Maoro Bona Kerere: Abi Hidi ta Ba Karaia
Mauri ai ta karamu abi hididia daidiai baita moalemu eiava baita lalohisihisimu. Iehova Dirava na mai dibana. Una dainai e uramu ita ese ena taravatu baita badinadia.
Iehova na e uramu maino ai baita noho bona baita moale.
“Lau binai Iehova, emu Dirava; emu namo ihabadana dalana na hadibalaimumu, emu raka dalana namona ai na hakaumumu. Egu haheḡani boma kamonai henidia bema namo; bena emu maino na sinavai ida bema heḡereḡere, bona emu kara maoromaoro na davara hurehuredia ida bema heḡereḡere.”—Isaia 48:17, 18.
Ḡau iboudiai Ihavaradia Diravana na mai dibana ita be dahaka baita kara unu amo mauri namona baita moalelaia. Una dainai ia na e uramu ena hahekau daladia baita badina. Dirava ena taravatu ta badinamu neganai, ta diba momokanimu una na abi hidi namona. Bona ita na hanaihanai abi hidi maorodia baita karamu dainai maino ai baita nohomu bona baita moalemu.
Iehova na se noidamu basita kara diba ḡaudia baita kara.
“Hari ina dina ai na haḡanilaimui haheḡanina na dia auka herea bona dia daudau herea.” —Deuteronomi 30:11.
Dirava ena kara maoromaoro taravatudia baita badina totona, eda lalohadai bona kara baita haidau na namo. To, Iehova na ita eda amo ḡau momo se noimu. Ia na ita Ihavarada Tauna dainai, ita ese baita kara diba ḡaudia na mai dibana. Bona Iehova baita dibaia namonamomu neganai, baita itaiamu “ena haheḡani danu dia memetau.”—1 Ioane 5:3.
Iehova na e gwauhamata ena taravatu e badinamu taudia na be durudiamu.
“Lau Iehova, emu Dirava, ese oi imamu idibana na dogoa taomu; lau ese na hamaoromumu, na tomu: Basio gari, baina durumu.”—Isaia 41:13.
Iehova ena kara maoromaoro taravatudia na baita badina diba, badina ia ese be durudamu. Ia ese ena Hereva Baibul amo e durudamu, e hagoadadamu bona helaro e henidamu.
Tanobada heḡeḡemadai, taunimanima milion momo ese e dibaia ḡauna na, Baibul ena taravatu ibadinadia karana ese edia mauri na eme hanamoa. Oi danu o uramu Baibul ai sisiba namodia ba diba? Unu ba kara toma dalana na baola jw.org ai, buklet ladana Mauri Ba Moalelaia Hanaihanai! ba duahia, asi davana. Una buklet ai ini lesen bo itamu:
Baibul ese Oi Baine Durumu Diba Dalana
Baibul ai Helaro Baita Davaria
Baibul Na Momokani Bona Maoromaoro
Dirava ena Hereva bo stadilaiamu neganai, bo itaiamu, ia na dia buka gunana, to “ena hereva na baita abidadama henia diba, hari ela bona hanaihanai.” (Salamo 111:8, NWT) Baibul ena haheḡani herevadia baita badinamu neganai, mauri namona baita moalelaiamu. To, Dirava ese ita na basine doridamu unu baita kara toma. (Deuteronomi 30:19, 20; Iosua 24:15) Una na ita ta ta ese baita karaia abi hidina.