Iehova ese Egu Ḡuriḡuri Be Haerelaimu, A?

1-2. Dahaka dainai nega haida na ta lalomu Iehova ese eda ḡuriḡuri na se haerelaimu?

“IEHOVA ba moalelaia; oi lalomu ena ura ia ese baine henimu.” (Sal. 37:4) Una na gwauhamata namo hereana, ani? To ita be baita lalo Iehova ese ta noimu ḡaudia iboudiai na maoromaoro baine henida, a? Dahaka dainai unu ta henanadai tomamu? Mani ini haheitalai haida aita lalodia: Singul taihuna ta na e ura Basileia Evanelia Skuli bainela dainai e ḡuriḡuri. To laḡani haida e ore muridiai, ia na do se boiria una skuli bainela. Matamata tadikakana ta na gorere badana ta e davaria bona Iehova e noia baine namo, unu amo kongrigeisin ai ḡaukara ma haida baine kara diba. To ena gorere na se namo. Kristen tama sina haida na e ḡuriḡuri natudia na hereva momokani lalonai baine noho. To natudia na lalona e hadaia Iehova ihesiai henina karana baine hadokoa.

² Reana oi danu Iehova enai ḡau ta o noia to haerena na so abia. Una dainai, reana o lalo Iehova ese haida edia ḡuriḡuri be e haerelaimu, a oiemu be lasi. Eiava reana o lalo oi na kerere ta o karaia. Taihu ta ladana Janiceb na unu e hemami toma. Ia bona adavana na Iehova e ḡuriḡuri henia badina e ura dikadika Betele ai bae ḡaukara. Janice na e gwa: “Lau na, na diba momokani ai na kahirakahira bae boirimai Betele ai.” To laḡani momo muridiai, idia na do se boiridia. Janice na e gwa: “Na lalohisihisi bona na daradara. Na lalova lau be dahaka na kara Iehova lalona na hahisia. Lau na Betele bainala totona ia na ḡuriḡuri henia. To dahaka dainai egu ḡuriḡuri na se haerelaia?”

3. Ina atikol ai dahaka baita herevalaimu?

³ Nega haida reana baita lalomu Iehova be eda ḡuriḡuri e kamonaimu eiava. Idaunegai abidadama taudia haida danu unu e lalo toma. (Iobu 30:20; Sal. 22:2; Hab. 1:2) Dahaka dainai bavabia dae Iehova ese emu ḡuriḡuri na baine haerelaidia diba? (Sal. 65:2) Una henanadai haerena baita diba totona, namona na ini henanadai toi aita haerelaidia guna: (1) Iehova be dahaka baine kara? (2) Iehova be e uramu ita be dahaka baita kara? (3) Dahaka dainai eda noinoi ḡaudia haida baita haidau na namo?

IEHOVA BE DAHAKA BAINE KARA?

4. Ieremia 29:12 ai heḡereḡerena, Iehova na e gwauhamata dahaka baine kara?

⁴ Iehova na e gwauhamata eda ḡuriḡuri baine kamonaidia. (Ieremia 29:12 ba duahia.) Eda Dirava ese ia e tomadiho heniamu taudia na e lalokau henidiamu, una dainai edia ḡuriḡuri na e hakala henidiamu. (Sal. 10:17; 37:28) To, una anina na dia ta noilaimu ḡaudia iboudiai na be henidamu. Eda noinoi ḡaudia haida na reana tanobada matamatana ai baita abimu, una dainai una nega baita naria.

5. Iehova ese eda ḡuriḡuri e hakalamu neganai, ia be dahaka e lalomu? Mani a herevalaia.

⁵ Iehova na eda ḡuriḡuri e hakala henimu neganai, iena ura e laloamu. (Isa. 55:​8, 9) Ia ena ura ta be ina, mai moaledia ida ena lohia dalana e badinaiamu taudia ese tanobada bae hahonua. To Satana na e gwa taunimanima na sibodia bae helohia neganai bae moale diba. (Gen. 3:​1-5) Iehova na e ura baine hahedinaraia Diabolo ena hereva na koikoi, una dainai taunimanima na se koudia sibodia bae helohia totona. To, taunimanima edia lohia dalana ese hekwakwanai momo e havaradiamu. (Koh. 8:9) Ita na ta dibamu hari ina negai Iehova ese unu hekwakwanai iboudiai na basine kokidiamu. Badina bema unu be kara tomamu, haida na be lalomu taunimanima edia lohia dalana ese hekwakwanai na e hamaoromaoromu.

