Manana Antony Hifaliana Isika!

VOALAMINA tsara ny zavatra noforonin’i Jehovah, manomboka amin’ny sela bitika indrindra hatramin’ny vahindanitra goavam-be. Tsy mahagaga izany satria “tsy Andriamanitry ny fikorontanana” izy. (1 Kor. 14:33) Diniho koa ny fomba andaminany ny mpanompony any an-danitra sy eto an-tany. Misy an-jatony tapitrisa isika sady manana safidy malalaka. Nangoniny ho ao anaty fandaminana iray ihany anefa isika rehetra, ka tafaray ao amin’ny fivavahana madio. Mahavariana tokoa izany!

Nentina hilazana ny fandaminan’Andriamanitra eto an-tany ny hoe Jerosalema, teo amin’ny Israely fahiny. Tao mantsy no nisy ny tempolin’i Jehovah sy ny mpanjaka voatendriny. Nilaza ny fihetseham-pony momba an’io tanàna masina io ny Israelita iray, tamin’izy babo tany Babylona. Hoy izy: “Aoka ny lelako hiraikitra amin’ny lanilaniko raha tsy mahatsiaro anao aho [ry Jerosalema], ary raha tsy i Jerosalema no asandratro ho ambony noho ny antom-pifaliako lehibe indrindra.”—Sal. 137:6.

Toy izany koa ve ny fihetseham-ponao momba ny fandaminan’i Jehovah? Tena mahafaly anao ve ny manompo an’i Jehovah miaraka amin’ny fandaminany? Fantatry ny zanakao ve ny tantaran’ny fandaminana sy ny fomba fiasany? Takatr’izy ireo ve fa anisan’ny fianakaviamben’ny Vavolombelon’i Jehovah eran-tany izy ireo? (1 Pet. 2:17) Misy soso-kevitra ireto azonareo ampiasaina amin’ny fotoam-pivavahan’ny fianakavianareo. Hanampy anareo hankasitraka kokoa ny fandaminan’i Jehovah izany.

Tantarao ny “tamin’ny andro fahiny”

Nankalaza ny Paska ny fianakaviana israelita, isan-taona. Nanome toromarika toy izao i Mosesy, tamin’izy ireo hankalaza voalohany azy io: “Raha manontany anao ny zanakao any aoriana any hoe: ‘Fa inona no hevitr’izao?’, dia lazao aminy hoe: ‘Tamin’ny herin-tsandriny no namoahan’i Jehovah antsika hiala tany Ejipta, avy tao amin’ny trano fanandevozana.’ ” (Eks. 13:14) Tsy tokony hohadinoina mihitsy àry ny zavatra nataon’i Jehovah. Nankatò an’io toromarika io ny ankamaroan’ny raim-pianakaviana israelita, matoa nivavaka toy izao ny Israelita iray, ela be tatỳ aoriana: “Andriamanitra ô, ny sofinay no nandre, ny razanay mihitsy no nitantara taminay ny zavatra nataonao tamin’ny androny, tamin’ny andro fahiny.”—Sal. 44:1.

Mety hihevitra ny ankizy ankehitriny fa zava-nitranga tamin’ny “andro fahiny” fotsiny ny tantaran’ny Vavolombelon’i Jehovah tato anatin’ny zato taona farany. Inona no azonao atao mba hahatonga azy ireo ho liana amin’ireny tantara ireny? Misy ray aman-dreny mampiasa ny boky Vavolombelon’i Jehovah—Mpitory ny Fanjakan’Andriamanitra, ny Diary, ny tantaram-piainana ao amin’ny gazetintsika, ny DVD, anisan’izany ilay DVD vaovao miresaka ny tantaran’ny Vavolombelon’i Jehovah. Eo koa ireo video momba ny fanenjehana tany amin’ny Firaisana Sovietika sy Alemaina Nazia. Mampianatra ny fianakaviana izy ireny, mba hiantehitra amin’i Jehovah rehefa misy fitsapana. Ampiasao amin’ny fianaranareo àry ireny fitaovana ireny. Hanatanjaka ny finoan’ny zanakao izany, ka hanampy azy hiatrika fitsapana.

