STADI 15

Mai Lalogoadamu ida Emu Abidadama Ba Herevalaia

1 Tesalonika 1:5 (NW)

LALOHADAI BADANA: Ba hahedinaraia o abia daemu ḡauna na momokani bona mai anina bada.

Ba heḡaeḡae namonamo. Emu tok ba stadilaia namonamo ela bona point badadia bona Baibul ese e hamomokaniamu dalana ba lalopararalaia. Hereva haida amo point badadia na ba gwaurai hedinarai toho. Unu point ese kamonai taudia bae durudia daladia ba lalohadailaidia. Lauma helaḡa iabina totona ba ḡuriḡuri.

Ruma ai emu tok o tohoamu neganai ba duahia badabada, unu amo emu tok anina idoinai ba dibaia bona tok ihenina dalana ba hanamoa.
Hereva maorodia amo o abia daemu ḡauna ba herevalaia. Pablikeisen ai e tore herevadia mo basio ḡaukaralai, to sibomu emu hereva ba ḡaukaralai danu. Hereva maorodia iḡaukaralaidia karana ese be hahedinaraiamu, oi na mai dibamu momokani dahaka ḡau o herevalaiamu.
Ba hahedinaraia o abia daemu ḡauna na momokani. Namona na gadomu reḡena baine hedinarai namonamo. Kamonai taudia ba raraidia, bema o laloamu una ese basine hahekwakwanaidiamu.

Mai lalogoadamu ida o abia daemu ḡauna ba herevalaia na idau, to mai aonegamu, mai auka-aukamu, bona hedori dalana ai ba hereva be ma idau. Ena be mai lalogoadamu ida ba hereva, to lalokau dalana ai kamonai taudia ba hereva henidia na namo.