Eski Zeova Pou Reponn Mo Lapriyer?

1-2. Parfwa, kifer nou panse ki Zeova pa pe reponn nou lapriyer?

“TROUV enn gran lazwa an Zeova, ek Li pou donn twa tou seki to leker anvi.” (Ps. 37:​4, NW) Se enn zoli promes, pa vre! Me eski sa vedir ki Zeova pou donn nou tou seki nou demann Li deswit? Kifer sa kestion-la bien inportan? Anou get de-trwa lexanp. Enn ser inn priye pou asiste Lekol pou Bann Evanzelizater Rwayom Bondie. Selman, boukou lane inn pase ek li pankor gagn so linvitasion. Enn zenn frer bien malad, ek li’nn demann Zeova pou geri li pou ki li kapav fer plis dan lasanble. Me so lasante pa pe ameliore mem. Bann paran inn priye pou ki zot zanfan res dan laverite. Selman, zot zanfan inn desid pou aret servi Zeova.

² Kitfwa twa osi to’nn demann Zeova enn kitsoz, me to pa’nn gagn li. Akoz sa, kitfwa to panse ki Zeova reponn lapriyer lezot, me Li pa reponn to lapriyer. Ouswa kitfwa to panse ki sirman to’nn fer enn kitsoz ki pa bon. Enn ser ki apel Janiceb ti ena sa santiman-la. Li ek so mari ti priye pou ki zot al servi Betel. Janice dir: “Mo ti sir ki nou ti pou rant Betel deswit.” Me bann mwa inn pase, bann lane inn pase, ek sa koup-la touzour pankor rant Betel. Janice dir: “Mo ti bien sagrin ek mo pa ti konpran kifer Zeova pa ti reponn mo lapriyer. Mo ti demann momem si mo’nn fer enn kitsoz ki’nn desevwar Zeova. Mo’nn telman priye pou mo al Betel! Kifer Li pa’nn reponn mo lapriyer?”

3. Ki nou pou examine dan sa lartik-la?

³ Parfwa, nou kapav demann noumem si Zeova ekout nou bann lapriyer. Mem bann serviter Zeova dan lepase ti poz zotmem sa kestion-la. (Zob 30:20; Ps. 22:2; Abak. 1:2) Kifer nou kapav sir ki Zeova reponn nou bann lapriyer? (Ps. 65:2) Anou examinn trwa pwin inportan ki pou ed nou pou reponn sa kestion-la: (1) Ki Zeova fer? (2) Ki Zeova anvi nou fer? (3) Kifer parfwa nou bizin sanz seki nou demann Zeova?

KI ZEOVA FER?

4. Dapre Zeremi 29:​12, ki Zeova promet?

⁴ Zeova promet ki Li pou ekout nou bann lapriyer. (Lir Zeremi 29:12.) Zeova bien kontan so bann serviter ki fidel, alor zame Li pa pou inior zot bann lapriyer. (Ps. 10:17; 37:28) Selman, sa pa vedir ki Li pou donn nou tou seki nou demann Li. Kitfwa nou pou bizin atann lemond nouvo pou nou kapav gagn sertin kitsoz ki nou’nn demann Li.

5. Ki kitsoz Zeova pran kont kan Li reponn nou bann lapriyer? Explike.

⁵ Zeova pran kont so proze kan Li reponn nou lapriyer. (Iza. 55:​8, 9) Ek enn kitsoz ki form parti so proze, se ki later ranpli ar bann dimounn ki aksepte Li kouma zot Dirizan ek ki zot obeir Li. Selman, Satan pretann ki bann dimounn pou viv pli bien si zot diriz zot par zotmem. (Zen. 3:​1-5) Pou montre ki Satan enn manter, Zeova inn les bann dimounn diriz zot par zotmem. Ek kan bann dimounn inn fer sa, zot inn gagn boukou problem. (Ekle. 8:9) Si Zeova rezoud tou nou bann problem deswit, bann dimounn ki pa krwar dan Bondie kitfwa pou panse ki bann imin kapav rezoud zot bann problem par zotmem. Ek zot kapav panse ki zot pa bizin direksion Bondie!