6. Dahaka dainai baita abia dae Iehova ese ḡau iboudiai na mai lalokauna ida e karamu bona iena kara na maoromaoro?

⁶ Ena be ita ta ta eda noinoi ḡaudia na heheḡereḡere, to Iehova ese dala idauidau ai e haerelaimu. Heḡereḡere, King Hesekia na e gorerea neganai, Iehova e noia baine durua baine namo totona. Bona Iehova ese ena noinoi na e abia dae bona e hanamoa. (2 Han. 20:​1-6) To, aposetolo Paulo na Iehova e noia iena “ginigini,” reana una na gorere ta, baine kokia totona, to Iehova ese una na se kokia. (2 Kor. 12:​7-9) Aposetolo Iakobo bona Petro edia haheitalai danu mani a laloa. Idia raruosi na King Herod ese e ura baine hamasedia. Kongrigeisin taudia na Petro bona Iakobo daidiai e ḡuriḡuriva. To, Iakobo be e mase, a Petro be hoa dalanai aneru ta ese e hamauria. (Apos. 12:​1-11) Reana ita na baita lalomu, ‘Dahaka dainai Iehova ese Petro e hamauria to Iakobo be lasi?’ Baibul ese una na se gwauraia.c Namona na ina baita diba, Iehova ena dala iboudiai na mamaoro. (Deu. 32:4) Bona baita diba Petro bona Iakobo na Iehova ena lalonamo e abia. (Apok. 21:14) Nega haida Iehova ese eda ḡuriḡuri na dia ita ese ta laloamu dalanai e haerelaimu. To ta abia daemu Iehova na mai lalokauna ida eda ḡuriḡuri e haerelaimu bona iena kara na maoromaoro, una dainai eda ḡuriḡuri e haerelaiamu dalana na basita daradaralaia.—Iobu 33:13.

7. Ita be dahaka basita kara, bona dahaka dainai?

⁷ Ita ese edai e varamu ḡauna na ma haida edia ida basita haheḡereḡerea. Haheitalai na ina, reana ita na Iehova ta noia dala ta ai baine duruda, to eda noinoi haerena na asita abia. Gabeai, ta kamonai ma ta na ena ḡuriḡuri ai e noilaia ḡauna na ita eda heḡereḡerena, bona Iehova ese ena noinoi na e haerelaia. Taihu ta ladana Anna enai na unu e vara toma. Ia na e ḡuriḡuri adavana Matthew na ena cancer gorerena amo baine namo totona. Bona taihu burukadia rarua danu cancer gorerena e abia. Una dainai Anna na Matthew bona unu taihu raruosi daidiai e ḡuriḡuriva. Taihu raruosi na edia gorere amo e namo, a Matthew be e mase. Matamanai, Anna na e laloava unu taihu raruosi e namo badina na Iehova ese e durudia. Bema unu bamona, dahaka dainai ia adavana baine namo totona e gwaurai ḡuriḡuridia na Iehova ese se haerelaidia? Momokani, ita na asi dibada unu taihu raruosi be ede e namo toma. To mai dibada ḡauna na ina, Iehova ese eda hisihisi iboudiai na be haoredia vaitanimu, bona ia na e ura dikadikamu ia turana na mase amo baine hatoredia isi lou.—Iobu 14:15.

8. (a) Isaia 43:2 heḡereḡerena, Iehova ese ita be ede e duruda tomamu? (b) Hahetoho aukadia ta davarimu neganai edena dala ai ḡuriḡuri karana ese baine duruda? (Vidio ladana Prayer Helps Us to Cope ba itaia.)

⁸ Iehova na nega iboudiai ita be durudamu. Iehova na Tamada lalokauna dainai se uramu baita hisihisi. (Isa. 63:9) To, ia ese eda hekwakwanai iboudiai, sinavai o lai na heto hekwakwanaidia na se koudiamu. (Isaia 43:2 ba duahia.) To, ia na e gwauhamata ita baine duruda unu hekwakwanai baita hanaidia. Bona herevana dahaka hekwakwanai ta davarimu, to ia ese be durudamu eda hetura karana ia ida baita hagoadaia totona. Danu iena lauma helaḡa amo be durudamu baita haheaukamu. (Luka 11:13; Fili. 4:13) Una dainai, baita abia dae momokani ia ese eda dabu ḡaudia korikoridia na be henidamu, unu amo baita haheaukamu bona ia baita badinaia hanaihanaimu.d

IEHOVA BE E URAMU ITA BE DAHAKA BAITA KARA?

