Valin’ny Fanontanianareo

◼ Tokony hanazava ilay fandaharana momba ny fanomezana an-tsitrapo ve isika rehefa mitory an-telefaonina?

Raha miresaka mivantana amin’ny olona itoriantsika isika, dia azo atao ny manazava hoe tohanana tanteraka amin’ny fanomezana an-tsitrapo ny asa fampianarana Baiboly maneran-tany ataon’ny Vavolombelon’i Jehovah, ary raisintsika an-tanan-droa ny fanomezana toy izany. Tsy tokony hiresaka momba an’io fanomezana io anefa isika rehefa mitory an-telefaonina, sao dia heverin’ny olona hoe fangataham-bola an-telefaonina izany. Tsy natao hitadiavam-bola mihitsy ny asan’ny Vavolombelon’i Jehovah.—2 Kor. 2:17.

◼ Inona no tokony hatao rehefa mitory an-telefaonina, ka misy milaza hoe tsy tiany hiantso azy intsony ny Vavolombelon’i Jehovah?

Tokony hohajaina ny fanirian’ilay olona. Tokony hosoratana amin’ny taratasy miaraka amin’ny sarin’ilay faritany ny anaran’ilay olona sy ny nomeraon-telefaoniny ary ny daty nilazany izany, mba tsy hisy mpitory hiantso azy intsony amin’ny manaraka. Averina hodinihina isan-taona ny lisitr’ireo olona nangataka tsy hantsoina intsony. Hisy mpitory za-draharaha sy malina hasain’ny mpiandraikitra ny fanompoana hiantso an’ireny olona ireny, mba hahalalana raha efa niova hevitra izy ireo.—Jereo ny Valin’ny Fanontanianareo ao amin’ny Fanompoantsika Ilay Fanjakana Jona 1994.