L’enseignement Jéhovah ena enn grand valeur
“Oui vrai-mem, mo considere tou kitsoz couma enn perte parski connaissance lor Christ Jésus, . . . ena enn grand valeur.”—PHIL. 3:8.
1, 2. Ki choix certain chretien finn faire, ek kifer?
DEPUIS bien jeune, Robert ti enn zeleve bien malin. Kan li ti ena zis huit an, enn so bann professeur ti vinn kot li ek ti dire li ki li pou kapav realise bann grand kitsoz. Professeur-la ti souhaité ki enn jour Robert vinn enn docteur. Bann resultat ki li ti gagné dan college, ti permette li pou al dan pli bon l’université ki ti ena dan so pays. Mais Robert ti decidé pou pa accepté seki beaucoup ti considere couma enn l’occasion ki li pa ti pou regagné encore, li ti faire sa pou ki li kapav realise so l’objectif pou vinn enn pionnier permanent.
2 Pareil couma Robert, beaucoup chretien—bann jeune ek bann ki pli agé—gagne beaucoup possibilité pou faire enn grand carriere dan sa le monde-la. Certain choisir pou pa profite a fond sa bann possibilité-la pou zot kapav poursuive bann l’objectif spirituel. (1 Cor. 7:29-31) Ki pousse bann chretien couma Robert pou faire tou seki zot kapav dan l’activité predication? Zot raison principal c’est l’amour pou Jéhovah, mais en plus, zot comprend ki l’enseignement Jéhovah ena enn grand valeur. Eski dernierement, ou finn gagne l’occasion pou reflechi couma ou la vie kitfois ti pou été si ou pa ti konn la verité? Si nou medite lor certain benediction extraordinaire ki nou gagné parski Jéhovah pé enseigne nou, sa pou aide nou pou contigne apprecié valeur la bonne nouvelle ek pou partage avek zele sa bonne nouvelle-la avek lezot.
Li enn grand privilege ki Bondié enseigne nou
3. Kifer nou kapav sur ki Jéhovah envie enseigne bann dimoune imparfait?
3 Dan so bonté, Jéhovah disposé pou enseigne bann dimoune imparfait. Dan enn fason prophetik, Isaïe 54:13 dire lor bann chretien oint: “Tou to bann garson pou bann dimoune ki Jéhovah inn enseigné, ek la paix to bann garson pou en abondance.” Sa bann parole-la applik aussi ar bann membre “lezot brebis.” (Jean 10:16) Nou trouve sa bien dan enn prophetie ki pé realisé dan nou lepok. Dan enn vision, Isaïe ti trouve enn grand la foule ki sorti dan tou nation ki pé al vers vrai l’adoration. Dapré Isaïe, sakenn pé dire so camarade: “Anou monte lor montagne Jéhovah, dan lakaz Bondié Jacob; ek Li pou montré nou ki chemin nou bizin suive, ek nou pou marche lor so bann sentier.” (Is. 2:1-3) Oui, c’est vrai-mem enn grand privilege ki Bondié enseigne nou!
4. Ki Jéhovah attann ar bann ki Li enseigné?
4 Ki nou bizin faire pou profite sa l’enseignement ki Jéhovah donne nou-la? Enn kitsoz ki necessaire c’est ki nou bizin ena l’humilité ek ki nou accepté pou laisse-nou enseigné. Psalmiste David ti ecrire: “Jéhovah Li bon ek Li droite. . . . Li pou enseigne bann dimoune ki humble so fason agir.” (Ps. 25:8, 9) Jésus ti dire: “Mo loué toi devant tou dimoune, Papa, Seigneur le ciel ek la terre, parski to finn bien cachiette sa bann kitsoz-la ar bann dimoune ki ena la sagesse ek ar bann intellectuel, ek to finn faire bann tibaba konn sa.” (Luc 10:21) Eski ou pa senti-ou attiré ar enn Bondié ki donne “so faveur ki personne pa merité, bann ki ena l’humilité”?—1 Pierre 5:5.
5. Ki finn permette nou gagne enn connaissance lor Bondié?
5 En tant ki bann serviteur Jéhovah, eski c’est grace a nou bann capacité ou-soit nou prop sagesse ki nou finn konn la verité? Non. En realité, par nou-mem jamais nou ti pou gagne enn connaissance lor Bondié. Jésus ti dire: “Personne pa kapav vinn vers moi si le Père, ki finn envoye moi, pa attire li.” (Jean 6:44) Par moyen predication ek par l’esprit saint, Jéhovah pé attire bann dimoune ki couma bann brebis, “bann kitsoz desirable dan tou bann nation.” (Hag. 2:7) Eski ou pa reconnaissant ki ou enn parmi bann dimoune ki Jéhovah inn attire vers so Garson?—Lire Jérémie 9:23, 24.
