Ny Fisedrana Mafy Nahazo An’i Maggy sy ny Fitahiana Azoko

Ny talata 2 May 1995 no andro nahaterahan’ny zanako vavikely sy nahafatesan’ny vadiko. Mampalahelo fa tsy nahita mihitsy ny salovan-tavan’ny zanany i Maggy. Ny fanantenako izao dia ny hampifankahalala an’i Tamara amin-dreniny rehefa hatsangana amin’ny maty izy.

TAORIAN’NY 16 taona nivadianay, dia nilazan’ny dokoterany i Maggy vadiko, fa voan’ny kanseran’ny nono izy ary am-bolana sisa no hahavelomany. Dimy taona lasa izay. Soa ihany fa afaka niaina ara-dalàna tanteraka i Maggy nandritra ireo taona farany teo amin’ny fiainany. Tany amin’ny faramparany ihany vao nanjary nila tsy ho zaka ny fanaintainana.

Noho ny fitaran’ny kansera nahazo azy, dia nilaza ireo dokotera fa tsy nisy fanantenana firy ny hahabevohoka azy. Koa azonao alaina sary an-tsaina ny fahatairanay rehefa hitan’izy ireo nisy zazakely tao an-kibony, nandritra ny fanaovan-javatra mahazatra misy fampiasana feo tsy re tsaika mba hanaraha-maso ny fandroson’ny fivontosana noho ny kansera! Vavikely ilay izy. Bevohoka efa-bolana sy tapany i Maggy. Dibo-kafaliana izy noho ny fahatsinjovana ny hoe ho tonga reny vao voalohany.

Nanao izay rehetra azony natao i Maggy mba hahazoana antoka fa ho teraka salama tsara ilay zaza. Nitandrina ny sakafony izy, ary na dia nandritra ny tapa-bolana farany teo amin’ny fiainany aza, rehefa nanjary faran’izay mafy ny fanaintainana, dia tsy nihinana fanafody fampitonena fanaintainana izy raha tsy rehefa tsy zakany intsony ilay izy.

Nandray fitahiana tamin’ny fahazoana zaza salama

Ny asabotsy 29 Aprily, dia nidobodoboka mafy sy haingana ny fon’i Maggy ka hoy izy hoe: “Ho faty aho izany angamba.” Nijanona teo aminy aho ny faran’ny herinandro manontolo. Rehefa avy niantso ny dokotera aho ny alatsinainy, dia nitondra azy avy hatrany tany amin’ny hopitaly tany Montréal, Kanada, tsy lavitra ny tranonay eto St. Jérôme.

Ny ampitso maraina tokony ho tamin’ny 5.30, ny mpitsabo mpanampy iray izay nandalo teo amin’ny efitra nisy an’i Maggy dia nahamarika fa tao anatin’ny krizy izy. Toa nihetsika aretim-po no fijery azy. Nantsoina avy hatrany avy tao amin’ny efitra ilany ny dokotera iray. Na dia maty aza i Maggy, ny ekipa mpitsabo dia afaka namonjy ny zanakay. Teraka roa volana sy tapany mialoha i Tamara ary tsy nilanja afa-tsy 1,1 kilaograma.

Koa satria ambany ny fatran’ny sela tao amin’ny ran’i Tamara, dia naniry hampidi-dra ireo dokotera. Kanefa, nampirisihina izy ireo hampiasa hormonina sentetika érythropoïétine ho solony. Nataon’izy ireo izany, ary rehefa hita fa nahomby ny fampiasana io fanafody io mba hampitomboana ny fatran’ny sela tao amin’ny rany, dia nilaza toy izao ny mpitsabo mpanampy iray: “Nahoana àry izy ireo no tsy mampiasa azy io amin’ny zazakely rehetra?”

Nanan-java-nanahirana hafa nifandray tamin’ny fahaterahany tsy tonga volana i Tamara, nefa voalamina avokoa izy rehetra. Raha ny marina, rehefa nandinika azy ny Dr. Watters, neurologue iray tatỳ aoriana, dia niteny tamin’ilay mpitsabo mpanampy hoe: “Zazakely hafa angamba no nomenao ahy hodinihina; ara-dalàna tanteraka no fijeriko an’itỳ iray itỳ.”

Fiatrehana fahafatesana sy fizakana ny taorian’izany

Sarotra tamiko ny nijery ny nahafatesan’i Maggy. Nahatsapa ho tsy afa-nanoatra aho. Tena mafy ny miresaka momba ny fahafatesan’i Maggy. Kanefa dia nanao izany aho rehefa tonga tany amin’ny hopitaly ireo rahalahiko sy anabaviko kristiana. Nihena tsikelikely ny alahelo arakaraka ny niresahako momba azy io. Isaky ny mamaky lahatsoratra ao amin’ny Ny Tilikambo Fiambenana na ny Mifohaza! izay mahakasika ahy manokana aho, dia atokako ao amin’ny faritra ahy manokana ao amin’ny efitra famakiam-bokiko ilay izy ary alaiko sy vakiko rehefa mahatsapa ny ilana izany aho.