Mora leo ny ankizy raha fanazavana be fotsiny no omenao. Asaivo mandray anjara àry izy ireo. Asaivo mifidy tany iray mahaliana azy, ohatra, ny ankizy iray. Ampirisiho izy hikaroka momba ny tantaran’ny Vavolombelon’i Jehovah ao amin’io tany io, ka hiresaka izany mandritra ny fianaranareo. Azonao atao koa ny manasa Kristianina tsy mivadika hatramin’ny ela, mba hanatrika ny fotoam-pivavahan’ny fianakavianareo. Ampirisiho ny zanakao hanadinadina azy sy hampirisika azy hitantara ny zavatra niainany. Azonao ampanaovina sary koa ny zanakao, ohatra hoe sarin’ireo zavatra niavaka teo amin’ny tantaran’ny Vavolombelon’i Jehovah, toy ny fanorenana sampana, fivoriambe iraisam-pirenena, na fitoriana isan-trano nampiasana grafofaonina.

Ianaro ny fomba fiasan’ny “rantsambatana tsirairay”

Noharin’ny apostoly Paoly amin’ny “vatana” ny fiangonana kristianina. Tafakambana tsara izy io noho ireo tonon-taolana, ary mitombo sy miorina ao anatin’ny fitiavana, noho ny fiasan’ny rantsambatana tsirairay. (Efes. 4:16) Lasa mankasitraka sy manaja kokoa ny Mpamorona isika, rehefa mandinika ny fomba fiasan’ny vatan’olombelona. Toy izany koa fa manjary miaiky ny “fahendren’Andriamanitra” isika rehefa mandinika ny fomba fiasan’ny fandaminana, izay azo lazaina hoe fiangonana iray maneran-tany.—Efes. 3:10.

Ampahafantarin’i Jehovah antsika ny fomba fiasan’ny fandaminany, anisan’izany ny fandaminany any an-danitra. Nisy zavatra tiany haharihary, ohatra, indray mandeha, ka i Jesosy Kristy no nampahafantariny an’ilay izy voalohany. I Jesosy indray avy eo ‘naniraka ny anjeliny’, mba hampita izany tamin’i Jaona, “tamin’ny alalan’ny famantarana.” I Jaona kosa no “vavolombelona nanambara” tamin’ny hafa. (Apok. 1:1, 2) Raha ny fomba fiasan’ny fandaminany any an-danitra aza ampahafantarin’Andriamanitra antsika, tsy midika ve izany fa tiany ho azontsika koa ny fomba fiasan’ny “rantsambatana tsirairay” ao amin’ny fandaminany eto an-tany? Tena ilaina àry ny mianatra momba izany.

Aoka hatao hoe hitsidika ny fiangonanareo ny mpiandraikitra ny faritra. Nahoana raha dinihina miaraka amin’ny fianakavianao ny andraikitr’ireny rahalahy ireny sy ny fitahiana raisiny? Inona no ataon’izy ireny mba hanampiana antsika tsirairay? Azo ianarana amin’ny fotoana hafa koa hoe: Nahoana no zava-dehibe ny mamerina tatitra momba ny fanompoana? Avy aiza ny vola ampiasain’ny fandaminana? Ahoana no fomba fiasan’ny Filan-kevi-pitantanana, ary ahoana no fomba anomezany ny sakafo ara-panahy?

Misy soa telo, fara fahakeliny, raisintsika, rehefa mazava tsara amintsika ny fomba andaminan’i Jehovah ny vahoakany: 1) Lasa mankasitraka kokoa an’ireo olona miasa mafy ho antsika isika. (1 Tes. 5:12, 13) 2) Voatosika hankatò ny toromariky ny fandaminana. (Asa. 16:4, 5) 3) Matoky kokoa an’ireo mitarika, satria hitantsika fa miorina amin’ny Soratra Masina ny fanapahan-kevitra raisin’izy ireo sy ny fandaharana ataony.—Heb. 13:7.

“Jereo tsara ny tilikambo fonenana eo aminy”

“Mandehana ianareo mihodidina an’i Ziona, ka isao ny tilikambony. Diniho tsara ny tovon-tany miaro azy. Ary jereo tsara ny tilikambo fonenana eo aminy, mba hotantarainareo amin’ny taranaka ho avy.” (Sal. 48:12, 13) Nampirisika ny Israelita ilay mpanao salamo mba handinika akaiky an’i Jerosalema. Nanao dia nankany amin’io tanàna masina io ny fianakaviana israelita mba hamonjy an’ireo fety fanao isan-taona. Nahita an’ilay tempoly tsara tarehy izy ireo tamin’izany. Tsy hadinon’izy ireo mihitsy izany, ka tsy maintsy ho ‘notantarainy tamin’ny taranany.’