Pouvoir pou ameliore nou la vie
6. Kan bann dimoune gagne “connaissance Jéhovah,” ki l’effet extraordinaire sa kapav ena lor zot?
6 Isaïe ti servi enn joli l’exemple pou decrire transformation ki pé arrivé dan personnalité bann dimoune zordi. Bann dimoune ki ti violent avant, finn vinn pacifik. (Lire Isaïe 11:6-9.) Bann ki ti l’ennemi avant a cause zot race, zot nationalité, zot tribu, ou-soit a cause lezot difference dan zot culture, finn aprann pou vive ensam dan l’unité. Coumadir zot finn “forge zot bann l’epée ek [finn] faire sa vinn bann zouti pou travail la terre.” (Is. 2:4) Ki finn amenn zot pou faire sa bann changement-la? Sa bann dimoune-la finn gagne “connaissance Jéhovah” ek finn mette sa en pratik dan zot la vie. Mem si bann serviteur Jéhovah zot imparfait, zot forme enn vrai famille international bann frere. Parski la bonne nouvelle attire bann dimoune dan le monde entier ek produire bann bon resultat, sa montré ki l’enseignement ki Bondié donné, ena enn grand valeur.—Mat. 11:19.
7, 8. (a) Ki certain kitsoz ki couma “bann kitsoz ki’nn bien enraciné,” ki l’enseignement Jéhovah inn aide bann dimoune pou detruire? (b) Ki montré nou ki l’enseignement Jéhovah faire Li gagne louange?
7 L’apotre Paul ti compare l’activité predication bann serviteur Bondié ar enn la guerre spirituel. Li ti ecrire: “Dan nou la guerre nou pa servi bann zarme ki dimoune servi, mais nou, nou bann zarme zot puissant grace a Bondié ek zot detruire bann kitsoz ki’nn bien enraciné. Parski nou pé detruire bann raisonnement ek tou l’orgueil ki dresse-li kont connaissance Bondié.” (2 Cor. 10:4, 5) Ar ki “kitsoz ki’nn bien enraciné,” l’enseignement Jéhovah inn libere bann dimoune? Parmi ena poids ki bann fausse l’enseignement, superstition, ek bann philosophie humain inn mette lor bann dimoune. (Col. 2:8) L’enseignement Jéhovah aide bann dimoune pou arrete pratik bann mauvais kitsoz, ek pou developpe bann qualité spirituel. (1 Cor. 6:9-11) Li ameliore la vie famille. Li donne bann ki pena okenn l’esperance enn vrai sens dan zot la vie. C’est sa qualité l’enseignement-la ki nou bizin zordi.
8 Enn parmi bann qualité ki Jéhovah aide bann dimoune pou developpé c’est l’honneteté. Anou guette enn fait ki montré sa. (Héb. 13:18) Dan l’Inde, enn madame ti accepté enn l’etude la Bible ek plitar, li ti vinn enn proclamateur non-baptisé. Enn jour kan li ti pé retourne kot li apré ki li ti’nn al travail lor construction enn la Salle du Royaume, li ti trouve enn la chaine en or en-bas, pré kot enn la gare bus. La chaine-la ti vaut huit cent dollar américain (apepré 27,000 roupie). Mem si li ti misere, li ti al quitte la chaine-la dan station la police. Policier-la pa ti’lé croire! Plitar, enn lot policier ti demann li: “Kifer ou pa’nn decidé pou garde la chaine-la pou ou?” Proclamatrice-la ti explik li: “Bann l’enseignement ki ena dan la Bible finn transforme moi, alors, zordi mo enn dimoune honnete.” Policier-la ti impressionné ek li ti dire sa ancien ki ti accompagne sa proclamatrice-la: “Dan sa l’etat-la ena plus ki 38 million habitant. Si ou kapav aide dix dimoune pou vinn couma sa madame-la, sa ti pou enn grand kitsoz.” Kan nou maziné ki c’est la vie plusieurs million dimoune ki finn amelioré grace a l’enseignement Jéhovah, eski nou pena beaucoup raison pou loué Li?