9. Iakobo 1:​6, 7 ena hereva heḡereḡerena, dahaka dainai baita abidadama Iehova ese ita na be durudamu?

⁹ Iehova na e uramu ia baita abidadama henia. (Heb. 11:6) Nega haida, baita lalomu ta davarimu hekwakwanaidia na basita hanaidia dibamu. Bona reana baita daradaramu Iehova be ita be durudamu eiava lasi. To, Baibul ese e hadibadamu Dirava ese be henidamu goadana amo “maḡu” na heto hekwakwanaidia baita hanaidiamu. (Sal. 18:29) Una dainai basita daradara, to mai eda abidadama ida Iehova baita ḡuriḡuri henia, bona baita abia dae ia ese eda ḡuriḡuri na be haerelaidiamu.—Iakobo 1:​6, 7 ba duahidia.

10. Edena dala ai eda ḡuriḡuri heḡereḡerena baita kara? Mani haheitalai ta a gwauraia.

¹⁰ Iehova na e uramu ita na eda ḡuriḡuri heḡereḡerena baita kara. Haheitalai na ina, tadikaka ta na Iehova e noia baine durua ena moni ḡaukara amo baine holidei, unu amo rijinol hebouna ta bainela diba. Iehova ese ena ḡuriḡuri be ede be haerelaia tomamu? Ia ese reana tadikaka na goada be heniamu ena bosi baine hereva henia. To namona na tadikaka danu bainela bosi dekena bona baine hereva henia. Ia ese ena bosi baine noia loulou na namo. Eiava reana ena ḡaukara hebou tauna ta baine noia ia gabunai baine ḡaukara. Eiava bema mai dalana, bosi baine noia holidei baine abia to basie peia.

11. Dahaka dainai eda lalohekwarahi ḡaudia na baita ḡuriḡurilaidia loulou?

¹¹ Iehova na e uramu ita ese eda lalohekwarahi ḡaudia na baita ḡuriḡurilaidia loulou. (1 Tes. 5:17) Iesu ese e hahedinaraia eda noinoi ḡaudia haida na basita abi haraḡamu. (Luka 11:9) Una dainai basio hesiku, to mai lalomu idoinai ida ba ḡuriḡuri loulou. (Luka 18:​1-7) Nega haida ḡau ta na ta ḡuriḡurilaia louloumu neganai, Iehova enai ta hahedinaraiamu ita edai una na mai anina bada. Danu ta hahedinaraiamu ita na ta abidadamamu Ia ese be duruda dibamu.

DAHAKA DAINAI TA NOILAIMU ḠAUDIA HAIDA BAITA HAIDAU NA NAMO?

12. (a) Iseda ḡuriḡuri karana ai edena henanadai baita laloa, bona dahaka dainai? (b) Edena dala ai eda ḡuriḡuri amo baita hahedinaraia Iehova na ta matauraiamu? (Ina maua “Egu Noinoi ese E Hahedinaraiamu Lau be Iehova Na Matauraiamu, A?” ba itaia. )

¹² Bema eda ḡuriḡuri haerena na asita abia, Reana henanadai toi baita lalodia. Ginigunana be ina, ‘Lau be ḡau maorodia na ḡuriḡurilaimu eiava?’ Nega momo baita laloamu ita na mai dibada dahaka ese be durudamu. To ta noilaimu ḡaudia ese reana ita na basie durudamu. Bema ita na hekwakwanai ta dainai ta ḡuriḡurimu, una hekwakwanai ihamaoromaorona dala namona ta na mia, dia ta ḡuriḡurilaia ḡauna heḡereḡerena. Bona ta noilaimu ḡaudia haida na reana dia Iehova ena ura heḡereḡerena. (1 Ioa. 5:14) Heḡereḡere, paragraf 1 ai ta herevalaidia tama sina mani aita lalodia. Idia na Iehova e noia natudia baine durua hereva momokani lalonai baine noho. Noinoi unu bamona na dia kerere. To, Iehova ese ita na basine doridamu ia baita hesiai henia. Ia na e uramu ita iboudai, natuda danu, ese abi hidi baita kara ia baita hesiai henia. (Deu. 10:​12, 13; 30:​19, 20) Una dainai tama sina ese Iehova bae noia diba idia baine durudia unu amo idia ese natudia bae hadibaia namonamo, una ese natudia be duruamu Iehova baine lalokau henia bona ia turana ai bainela.—Her. 22:6; Efe. 6:4.

