Hita Ilay Notadiavina Ela

“JEHOVAH? Iza moa i Jehovah?” Hitan’i Silvia, valo taona, ilay anarana, tao amin’ny Baiboly armenianina, izay fananana sarobidin’ny fianakaviana iray, nasehon’ny ankizivavy iray hafa azy. Nanontany ny manodidina azy izy, nefa tsy nisy na iza na iza tao amin’ny tanànany tao Yerevan, any Armenia, afaka nilaza taminy hoe iza i Jehovah​—na ny ray aman-dreniny izany, na ny mpampianatra azy, ary na dia ny mpitondra fivavahana tao amin’ny fiangonana teo an-toerana aza.

Nihalehibe i Silvia, nahavita ny fianarany, ary niasa, nefa mbola tsy fantany foana hoe iza i Jehovah. Voatery nandositra niala an’i Armenia izy, rehefa tonga olon-dehibe. Tonga tany Polonina izy, rehefa afaka fotoana kelikely, ary nipetraka tao amin’ny efitra kely iray niaraka tamin’ny mpitsoa-ponenana hafa. Nisy mpitsidika tsy tapaka ny iray tamin’ireo mpiray efitra taminy. “F’iza ireny vahininao ireny?”, hoy i Silvia nanontany. Hoy ny valiny hoe: “Vavolombelon’i Jehovah ireny, tonga eto mba hampianatra Baiboly ahy.”

Dibo-kafaliana ny fon’i Silvia rehefa nandre ilay anarana hoe Jehovah izy. Ela ny ela, ka nanomboka nahafantatra ihany izy hoe iza i Jehovah, ary hoe tena Andriamanitra be fitiavana tokoa izy io. Tsy ela anefa, dia voatery niala tany Polonina izy. Nitady fialokalofana tany Danemark, teo ampitan’ny Ranomasina Baltika, izy. Fananana vitsivitsy monja no nentiny, kanefa anisan’izy ireo ny zavatra vita an-tsoratra momba ny Baiboly, natontan’ny Vavolombelon’i Jehovah. Hitan’i Silvia tao amin’ny pejy farany amin’ny boky iray ny lisitry ny adiresin’ireo biraon’ny sampan’ny Fikambanana Watch Tower. Io no iray amin’ireo fananany lehibe indrindra, dia ny lalan’ny fiainana mitondra azy ho any amin’i Jehovah!

Nentina tany amin’ny tobin’ny mpitsoa-ponenana i Silvia, tany Danemark. Nanomboka nitady Vavolombelon’i Jehovah avy hatrany izy. Hitany tao amin’ilay lisitry ny adiresy tany aminy, fa any amin’ny tanànan’i Holbæk ny biraon’ny sampan’ny Fikambanana Watch Tower any Danemark. Aiza anefa izany? Nalefa tamin’ny fiarandalamby ho any amin’ny toby hafa iray i Silvia, ka teny an-dalana ho any, dia nandalo an’i Holbæk ilay fiarandalamby! Dibo-kafaliana indray ny fony.

Tsy ela taorian’izay, tamin’ny andro nibaliaka iray, dia nandeha fiarandalamby niverina ho any Holbæk i Silvia, ka nandeha an-tongotra avy teo amin’ny gara, ho any amin’ny biraon’ny sampana. Izao no tsaroany: “Rehefa niditra tao amin’ilay zaridaina aho, dia nipetraka teo amin’ny seza iray, ka niteny anakampo hoe: ‘Izao no paradisa!’ ” Noraisina tamin-kafanam-po izy tao amin’ilay sampana, ka afaka nanao ny fianarany Baiboly, rehefa ela ny ela.

Nifindrafindra matetika anefa izy taorian’izay. Tany amin’ireny tobin’ny mpitsoa-ponenana samihafa ireny, dia tsy maintsy nitady Vavolombelon’i Jehovah i Silvia, ka namerimberina nanomboka ny fianarany Baiboly. Rehefa afaka roa taona anefa, dia ampy ny fahalalany, mba hahafahany hanolotra ny fiainany ho an’i Jehovah. Natao batisa izy, ary tsy ela taorian’izay, dia nirotsaka tamin’ny fanompoana manontolo andro. Nanome azy fialokalofana ny fitondram-panjakana danoà, tamin’ny 1998.

Enina amby roapolo taona i Silvia ankehitriny, ary manompo ao amin’ilay toerana izay nampahatsiahy azy ny paradisa, dia ny biraon’ny sampan’ny Vavolombelon’i Jehovah any Danemark. “Inona no azoko lazaina?”, hoy izy ankehitriny manamarika. “Nitady an’⁠i Jehovah aho, nanomboka tamin’ny izaho mbola zazavavikely. Hitako izy izao. Nieritreritra foana ny handany ny fiainako amin’ny fanompoana azy aho, dia izao izaho ato amin’ny Betela izao. Mivavaka aho mba ho ny tranoko mandritra ny taona maro ho avy, izy ity!”