9. Couma bann dimoune arrivé faire bann grand changement dan zot la vie?
9 Pouvoir ki Parole Bondié ena pou transforme la vie bann dimoune, ensam avek l’aide ki Jéhovah donné a travers so l’esprit saint, permette bann dimoune pou faire bann grand changement dan zot la vie. (Rom. 12:2; Gal. 5:22, 23) Colossiens 3:10 dire: “Mette nouveau personnalité, ki grace a connaissance exact pé contigne changé dapré ressemblance sa Kikenn ki finn crée li-la.” Message ki trouve dan Parole Bondié, la Bible, ena pouvoir pou montré seki enn dimoune été vrai-mem, ek sa kapav change fason ki li pensé ek mem fason ki li considere bann kitsoz. (Lire Hébreux 4:12.) Kan enn dimoune gagne enn connaissance exact lor la Bible, ek kan li vive en accord avek bann principe juste Jéhovah, li kapav vinn camarade Bondié, avek l’esperance pou vive pou touletan.
Jéhovah prepare nou pou l’avenir
10. (a) Kifer Jéhovah tousel ki kapav aide nou pou prepare-nou pou l’avenir? (b) Ki bann grand changement bientot pou ena lor la terre?
10 Jéhovah tousel ki kapav aide nou pou prepare-nou pou l’avenir parski Li koné ki pou arrivé bientot. C’est Li ki decidé ki pou arrive bann dimoune dan l’avenir. (Is. 46:9, 10) Enn prophetie la Bible dire ki “grand jour Jéhovah bien pré.” (Tseph. 1:14) En rapport avek sa jour-la, bann parole Proverbes 11:4 pou realisé: “Bann kitsoz ki ena valeur pa pou servi nanyin kan jour la colere vini, mais la justice pou delivré enn dimoune ar la mort.” Kan ler pou arrivé pou ki Jéhovah execute so jugement lor le monde Satan, seki pou compté, c’est si nou ena faveur Bondié. L’argent pa pou servi nanyin. En realité, Ézékiel 7:19 dire: “Zot pou jette zot l’argent lor bann chemin, ek zot l’or pou vinn enn kitsoz degoutant.” Parski nou konn seki pou arrivé en avance, sa kapav aide nou pou prend bann bon decision asterla-mem.
11. Cite enn fason couma l’enseignement Jéhovah aide nou pou prepare nou pou l’avenir.
11 Enn fason principal ki l’enseignement Jéhovah prepare nou pou So jour ki pé vini c’est kan sa l’enseignement-la aide nou pou fixé bann bon priorité dan nou la vie. L’apotre Paul ti ecrire Timothée: “Donne l’ordre bann ki riche dan sa systeme-la pou zot pa faire vantard, ek pou zot pa mette zot l’espoir dan bann richesse ki pa garanti nanyin, mais dan Bondié.” Mem si nou pa riche, nou kapav tire profit ar sa conseil ki Jéhovah donne nou-la. Ki nou bizin faire? Au lieu ki nou ramasse enn quantité kitsoz materiel, nou bizin faire zeffort “pou faire le bien” ek “pou vinn riche dan bann bon action.” Kan nou mette nou service pou Jéhovah en premier dan nou la vie, nou ‘garde couma enn tresor pou nou-mem, enn bon base pou l’avenir.’ (1 Tim. 6:17-19) Enn la vie sacrifice coumsa montré ki nou ena la sagesse pratik parski, couma Jésus ti dire: “Ki profit enn dimoune pou ena si li gagne le monde entier, mais ki li perdi so nâme?” (Mat. 16:26, 27) Alors ki jour Jéhovah bien pré, sakenn parmi nou bizin demann li-mem: ‘Kot-sa mo pé ramasse bann tresor? Eski mo pé travail couma enn esclave pou Bondié ou-soit pou la Richesse?’—Mat. 6:19, 20, 24.
12. Kifer fodé pa nou decouragé si certain pena respé pou nou ministere?
12 Dapré Parole Bondié, bann “bon action” ki pli important ki bann chretien bizin faire, c’est preche Royaume Bondié ek faire bann disciple, enn l’activité ki sauve la vie bann dimoune. (Mat. 24:14; 28:19, 20) Pareil couma dan premier siecle, kitfois certain pena respé pou nou ministere. (Lire 1 Corinthiens 1:18-21.) Mais sa pa change valeur nou message, ek sa pa diminué l’importance pou donne chaque dimoune possibilité pou ena la foi dan sa message-la tant ki ena encore le temps. (Rom. 10:13, 14) A mesure ki nou aide lezot pou profite l’enseignement Jéhovah, nou pou gagne beaucoup benediction.
