taomu.” India ai, taihu ta ladana Tabitha, na eto: “Aina asia ura baia lalohekwarahi. Una dainai, emai headava dinana ai ḡau momo asia kara bona lalohisihisi ḡauna ta se vara.”

11. Tadikaka taihu ese edia dabua bona heḡoeva dalana amo manau karana be ede bae hahedinaraia toma? (Laulau danu ba itadia.)

¹¹ Umui ese headava dabuadia vada o abi hidi? Vaia umui o uramu emui dina badana ai toamui na bae namo. Baibul negadiai danu, maoheni taudia na toadia e lalo badava. (Isa. 61:10) Ena be headava dinana ai umui ese emui headava dabuadia na vaevae o riomu dabuadia amo taidia be idaumu, to dia namo o riomu dabuadia ese ma haida bae hahekwakwanaidia. (1 Ti. 2:9) Dia namo, headava dinana ai dabua—o ma ḡau haida—na umui ese ḡau badadia ai ba halaodia.—1 Pi. 3:​3, 4.

12. Dahaka dainai maoheni taudia ese edia gabu ai Baibul ena taravatu e utumu kastom karadia bae dadarai na namo?

¹² Baibul ena taravatu e utumu kastom karadia iboudiai ba dadarai. (Rev. 18:4) Hari ina nega ai, taunimanima ese headava dinadia ai tomadiho koikoi karadia o lauma dikadia e moalelaimu ḡaudia e karamu. To Iehova ese ita e haḡanidamu, miro ḡaudia iboudiai edia amo baita raka oho. (2 Ko. 6:​14-17) Bema umui o uramu ba diba emui gabu ai ededia kastom o sene karadia be Baibul ena taravatu e utumu, namona na nega bada lalonai research ba kara—una hetahu ai bo davarimu information o Baibul ena hahekau herevadia ese be durumuimu abi hidi maorodia bo karamu.

13. Maoheni taudia ese Iehova be ede bae tohotohoa toma, harihari ḡaudia e abi daemu neganai?

¹³ Oi o nohomu gabuna ai haida ese harihari ḡaudia na headava taudia e henidiamu, ani? Taḡa taudia edia harihari ḡaudia be reana ma haida edia amo be idaumu. Baibul ese tadikaka taihu e hagoadadiamu harihari bada karana bae goadalaia bona una ese idia na e hamoalediamu. (Prov. 11:25; Apos. 20:35) To, asita uramu ta invaitidia taudia ese bae mamia, ita na idia ta doridiamu harihari ḡaudia bae heni. Danu asita ura idia ese bae mamia, ita ese edia harihari ḡauna na asita moalelaiamu. Edia davari heḡereḡerenai e henidamu harihari ḡaudia ta moalelaimu neganai, ita ese Iehova ta tohotohoamu.—2 Ko. 9:7.

HEKWAKWANAI IDAUIDAU BA HANAIDIA

14. Maoheni taudia haida ese e davarimu hekwakwanai haida be dahaka?

¹⁴ Vaia umui na o uramu emui headava dinana ai Iehova ba hamoalea, to una dina ena plen o karaiamu lalonai, hekwakwanai haida na be varamu. Heḡereḡere, umui na bo daradaramu emui lista ai be dahaka ba koki. Solomon Islands ai, tadikaka ta ladana Charlie, na eto: “Ai na a daradarava, daidia baia boiridia headava ariana baema. Turamai na momo herea, bona emai kastom ai, idia iboudiai baia invaitidia na namo.” Matamanai tame herevalaia taihuna, Tabitha, na eto: “Egu gabu ai momo na aria badadia e karamu. Matamanai, tamamai bona sinamai na asie moaleva, badina ai ese a invaitidia taudia na 100 mo, to gabeai idia ese emai ura na e matauraia.” India ai, taihu ta ladana, Sarah, na eto: “Taunimanima haida na moni bona ladadia mo e lalomu. Egu kasen momo na edia headava dinadia ai, moni bada herea e ḡaukaralaiva, una dainai na laloava ai danu unu baia kara toma na namo.” Dahaka ese be durumumu hekwakwanai unu bamodia ba hanai?

15. Emui headava plen o karamu neganai, dahaka dainai ḡuriḡuri karana na mai anina bada?

¹⁵ Nega iboudiai Dirava ba noia emui headava dinana ena plen baine hanamoa. Bema umui na ḡau haida o lalohekwarahilaimu, Iehova ba ḡuriḡuri henia. (Flp. 4:​6, 7) Umui ese Dirava ba noia baine durumui abi hidi maorodia ba kara, basio laloa momo, bona basio gari. (1 Pi. 5:7) Bona bavabia dae Dirava ese emui ḡuriḡuri na be haerelaimu. Taihu Tabitha na ma eto: “Ai ese a lalohekwarahilaiava ḡauna na, ai raruosi bona emai femli padamai ai lalotamona be varamu eiava lasi. Una dainai, emai wedin plen a herevalaiva negadiai a ḡuriḡuri gunava. A mamia momokani Iehova ese ai na e durumai, bona ai raruosi bona emai femli na a lalotamona.”

