Avy Amin’ny Mpamaky

Mampijaly Biby Manoratra ity ho anareo aho mba hilazana aminareo fa asa tena mahatalanjona no nataonareo tao amin’ilay lahatsoratrareo hoe “Ny Fiheveran’ny Baiboly: Ratsy ve ny Mampijaly Biby?” (8 Novambra 1998). Amiko dia tsara ny nampisehoanareo fa tsy mankasitraka ny fampijaliana biby Andriamanitra, indrindra raha olona milaza fa Kristianina no manao izany.

J. L. C., Etazonia

Tanora Tsy Manan-dray Aman-dreny Velom-pankasitrahana lalina aho noho ilay lahatsoratra hoe “Manontany ny Tanora Hoe... Nahoana Aho no Tsy mba Manan-dray Aman-dreny?” (8 Desambra 1998). Sivy amby telopolo taona aho izao. Fony aho 11 taona anefa, dia maty ny reniko ary nandao ny tokantrano ny raiko. Hatramin’izao, dia mbola tsy vitako mihitsy ny nanao izay hahatakaran’ny olona ny fiainana mampahonena niainanay sy ireo anadahiko. Tsapako anefa izao fa misy hafa mahatakatra ny nanjo anay. Misaotra.

K. Y., Japon

Maty ny raiko fony aho vao sivy volana monja, ary mbola tsy nandray 12 taona akory aho dia maty koa ny reniko. Tena nitondra fampiononana ilay lahatsoratrareo ary nampiseho izay tena tsapan’ny kamboty. Tsara erỳ ny mahafantatra fa hamerina indray ireny havan-tiantsika nodimandry ireny ho amin’ny fiainana i Jehovah!

M. S. S., Brezila

Efa-polo taona aho, ary efa namaky sy namerina namaky ilay lahatsoratra. Nanganohano ny ranomasoko nanomboka tamin’ny voalohany ka hatramin’ny farany, satria kamboty aho, efa hatramin’ny faharoa taonako. Hatramin’izao, dia tsy mahavita mijery ny sarin’i Dada sy i Neny aho ka hoe tsy mitomany. Misaotra noho ny nanoratanareo lahatsoratra toy ireny!

J. C. V., Frantsa

Mbola velon-dray aman-dreny aho, saingy manana fomba fijery mifanipaka ny tenako, ka mahaliana ahy izay lahatsoratra rehetra miresaka momba ny famakivakiana fotoan-tsarotra. Te hilaza aminareo fotsiny aho fa tiako ireo fitantarana zavatra tena niainana sy torohevitra miorina amin’ny Baiboly hita ao amin’ny “Manontany ny Tanora Hoe...”

S. H., Kanada

Vadi-mpanjaka Nahay Nandanjalanja Nampahatsiahy ahy ny fitantarana ao amin’ny Baiboly momba an’i Estera Vadi-mpanjaka ny lahatsoratra mahavariana nosoratanareo momba an’i Catherine Parr (“Vadi-mpanjaka Nahay Nandanjalanja Nandresy Eveka Be Tetika”, 8 Novambra 1998). Naneho fahendrena tokoa ireo vehivavy ireo! Na dia tsy Vavolombelon’i Jehovah aza aho, dia tsy mandingana nomerao iray amin’ny Mifohaza! mihitsy. Matetika aho no manontany tena hoe nahoana no misy olona tsy mankasitraka ny zavatra vita an-tsoratrareo, tsy tahaka ahy.

M. D. S. F., Brezila

Hitako ho tena mahaliana be ilay lahatsoratra ara-tantara momba an’i Henri VIII sy i Catherine Parr, vadiny. Midera anareo aho fa lahatsoratra nanaovana fikarohana tsara sy voafintina ary mazava tokoa ilay nataonareo!

C. G., Italia

Mahatonga antsika ho toy ny hoe niara-niaina ny fotoana rehetra tamin’i Catherine Vadi-mpanjaka ny fomba nitantarana ilay lahatsoratra. Misaotra noho ny namoahanareo lahatsoratra toy io mba hahafahanay, izay mipetraka atỳ amin’ny faritra hafa amin’izao tontolo izao, hahalala momba ny kolontsaina any lavitra any.

L. G. sy L. G., Venezoela