Afaka ny ho mpitory maharitra mpanampy ve ianao?

¹ Nampirisika ny mpanara-dia azy mba hanolotra maimaimpoana ny fanampiany eo amin’ny fanompoana i Jesosy, ary nanome toky azy ireo fa ny fanarahana io lalana io dia hitondra fahasambarana sy fitahiana ara-panahy maro ho azy ireo. (Matio 10:8b; Asan’ny apostoly 20:35). Tamin’ny volana Aprily tamin’ny herintaona dia nisy 212 nahatsapa mivantana ireo fifaliana azo avy tamin’ny fampitomboana ny fanompoany tamin’ny fanaovana ny asan’ny mpitory maharitra mpanampy. Moa ve ianao afaka ny hahazo ireo fitahiana ireo koa amin’ity taona ity amin’ny fandraisana anjara amin’ny asan’ny mpitory maharitra mpanampy mandritra ny volana Martsa na ny volana Aprily na mandritra ireo volana roa ireo angamba? — Sal. 34:8.

² Diniho ny toerana misy anao: Eo am-pandinihanao ireo fitantarana voatonona eto ambany, dia manontania tena toy izao: ‘Mahita ny tenako ao amin’ny iray amin’ireo ohatra ireo ve aho? Ahoana no hahavitako ireo fanamboarana ilaina mba hahafahako hanao ny asan’ny mpitory maharitra mpanampy?’

³ Ny anabavy iray dia afaka nanao ny asan’ny mpitory maharitra mpanampy na dia manan-janaka dimy sy asa ivelan’ny fivavahana aza izy. Nanao ahoana ny valisoa azony? Nanome azy fanohanana faran’izay tsara ny vady aman-janany, ary ho vokatry ny ohatra tsaran’ilay anabavy, dia voatosika ho tonga mpitory tsy vita batisa ny vadiny ny volana nanaraka.

⁴ Tao amin’ny kongregasiona iray, dia nanao ny asan’ny mpitory maharitra mpanampy nandritra ny volana iray ireo loholona sy mpikarakara momba ny asa rehetra. Nanana asa ivelan’ny fivavahana ny ankamaroan’izy ireo, fa nandritra ireo faran’ny herinandro kosa, dia voatanan’ireo asa ara-panahy aoka izany. Ny fitarihan-dalana tsara dia tsara nomen’izy ireo teo amin’ny fitoriana sy fandaminana ny asa fanompoana dia nitondra soa ho an’ny kongregasiona iray manontolo. Tamin’ireo mpitory 77, dia nisy 73 nandray anjara tamin’ny endriny iray na hafa amin’ny fanompoan’ny mpitory maharitra, tamin’io volana io.

⁵ Ny ankizivavy 15 taona mbola mianatra iray dia nampiasa ny fotoam-pialan-tsasatra naharitra tapa-bolana nananany tamin’ny lohataona mba hanaovana ny asan’ny mpitory maharitra mpanampy, ka hoy izy hoe: “Tena mahita fahasamihafana mihitsy aho, indrindra fa fihatsarana eo amin’ny firesahana. Afaka niresaka betsaka kokoa niaraka tamin’ny olona teo am-baravarany aho.”

⁶ Ireo izay efa misotro ronono amin’ny raharaha ivelan’ny fivavahana matetika dia manana fahafahana faran’izay tsara mba hikatsahana ireo tombontsoan’ilay Fanjakana. Taorian’ny nahafatesan’ny vadiny, ny anabavy iray 84 taona dia nanoratra toy izao: “Samy efa lehibe sy manambady aman-janaka avokoa ny zanako rehetra. Tsy hoe tsy niraharaha ahy akory izy ireo, nefa tsy naharesy ny fahatsiarovana famoizana sy ny fahatsapana ho manirery ny fitsidihan’izy ireo. Tamin’izay, dia nanipy hevitra tamiko mba hanandramako hanao ny asan’ny mpitory maharitra mpanampy ny iray tamin’ireo loholona tao amin’ny kongregasionanay. Nisalasala aho, nefa tamin’ny farany, dia nanapa-kevitra ny hanandrana hanao izany ihany. Fifaliana toy inona ny ahy! Tsapako fa navelan’i Jehovah hiaina hatramin’izao taonako izao aho mba hahafahako hanao ny asan’ny mpitory maharitra mpanampy. Hatramin’izay aho dia nanohy ny asan’ny mpitory maharitra mpanampy isam-bolana.”

⁷ Ny rahalahy iray mpivarotra tany sy trano dia nanamboatra ny fandaharam-potoanany hampisehoany ireo trano amin’ny mpividy mba hahazoana fotoana hanaovana ny asan’ny mpitory maharitra mpanampy. Ny hafa dia nanamboatra ny asany toy izany koa mba hahazoana fotoana hampitomboana ny fanompoany amin’izany fomba izany.

⁸ Sorito dieny izao ireo fandaharam-potoananao: Nahoana ianao raha manoritra fandaharam-potoana hentitra dieny izao mba hanaovana ny asan’ny mpitory maharitra mpanampy amin’ny volana Martsa sy Aprily? Mba hahombiazana, dia ilaina ny fanoritana fandaharam-potoana amim-pitandremana. Izany dia miharihary avy amin’ny fanandraman-javatr’ireo izay afaka nanao ny asan’ny mpitory maharitra mpanampy na dia nanana andraikitra ara-pianakaviana, asa ivelan’ny fivavahana manontolo andro sy adidy araka ny Soratra masina hafa aza. Miresaha amin’ireo izay nanao ny asan’ny mpitory maharitra tamim-pahombiazana mba handraisan-tsoa avy amin’ny fanandraman-javatra hitan’izy ireo. Ary manatòna an’i Jehovah amin’ny vavaka koa ka mangataha ny fanampiany. — Isaia 40:29-31; Jak. 1:5.

⁹ Tsy misy iadian-kevitra mihitsy fa maro ny fifalian’ireo izay manamboatra ny raharahany mba hanompoana amin’ny maha-mpitory maharitra mpanampy. Raha mbola tsy ao amin’ny fanompoana manontolo andro ianao, dia azonao atao ve ny hahazo io tombontsoa io? Raha manao ny fiezahana ilaina mba hanitarana ny tombontsoanao hizara ny vaovao tsara amin’ny hafa ianao, dia azo antoka fa handrotsaka fitahiana tondraka aminao i Jehovah. — Mal. 3:10.