Diniho koa ny tantaran’ny mpanjakavavin’i Sheba. Tsy nino izy rehefa nisy nitantara taminy ny hatsaran’ny fitondran’i Solomona sy ny fahendreny. Inona no nampiova hevitra azy? Hoy izy: “Tsy nino ny tenin’ny olona aho raha tsy tonga tatỳ, ka ny masoko mihitsy no nahita.” (2 Tan. 9:6) Misy vokany amintsika tokoa ny zavatra hitan’ny ‘masontsika.’

Inona no azonao atao mba hanampiana ny zanakao hahita ‘maso’ an’ireo zava-mahatalanjona eo anivon’ny fandaminan’i Jehovah? Raha misy biraon’ny sampana eo amin’ny tany misy anao, nahoana raha miezaka mitsidika any? Izany no nataon’ny ray aman-drenin’i Mandy sy Bethany. Nentin’izy mivady nitsidika Betela matetika izy mirahavavy tamin’izy ireo mbola kely, na dia 1 500 kilaometatra aza ny dia tsy maintsy natao. Hoy izy mirahavavy: “Nihevitra izahay taloha fa natao ho an’ny antitra ny Betela ary hentitra be ny zava-drehetra ao. Gaga anefa izahay rehefa tonga tany. Nahita tanora miasa mafy ho an’i Jehovah izahay, ary falifaly izy ireo. Tsapanay koa fa hay tsy ny fiangonana tao amin’ny faritra kely nisy anay ihany no atao hoe fandaminan’i Jehovah. Nihanatanjaka ny finoanay isaky ny nitsidika Betela izahay.” Nandrisika an’i Mandy sy Bethany hanao ny asan’ny mpisava lalana ny fandinihana akaiky ny fandaminana. Nasaina hiasa nandritra ny fotoana kelikely tao amin’ny Betela mihitsy aza izy ireo.

Misy fitaovana hafa koa manampy antsika ‘hahita’ ny fandaminan’i Jehovah. Tsy nananan’ny Israelita izy io. Tsy inona izany fa ireo video sy DVD miresaka zavatra samihafa momba ny fandaminana. Anisan’izany ireto: Vavolombelon’i Jehovah—Voalamina mba Hitory ny Vaovao Tsara, Ireo Rahalahintsika Rehetra ao Amin’ny Finoana, Hatrany Amin’ny Faran’ny Tany (frantsay), ary Tafaray Noho ny Fampianaran’Andriamanitra (frantsay). Azo antoka fa hankasitraka kokoa ny rahalahy rehetra eran-tany ianao sy ny fianakavianao, rehefa mahita ny asa mafy ataon’ny Betelita, mpiasa an-tsitrapo manampy tra-boina, misionera, ary ireo rahalahy manomana fivoriambe sy mandamina azy ireny.

Marina fa tena ilaina ny fiangonana tsirairay, satria mitory ny vaovao tsara sy mampahery an’ireo Kristianina eo anivony. Aza hadinoina koa anefa ‘ny rahalahy rehetra ao amin’ny finoana, eran’izao tontolo izao.’ ‘Hanana finoana matanjaka’ foana ianao sy ny fianakavianao, raha manokana fotoana hisaintsainana momba azy ireny. (1 Pet. 5:9) Ho tsapanareo fa manana antony hifaliana ianareo.

[Efajoro/Sary, pejy 18]

Mahaliana ny Mianatra Momba ny Fandaminana

Tianao ve ny hianatra momba ny tantaran’ny fandaminan’i Jehovah sy ny fomba fiasany? Manana fitaovana maro isika hanampiana antsika amin’izany. Misy fanontaniana ireto hanampy anao hanomboka izany fianarana izany:

☞ Ahoana no niandohan’ny asan’ny mpiandraikitra mpitety faritany amin’ny andro ankehitriny?—Vavolombelon’i Jehovah—Mpitory ny Fanjakan’Andriamanitra, pejy 221-227.

☞ Inona no zava-nitranga niavaka tamin’ilay hoe “Andron’ny Ankizy”, tamin’ny fivoriambe tamin’ny 1941?—Vavolombelon’i Jehovah—Mpitory ny Fanjakan’Andriamanitra, pejy 86, 88.

☞ Ahoana no ataon’ny Filan-kevi-pitantanana rehefa hanapa-kevitra?—‘Torio Amin’ny Fomba Feno ny Fanjakan’Andriamanitra’, pejy 108-114.