Valin’ny Fanontanianareo

◼ Ahoana no hamitana ara-potoana ny anjara tsirairay amin’ny fivorian’ny fiangonana?

Mandeha haingana ny fotoana rehefa miresaka zavatra mampahery amin’ny namana isika. Mety ho sarotra àry ny mamita ara-potoana ireo anjara tsirairay any am-pivoriana. Inona no hanampy antsika hanao izany?

Manomboha ara-potoana. Tsara raha asaina mipetraka ny mpanatrika, iray na roa minitra alohan’ny hanombohan’ny fandaharana. Ho azo atomboka ara-potoana sy amim-pilaminana amin’izay ilay fivoriana. (Mpit. 3:1) Tsy tokony handrasana ireo tara, vao hatomboka ny fivoriana kely kokoa, toy ny fivoriana alohan’ny fanompoana, ohatra.

Manomàna tsara. Ho voahaja ny fotoana, raha manomana aloha be isika. Ataovy mazava tsara ao an-tsainao ny zava-kendren’ilay anjaranao. Fantaro ireo hevi-dehibe, ary asongadino ireny fa aza variana amin’ireo tsipirian-javatra madinika. Tsory ilay famelabelarana. Manaova koa famerenana aloha be, raha misy fampisehoana na fanadinadinana mandritra ilay anjara. Avereno amin’ny feo avo ilay izy, mba hamantarana tsara ny faharetany.

Zarao ho fizarana maromaro ilay anjara. Hanampy anao koa ny fitsinjarana ilay anjara ho fizarana maromaro, na lahateny izy io na fiaraha-midinika amin’ny mpanatrika. Fero ny fotoana atokanao ho an’ny fizarana tsirairay, ary soraty eo amin’ny sisin’ilay taratasy ampiasainao izany. Araho maso ny fandehan’ny fotoana mandritra ilay famelabelarana. Mitandrema koa rehefa fiaraha-midinika, mba tsy hiresaka zavatra be loatra eo am-boalohany, ka voatery hovitaina maimaika ny fandinihana ireo hevi-dehibe atỳ aoriana. Tokony hanokana fotoana ampy, ho an’ny famerenana koa ny mpitarika ny Fianarana Ny Tilikambo Fiambenana. Tokony hitandrina koa izy, mba tsy haka amin’ny fotoana natokana ho an’ny hira sy vavaka famaranana.

Farano ara-potoana. Tokony hanomboka sy hamarana ara-potoana ny anjarany ny mpandahateny tsirairay, raha fivoriana misy anjara maromaro ilay izy, toy ny Fivoriana Momba ny Fanompoana, ohatra. Inona no azo atao raha mihoatra ny fotoana? Afaka mifantoka bebe kokoa amin’ny hevi-dehibe ireo mpandahateny manaraka, ka hanajanona ny tsipirian-javatra sasany. Anisan’ny amantarana ny mpampianatra kinga izany.

Manampy ny mpitarika koa ny mpanatrika, rehefa manome valin-teny fohy sy mazava. Koa afaka mitondra ny anjara birikintsika àry isika rehetra, mba hahatonga ireo fivoriantsika hizotra “amim-pahamendrehana sy amim-pilaminana.”​—1 Kor. 14:40.