Ampiasao ny Baiboly eny amin’ny saha fitoriana
1 Ireo teny ara-tsindrimandry ao amin’ny Baiboly dia mety hisy vokany maharitra eo amin’ny olona. Noho io antony io, ireo kristiana tamin’ny taonjato voalohany dia nampiasa tamim-pahombiazana ny Soratra masina rehefa nitory ny vaovao tsara. Paoly dia ‘nanjohy hevitra avy ao amin’ny Soratra masina’, nanazava ary nanamarina ny heviny tamin’ireo andinin-teny. (Asan’ny apostoly 17:2, 3, MN) Apolosy, rehefa nanao fanambarana tamin’ireo Jiosy, dia ‘nandresy lahatra ny Jiosy tamin’ny alalan’ny Soratra Masina fa Jesosy no Kristy.’ — Asan’ny apostoly 18:24-28.
2 Manaraka io ohatra io koa ny Vavolombelon’i Jehovah amin’izao andro izao. Toy izao no voalaza mazava ao amin’ny Ny Tilikambo Fiambenana tamin’ny 1 Jona 1986 eo amin’ny pejy faha-26, “Rehefa mandray anjara amin’ny fanompoana ampahibemaso izy ireo, dia iriny ny hahatakaran’ny olona fa ny hafatra torin’izy ireo dia tsy avy amin’ny fiheveran’ny tenany ihany fa ny an’ny Tenin’Andriamanitra. Noho izany dia mampiasa mivantana ny Baiboly izy ireo, amakiany andininy avy ao mihitsy amin’ny olona isaky ny azo atao.” Moa ve ianao mampiasa amin’ny fomba feno ny Baiboly eo amin’ny fanompoanao?
NAHOANA NO MANDAITRA IZANY
3 Nahoana no mandaitra ny Baiboly? Satria Tenin’Andriamanitra izy io ary ‘mahay mamantatra ny eritreritra sy ny fisainan’ny fo’. (Hebreo 4:12) Fantatra ny antony manosika marina ny tsirairay rehefa alan’ny fahamarinana ao amin’ny Soratra masina sarona. Ireo olona mahitsy fo dia voataonany. Ohatra, ny mpivady tanora iray izay nanao fandrosoana haingana tamin’ny fanompoana an’i Jehovah dia nanontaniana hoe nahoana izy ireo no nankasitraka avy hatrany tahaka izany ny vaovao tsara. Inona no navalin’izy ireo? “Satria ny Baiboly izany”. Rehefa nisarika mivantana ny sain’izy ireo ho ao amin’ny Baiboly ireo mpitory roa, dia fantatr’izy ireo ny feon’ilay “Mpiandry Tsara”. — Jaona 10:14; wMG 15 Desambra 78, pejy faha-12, 13.
4 Mahatsapa ho tsy ampy fahaizana amin’ny fampiasana ny Baibolinao ve ianao eny amin’ny saha fitoriana? Ny fandaharam-pianarana manokana tsara, anisan’izany ny fanomanana sy fanatrehana ireo fivoriana rehetra, dia hanolotra anao izay ilaina ho amin’ny asa tsara rehetra ary hanome toky anao bebe kokoa. (2 Timoty 3:16,17) Ireo namana miaraka mitory sy ireo mpikambana ao amin’ny fianakaviana dia azo iaraha-manao fanazaran-tena hampiharana ny foto-dresaka. Ny ankabeazan’ireo fampidiran-dresaka ao amin’ny pejy faha-9-15 ao amin’ny boky Comment raisonner koa dia mahatonga hamaky aloha ny Soratra Masina eo amin’ny resadresaka. Nahoana no tsy mampihatra ny sasantsasany amin’izy ireo? Ampiasao izay azo ampiasaina ary hazony ny fahalianan’ny olona ao amin’ny faritaninao.
MAMPIASÀ FAHAIZA-MITSARA ZAVATRA
5 Misy fotoana izay haniriantsika ny hanasa ilay tompon-trano mba handray ny Baiboliny manokana sy hitady ilay andinin-teny miaraka amintsika. Mampias fahaiza-mitsara zavatra amin’ny toe-javatra toy izany. (Jereo ny boky Comment raisonner, pejy faha-60, fehintsoratra faha-3, sy ny pejy faha-441, fehintsoratra faha-2). Rehefa fohy ny fotoana, dia mety hanapa-kevitra isika ny hamaky iray monja amin’ny andinin-teny ao amin’ny foto-dresaka. Na rehefa tena sahirana ilay tompon-trano, dia azo atao ny manonona fehezanteny tsotra mifanentana aminy, ampahafantaro an’ilay tompon-trano fa avy ao amin’ny Baiboly izany. I Jesosy sy ireo apostoly dia tsy nanana manokana ny kopian’ny Soratra hebreo nentiny niaraka taminy rehefa nitory izy ireo. Kanefa dia nanonona maro be avy amin’izany izy ireo. Isika koa dia tokony hanao fiezahana mba hitadidy andininy ao amin’ny Soratra Masina, hihazona izany ao an-tsaina mba hampiasaina amin’ny fanompoantsika.
6 Nampirisika an’i Timoty mba ‘hizara tsara ny teny fahamarinana’ i Paoly. (2 Tim. 2:15) Io fananarana io dia mihatra amintsika amin’izao andro izao. Irintsika ny hanahaka an’i Jesosy sy ireo apostoly amin’ny fampiasana matetika ny Baiboly eo amin’ny asa fanompoantsika. Mamakia teny avy ao amin’izany raha vao azo atao, kanefa rehefa ilaina, dia manonna izany avy ao an-tsaina. Ny fanaovantsika izany amin’ny fomba mandaitra dia hampiseho mazava tsara fa isika dia minisitr’Andriamanitra ary ny hafatra entintsika dia miorina mafy amin’ny Teniny.