“Ekute ek Gayn Plis Linstriksyon”
1 Liv Proverb reprezant lasazes kuma enn kikenn ki pe kriye: “Ekute, parski mo pe koz lor bann kitsoz inportan, ek mo lalev pe uver pu dir seki drwat. Mo ena konsey ek sazes pratik. . . . Ekut mwa; wi, seki gard mo bann simin pu ere. Parski seki truv mwa pu vremem truv lavi, ek li pu gayn faver Zeova.” (Proverb 8:6, 14, 32, 35) Sa bann parol la dekrir byin linstriksyon ki pe atann nu dan Lasanble Distrik “Bann Anseynan Parol Bondye.”
2 Finn analiz bann bezwin bann frer partu dan lemond, ek finn prepar program sa lasanble la dapre zot bezwin. Si nu aplik bann linstriksyon ek bann sigzesyon pratik ki nu pu gayne, sa pu ed nu pu truv boner, pu gard enn bon relasyon avek Zeova, ek pu res lor simin lavi eternel. Byinsir, nu ena tu bann bon rezon pu ‘ekute ek pu gayn plis linstriksyon.’—Proverb 1:5.
3 Avan Program: Pu nu kapav profit byin seki pu prezante, nu bizin res dan nu plas ek prepar nu lespri pu ekute kan program la kumanse. Nu pu bizin byin organiz nu pu fer sa. Enn kitsoz u kapav fer: kumans u bann preparasyon depi boner gramatin. Pa al dormi tar lavey. Lev ase boner pu ki bann manb u fami gayn letan pu prepar zot ek gayn kitsoz pu manze. Ariv lasanble boner pu ki u kapav gayn plas ek okip bann kitsoz ki bizin avan program kumanse. Bann laport pu uver 8:00 gramatin, ek program la pu kumanse 9:30 gramatin tulezur.
4 Pwiski nu pe reyni sirtu pu donn Zeova loner “parmi bann laful ki finn rasanble,” sak sesyon bizin kumans enn manyer ki donn nu Bondye laglwar. (Psom 26:12) Akoz sa mem, tu dimunn ankuraze pu asize avan ki anons kantik kumansman. Sa li an armoni avek seki Labib dir: “Ki tu kitsoz pas byin ek dan lord.” (1 Korintyin 14:40) Ki sa vedir pu sakenn parmi nu? Kan u truv prezidan lasanble asize lor lestrad pandan lamizik, u’si, pran u plas vit. Sa pu permet u sant avek tu u leker bann kantik ki kumans sak sesyon, pu donn Zeova laglwar.—Psom 149:1.
5 Pandan Program: Ezra “ti prepar so leker pu egzaminn lalwa Zeova ek pu met li an pratik.” (Ezra 7:10) Kuma eski nu kapav prepar nu leker pu gayn linstriksyon ki Zeova done? Letan u zet enn kudey lor bann tit bann diferan diskur ki ena dan u program, u kapav demann u mem, ‘Ki Zeova pe dir mwa par mwayin sa program la? Kuma eski mwa ek mo fami kapav tir profi ar sa bann ranseynman la?’ (Izai 30:21; Efezyin 5:17) Kontiyn poz u sa bann kestyon la tutlong derulman lasanble. Not bann pwin ki u pu servi. Pran letan pu reget zot alafin sak zur lasanble. Sa pu ed u pu rapel bann pwin inportan ek pu met zot an pratik.
6 Li pa fasil pu res konsantre pandan plizir lertan. Ki kapav ed nu pu anpes nu lespri distrer? Profit puvwar ki nu lizye ena. Normalman, kan nu fixe nu lizye lor enn kitsoz, lor la mem ki nu aret nu latansyon. (Matye 6:22) Alor, reziste lanvi pu turn u latet sak fwa u tann enn tapaz uswa ena enn muvman. Gard u lizye fixe lor orater. Kan sit enn pasaz Labib, swiv li dan u Labib, ek les li uver pandan ki orater la pe fer enn komanter lor verse la.
7 Lamur Kretyin pu anpes nu deranz lezot pandan derulman program. (1 Korintyin 13:5) Sa li enn moman pu “res trankil” ek pu ekute. (Eklezyast 3:7) Donk, evit koze ek sorti pu nanyin. Pran u prekosyon pu u pa al twalet saku. Pa manze, ni bwar avan ler poz, amwin ki u ena enn problem lasante. Bann ki amenn telefonn portab, pager, kamera pu filme, ek laparey foto bizin fer atansyon pu pa distrer lezot kan zot servi sa bann laparey la. Bann paran bizin fer enn manyer ki tu bann manb zot fami—bann adolesan usi—asiz ansam pu ki zot kapav vey zot zanfan.—Proverb 29:15.
8 Lane pase, enn ansyin ki abitye asiste bann lasanble depi plizir lane finn remarke: “Mo finn santi ki sa lasanble la ti extraordiner pu enn lot rezon. Preske tu dimunn dan lasistans ti pe pran not, mem bann ti zanfan. Li ti enn plezir pu gete. Lasistans finn byin servi zot Labib, kan bann orater ti ankuraz zot pu rod bann verse.” Sa kalite latansyon la vremem merit loner. Wi, nu ek nu bann konpanyon tir profi, me sirtu sa donn laglwar nu Gran Instrikter, Bondye Zeova.—Izai 30:20.