Fomba fampiseho ny vaovao tsara—Miaraka amin’ny fianakaviana
1 Ny fianakaviana izay manao be indrindra eo amin’ny fanompoana masina, izany hoe ny ray sy ny reny ary ny ankizy izay manompo an’Andriamanitra amin’ny fony rehetra, dia midera ny anaran’i Jehovah lehibe. Faly isika fa misy fianakaviana be dia be karazan’izany amin’ireo kongregasionan’ny vahoakan’i Jehovah manerana ny tany manontolo.
2 Mazava ho azy fa ny ray no manana andraikitra voalohany hiahy izay ilain’ny fianakaviany eo amin’ny ara-panahy (1 Kor. 11:3). Afaka mampihatra fitaomana mahery eo amin’ny hafa ny fianakaviany, noho ny fiaraha-miasan-dravehivavy vadiny sy ny zanany (Matio 5:16). Eo amin’ny lafiny inona avy no mety hahitana izany fiaraha-miasa izany?
Manome ohatra ny ray aman-dreny
3 Amin’ny ankamaroan’ny toe-javatra, dia loholona na mpikarakara momba ny asa ny ray. Midika izany fa ambonin’ny fanomezany fotoana sy fiheverana ho an’ny tombontsoan’ny fianakaviany, dia tsy maintsy manokana amin’izany koa izy ho an’ny raharahan’ny kongregasiona. Ny andraikitry ny ray dia miahy mba hizarana tsara ny fotoana ananany mba tsy hanaovana tsirambina ny fianakaviany. Tsy mora foana akory izany raha toa ka voatana mafy amin’ny raharahany izy sy raha voafetra ny fotoanany. Kanefa, noho izy tompon’andraikitra amin’ny fianakaviany alohan’ny zavatra rehetra, dia tokony hanokana tsy tapaka tapany amin’ny fotoanany sarobidy izy mba hianarana, hitoriana, hanatrehana ireo fivoriana sy hialana voly araka ny mety miaraka amin’ny fianakaviany. Na dia manova izany fandaharana izany aza indraindray ny toe-javatra miseho sy ny zavatra tsy maintsy hatao hafa, dia tena zava-dehibe ny handaniany fotoana isam-bolana hitoriana miaraka amin’ny ankohonany.
4 Tena ilaina ny fiaraha-miasan’ny vehivavy. Azony atao tsara tokoa ny mameno ny andraikitry ny vadiny, amin’ny fanampiana azy hampiofana ny ankizy eo amin’ny fanompoana. Ho sarobidy ny oha-pahazotoana sy fifikirana amin’Andriamanitra ananany mba hampitomboana ao amin’ny ankizy ny fitiavana ny fanompoana.—2 Tim. 3:14, 15.
5 Ho azo atao ny mitanisa toe-javatra maro izay ny anankiray amin’ny ray aman-dreny irery no miantsoroka ny andraikitra amin’ny zavatra ara-panahy sy namolavola tamim-pahombiazana ny zanany teo amin’ny fanompoana. Noho ny ohatra tsara dia tsara nomen’ny reniny na ny rainy, dia tanora maro be no niandany tamim-pahatokiana tamin’ny fahamarinana ary nanomboka ny fanompoana manontolo andro mihitsy aza.
Ny andraikitry ny ankizy
6 inona no andraikitry ny ankizy? Na dia Jesosy Zanak’Andriamanitra tanteraka aza, dia nanaiky ny fitarihana sy ny toromariky ny ray aman-dreniny, fony izy mbola ankizy (Lioka 2:51). Noho izany, rehefa manomana ny handanian’ny fianakaviana fotoana miaraka eo amin’ny fanompoana ny ray sy ny reny, dia manana adidy haneho fifikirana amin’Andriamanitra ny ankizy amin’ny fiaraha-miasa amin’ny ray aman-dreniny.—Efes. 6:1-3.
7 Mihamafy ny fatoram-pitiavana sy ny firaisan-tsaina ao anatin’ny faritry ny fianakaviana rehefa manompo an’Andriamanitra miaraka amin’ny fianakaviana ny tena—amin’ny fianarana sy amin’ny fitoriana ary amin’ny fanatrehana ireo fivoriana. Samy manana ny anjara andraikiny amin’izany ny ray aman-dreny sy ny ankizy.