Zava-tsarotra hafa iray ny mamantana trano foana. Tena mafy ny mizaka ny fahatsiarovan-tena ho manirery. Mbola mipoitra ihany io fihetseham-po io na dia tena nandray soa avy tamin’ny fiarahana kristiana mampahery aza aho. Zatra niara-nanao ny zava-drehetra izahay sy i Maggy, ary niresaka momba ny zava-manahirana ho hitako noho ny fahatsiarovan-tena ho manirery izahay. Naniry ny hanambadiako indray izy. Kanefa, tsy mora toy izany ny tarehin-javatra.

Fanohanana avy tamin’ireo namana kristiana

Tsy fantatro izay ho nataoko raha tsy nisy ny fanohanan’ny Komity Mifandray Amin’ny Hopitaly (KMH) an’ny Vavolombelon’i Jehovah. Ny maraina nahafatesan’i Maggy, dia tany amin’ny hopitaly ny Vavolombelona manam-pahalalana iray avy tamin’ny KMH ary nanome ahy ny fanampiana nilaiko.

Nanaitra ny sain’ireo mpiasan’ny hopitaly ny fanampiana azoko avy tamin’ny kongregasiona kristiana teto St. Jérôme ary koa avy tamin’ireo kongregasiona hafa teo amin’ilay faritra. Ny alina nanaovana fampandrenesana tao amin’ny fivorianay kristiana fa maty i Maggy, dia namana malala mihoatra ny 20 no nanolotra ny fanampiany. Be dia be tokoa ny fanohanana.

Nisy namana nanomana sakafo ho ahy; feno zavatra izay haharitra am-bolana maro ny congélateur-n’ny vata fampangatsiahako. Nokarakarain’ny fianakaviako sy ireo rahalahiko sy anabaviko kristiana hatramin’ny akanjo ho an’ny zanako vavikely. Nitondra zavatra betsaka ho ahy izy ireo, hany ka tsy nanan-toerana ampy hitahirizana azy rehetra aho.

Fahafinaretana ankehitriny sy fahatsinjovan-javatra hoavy

Manampy ahy hihazona ny saiko tsy ho amin’ny fahabangana eo amiko i Tamara. Tena nambabo ny foko izy. Isan’andro rehefa misariaka aminy aho amin’ny fiarahabana azy hoe “manao ahoana”, dia mitsikitsiky be izy, manomboka “miresaka” sy manapelipelika ny sandriny sy ny ranjony, mientanentana erỳ.

Amin’ny maha-astronoma amateur ahy, dia tsy andriko ny fotoana hihazonako an’i Tamara eo am-pofoako sy hampijereko azy, amin’ny alalan’ny teleskaopiko, ireo zava-mahatalanjona eny amin’ny lanitra, nataon’i Jehovah, ilay Mpanao Lehibe antsika. Ny fisaintsainana ny fiainana tsy misy farany ao amin’ny Paradisa ho eto an-tany dia tena loharanom-pampiononana ho ahy. Ary ny fahalalana fa izany no fahatsinjovan-javatra eo anoloan’i Tamara dia manome ahy fahafinaretana fanampiny. — Salamo 37:9-11, 29.

Rehefa mamisavisa an’ireo fisehoan-javatra tamin’ireo dimy taona lasa aho, dia afaka milazalaza tsara azy ireny ho sady mampikorontana anaty no mahafaly. Niana-javatra betsaka momba ny tenako sy momba ny fiainana mihitsy aho. Miandry amim-pahadodonana ny hoavy izay “tsy hisy fahafatesana intsony, sady tsy hisy alahelo, na fitarainana, na fanaintainana”, araka ny ilazalazan’ny Baiboly azy, aho. — Apokalypsy 21:3, 4.

Amin’izay, amin’ny fitsanganana amin’ny maty, dia ho afaka hiaina mafy tsy hisy fanaintainana i Maggy. Ambonin’ny zavatra rehetra, ny fanantenako sy ny faniriako mafy orina dia ny ho eo mba hampifankahalala an’i Tamara amin’i Maggy, mba hahafahany hahita an’ilay zazavavy kely nanaovany zavatra betsaka. — Notantarain’i Lorne Wilkins.

[Sary, pejy 11]

Miaraka amin’ny vadiko

[Sary, pejy 11]

I Tamara, zanakay vavikely