Jéhovah beni nou kan nou faire bann sacrifice
13. Ki sacrifice l’apotre Paul ti faire pou la bonne nouvelle?
13 Avant li vinn enn chretien, l’apotre Paul ti gagne enn formation ki ti pou faire li gagne enn grand position dan systeme juif. Kitfois kan li pa ti ena plus ki 13 an, li ti quitte Tarse, la ville kot li ti né pou al Jérusalem pou etudié avek Gamaliel, enn enseignant la Loi ki bann dimoune ti bien estimé. (Actes 22:3) Avek le temps, Paul ti commence vinn bien important parmi bann dimoune dan so lepok, ek si li ti contigné dan seki li ti pé faire, kitfois li ti pou vinn enn kikenn ki ena enn grand position dan religion juif. (Gal. 1:13, 14) Kan li ti accepté la bonne nouvelle ek ti commence preché, li ti abandonne tousala. Eski Paul ti regrette choix ki li ti faire? Non. En realité, li ti ecrire: “Oui vrai-mem, mo considere tou kitsoz couma enn perte parski connaissance lor Christ Jésus, mo Seigneur ena enn grand valeur. A cause li, mo finn accepté perdi tou kitsoz ek mo considere tousala couma enn tas saleté.”—Phil. 3:8.
14, 15. Ki bann benediction nou gagné en tant ki “bann ki travail ensam avek Bondié”?
14 Pareil couma Paul, bann chretien zordi faire bann sacrifice pou zot kapav preche la bonne nouvelle. (Marc 10:29, 30) Eski nou mank kitsoz a cause sa? Robert, ki nou ti mentionné au commencement, partage mem sentiment ki lezot kan li dire: “Mo pena okenn regret. Service a plein temps finn donne moi la joie ek satisfaction, ek finn permette moi pou ‘gouté ek trouvé ki Jéhovah Li bon.’ Kan mo ti faire bann sacrifice materiel pou mo kapav realise mo bann l’objectif spirituel, Jéhovah ti touletan beni moi ek ti donne moi plus ki seki mo ti’nn sacrifié. C’est coumadir mo pa finn vrai-mem sacrifié nanyin. Mo finn zis gagné!”—Ps. 34:8; Prov. 10:22.
15 Si sa faire inpé le temps ki ou pé participe dan l’activité predication ek l’enseignement, surement ou aussi ou finn gagne l’occasion pou gouté ek trouvé ki Jéhovah Li bon. Eski finn ena bann moment kot ou finn senti l’aide l’esprit saint kan ou ti pé preche la bonne nouvelle? Eski ou finn trouve la joie lor figure bann dimoune a mesure ki Jéhovah ti ouvert zot leker pou accepté nou message? (Actes 16:14) Eski Jéhovah finn aide ou pou surmonte bann difficulté, kitfois Li finn ouvert enn chemin pou ou kapav faire plus dan ou ministere? Eski Li finn soutenir ou dan bann moment difficile, ek finn permette ou pou contigne servi Li kan ou ti senti ki ou ti nepli ena la force? (Phil. 4:13) Kan personnellement nou faire l’experience ki Jéhovah pé aide nou a mesure ki nou accompli nou ministere, Li vinn pli réel pou nou ek nou senti-nou encore pli proche ar Li. (Is. 41:10) Eski li pa enn benediction ki nou enn parmi “bann ki travail ensam avek Bondié” dan sa grand travail pou donne bann dimoune l’enseignement Jéhovah-la?—1 Cor. 3:9.
16. Ki ou sentiment concernant bann zeffort ek bann sacrifice ki ou faire pou enseigne lezot lor Jéhovah?
16 Beaucoup dimoune esperé ki dan zot la vie zot pou kapav faire enn kitsoz important ki pou dure longtemps. Mais nou finn trouvé ki bann dimoune blié vite mem bann kitsoz extraordinaire ki certain finn faire dan sa le monde-la. Mais, l’activité ki Jéhovah pé accompli dan nou lepok en rapport avek sanctification so nom, sans okenn doute, pou reste pou touletan dan l’histoire bann serviteur Jéhovah. C’est enn kitsoz ki jamais nou pa pou blié. (Prov. 10:7; Héb. 6:10) Anou apprecié privilege ki nou ena pou enseigne lezot lor Jéhovah, c’est enn l’activité ki jamais nou pa pou blié.
Couma ou pou reponn?
• Ki Jéhovah attann ar bann ki Li enseigné?
• Couma l’enseignement Jéhovah ameliore la vie bann dimoune?
• Dan ki fason nou beni kan nou aide lezot pou profite l’enseignement Jéhovah?
[Zimage lor page 25]
Bann ki Jéhovah enseigné forme enn vrai famille international
[Zimage lor page 26]
Eski li pa enn benediction ki nou parmi “bann ki travail ensam avek Bondié”?