Anou prepare-nou bien pou Mémorial
Chaque l’année bann disciple Christ prepare-zot bien pou la soirée kot nou pou commemore la mort Jésus Christ, ek zot considere sa couma enn grand la joie ek enn grand l’honneur! (Luc 22:19) Ki bann disposition bizin prend pou Mémorial?
◼ L’heure ek l’endroit: Tou dimoune bizin bien koné ki ler ek ki l’endroit exact pou faire Mémorial. Si plus ki enn congregation servi la Salle du Royaume, li important pou arrive a ler ek apré Mémorial zot bizin sorti en ordre ek sans perdi le temps, parski le temps ki ena entre sa deux reunion-la li bien courte. Li bien important pou evite blok passage dan l’entrée, lor trottoir, ek dan parking.
◼ Invitation: Eski tou bann proclamateur inn gagne zot quantité l’invitation, ek eski zot koné ki li dire ladan? Eski ou finn pratiké couma pou presente sa l’invitation-la? Kisannla ou pou donne sa l’invitation-la? Bizin faire bann zeffort pou distribué tou bann l’invitation.
◼ Transport: Certain dimoune ki interessé ek certain frere ek soeur kitfois bizin enn transport ou-soit lezot l’aide pou zot al Mémorial. Ki l’arrangement finn faire pou aide zot?
◼ Bann l’embleme: Faire sur ki bann l’embleme pa passe avant ki soleil inn couché. Bizin faire bann l’arrangement necessaire pou presente bann l’embleme tou bann membre oint ki malade ou-soit ki pa finn kapav vini. Prevoir di-pain ek di-vin ki approprié pou sa l’evenement-la.—Guette La Tour de Garde 1er mars 2003, en créole, page 10 ek 11, paragraphe 14 ek 17.
◼ La Salle du Royaume: Bizin fini faire enn grand nettoyage la salle. Bizin amenn bann l’assiette, bann coupe di-vin, enn la table ek enn nappe approprié pou sa l’evenement-la. Si la congregation servi enn lot l’endroit a part la Salle du Royaume pou faire Mémorial, faire sur ki pou ena enn bon systeme sonorisation pou ki tou dimoune kapav tann bien l’orateur. Bizin designe a l’avance bann frere ki pou occupe service l’accueil ek bann serveur, ek donne zot bann instruction precis lor seki zot bizin faire, couma tou kitsoz deroulé, ek lor l’importance pou habille-zot ek coiffe-zot dan enn fason digne.
Nou koné ki Mémorial la mort Jésus Christ li enn moment bien important. A cause sa nou envie bien prepare-nou lor plan personnel ek en tant ki membre la congregation. Pena doute ki Jéhovah pou bien beni tou bann ki montré zot reconnaissance pou tou seki Jéhovah finn donne l’humanité par sacrifice so Garson ki Li content, Jésus Christ.