6. Kifer nou bizin sir ki Zeova touletan azir avek lamour ek lazistis?

⁶ Kan bann dimounn priye Zeova pou mem kitsoz, Li kapav reponn zot dan diferan fason. Par exanp, kan Lerwa Ezekias ti bien malad, li ti sipliy Zeova pou geri li. Ek Zeova ti geri li! (2 Ler. 20:​1-6) Parkont, lapot Pol ti ena enn “pikan dan laser,” ek kitfwa sa ti enn problem lasante. Selman, Zeova pa ti rezoud so problem. (2 Kor. 12:​7-9) Ena osi lexanp Zak ek Pier. Lerwa Erod ti anvi touy toule-de. Bann frer ek ser ti priye pou Pier ek pou Zak toule-de. Me Zak ti mor, alor ki enn anz ti sov Pier. (Zist. 12:​1-11) Nou kapav demann noumem, ‘Kifer Zeova inn sov Pier me Li pa’nn sov Zak?’ Labib pa dir nanye lor la.c Selman, nou kapav sir ki Zeova zame “fer bann kitsoz inzis.” (Det. 32:4) Nou kone osi ki Pier ek Zak toule-de ti ena faver Zeova. (Rev. 21:14) Parfwa, Zeova pa reponn nou lapriyer kouma nou nou anvi. Me parski nou sir ki Zeova touletan azir avek lamour ek lazistis kan Li reponn nou lapriyer, nou pa pou plengne kan Li swazir pou reponn nou lapriyer kouma Li Li anvi.—Zob 33:13.

7. Ki kitsoz fode pa nou fer, ek kifer?

⁷ Fode pa nou konpar nou sitiasion ar sitiasion lezot. Par exanp, kitfwa nou’nn priye Zeova pou enn kitsoz presi, me Li pa’nn reponn nou lapriyer. Selman, plitar nou al aprann ki enn lot dimounn inn priye pou mem kitsoz, ek li posib ki Zeova inn reponn so lapriyer. Enn ser ki apel Anna inn pas par sa sitiasion-la. So misie, Matthew, ti ena enn kanser, ek Anna ti priye Zeova pou li geri. Sa lepok-la, ti ena osi de ser aze ki ti ena enn kanser. Anna ti priye Zeova pou Matthew ek pou sa de ser-la. Sa de ser-la ti geri, me Matthew ti mor. O-koumansman, Anna ti demann limem si Zeova ti ed sa de ser-la pou geri. Ek si Zeova ti fer sa, kifer Li pa ti geri so mari osi? Biensir, nou pa kapav dir kifer sa de ser-la inn geri. Me nou kone ki Zeova pou tir tou soufrans ek ki Li inpasian pou resisit so bann kamarad ki’nn mor.—Zob 14:15.

8. (a) Dapre Izai 43:​2, kouma Zeova soutenir nou? (b) Kouma lapriyer kapav ed nou kan nou gagn bann difikilte? (Get video Lapriyer Kapav Ed Nou pou Andir Bann Leprev.)

⁸ Zeova pou touletan soutenir nou. Nou Papa Zeova bien kontan nou. Akoz sa, Li pa kontan trouv nou soufer. (Iza. 63:9) Me mem si nou gagn bann difikilte, ki nou kapav konpar ar bann “larivier” ek bann “dife,” Li pa pou tir tou nou bann difikilte. (Lir Izai 43:2.) Selman, Li promet nou ki Li pou ed nou pou “travers” zot. Ninport ki difikilte nou gagne, Li pou ed nou pou res pros ar Li ek pou kontign servi Li. Li pou osi donn nou so lespri sin pou ki nou andir nou bann difikilte. (Lik 11:13; Fil. 4:13) Alor, nou kapav sir ki Zeova pou touletan donn nou seki nou bizin pou ki nou reisi andire ek nou res fidel anver Li.d

KI ZEOVA ANVI NOU FER?