16-17. Headava ariana ena plen o karaiamu neganai, dahaka dainai herevahereva namonamo karana na mai anina bada?

¹⁶ Ḡau iboudiai ba herevalai namonamo mai hemataurai ida. (Prov. 15:22) Maoheni taumui e, umui sibomui ese ini abi hidi ba kara na maoro: Headava dinana, moni hida bae heḡaukaralai, daidia ba invaitidia, bona ma ḡau haida. Unu abi hidi do so kara lalonai, Baibul ena hahekau herevadia bona lo tadikaka taihu edia sisiba herevadia ba herevalaidia namonamo. Una murinai mai hematauraimui ida abi hidi ba kara. Bema tamamui, sinamui o varavaramui na lalohadai namodia haida e gwauraimu, mani edia ura bavabi dae. Badina idia ediai danu una na dina badana. To bema umui ese edia lalohadai na so abi daemu, namona na mai hematauraimui ida una ba herevalaia. (Kol. 4:6) Emui femli ba hadibadia umui na o uramu emui headava dinana ai ema taudia na bae moale bona o uramu Iehova danu ba hamoalea.

¹⁷ Bema tamamui o sinamui na dia Iehova ena Witnes, namona na idia ediai emui abi hidi na mai hematauraimui ida ba herevalaidia namonamo. India ai Tadikaka ta ladana, Santhosh, na eto: “Emai femli na e urava ai ese emai lista ai Hindu edia kastom idauidau danu baia tore. Ai raruosi ese emai abi hidi na nega momo idia ida a herevalaia. Bena emai lista ai edia ura ḡaudia haida a tore, badina a itaia unu ese Iehova ena taravatuna na basie utuamu. Heḡereḡere, ai ese a ura henimu anianidia na lista amo a kokidia bena idia e uramu anianidia a toredia, to ane bona mavaru na asi a toredia, badina edia mauri ai unu na se manadalai.”

18. Headava dinana ai ḡau iboudiai ba heau namonamo totona, dahaka ba kara? (1 Korinto 14:40) (Laulau danu ba itaia.)

¹⁸ Plen ibounai ba karaia namonamo. Umui ese ḡau iboudiai bo kara namonamomu neganai, headava dinana ai umui na bo moalemu. (1 Korinto 14:40 ba duahia.) Taiwan ai, tadikaka ta ladana, Wayne, na eto: “Emai headava dinana e kahirakahirava lalonai, ai na bae durumai taudia ida hebou kwadoḡina ta abia. Ai ese emai plen a herevalai bona kaha haida na a praktis, badina a urava headava dinana ai ḡau iboudiai na bae heau namonamo.” Danu, ḡau iboudiai na edia nega korikori ai ba karadia, unu amo bo hahedinaraiamu bo invaitidiamu taudia o matauraidiamu.

19. Aria ai ḡau iboudiai bae heau namonamo totona, dahaka ba kara be namo?

¹⁹ Umui ese ḡau iboudiai bo haero namonamomu gunamu neganai, headava dinana ai hekwakwanai na basie varamu. (Prov. 22:3) Heḡereḡere, reana emu gabu ai, umui ese haida na basio boiridiamu to aria ai idia na be hedinaraimu. Una hekwakwanai basine vara totona, oi be dahaka ba kara? Namona na dia Witnes varavara ediai headava dinana ai be varamu ḡaudia bona ededia kastom karadia so abi daemu na ba hadibadia. Bona jw.org ai atikol ladana “What Happens at a Wedding of Jehovah’s Witnesses?” na umui ese idia ediai ba herevalaia diba. Danu, aria ai ḡau iboudiai bae heau namonamo totona, umui ese lo tadikaka ta na “aria biaguna” ai ba halaoa. (Jon 2:8; NWT-MO) Bema umui ese emui plen iboudiai na aria biaguna enai bo herevalai namonamomu, aria negana ai, ia ese unu na be badinadiamu bona ḡau iboudiai na emui ura heḡereḡerena ai be heaumu.

20. Maoheni taudia ese edia headava dinana ai dahaka bae laloatao be namo?

²⁰ Headava dinana ai be varamu ḡaudia iboudiai ena plen bo karamu neganai, reana bo lalohekwarahimu. To ba helalotao, emui headava na dina tamona ai mo be varamu. Una dina amo, umui na emui headava maurina ai Iehova bo hesiai henia hebou matamamu. Una dainai, emui headava dinana ai ḡau momo basio kara bona Iehova e hamoaleamu ḡaudia ba kara. Iehova enai ba tabekau. Bona ena heduru amo emui headava ena plen namona bo karaiamu. Gabeai, umui na emui dina badana bo laloa loumu neganai basio lalohisihisimu, to bo moalemu.—Sal. 37:​3, 4.