Valin’ny Fanontanianareo

◼ Rahoviana isika no tokony hitehaka any amin’ireo fivoriana?

Tena mahay mankasitraka ny Vavolombelon’i Jehovah rehefa manatrika fivoriana. Mahafinaritra fa maniry haneho ny fankasitrahany izy ireo, noho ny ezaka ataon’ny rahalahiny sy ny fandaharana atao eny amin’ny lampihazo. Aseho amin’ny alalan’ny tehaka izany fankasitrahana izany, any amin’ny tany sasany. Tokony handeha ho azy sy ho avy amin’ny fo anefa ny tehaka. Rehefa misy zavatra miavaka ihany koa matetika vao mitehaka isika, ho fanehoana fankasitrahana. Amin’ireo fandaharana manokana any amin’ny fivoriamben’ny faritra na ny vondrom-paritra àry, dia mitehaka ny mpanatrika indraindray eny anelanelan’ny lahateny, fa tsy amin’ny faran’ny lahateny ihany. Nanokana fotoana sy ezaka fanampiny mantsy ireo rahalahintsika mba hanaovana ny anjarany. Mety koa raha mitehaka isika aorian’ny fanadinadinana na fampisehoana, mandritra ny fivoriambe.

Na dia mandritra ny lahateny aza, dia mety hametraka fanontaniana toy izao ilay mpandahateny: “Tsy miaiky ve ianareo fa manana ny fahamarinana isika?”; na koa hoe: “Tsy velom-pankasitrahana ve isika noho ny fandaminan’i Jehovah sy izay omeny antsika?” Tokony hitehaka mihitsy isika amin’izay, na dia eny anelanelan’ny lahateny aza! Hevero izay nitranga tamin’ny Fivoriambe Iraisam-pirenena tamin’ny 1969 hoe “Fiadanana Ambonin’ny Tany.” Olona 492 310 no nandre ilay fanambarana nanetriketrika momba ny fanantenana fiadanana ho an’ny tany, avy ao amin’ny Soratra Masina. Tena nankasitraka izany ny mpanatrika, ka nitehaka imbetsaka teny anelanelan’ilay lahateny.

Mihatra koa ve anefa izany any amin’ny Efitrano Fanjakana? Mazava ho azy fa tsy voarara ny mitehaka raha mandeha ho azy ilay izy, sady vokatry ny fankasitrahana amin’ny fo manontolo. Amin’ny ankapobeny anefa, dia tsy mitehaka isika amin’ireo anjara amin’ny Sekolin’ny Fanompoana sy ny Fivoriana Momba ny Fanompoana, satria mety hanjary ho fahazarana fotsiny izany, ka tsy tena hisy heviny intsony.

Azontsika rehetra aseho amin’ny fomba hafa anefa hoe tena ankasitrahantsika ny ezaka ataon’ireo manana anjara ao amin’ny Efitrano Fanjakana. Afaka mihaino tsara isika, ka mijery ny mpandray anjara sady mampiseho amin’ny endritsika hoe tena liana. Asehontsika amin’izany koa fa manaraka ny hevitra lazainy isika, sady mandray soa avy amin’izany. Azontsika atao koa ny miresaka mivantana amin’ilay nanana anjara aorian’ny fivoriana, ka milaza aminy fa nahafinaritra antsika ny anjarany.