9. Dapre Zak 1:​6, 7, kifer nou bizin sir ki Zeova pou ed nou?

⁹ Zeova anvi ki nou fer Li konfians. (Ebre 11:6) Parfwa, akoz nou ena telman boukou problem, nou kapav panse ki Zeova pa kapav ed nou. Me Labib dir nou ki, avek lafors ki Bondie donn nou, nou kapav mem “grinp enn miray.” (Ps. 18:29) Alor, olie ki nou ena bann dout, nou bizin kontign priye avek lafwa ek nou bizin sir ki Zeova pou reponn nou bann lapriyer.—Lir Zak 1:​6, 7.

10. Donn enn lexanp pou montre kouma nou kapav azir an-akor avek nou lapriyer.

¹⁰ Zeova anvi ki nou azir an-akor avek nou lapriyer. Par exanp, enn frer kapav demann Zeova pou ed li pou li gagn bann konze pou asiste lasanble rezional. Kouma Zeova kapav reponn so lapriyer? Zeova kapav donn li kouraz pou koz ar so patron. Selman, li pou bizin fer zefor pou al get so patron ek koz ar li. Kitfwa li pou mem bizin fer sa plizir fwa. Kitfwa li pou bizin osi fer bann laranzman ar enn koleg travay, pou ki li ranplas li. Ek si tousala pa marse, kitfwa li pou bizin pran bann zour konze ek aksepte ki koup sa lor so lapey.

11. Kifer nou bizin priye plizir fwa konsernan bann kitsoz ki inportan pou nou?

¹¹ Zeova anvi ki nou priye Li plizir fwa konsernan bann kitsoz ki inportan pou nou. (1 Tes. 5:17) Zezi ti explike ki nou pa pou gagn deswit tou seki nou demande. (Lik 11:9) Alor, fode pa nou bes lebra! Nou bizin priye ar tou nou leker ek nou bizin fer sa plizir fwa. (Lik 18:​1-7) Kan nou priye Zeova plizir fwa konsernan enn kitsoz, nou montre Li ki kantite sa kitsoz-la inportan pou nou. Nou montre osi ki nou ena lafwa ki Li kapav ed nou.

KIFER PARFWA NOU BIZIN SANZ SEKI NOU DEMANN ZEOVA?

12. (a) Ki premie kestion nou bizin poz noumem, ek kifer? (b) Kouma nou kapav fer sir ki nou bann lapriyer montre ki nou ena respe pou Zeova? (Get lankadre “Eski Mo Bann Lapriyer Montre ki Mo Ena Respe pou Zeova?”)

¹² Si nou panse ki Zeova pa’nn reponn nou lapriyer, nou bizin poz noumem trwa kestion. Premie-la se, ‘Eski se pou samem ki mo bizin priye?’ Bien souvan, nou panse nou kone ki kitsoz pli bon pou nou. Me pou Zeova, kitfwa se pa sa kitsoz-la ki pli bon pou nou. Par exanp, kitfwa nou ena enn problem ek nou panse ki nou konn solision sa problem-la. Kitfwa nou pe priye Zeova pou sa. Selman, Zeova kapav ena enn pli bon solision pou sa problem-la. Anplis, li kapav arive osi ki nou demann Zeova bann kitsoz ki pa an-akor avek so volonte. (1 Zan 5:14) Anou get lexanp bann paran ki nou ti mansione dan koumansman sa lartik-la. Zot ti demann Zeova pou fer zot zanfan res dan laverite. Se enn bon kitsoz ki zot inn demann Zeova. Selman, Zeova pa fors personn pou servi Li. Li anvi ki nou tou, mem nou bann zanfan, swazir pou servi Li. (Det. 10:​12, 13; 30:​19, 20) Alor, ki kitsoz sa bann paran-la ti kapav demann Zeova? Zot ti kapav demann Li pou ed zot pou tous leker zot zanfan pou ki li aprann kontan Zeova ek li vinn So kamarad.—Prov. 22:6; Efe. 6:4.

