Valin’ny Fanontanianareo
◼ Ahoana no hamaranana ara-potoana ny Fivoriana Momba ny Fanompoana, rehefa misy zavatra fanampiny mila alamina na taratasy tokony hovakina?
Indraindray dia misy lafin-javatra tsy ampoizina, tsy maintsy ampidirin’ny mpiandraikitra mpitantan-draharaha ho anisan’ny fandaharana. Tsy maintsy vakina, ohatra, ny taratasy ho an’ny fiangonana, avy amin’ny fandaminana. Tsy maintsy dinihina koa ny taratasy avy amin’ny mpiandraikitra ny faritra. Mety hisy fiaraha-midinika na filazana momba ny fanamboarana ny Efitrano Fanjakana, ny fanadiovana azy io, ary ny lafin-javatra hafa. Mety hilaina hampandrenesina koa rehefa misy rahalahy na anabavy marary, na maty. Toy izany koa rehefa misy raharaha sasany momba ny fananarana. Tokony hifarana ara-potoana anefa ny Fivoriana Momba ny Fanompoana. Ahoana àry no ahazoana fotoana hanaovana ireo zavatra ireo?
Mety ho hitan’ny mpiandraikitra mpitantan-draharaha indraindray, fa mila ahena ny faharetan’ireo anjara amin’ny Fivoriana Momba ny Fanompoana. Azony iangaviana ireo rahalahy mba hamintina ny fanazavana ao amin’ny anjarany, ka ho voaresaka ao anatin’ny fotoana fohy kokoa izany. Mazava ho azy fa tokony hampahafantarina aloha be, araka izay azo atao, izy ireo, mba tsy ho amin’ny minitra farany vao hanao fanovana. Azo atao ny manafoana anjara iray manontolo, sy mampiditra izany amin’ny Fivoriana Momba ny Fanompoana any aoriana kokoa. Maningana anefa izany. Tokony hamita ara-potoana ny anjarany ny rahalahy rehetra, mba ho vita ara-potoana ny fivoriana. Ho vita tsara koa amin’izay ny anjara tsirairay.
Tokony hifidy rahalahy mahay mamaky teny tsara ny mpiandraikitra mpitantan-draharaha, rehefa misy taratasy tokony hovakina. Tsara koa raha mamerimberina mamaky an’ilay taratasy io rahalahy io. Tsy ho vita izany, raha aloha kelin’ny hanombohan’ny fivoriana na minitra vitsy alohan’ny anjarany no hanomezana azy ilay taratasy. Tsy ho fantany ny votoatin’ilay izy, ka tsy ho hainy hoe inona no tokony hasongadina.
Omena toromarika, indraindray, ny anti-panahy mba hamaky ilay taratasy, amin’ny Fivoriana Momba ny Fanompoana sy Fianarana Ny Tilikambo Fiambenana manaraka, aorian’ny haharaisany ilay taratasy. Izany dia natao hampahafantarana fa maika ilay taratasy, ka tsy tokony hangataka andro ny anti-panahy. Tsy midika anefa izany fa tsy maintsy hovakina amin’ny fiangonana amin’ny andro haharaisana azy ilay taratasy. Mety ho nalefa paositra mantsy ilay izy, ka aloha kelin’ny hanombohan’ny Fivoriana Momba ny Fanompoana vao voarain’ny mpiandraikitra mpitantan-draharaha. Mila mandinika ny votoatin’ilay taratasy aloha ny mpiandraikitra mpitantan-draharaha, na mety hila handinika azy io miaraka amin’ny anti-panahy hafa, izay vao hanendry mpamaky teny mahay hamaky an’ilay izy. Tokony hofantariny ny halavan’ilay taratasy. Amin’izany no hamaritany izay fotoana ilaina mba hanaovana vakiteny tsara sy mazava. Rehefa mahafantatra ny fotoana ilaina hamakiana ilay taratasy izy, vao ho afaka hamaritra ny fotoana ho an’ny fandaharana sisa. Mety ho amin’ny Fivoriana Momba ny Fanompoana manaraka àry ilay taratasy vao hovakina, ary tsy diso ny anti-panahy raha manao izany.
Raha toy izany no handaminantsika ireo zavatra voalaza teo, dia handray soa amin’ny fanazavana tokony ho azony ny rahalahy, nefa tsy hihoatra ny fivoriana. Tokony hazava sy ho fohy ny fampandrenesana. Tokony ho voaomana tsara foana àry izy ireny, na anti-panahy na mpanampy amin’ny fanompoana no manao azy. Raha arahina tsara ireo toro lalana ireo, dia ho azo antoka fa mety ny fomba ampitana ireo toromarika amin’ny fiangonana, ka handroso amim-piraisan-tsaina ny rehetra.—Sal. 133:1; 1 Kor. 14:8, 9, 40.