13. Heberu 4:16 heḡereḡerena, Iehova be edena negai ita be durudamu? Mani a herevalaia.

¹³ Henanadai iharuana na, ‘Ina be Iehova ese egu noinoi baine haerelaia negana, a?’ Reana baita lalomu eda ḡuriḡuri haeredia baita abi haraḡa na namo. To, Iehova na mai dibana edena nega maorona ai baine duruda. (Heberu 4:16 ba duahia; NWT) Ta noiamu ḡauna asita abia haraḡamu neganai, reana baita laloamu, Iehova ena haere na “Lasi.’ To ia ena haere na vaitani e gwaumu, ‘Dohore.’ Heḡereḡere, paragraf 1 ai tame herevalaia matamata tadikakana aita laloa. Ia na e ḡuriḡuri ena gorere amo baine namo totona. Bema Iehova ese hoa dalanai ena gorere bema hanamoa, Satana na bema gwau una tadikaka na Iehova e hesiai heniamu badina ia ese ena gorere e hanamoa. (Iobu 1:​9-11; 2:4) Danu, Iehova ese nega ta vada e abia hidi gorere iboudiai baine haoredia. (Isa. 33:24; Apok. 21:​3, 4) To basita laloa Iehova ese hari ina negai eda gorere na hoa dalanai be hanamodiamu. Una dainai tadikaka na Iehova baine noia diba goada bona lalomaino baine henia unu amo ena gorere baine haheaukalaia bona mai ena abidadama ida Ia baine hesiai henia.—Sal. 29:11.

14. Janice ena sivarai amo dahaka o dibamu?

¹⁴ Mani Janice ena sivarai aita laloa lou. Ia na e ura Betele ai baine ḡaukara dainai e ḡuriḡuri. Laḡani 5 muridiai, Iehova ese ena ḡuriḡuri e haerelaia dalana e lalopararalaia. Ia na e gwa: “Iehova ese una nega na e ḡaukaralaia lau e hadibagu bona e durugu ḡau haida baina hanamodia. Egu abidadama ia enai baina hagoadaia na namo. Bona sibogu egu stadi karana baina hanamoa. Danu na diba dala idauidau ai Iehova baina hesiai henia neganai baina moale diba.” Gabeai, Janice bona adavana na e boiridia seket ḡaukarana bae karaia. Janice na e lalo lou neganai, e gwa: “Iehova ese egu ḡuriḡuri na asina laloa dalana ai e haerelaia. Nega daudau lalonai na laloparara, Iehova ese e henigu haerena na harihari ḡauna namona ta, bona na moalemu badina una dala amo iena lalokau bona hebogahisi na mamidia.”

15. Dahaka dainai ta uramu baita karaia ḡauna mo baita ḡuriḡurilaia na dia heḡereḡere? (Laulau danu ba itadia.)

¹⁵ Henanadai ihatoina be ina, ‘Lau be ma ḡau ta danu baina ḡuriḡurilaia be namo, a?’ Ena be eda ḡuriḡuri ai ta uramu baita karaia ḡauna ta gwauraia hedinaraimu, to Iehova ena ura baita lalopararalaia totona, ma ḡau haida danu baita kara. Paragraf 1 ai ta herevalaia singul taihuna aita laloa, ia na e ura Basileia Evanelia Skuli bainela dainai e ḡuriḡuri. Iena ura na una skuli bainela unu amo pablisa dia momo gabuna ta ai hesiai ḡaukarana baine karaia. Una dainai, una skuli bainela totona ena ḡuriḡuri lalonai danu Iehova baine noia, baine durua ena hesiai ḡaukara ihabadana daladia ma haida baine diba totona. (Apos. 16:​9, 10) Bena ena ḡuriḡuri heḡereḡerena baine kara, ia ese seket tauna baine nanadaia bema kongrigeisin kahikahina ta ai painia taudia ma haida bae heduru diba. Eiava brens ofes baine tore henia bona baine nanadaidia bema gabu haida ai pablisa ma haida bae heduru diba.e

16. Ita be dahaka baita diba na namo?

¹⁶ Ina stadi ai tame diba bamona, baita abia dae Iehova na mai lalokauna ida eda ḡuriḡuri e haerelaimu bona iena kara na maoromaoro. (Sal. 4:3; Isa. 30:18) Nega haida haere na basita abi haraḡamu. To Iehova ese eda ḡuriḡuri na e kamonadiamu. Ia ese ita na e lalokau henida badamu, bona basine rakatanidamu. (Sal. 9:10) Una dainai “nega iboudiai ia bavabidadama henia,” bona ḡuriḡuri amo lalomu ai e miamu ḡaudia na ia enai ba gwaurai hedinarai.—Sal. 62:8.