13. Dapre Ebre 4:​16, kan eski Zeova pou ed nou? Explike.

¹³ Deziem kestion-la se, ‘Eski se bon moman pou ki Zeova reponn mo lapriyer?’ Parfwa, nou kapav panse ki Zeova bizin reponn nou deswit kan nou priye Li. Selman, Zeova kone ki pli bon moman pou ed nou. (Lir Ebre 4:16.) Kan nou pa gagn enn repons deswit pou nou lapriyer, kitfwa nou panse ki Li pa pou reponn nou lapriyer. Me kitfwa pankor ariv ler pou Li reponn nou lapriyer. Anou get lexanp sa zenn frer ki ti priye Zeova pou ki li geri la. Si Zeova ti fer enn mirak pou geri li, Satan ti kapav dir ki frer-la pe kontign servi Zeova zis parski Li’nn geri li. (Zob 1:​9-11; 2:4) Anplis, Zeova inn fini fixe enn moman kot Li pou geri tou bann maladi. (Iza. 33:24; Rev. 21:​3, 4) Me ziska ki sa moman-la arive, Zeova pa pou fer enn mirak pou geri nou. Alor, pou ki kitsoz sa zenn frer-la ti kapav priye Zeova? Li ti kapav demann Zeova lafors ek lape lespri, pou ki li kapav andir so maladi ek kontign servi Zeova avek fidelite.—Ps. 29:11.

14. Ki to’nn aprann ar lexanp Janice?

¹⁴ Anou reget lexanp Janice, ki ti priye Zeova pou li al servi dan Betel. Apre sink an, li’nn konpran ki Zeova ti reponn so lapriyer. Li dir: “Zeova inn servi sa letan-la pou ansegn mwa ek form mwa. Mo ti bizin ena plis konfians an Li. Mo ti bizin aprann etidie Labib pli bien. Ek mo ti bizin aprann ki mo lazwa depann lor mo lamitie avek Zeova, pa lor kotsa mo pe servi Li.” Plitar, Janice ek so misie ti al servi dan sirkonskripsion. Kan li reflesi lor so sitiasion, Janice dir: “Zeova inn reponn mo bann lapriyer, me dan enn fason ki mo pa ti atann. Mo’nn pran boukou letan pou konpran ki repons Zeova pou mo lapriyer ti enn vre benediksion. Mo bien rekonesan ki mo’nn gagn lokazion pou resanti so lamour ek so bonte anver mwa.”

15. Parfwa, kifer nou bizin pa tro presi dan nou bann lapriyer? (Get bann zimaz osi.)

¹⁵ Trwaziem kestion-la se, ‘Eski mo bizin priye pou enn lot kitsoz?’ Li bon ki nou presi kan nou priye Zeova. Selman, parfwa li pli bon ki nou pa tro presi kan nou priye Li, koumsa nou kapav trouve kouma Li reponn nou lapriyer. Anou get lexanp sa ser selibater ki ti priye Zeova pou asiste Lekol pou Bann Evanzelizater Rwayom Bondie. Li ti anvi fer sa lekol-la pou ki li kapav al servi kot bizin plis proklamater. Me an-atandan ki bann-la aksepte so demann pou sa lekol-la, ki li ti kapav fer? Li ti kapav priye pou trouv bann lezot fason pou li fer plis pou Zeova. (Zist. 16:​9, 10) Apre sa, li ti kapav azir an-akor avek so lapriyer kan li demann responsab sirkonskripsion si ena bann lasanble kot bizin plis pionie. Ouswa li ti kapav ekrir enn let Betel, pou demande kotsa bizin plis proklamater.e

16. Ki kitsoz nou kapav sir?

¹⁶ Kouma nou’nn trouve dan sa lartik-la, nou kapav sir ki Zeova azir avek lamour ek lazistis kan Li reponn nou bann lapriyer. (Ps. 4:3; Iza. 30:18) Parfwa, nou kapav gagn bann repons ki nou pa atann. Selman, Zeova zame pa pou inior nou lapriyer. Li bien kontan nou, ek zame Li pa pou abandonn nou. (Ps. 9:10) Alor, kontign“fer Bondie konfians touletan,” ek devid to leker ar Li dan lapriyer.—Ps. 62:8.